Skip to content

Skip to table of contents

Heepi dee „woto köndë sëmbë” u de „dini Jehovah ku piizii”

Heepi dee „woto köndë sëmbë” u de „dini Jehovah ku piizii”

„Jehovah ta tjubi dee woto köndë sëmbë dee ta libi a dee sëmbë fëën mindi.”—PSALÖM 146:9.

KANDA: 84, 73

1, 2. (a) Andi ta miti so u dee baaa ku dee sisa fuu? (b) Un hakisi nama ku di soni aki?

WAN baaa de kai Lije bi taki taa: „Di dee sëmbë u di köndë Bulundi bi ta feti ku deseei, nöö di famii fuu bi dë a wan keling-komakandi. U bi ta si fa sëmbë bi ta kule fanjanfanjan, ta suti goni. Mi ku mi mama ku mi tata ku dee 11 baaa ku sisa u mi, bi fusi go u de an kii u. Wantu koosu lai dee u bi lai a saku fuu tja nöö u bi tei. So fuu bi dou a wan kampu a Malaawi, di de bi seti da sëmbë di bi fusi kumutu a de köndë. Möön leki 1600 kilomëti de bi musu waka u de dou ala. Ma so fuu bi paaja go a woto kamian.”

2 A hii di goonliba, möön leki 65 milion sëmbë bi musu fusi kumutu a di köndë u de, u di gaan feti bi dë a di köndë u de, nasö u di sëmbë bi ta du ku de. Fosu pasi sëmbë bi fusi kumutu a de köndë sö. Dusudusu u dee sëmbë aki da Jehovah Kotoigi. Sömëni u de bi lasi hii soni di de bi abi, söseei sëmbë u de bi dëdë tu. Un woto soni bi ta taanga da dee sëmbë aki? Unfa u sa heepi dee baaa ku dee sisa fuu u de dini Jehovah, söseei u de ta dë waiwai te dee lö fuka aki ta miti de? (Psalöm 100:2)  Nöö andi da di möön bunu fasi fa u sa peleiki da dee sëmbë dee fusi kumutu a de köndë di an sabi Jehovah jeti?

DI LIBI U WAN SËMBË DI FUSI KUMUTU A DI KÖNDË FËËN

3. Unfa a bi du ko taa Jesosi ku sömëni u dee bakama fëën bi musu fusi kumutu a di köndë u de?

3 Jesosi ku hën mama ku hën tata bi musu fusi go a Egepiti baka di wan ëngëli u Jehovah bi ko piki Josëfu taa Könu Helodi kë kii Jesosi. De bi dë a Egepiti u te kuma Helodi bi ko dëdë (Mateosi 2:13, 14, 19-21). Baka sömëni jaa, hën dee bakama u Jesosi bi „paaja go a kamiankamian. So u de go a dee oto köndë u Judea, so u de go a Samalia” (Tjabukama 8:1). Jesosi bi sabi taa sëmbë bi o du ku sömëni u dee bakama fëën u de kumutu a di köndë u de. A bi taki taa: „Te un go a wan köndë nöö te de ta toobi unu tumisi, nöö un kule kumutu dë go a oto köndë e” (Mateosi 10:23). Hii juu a ta dë wan taanga soni u fusi kumutu a di köndë fuu.

4, 5. Un hogi soni ta pasa (a) te sëmbë ta fusi go disa di köndë u de? (b) te de dë a di lowema kampu?

4 Dee sëmbë dee ta fusi kumutu a di köndë u de, ku dee sëmbë dee ta libi a wan lowema kampu ta miti peipei soni. Di piki baaa u Lije de kai Gad, bi taki taa: „U bi waka sömëni wiki longi, nöö u bi ta si höndöhöndö dëdë sëmbë a di pasi liba. Mi bi abi 12 jaa, nöö mi futu bi soi tee, hën mi piki dee sëmbë u mi taa de sa go disa mi. Ma mi tata an bi kë go disa mi u de feni mi kii. Fëën mbei a bi heepi mi. Hiniwan daka u bi ta begi Jehovah, söseei u bi ta buta futoou nëën. So juu manjan wanwan u bi ta feni u njan di u bi dë a pasi nango.”—Filipi 4:12, 13.

5 Gaansë u dee famii u Lije bi libi sömëni jaa longi a dee lowema kampu. Ma sëmbë bi ta libi peipei libi a dee kampu aki tu. Lije dë wan keling-gaanwomi nöunöu, nöö a taki taa: „Gaansë u dee sëmbë an bi abi wooko. De bi ta taki sëmbë soni, de bi ta bebe dööngö, de bi ta pëë möni pëë, de bi ta fufuu, söseei de bi ta libi fanafiti a di së u manu ku mujëë tu.” Hii juu dee Kotoigi bi musu ta du soni di nama ku di kemeente, ee de an bi kë go ta libi dee lö libi aki (Hebelejën 6:11, 12; 10:24, 25). De bi ta du soni u ko taanga a di biibi, nöö gaansë u de bi bigi ta du di pioniliwooko. De bi ta mëni deseei taa wan daka de bi o kumutu a di lowema kampu, leti kumafa dee Isaëli sëmbë bi kumutu a di sabana. Di soni aki bi ta heepi de u de hoi dou.—2 Kolenti 4:18.

LEI TAA I LOBI DEE SËMBË DEE FUSI KUMUTU A DI KÖNDË U DE

6, 7. Konda unfa di „lobi Masa Gadu” lobi u ta mbei u libi ku dee baaa ku dee sisa fuu.

6 Di „lobi Masa Gadu” lobi u, mbei u ta lei taa u lobi dee baaa ku dee sisa fuu, möönmöön te di libi ta taanga da de. (Lesi 1 Johanisi 3:17, 18.) Di dee fesiten Keesitu sëmbë u Judea bi abi soni u njan fanöudu u di hangi pena bi dë a di köndë, hën di kemeente bi seeka soni u heepi de (Tjabukama 11:28, 29). Apösutu Paulosu ku Petuisi seei bi da dee Keesitu sëmbë taanga u tei wotowan ku wai a de wosu (Loomë 12:13; 1 Petuisi 4:9). Wë u di de piki u kuma Keesitu sëmbë taa u musu libi bunu ku dee baaa ku dee sisa fuu dee kumutu a wan woto kamian, mbei u musu ta libi bunu ku dee baaa ku dee sisa fuu dee fuka ta miti, nasö di sëmbë ta du ku de u di biibi u de hedi! * (Luku di pisi a basu.)—Lesi Nöngö 3:27.

 7 A dee jaa dee pasa, dusudusu Jehovah Kotoigi bi musu fusi go a wan woto kamian u di gaan feti bi dë a di köndë Ukalaini, söseei u di de bi ta du ku de. A tjali taa de bi kii so u de. Ma woto baaa ku sisa di bi ta libi a dee woto pisi u Ukalaini ku di Losiaköndë, bi tei gaansë u dee baaa ku dee sisa aki a de wosu. Dee baaa ku dee sisa u dee tu köndë aki an bi tei së a politiki soni u di köndë, u di de an bi „dë ku de a wan së”, ma de bi dë seei fajafaja „ta tja di buka u Masa Jesosi ta paaja tu a dee köndëköndë nöömö”.—Johanisi 15:19; Tjabukama 8:4.

HEEPI DEE SËMBË DEE FUSI KUMUTU A DI KÖNDË U DE U KO ABI WAN TAANGA BIIBI

8, 9. (a) Un bookohedi dee sëmbë dee fusi kumutu a di köndë u de ta abi a di njunjun köndë ka de go? (b) Faandi mbei u musu abi pasensi ku de?

8 So u dee sëmbë di fusi kumutu ka de bi ta libi, nango libi a wan woto pisi u di köndë u de. Ma sömëni u de musu fusi go a wan woto köndë di de an sabi. A dë sö tuu taa lanti ta da dee sëmbë aki soni u njan, soni u bisi, ku wan kamian u libi, ma tökuseei de ta abi woto bookohedi. Kandë dee soni di de ta feni u njan tooka ku dee soni di de bi guwenti. So u dee sëmbë aki di kumutu a wan kendi köndë an ta sabi andi de musu bisi te di wei kötö. Kandë di fosu pasi so u de o wooko ku soni kuma ëisikasi, wasimasini, teefei, ku woto soni.

9 So u dee tiima seti soni u heepi dee sëmbë dee fusi kumutu a de köndë u de sa libi a di njunjun köndë ka de dë. Ma möön gaanfa dee tiima ta kë taa dee sëmbë aki musu sa sölugu deseei baka wantu liba. Di soni aki sa dë wan taanga soni seei. Pakisei hii dee soni di de musu ko sabi. De musu ko sabi wan njunjun töngö, wan njunjun fasi u libi, de musu hoi deseei a dee njunjun wëti di nama ku di paka di de musu ta paka dee kösutu u de, de musu ta paka lanti möni, de musu buta dee mii u de a siköö, söseei de musu sabi unfa de musu kiija miii a di köndë dë! U musu abi pasensi da dee baaa ku dee sisa fuu aki, nöö u musu heepi de a wan lesipeki fasi u de ko saanfa u libi ku dee bookohedi aki.—Filipi 2:3, 4.

10. Unfa u sa heepi dee baaa ku dee sisa fuu di fusi kumutu a di köndë u de, u di biibi u de ko möön taanga? (Luku di peentje a bigi u di woto.)

10 So u dee tiima ta mbei a taanga da dee baaa ku dee sisa fuu dee fusi kumutu a wan woto köndë u de feni dee komakandi kamian. So u dee tiima ta taki taa de an o heepi dee baaa ku dee sisa fuu möön. So juu de ta hakisi dee baaa ku dee sisa fuu u tei wan wooko di o tapa de u go a dee komakandi, nöö ee de an kë tei di wooko, nöö de ta piki de taa de an o da de pasi u libi a di köndë. U di so u de bi ta fëëë, söseei u di so u de an bi a’ saanfa-u-du u deseei, mbei de bi tei di wooko. Fëën mbei te dee baaa ku dee sisa fuu fusi kumutu a di köndë u de ko a di köndë fuu, nöö u musu biinga hesihesi go heepi de. De musu si taa u ta booko u hedi ku de. Te u ta du di soni aki, söseei te u ta heepi de a woto fasi tu, nöö di soni aki sa mbei di biibi u de ko möön taanga.—Nöngö 12:25; 17:17.

DU SONI DA DEE SËMBË DEE FUSI KUMUTU A DI KÖNDË U DE

11. (a) Andi da di fosu soni di dee sëmbë di fusi kumutu a di köndë u de ta abi fanöudu? (b) Unfa de sa lei taa de ta tei soni u bigi?

11 Di fosu soni di u sa du, hën da u sa da dee baaa ku dee sisa fuu aki soni u njan, soni  u bisi, nasö woto soni di de abi fanöudu. * (Luku di pisi a basu.) Aluwasi wan dasi seei u tei fuu da wan baaa, tökuseei a de wan gaan soni. Ma dee baaa ku sisa aki musu tei dee soni aki u bigi tu. De an musu si kuma dee baaa ku dee sisa bi musu u du möön soni da de. Di soni aki o mbei taa dee baaa ku dee sisa dee ta da de soni o ta dë waiwai. Ma tökuseei dee baaa ku sisa di fusi go libi a wan woto köndë musu mbei möiti u sölugu deseei. Te de du sö, nöö a o heepi de u de abi lesipeki da deseei, söseei u de sa ta libi fiifii ku dee woto baaa ku sisa u di köndë (2 Tesalonika 3:7-10). Tökuseei u musu heepi dee baaa ku dee sisa fuu dee fusi ko libi a di köndë fuu.

Unfa u sa heepi dee baaa ku dee sisa fuu dee fusi kumutu a de köndë? (Luku palaklafu 11-13)

12, 13. (a) Unfa u sa heepi dee sëmbë dee fusi kumutu a de köndë? (b) Konda unfa wanlö gaanwomi bi heepi fö njönkuwan di bi fusi kumutu a de köndë.

12 Wa abi hia möni fanöudu fuu heepi dee sëmbë aki. Di soni di de möön abi fanöudu, hën da di ten fuu, söseei di lei di woo ta lei taa u lobi de. Kandë i sa lei de unfa de sa tei besi a di köndë, nasö unfa de sa bai bumbuu soni u njan di an dii poi. Söseei i sa piki de ka de sa bai soni kuma masini u nai soni, nasö masini u koti kamian, sö taa de sa ta wooko ku de u feni wan piki möni. Möön gaanfa i sa heepi de u de fii bunu a di njunjun kemeente u de. Kandë i sa ta tja de ku  wagi go a dee komakandi. I sa konda da de tu unfa de musu peleiki da sëmbë u di pisiwata dë, söseei i sa wooko ku de a di peleikiwooko.

13 Di fö njönkuwan di bi fusi kumutu a de köndë, bi dou a wan kemeente, hën wanlö gaanwomi bi heepi de. De bi lei de unfa de sa lëi wagi, unfa de musu sikifi wan biifi, söseei unfa de sa suku wan wooko. De bi heepi de tu u de seti wan skeima, sö taa de bi sa ta buta di dini u Jehovah a di fosu kamian a de libi (Galasia 6:10). Te u kaba fëën, hën hii dee fö njönkuwan aki ko ta du di pioniliwooko. U di dee gaanwomi bi heepi de, söseei u di deseei bi mbei möiti u buta maaka di de kë dou a di dini u Jehovah, mbei de bi go a fesi a di biibi, söseei de an bi ko dë kuma dee sëmbë u di goonliba u Saatan.

14. (a) Ku andi dee sëmbë dee fusi kumutu a di köndë u de musu ta köni? (b) Konda wan woto.

14 Leti kumafa hii Keesitu sëmbë musu ta köni be de an kule a gudu baka, sö nöö dee sëmbë dee fusi kumutu a di köndë u de musu köni ku di soni aki sö tu. De musu ta buta di dë di de ku Jehovah dë mati a di fosu kamian a de libi. * (Luku di pisi a basu.) Lije, di u bi taki fëën kaa, ku dee baaa ku dee sisa fëën, ta mëni unfa de tata bi ta lei de fanöudu soni di nama ku di biibi u de di de bi ta fusi kumutu a di köndë u de. De taki taa: „Wanwan-fu-wan a bi ta tuwë dee soni dee u bi tja di an bi dë fanöudu. Te u kaba fëën, a hopo di tasi a liba söndö soni a dendu, hën a lafu, hën a taki taa: ’Wan si ö? Di soni aki nöö un abi fanöudu!’”—Lesi 1 Timoteo 6:8.

HEEPI DEE SËMBË DEE FUSI KUMUTU A DE KÖNDË KU DEE SONI DI DE MÖÖN ABI FANÖUDU

15, 16. (a) Unfa u sa heepi dee baaa ku sisa fuu u de ko abi wan taanga biibi? (b) Unfa u sa lei taa u ta booko u hedi ku de?

15 Na soni u njan ku soni u bisi nöö dee sëmbë dee fusi kumutu a de köndë abi fanöudu. U musu ta lei taa u ta booko u hedi ku de, söseei u musu ta da de taanga ku di Bëibel (Mateosi 4:4). Dee gaanwomi sa heepi de u de feni buku a di töngö u de, söseei de sa heepi de u miti baaa ku sisa di ta fan di töngö u de. Di soni aki dë wan fanöudu soni seei, u di dee sëmbë aki bi musu fusi go disa hii soni di de bi guwenti. De ta hangi dee famii u de, di köndë u de, ku di kemeente u de. De musu ta si taa u lobi de kumafa Jehovah lobi de, söseei taa u ta booko u hedi ku de. Ee de an ta si dee soni aki, nöö a sa pasa taa de go suku heepi a dee sëmbë di de ku de kumutu a di wan köndë, ma di an ta dini Jehovah (1 Kolenti 15:33). Te u ta mbei de fii bunu a di kemeente, hën da u ku Jehovah ta wooko makandi u tjubi „dee woto köndë sëmbë”.—Psalöm 146:9.

16 Jesosi ku dee sëmbë fëën an bi sa toona go a wosu, solanga dee sëmbë dee bi kë du ku de bi ta tii jeti. A di ten aki, dee lö soni aki sa mbei taa sëmbë di fusi kumutu a de köndë an sa toona go a de köndë baka. Ma kandë wotowan an kë toona go a de köndë baka. Lije taki taa dee mama ku dee tata dee bi ta si fa de ta kisi sëmbë u de ta duumi ku de ku taanga, söseei fa de bi ta kii sëmbë u de, an bi kë tja dee mii u de go a di köndë u de baka. Ee u kë heepi dee baaa ku dee sisa fuu aki, nöö u ’musu ta fii ku dee otowan fuu ta lobi useei kuma baaa ku baaa. U musu ta  abi tjalihati da u na u, ta libi ku sakafasi’ (1 Petuisi 3:8). Di du di de ta du ku dee sëmbë di fusi kumutu a di köndë u de, mbei de an ta kë hulu woto sëmbë, nöö kandë de ta sen u konda dee bookohedi u de da wotowan, möönmöön ee dee mii u de dë a zuntu. Hakisi iseei di soni aki: ’Unfa mi bi o kë u wotowan libi ku mi ee dee lö soni aki bi miti mi?’—Mateosi 7:12.

TE U TA PELEIKI DA SËMBË DI FUSI KUMUTU A DE KÖNDË

17. Unfa di peleiki di u ta peleiki ta mbei dee sëmbë dee fusi kumutu a de köndë feni kötöhati?

17 Gaansë u dee sëmbë dee ta fusi kumutu a de köndë, ta kumutu a köndë ka de tapa di peleikiwooko. U di dee Kotoigi ta peleiki fajafaja, mbei dusudusu u dee sëmbë aki sa ta jei „di buka u di Njunjun Tii u Gadu” (Mateosi 13:19, 23). Sömëni sëmbë di ’ko wei u dee lai dee de ta tja’ ta feni kötöhati a dee komakandi fuu, nöö de ta taki taa: „Gadu dë a unu mindi tuutuu.”—Mateosi 11:28-30; 1 Kolenti 14:25.

18, 19. Unfa u sa du soni ku köni te u ta peleiki da sëmbë di fusi kumutu a di köndë u de?

18 U musu du soni ku köni, söseei u musu ta dë „wekiweki ta wooko ku fusutan” te u ta peleiki da sëmbë di fusi kumutu a de köndë (Mateosi 10:16; Nöngö 22:3). U musu abi pasensi u haika dee sëmbë aki te de ta fan ku u, ma wa musu go ta da politiki woto ku de. U musu du dee soni di di bëikantoo fuu ta piki u, söseei u musu ta haika dee tiima tu, sö taa wa go du wan soni di sa mbei soni miti u. U di dee sëmbë aki ta kumutu a peipei kamian, söseei u di de ta biibi peipei soni, mbei u musu ko sabi dee soni aki, söseei u musu lesipeki di fasi fa de ta pakisei u soni. A so köndë sëmbë ta pakisei woto fasi u di fasi fa mujëë sëmbë musu ta bisi soni. Fëën mbei te u ta peleiki da de, nöö a bi o bunu fuu bisi a wan fasi di an o mbei de fii wan fasi.

19 U kë heepi dee sëmbë dee abi bookohedi, te kisi dee sëmbë dee an ta dini Jehovah seei tu. Te u ta du sö, nöö u ta djeesi di Samalia womi di Jesosi bi taki a di woto fëën (Lukasi 10:33-37). Di möön bunu fasi fa u sa heepi dee sëmbë aki, hën da te u ta lei de soni u di bunu buka. Wan gaanwomi di bi heepi sömëni u dee sëmbë aki, bi taki taa a dë fanöudu fuu piki de wantewante taa u da Jehovah Kotoigi. U musu piki de taa di fosu soni di u ko du, hën da u heepi de u de ko fusutan dee soni dee sikifi a di Bëibel di nama ku di ten di ta ko, ma wa ko u tja gudu ko da de.

DEE WINI DEE A TA TJA KO

20, 21. (a) Un wini dee sëmbë dee fusi kumutu a de köndë ta feni te u ta lei taa u lobi de tuutuu? (b) Andi woo lei a di woto di ta ko?

20 Te u ta lei taa u lobi „dee woto köndë sëmbë” tuutuu, nöö a ta tja gaan wini ko da de. Wan sisa bi taki taa dee famii fëën bi musu fusi kumutu a di köndë Elitelea, u di de bi ta du hogihati soni ku sëmbë a di köndë. Fö u dee mii fëën bi musu waka söwan aiti daka longi a wan sabana dendu. De waka tee de ko dou a di köndë Sudan. Di sisa taki taa: „Dee baaa ku dee sisa bi libi ku de seei kuma de ku de da famii. De bi da de soni u njan, soni u bisi, wan kamian u libi, söseei de bi ta lëi de go a kamian. Ambë seei bi o tei sëmbë di de an sabi a de wosu u di de ta dini di wan seei Gadu? Wë Jehovah Kotoigi wanwan bi o sa du di soni aki!”—Lesi Johanisi 13:35.

21 Unfa a dë ku dee mii u dee sëmbë aki? A di woto di ta ko, woo lei unfa hii u tuu sa heepi dee famii aki u dini Jehovah ku piizii.

^ pal. 6 Luku di woto „U musu ta libi bunu ku woto köndë sëmbë” di dë a Di Hei Wakitimawosu u tinimu-liba u di jaa 2016 bladsëidë 3-8.

^ pal. 11 Solanga sëmbë fusi kumutu a di köndë u de ko libi a di köndë fuu, nöö dee gaanwomi musu wooko ku dee lai dee sikifi a di buku Wi orga fu du a wani fu Yehovah, kapitë 8 palaklafu 30. Ee dee gaanwomi kë fan ku dee gaanwomi u di kemeente ka di sëmbë fusi kumutu, nöö de sa sikifi wan biifi da di bëikantoo u di köndë u de a jw.org. A di wan seei ten de sa buta hakisi u de ko sabi möön soni u di kemeente u di sëmbë, söseei u de ko sabi ee a ta du di peleikiwooko, sö taa de sa ko sabi unfa hën ku Jehovah dë mati tjika.

^ pal. 14 Luku di woto „Nowan sma kan dini tu masra” ku di woto „Abi deki-ati—Yehovah na yu yepiman!” di dë a di Waktitoren u 15 u piki-deewei-liba u di jaa 2014, bladsëidë 17-26.