Skip to content

Skip to secondary menu

Skip to table of contents

Jehovah Kotoigi

Saamakatöngö

Di Hei Wakitimawosu (u lei soni a komakandi)  |  sebitaa-liba 2017

Di piizii di i ta feni te i ta libi ku dee soni dee i abi fanöudu

Di piizii di i ta feni te i ta libi ku dee soni dee i abi fanöudu

DANIEL KU MIRIAM bi tööu a wajamaka-liba u di jaa 2000, nöö de bi abi wan bunu libi a di foto de kai Barcelona, di dë a Sipanjöluköndë. Daniel taki taa: „Di möni di u bi ta kisi bi ta da u pasi fuu go njan a dee möön bunu njanjan wosu, u bi sa go köi a woto köndë, nöö u bi sa bai dee möön dii bisi. Söseei hii juu u bi nango a di peleikiwooko.” Ma bakaten wan soni ko pasa.

Daniel bi jei di de bi hakisi wan soni a wan könklësi a di jaa 2006. De bi hakisi taa: „U ta du hii soni di u sa du fuu heepi dee sëmbë ’di de ta tja go kii’, u de ko a di pasi di ta tja sëmbë go a teego libi ö?” (Nöngö 24:11) A di taki di de bi hoi de bi taki taa u abi di faantiwöutu u paaja di bosikopu di dë a Bëibel, u di sëmbë sa lasi de libi ee wa du ën (Tjabukama 20:26, 27). Daniel ta toona mëni fa a bi ta fii a di ten dë. A bi taki taa: „Mi bi ta fii taa ku mi Jehovah bi ta fan.” A di taki di de bi hoi, de bi taki tu taa u ta möön dë waiwai te u ta du möön soni a di dini u Jehovah. Daniel bi sabi taa di soni aki bi dë sö tuutuu, u di Miriam bi ta dë waiwai seei di a bi bigi ta du di pioniliwooko.

Di taki di di baaa bi hoi, bi dou Daniel hati gaanfa seei taa a bi taki taa a dou di juu faa tooka soni nëën libi. A bi ta wooko wantu juu nöö, a bi bigi ta du di pioniliwooko, nöö a bi ta pakisei unfa a bi o dë ee hën ku Miriam bi o go heepi a wan kamian ka möön peleikima dë fanöudu.

BIGIBIGI A BI TAANGA, BAKATEN U JEI WAN BUNU BUKA

A sebitaa-liba u di jaa 2007, hën Daniel ku Miriam disa di wooko di de bi ta du, hën de foloisi go libi a Panama, a wan köndë ka de bi go köi kaa. Di pisiwata ka de bi ta peleiki, bi dë wantu paati dee dë a di së u di Caraibische Ze. Gaansë u dee sëmbë a dee paati aki de ta kai Ngabe. Daniel ku Miriam bi si taa de bi o sa dë a Panama söwan aiti liba ku di möni di de bi buta a wan së.

De bi ta tei boto nango a dee peipei paati. Nöö de bi ta lëi baisigi te de bi dou. De ta mëni di fosu pasi di de bi lëi ku baisigi söwan 30 kilomëti ta subi dee kuun, nöö di wei bi kendi gaanfa seei. Daniel bi wei seei taa bëina a kai faau. Ma dee Ngabe sëmbë bi tei de ku wai a de wosu seei, möönmöön u di Daniel ku Miriam bi ko sa’ u taki wantu soni a di töngö u de. An bi tei longi möön, hën de bi ko ta lei 23 sëmbë soni u Bëibel.

Andi bi ko pasa di di möni u de ko kaba? Daniel taki taa: „Ku këë a wojo, u bi bigi ta pakisei fuu toona go a Sipanjöluköndë. A bi ta hati u seei taa u bi o go disa dee sëmbë dee u bi ta lei soni u Bëibel.” Ma baka wan liba, hën de jei wan bunu buka. Miriam taki taa: „De hakisi u fuu du di apaiti pioniliwooko. U bi wai seei taa an bi dë fuu go möön!”

DI SONI DI BI MÖÖN DA DE PIIZII

U di soni bi ko tooka a di ölganisaasi, mbei a di jaa 2015, Daniel ku Miriam bi musu disa di apaiti pioniliwooko. Andi de bi o du? De bi o buta futoou a di paamusi di sikifi a Psalöm 37:5, di ta taki taa: „Be Jehovah tii di libi fii, buta futoou nëën, nöö hënseei o heepi i.” De bi feni wan wooko di bi sa heepi de u de ta du di kowoonu pioniliwooko, nöö nöunöu de dë a wan kemeente a Veraguas, di dë a di köndë Panama.

Daniel taki taa: „Ufö u kumutu a Sipanjöluköndë, nöö wa bi dë seiki ee u bi o sa ta libi söndö dee gudu dee u bi abi. Nöunöu u sa du ën, nöö wa ta makei na wan soni di u abi fanöudu.” Andi da di soni di bi da Daniel ku Miriam möön piizii? De taki taa: „Di möön gaan piizii di wan sëmbë sa feni, hën da te a ta heepi sakafasi sëmbë u de ko sabi Jehovah!”