Skip to content

Skip to table of contents

I dë kabakaba u wakiti ku pasensi ö?

I dë kabakaba u wakiti ku pasensi ö?

„Wan musu lasi hati, ma un musu ta hoi dou.”​—JAKOBOSI 5:8.

KANDA: 114, 79

1, 2. (a) Andi sa mbei u ta hakisi useei: ’Un longi jeti?’ (b) Unfa dee woto u dee dinima u Jehovah fu awooten sa da u kötöhati a di ten aki?

’UN LONGI jeti?’ Di soni aki Jesaaja ku Habaki dee bi dë tjabukama u Gadu bi hakisi ën (Jesaaja 6:11; Habaki 1:2). Di Könu Dafiti bi sikifi Psalöm 13, nöö a bi hakisi Gadu di wan seei soni fö pasi (Psalöm 13:1, 2). Nöö Jesosi Keesitu seei bi hakisi di wan seei soni, di wanlö sëmbë di an bi abi biibi, bi ko nëën (Mateosi 17:17). Kandë u ta hakisi useei di wan seei soni a di ten aki tu.

2 Andi sa mbei u ta hakisi useei: ’Un longi jeti?’ Kandë wan soni miti u nasö kandë wan sëmbë an libi bunu ku u.Nasö kandë u dë ku siki nasö u ta ko gaandi. Kandë u ta booko u hedi u di u ta libi a „dee lasiti daka u di goonliba aki” (2 Timoteo 3:1). Nasö kandë u di sëmbë ta libi hogi, mbei u sa ko wei, nöö u sa lasi hati. Jehovah an bi kuutu dee futuboi fëën di de bi  hakisi ën ee un longi hogi soni bi o ta miti de jeti. Di soni aki sa da u kötöhati a di ten aki tu.

3. Andi sa heepi u te soni ta taanga da u?

3 Andi sa heepi u te a ta taanga da u fuu hoi dou? Gadu bi mbei di baaa u Jesosi de kai Jakobosi sikifi taa: „Ma nöö un dee biibima dë, un musu tai hati fu tefa Masa Jesosi ko puu unu a dee sitaafu fuunu basu e” (Jakobosi 5:7). Fëën mbei hiniwan fuu musu ta wakiti ku pasensi. Ma andi da pasensi? Nöö unfa u sa lei taa u abi pasensi?

ANDI DA PASENSI?

4, 5. (a) Andi da pasensi, nöö unfa u sa lei taa u abi pasensi? (b) Unfa Jakobosi ta heepi u fuu ko fusutan andi da pasensi? (Luku di peentje a bigi u di woto.)

4 Di Bëibel ta piki u taa pasensi da wan fasi di di santa jeje u Gadu ta mbei sëmbë ko abi. Hën da ee Gadu an heepi u, nöö a sa taanga da u kuma zöndu libisëmbë u lei taa u abi pasensi te fuka ta miti u. Pasensi da wan gudu di Gadu ta da sëmbë. Nöö te u ta lei taa u abi pasensi, nöö u ta lei Jehovah ku woto sëmbë taa u lobi de. Ma te wa abi pasensi, nöö di soni dë sa mbei u ku wotowan an dë gaan mati möön (1 Kolenti 13:4; Galasia 5:22). Unfa wan sëmbë ta lei taa a abi pasensi? Wë wan sëmbë ta lei taa a abi pasensi te a ta dë waiwai ta hoi dou hii fa soni ta miti ën (Kolosën 1:11; Jakobosi 1:3, 4). Te u abi pasensi, nöö a ta heepi u fuu hoi useei a Jehovah aluwasi un fuka ta miti u. A ta heepi u fu wa toona du hogi ku wan sëmbë di bi du hogi ku u. Di Bëibel ta piki u taa u musu dë kabakaba u wakiti, te a dë fanöudu. Di soni aki da wan gaan fanöudu soni di u ta lei a Jakobosi 5:7, 8. (Lesi ën.)

5 Faandi mbei u musu dë kabakaba u wakiti u Jehovah du dee soni dee a paamusi u? Di bakama u Jesosi de kai Jakobosi bi tei di pasensi di u musu abi maaka ku di pasensi di wan womi di ta wooko goon ta abi. Hii fa di womi aki ta wooko taanga u paandi soni, tökuseei an sa mbei di tjuba kai, an sa mbei di sonu jabi, söseei an sa mbei dee soni dee a paandi göö möön hesi. A musu ta wakiti ku pasensi „ta tai hati ta luku di tjuba faa kai nasi di alisi”. Sö nöö sömëni soni dë di wa sa tooka a di ten di u dë aki ta wakiti u Jehovah du dee soni dee a paamusi u (Maikusi 13:32, 33; Tjabukama 1:7). Hën da useei musu ta hoi pasensi kuma di womi di ta wooko goon.

6. Andi u sa lei a di woto u di tjubakama u Gadu de kai Mika?

6 Di tjabukama u Gadu de kai Mika seei bi musu hoi dou di soni bi ta taanga dëën, leti kumafa u musu ta hoi dou a di ten aki tu. A bi libi a di pisiten di Könu Akasi bi ta tii. Akasi bi dë wan Könu di bi abi hogihati. Di soni dë bi mbei taa te u kaba fëën, dee sëmbë bi ta du sömëni soni di an bi fiti a di köndë. Soni bi ko hogi sö tee taa di Bëibel taki taa dee sëmbë bi ko „lo’ u du hogihati soni, nöö de [bi] saanfa u du ën tu” (Lesi Mika 7:1-3). Mika bi sabi taa an bi sa tooka di fasi fa dee sëmbë bi ta libi. Wë nöö andi a bi o du? A bi taki taa: „Mi o dë u mi ta wakiti Jehovah. Ku pasensi mi o dë ta wakiti di Gadu u mi di o heepi mi. Di Gadu u mi o jei mi” (Mika 7:7). Leti kumafa Mika bi „dë ta wakiti ku pasensi”, sö nöö useei musu ta wakiti ku pasensi tu.

7. Faandi mbei na wakiti nöö u musu ta wakiti Jehovah faa du dee soni dee a paamusi u?

7 Ee u abi di wan seei biibi kuma Mika, nöö woo dë kabakaba u wakiti Jehovah.  Wa dë kuma wan sëmbë di de buta a dunguwosu di ta wakiti di daka ka de o kii ën. Te wan sëmbë dë a dunguwosu ta wakiti u de kii ën, nöö a musu u wakiti, ma an ta dë waiwai ta wakiti u di daka dë dou. Ma na sö a dë ku u seepiseepi! U dë kabakaba ta wakiti Jehovah, u di u sabi taa a o mbei u feni teego libi a di soifi ten, leti kumafa a paamusi u! Fëën mbei u ’sa tei hii dee soni dee ta miti u ku pasensi, ku wai a hati seei’ (Kolosën 1:11, 12). Hii fa u ta wakiti, u ta köni be wa ta kuutu Jehovah taa an ta du soni hesi tjika. An o feni ën bunu ee u ta kuutu ën.​—Kolosën 3:12.

SËMBË DI BI ABI PASENSI

8. Andi u ta lei a dee womi ku dee mujëë fu awooten dee bi ta hoi deseei a Gadu?

8 Andi o heepi u fuu sa ta möön dë kabakaba u wakiti? Wë u sa ta pakisei soni u dee womi ku dee mujëë fu awooten dee bi ta wakiti Jehovah ku pasensi faa du dee soni dee a bi paamusi de (Loomë 15:4). Te u ta pakisei dee woto u de, nöö u musu ta mëni un longi de bi musu wakiti, faandi mbei de bi dë kabakaba u wakiti, söseei unfa Jehovah bi mbei de feni gaan bunu u di de bi abi pasensi.

Abahamu bi musu wakiti sömëni jaa longi ufö a feni miii kai ën avo (Luku palaklafu 9, 10)

9, 10. Un longi Abahamu ku Sala bi wakiti Jehovah?

9 Luku di woto u Abahamu ku Sala. U di de bi „tai hati ta biibi”, mbei de bi feni „dee soni dee Gadu bi paamusi de”. Di Bëibel ta piki u taa u di „Abahamu [bi] dë ta hoi pasensi”, mbei Jehovah bi paamusi ën taa a bi o mbei a feni gaan bunu, söseei taa a bi o mbei dee bakamii fëën ko toon wan gaan föluku (Hebelejën 6:12, 15). Faandi mbei Abahamu bi musu abi pasensi? Wë u  di di soni di Gadu bi paamusi ën an bi o pasa jeti. A 14 Nisan u di jaa 1943 Bifö Keesitu, hën Abahamu ku Sala ku hii dee sëmbë u de wosudendu, aba di lio de kai Efaata, hën de go a di Paamusi Köndë. Ma Abahamu bi musu wakiti 25 jaa longi ufö hën ku hën mujëë ko pai di womi mii u de de kai Isaki, nöö a bi musu wakiti 60 jaa jeti ufö Isaki ku hën mujëë ko pai Esau ku Jakopu.​—Hebelejën 11:9.

10 Ma Abahamu bi feni wan pisi u di Paamusi Köndë u? Di Bëibel taki taa Jehovah „an [bi] dëën di köndë fëën seei eti bifö a dëdë. Na wan kodo pisi fëën a dëën. Ma a bi paamusi ën taa a o dëën di köndë nöömö, nöö a o ko köndë fëën ku dee bakamii fëën dee a o pai. Wë nöö di juu di Masa Gadu paamusi Abahamu di soni dë, Abahamu an bi pai na wan kodo mii eti” (Tjabukama 7:5). Baka 430 jaa di Abahamu bi aba di lio de kai Efaata, ufö dee bakamii fëën bi ko dë di föluku di bi ta libi a di köndë dë.​—Ëkisodesi 12:40-42; Galasia 3:17.

11. Faandi mbei Abahamu bi dë kabakaba u wakiti, nöö un gaan bunu a o feni u di a bi abi pasensi?

11 Abahamu bi dë kabakaba u wakiti u di a bi dë seiki taa Jehovah bi o du dee soni dee a bi paamusi ën. A bi abi biibi a Jehovah. (Lesi Hebelejën 11:8-12.) Abahamu bi ta wakiti ku wai, hii fa an bi si fa dee soni dee Gadu bi paamusi ën bi pasa tuutuu ufö a dëdë. Ma pakisei unfa Abahamu o wai tjika te Jehovah weki ën ko a libi baka a di Paladëisi a goonliba aki. A o foondo ën seei te a ko si taa Jehovah mbei sëmbë sikifi sömëni soni fëën ku dee sëmbë fëën buta a di Bëibel. * (Luku di pisi a basu.) Pakisei unfa a o wai tjika te a ko sabi taa hën da wan u dee sëmbë di Jehovah bi tei u ko dë avo u di Mësiasi! U sa dë seiki taa an o hati ën taa a bi wakiti u Jehovah du dee soni dee a bi paamusi ën.

12, 13. Faandi mbei Josëfu bi musu abi pasensi, nöö unfa a bi lei taa a bi ta du soni a wan bunu fasi?

12 Josëfu, wan mii di bi kai Abahamu avo, bi dë kabakaba u wakiti ku pasensi tu. Sëmbë an bi ta libi bunu ku ën. Di fosu soni di bi miti ën, hën da dee baaa fëën bi sei ën kuma saafu di a bi abi söwan 17 jaa. Bakaten, hën di mujëë u di masa fëën bi mindi soni dëën taa a bi kë kisi ën (Kenesesi 39:11-20; Psalöm 105:17, 18). A bi ta djei kuma hogi nöö bi ta miti Josëfu, hii fa a bi dë wan sëmbë di bi ta dini Gadu ku hii hën hati. Ma baka 13 jaa hën soni ko tooka. De bi puu Josëfu a dunguwosu, hën a bi ko dë di möön hei sëmbë u di köndë Egepiti, baka könu.​—Kenesesi 41:14, 37-43; Tjabukama 7:9, 10.

Josëfu bi fusutan taa hii soni bi dë a Jehovah maun, söseei a bi sabi taa an bi o hati ën bakaten ee a wakiti Jehovah ku pasensi faa du dee soni dee a bi paamusi ën

13 Ma dee soni dee bi miti Josëfu aki bi mbei hati fëën bi boonu ö? A bi ta fii kuma Jehovah an bi dë ku ën möön u? Wë nönö. Josëfu bi wakiti Jehovah ku pasensi. Ma andi bi heepi ën faa du di soni aki? Wë, di biibi di a bi abi a Jehovah hën bi heepi ën. A bi fusutan taa hii soni bi dë a Jehovah maun. U ta si di soni aki te u luku di soni di a bi piki dee baaa fëën. A bi taki taa: „Wan fëëë e. Mi na Gadu. Hii fa un bi kë du hogi ku mi, tökuseei Gadu bi kë u di hogi di un bi kë du ku mi aki ko toon wan bunu soni, nöö a bi kë u sömëni sëmbë fika a libi, kumafa a o mbei de fika a libi tide aki” (Kenesesi 50:19, 20). Josëfu bi sabi taa an bi o hati ën bakaten ee a wakiti Jehovah ku pasensi faa du dee soni dee a bi paamusi ën.

14, 15. (a) Faandi mbei di fasi fa Dafiti bi lei taa a abi pasensi, ta bigi da u? (b) Andi bi heepi Dafiti faa wakiti ku pasensi?

 14 Könu Dafiti bi tja sömëni sitaafu tu. Jehovah bi salufu Dafiti faa ko dë könu u Isaëli di a bi njönku. Ma Dafiti bi wakiti 15 jaa longi ufö a ko toon könu u di lö ka a bi kumutu (2 Samuëli 2:3, 4). A di pisiten dë, Dafiti bi musu ta kule ta tjubi da Könu Saulosu fu an feni ën kii. * (Luku di pisi a basu.) Nöö di soni dë bi mbei taa Dafiti an bi abi fu hënseei wosu. A bi musu ta libi a wan woto köndë nasö a sitonu baaku dendu a wan sabana. Te u kaba fëën, de bi kii Saulosu a wan gaan feti. Ma tökuseei Dafiti bi musu wakiti söwan seibi jaa longi jeti ufö a bi sa toon könu u hii di köndë Isaëli.​—2 Samuëli 5:4, 5.

15 Ma faandi mbei Dafiti bi dë kabakaba u wakiti ku pasensi? Hënseei ta piki u di soni aki a Psalöm kapitë 13, ka a bi hakisi Jehovah fö pasi taa: ’Un longi jeti?’ A bi taki söseei taa: „Mi sabi taa joo lei mi taa i abi bunuhati u mi. Be hati u mi ko dë waiwai, u di i heepi mi. Mi o kanda da Jehovah, u di a mbei mi feni gaan bunu” (Psalöm 13:5, 6). Dafiti bi sabi taa Jehovah lobi ën, söseei taa a bi o dë ku ën hii juu. A bi ta mëni dee sömëni pasi di Jehovah bi heepi ën a di ten di pasa, nöö a bi ta buta pakisei a di heepi di Jehovah bi o heepi ën a di ten di ta ko. Dafiti bi sabi taa an bi o hati ën ee a bi wakiti Jehovah ku pasensi faa du dee soni dee a bi paamusi ën.

Jehovah an o hakisi u fuu du wan soni di hënseei an bi o kë du

16, 17. Unfa Jehovah Gadu ku Jesosi Keesitu tuu bi lei taa de da dee möön bunu sëmbë dee u sa djeesi a di wakiti di de ta wakiti ku pasensi?

16 Jehovah an o hakisi u fuu du wan soni di hënseei an bi o kë du. Hën da di möön bunu sëmbë di u sa djeesi a di fasi fa a ta dë kabakaba u wakiti. (Lesi 2 Petuisi 3:9.) Sömëni dusu jaa pasa, di Adam ku Eva bi dë a di djai u Eden, hën Saatan bi taki taa Jehovah an ta du soni a wan leti fasi. Jehovah ta „wakiti ku pasensi” u te di ten dou ka di në fëën o ko santa. Di soni dë o tja gaan bunu ko da dee sëmbë „dee ta wakiti ën nöömö”.​—Jesaaja 30:18.

17 Jesosi seei bi dë kabakaba u wakiti tu. Di a bi dë a goonliba aki, a bi ta hoi hënseei a Gadu u tefa a dëdë. A di jaa 33, a bi go a liba ala, hën a go a Gadu fesi go paka puu u a zöndu ku dëdë basu, ku di buuu fëën. Ma a bi musu wakiti u te di jaa 1914 dou, ufö a bi sa bigi tii kuma Könu (Tjabukama 2:33-35; Hebelejën 10:12, 13). Boiti di dë, Jesosi musu wakiti u te di kaba u di Dusu Jaa Tii fëën dou, ufö a o sa puu hii dee felantima fëën a pasi (1 Kolenti 15:25). Hën da a musu wakiti longi seei. Ma hii fa a dë sö, tökuseei an o wakiti u sösö, biga Gadu o mbei a feni gaan bunu.

 ANDI O HEEPI U FUU DË KABAKABA U WAKITI KU PASENSI?

18, 19. Andi o heepi u fuu sa dë kabakaba u wakiti ku pasensi?

18 A dë gbelingbelin u si taa Jehovah kë fuu abi pasensi, söseei fuu dë kabakaba u wakiti. Ma andi o heepi u fuu sa du di soni aki? U musu begi Gadu faa da u di santa jeje fëën. Na fëëkëtë taa di santa jeje u Gadu hën ta mbei sëmbë ko abi pasensi (Efeise 3:16; 6:18; 1 Tesalonika 5:17-19). Fëën mbei, begi Jehovah faa heepi i fii sa hoi dou ku pasensi!

19 Ma na fëëkëtë di soni di bi heepi Abahamu, Josëfu ku Dafiti u de bi sa wakiti ku pasensi u te Jehovah bi du dee soni dee a bi paamusi de. Di biibi ku di futoou di de bi abi a Jehovah hën bi heepi de. De an bi ta pakisei deseei nöö nasö dee soni di deseei bi kë. Te u ta pakisei unfa soni bi waka bunu da de, nöö a ta da u taanga fuu ta wakiti Jehovah tu.

20. Andi u musu dë kabakaba u du?

20 Wë hii fa fuka ta miti u, tökuseei u musu dë kabakaba u „wakiti ku pasensi”. Kandë so juu woo ta hakisi taa: ’Jehovah o, un longi jeti?’ (Jesaaja 6:11). Ma di santa jeje u Gadu sa heepi u fuu djeesi di tjabukama u Gadu de kai Jelemia, nöö te u kaba fëën woo taki taa: „Jehovah da di gudu di mi feni. Fëën mbei mi o wakiti ën.”​—Këëkanda 3:21, 24.

^ pal. 11 Söwan 15 kapitë u di buku Kenesesi ta konda soni u Abahamu. Boiti di dë, dee womi dee sikifi dee Giiki buku u Bëibel ta taki soni u Abahamu möön leki 70 pasi.

^ pal. 14 Jehovah an bi kë Saulosu kuma könu möön baka di a bi tii söwan tu jaa longi. Ma tökuseei Saulosu bi tii sowan 38 jaa jeti, u tefa a ko dëdë.​—1 Samuëli 13:1; Tjabukama 13:21.