Skip to content

Skip to secondary menu

Skip to table of contents

Jehovah Kotoigi

Saamakatöngö

Di Hei Wakitimawosu (u lei soni a komakandi)  |  tanvuuwata-liba 2016

I ta si taa a dë fanöudu fii ta lei wotowan soni ö?

I ta si taa a dë fanöudu fii ta lei wotowan soni ö?

„Mi o lei unu bumbuu soni.”NÖNGÖ 4:2.

KANDA: 93, 96

1, 2. Faandi mbei u musu lei wotowan soni, u de sa tja faantiwöutu a di kemeente?

JESOSI bi ta mbei taanga möiti u konda soni u di Könuköndë da sëmbë. A bi ta abi ten u lei dee bakama fëën soni tu. A bi lei de unfa de musu lei wotowan soni, söseei unfa de musu luku dee sëmbë u Gadu. Dee bakama u Jesosi bi ko sabi unfa de sa dë kuma wan sikapuma di ta luku dee sikapu fëën (Mateosi 10:5-7). Filipi seei bi ta peleiki fajafaja tu, ma a bi lei dee mujëë mii fëën u du di wan seei wooko tu (Tjabukama 21:8, 9). Useei musu ta lei wotowan soni a di ten aki tu. Faandi mbei u musu ta du ën?

2 A hii dee kemeente dee dë a hii së u goonliba, i abi sömëni njunjun peleikima di an tei dopu jeti. A dë fanöudu fuu lei dee njunjun peleikima aki soni. U musu lei de u ko fusutan faandi mbei a bunu u deseei musu ta lesi Bëibel, söseei u deseei ta lei soni u Bëibel. Nöö u musu lei de u peleiki, söseei u musu lei de u de sa lei sëmbë soni u di bunu buka tu. Dee baaa dee an dopu sö longi jeti musu kisi lei, sö taa bakaten de sa toon dinai nasö  gaanwomi. Hii sëmbë a di kemeente sa heepi dee njunjun peleikima aki tu.Nöngö 4:2.

LEI DEE NJUNJUN PELEIKIMA UNFA DESEEI SA TA LEI SONI U BËIBEL

3, 4. (a) Unfa Paulosu bi lei taa di lei di u ta lei soni u Bëibel ta heepi u a di peleikiwooko? (b) Andi useei musu du, ufö u sa da dee sëmbë dee u ta lei soni u Bëibel degihati u deseei lei soni u Bëibel tu?

3 Hiniwan dinima u Jehovah musu ta lesi di Bëibel, söseei de musu ta lei soni nëën u de ko sabi andi da di kë u Gadu. Apösutu Paulosu bi taki di soni aki da dee baaa ku dee sisa fëën dee bi ta libi a Kolosën. A bi taki taa: „U ta begi Masa Gadu da unu nöömö, fuun musu ko sabi bumbuu fa a kë fuun musu libi.” Faandi mbei de bi musu ta lesi di Wöutu u Gadu, söseei faandi mbei de bi musu ta lei soni nëën? Wë u di di soni aki bi o mbei de ko köni, nöö a bi o heepi de u ko fusutan unfa de bi sa „libi bunu nëën wojo, leti kumafa a fiti u dee sëmbë fëën musu ta libi”. A bi o heepi de tu u du hiniwan wooko di Jehovah bi o kë u de du, möönmöön u de paaja di bunu buka (Kolosën 1:9, 10). Fëën mbei ee u ta lei wan sëmbë soni u Bëibel, nöö u musu heepi ën faa ko fusutan taa ee a ta lesi di Bëibel, söseei ee a ta lei soni nëën hii juu, nöö a o heepi ën u dini Jehovah.

4 Wa o sa heepi dee sëmbë dee u ta lei soni u Bëibel u ko fusutan faandi mbei a dë fanöudu u de ta lei deseei soni u Bëibel, ee useei an ta du ën. Wë ee u ta lesi di Bëibel hii juu, söseei ee u ta pakisei fundu fëën, nöö a o heepi u a di libi fuu ku di peleikiwooko tu. Kandë te u dë a di peleikiwooko, hën wan sëmbë hakisi u wan taanga soni, nöö woo sa piki di sëmbë ku di Bëibel. Nasö te u ta lesi unfa Jesosi, Paulosu ku dee woto sëmbë an bi disa di peleiki di de bi ta peleiki, nöö a o da u degihati fuu sa peleiki go dou aluwasi soni ta taanga da u. Nöö te u ta konda da wotowan andi u bi lei, söseei unfa di soni di u lei dë bi heepi u, nöö woo sa da de degihati u de lei soni u Bëibel möön fundu, sö taa deseei sa feni wini tu.

5. Konda unfa u sa heepi njunjun peleikima u de ko abi di guwenti u ta lei deseei soni u Bëibel.

5 Kandë i ta hakisi iseei taa: ’Unfa mi sa lei di sëmbë di mi ta lei soni u Bëibel faa ta lesi di Bëibel hii daka?’ Wë kandë i sa lei ën unfa a sa seeka hënseei a di pisi u di buku di i ta lei ën soni u Bëibel. I sa piki ën faa lesi di pisi ka sikifi „Woto fanöudu soni” di dë baka u di buku Andi di Bëibel ta lei u tuutuu? di nama ku di pisi dë, söseei i sa piki ën faa lesi dee tëkisi dee sikifi a di pisi dë. Baka di dë, i sa lei ën unfa a sa seeka hënseei da dee komakandi  faa sa da piki tu. Dëën degihati faa ta lesi hii dee njunjun Hei Wakitimawosu ku Ontwaakt! Nöö i sa lei ën tu unfa a sa feni dee piki dee nama ku Bëibel a di Watchtower Library nasö di Watchtower LIBRARY A INTERNET. Te a pooba hii dee peipei fasi aki te a ta lei hënseei soni u Bëibel, nöö a o ko lobi ën seei, söseei a o kë sabi möön soni tu.

6. (a) Unfa i sa heepi di sëmbë di i ta lei soni u Bëibel faa ko lobi di Bëibel? (b) Andi wan sëmbë di ta lei soni u Bëibel ta du te a ko lobi di Wöutu u Gadu?

6 Te u ta lei wan sëmbë soni u Bëibel, nöö u kë faa ko fusutan taa di Bëibel da wan apaiti buku, u di a ta heepi ën u ko sabi Jehovah möön bunu. Ka fuu duwengi ën faa lei soni u Bëibel, nöö u sa lei ën unfa a sa ko lobi di lei di a ta lei soni u Bëibel. Möön a ta lei soni u Bëibel, möönmöön a o ta fii kuma di psalöm sikifima di bi kanda taa: „A bunu da mi u ko zuntu ku Gadu. Di möön Hei Masa Jehovah mi ta si kuma di tjubi kamian u mi” (Psalöm 73:28). Wë u dë seiki taa di jeje u Jehovah o heepi wan sëmbë di kë ko zuntu ku ën.

LEI DEE NJUNJUN PELEIKIMA U PELEIKI SÖSEEI U LEI SËMBË SONI U BËIBEL

7. Unfa Jesosi bi ta lei dee apösutu fëën soni? (Luku di peentje a bigi u di woto.)

7 U sa lei sömëni soni a di fasi fa Jesosi bi ta lei dee apösutu fëën soni. Jesosi bi ta tja de te a bi nango peleiki, nöö de bi ta luku unfa a bi ta lei sëmbë soni. A bi da de lai tu u di fasi fa de bi musu peleiki (Mateosi kapitë 10) [1] (Luku di pisi a kaba u di woto.) A wan kölö pisiten dee apösutu bi ko sa’ u lei sëmbë soni u di tuutuu lei kumafa Jesosi bi lei de (Mateosi 11:1). Boo go luku tu soni di u sa lei dee njunjun peleikima u de du, te de dë a di peleikiwooko.

8, 9. (a) Unfa Jesosi bi ta fan ku sëmbë te a bi ta peleiki? (b) Unfa u sa heepi njunjun peleikima u de ta fan ku sëmbë kumafa Jesosi bi ta fan?

8 Lei unfa i musu ta fan ku wotowan. Na hii juu Jesosi bi ta fan ku gaan hia sëmbë. Möön gaanfa a bi ta fan ku wan sëmbë apaiti, nöö a bi ta fan ku de a wan suti fasi. A bi fan ku wan mujëë di bi ko ba wata a wan baaku wata di bi dë zuntu ku di köndë de kai Sikali (Johanisi 4:5-30). Söseei a bi fan ku Mateosi, wan womi di bi ta pii lanti möni, nöö a bi kai ën faa ko dë wan bakama fëën. Mateosi bi ko toon wan bakama u Jesosi, nöö bakaten a bi kai Jesosi ku wanlö woto sëmbë u de ko njan nëën pisi. Naandë Jesosi bi fan ku sömëni sëmbë.Mateosi 9:9; Lukasi 5:27-39.

Te u ta fan ku sëmbë a wan suti fasi, nöö de o ta kë haika andi u kë konda da de

9 Jesosi bi fan a wan suti fasi ku Nataniëli, hii fa Nataniëli an bi taki bunu soni u dee sëmbë dee ta libi a Nazalëti. U di Jesosi bi fan a wan suti fasi ku Nataniëli, mbei a bi ko ta pakisei woto fasi u Jesosi, di bi dë u di köndë Nazalëti. Nöö Nataniëli bi kë u Jesosi lei ën möön soni seei (Johanisi 1:46-51). Di woto u Jesosi ta lei u taa, te u ta fan ku sëmbë a wan suti fasi, nöö de o ta kë haika andi u kë konda da de. [2] [Luku di pisi a kaba u di woto.] Te u ta lei njunjun peleikima u de  ta fan a sö wan fasi, nöö de o möön lobi di peleikiwooko.

10-12. (a) Andi Jesosi bi ta du te a bi si taa sëmbë bi kë sabi soni u di bunu buka? (b) Unfa u sa heepi dee njunjun peleikima u go a fesi a di fasi fa de ta lei sëmbë soni u Bëibel?

10 I musu ta lei dee sëmbë dee dë kabakaba u haika. Dii jaa ku hafu nöö Jesosi bi abi u du di wooko fëën a goonliba aki. Ma te sëmbë bi dë kabakaba u haikëën, nöö a bi ta dë ku de makandi, söseei a abi ta lei de sömëni soni. Wan daka a bi pasa taa gaan hia sëmbë bi ko taanpu a tela liba ta haika Jesosi. Hën Jesosi ku Petuisi subi a wan boto, hën de ta lei dee sëmbë dee bi dë a tela liba. Baka di dë, a bi kë lei Petuisi wan soni tu. Jesosi bi du wan foombo soni, u di a bi mbei Petuisi kisi wanlö gaan hia fisi. Hën a piki Petuisi taa: „Mi o mbei i ko ta kisi libisëmbë.” Wantewante dë hën Petuisi ku dee wotowan „tja dee boto u de go buta, hën de disa hii soni u de dë”, hën de go ta waka a Jesosi baka.Lukasi 5:1-11.

11 Nikodemusi seei bi kë u Jesosi lei ën möön soni. Ma u di Nikodemusi bi dë wan u dee sëmbë di bi ta wooko a di kuutu kamba u dee Dju, mbei a bi ta fëëë andi wotowan bi o taki, ee de bi si taa a ta fan ku Jesosi. Fëën mbei a kai Jesosi faa ko nëën pisi a ndeti. Jesosi an bi puu ën nëën liba, ma a bi go nëën pisi, hën a bi konda wantu fanöudu soni u di tuutuu lei dëën (Johanisi 3:1, 2). Hii juu Jesosi bi ta dë kabakaba u lei sëmbë soni u di tuutuu lei, nöö a bi ta taanga di biibi u de tu. A di wan seei fasi, u musu dë kabakaba u go a sëmbë a wan juu di möön bunu da de, nöö u musu dë makandi ku de u heepi de u fusutan di Bëibel.

12 Te u ta peleiki ku dee njunjun peleikima, nöö u musu lei de taa de musu toona go a hiniwan sëmbë di bi lei taa a bi kë sabi möön soni. Söseei u sa tja dee njunjun peleikima te u nango a dee gobaka ku dee studie fuu. A sö wan fasi de o ko sabi unfa de sa lei woto sëmbë soni, söseei de o ko si unfa wan sëmbë ta fii bunu te a ta lei sëmbë soni u Jehovah. Nöö di soni aki o mbei dee njunjun peleikima aki fii bunu seei u toona go a wan sëmbë u lei ën soni u Bëibel. De o ko sabi unfa de sa abi pasensi, söseei de o ko sabi taa de an musu lasi hati hesi poi te de an sa miti sëmbë a wosu.Galasia 5:22; luku di pisi „ An bi lasi hati”.

LEI DEE NJUNJUN PELEIKIMA UNFA DE SA HEEPI DEE BAAA KU DEE SISA U DE

13, 14. (a) Unfa i ta pakisei u dee woto u sëmbë di dë a Bëibel, di bi mbei taanga möiti u heepi wotowan? (b) Na un fasi i sa lei dee njunjun peleikima ku dee njönkuwan u de sa lei taa de lobi dee baaa ku dee sisa u de?

13 Jehovah kë u dee dinima fëën musu ta lobi de na de kuma baaa ku sisa, söseei a kë u de musu ta heepi de na de tu. (Lesi Lukasi 22:24-27; 1 Petuisi 1:22.) Di Bëibel ta lei u taa Jesosi bi du hii soni u heepi wotowan, te kisi hën libi seei a bi da u heepi wotowan (Mateosi 20:28). Hii juu Doluka bi „ta puu sëmbë a fuka ta heepi dee pootima” (Tjabukama 9:36, 39). Malia „bi wooko taanga seei” u heepi dee baaa ku dee sisa fëën dee bi ta libi a Loomë (Loomë 16:6). Unfa u sa heepi dee njunjun peleikima u ko fusutan taa a dë fanöudu seei u du bunu soni da dee baaa ku dee sisa u de?

Lei dee njunjun peleikima u lobi dee baaa ku dee sisa u de, söseei u de ta heepi de tu (Luku palaklafu 13, 14)

14 U sa hakisi dee njunjun peleikima u ko ku u te u nango luku dee sëmbë dee ko gaandi kaa, nasö te u nango luku dee sëmbë dee dë ku siki. Söseei te mama ku tata nango  luku dee lö sëmbë aki, nöö de sa tja dee miii u de ee a fiti. Dee gaanwomi sa hakisi dee njönkuwan nasö dee njunjun peleikima u wooko makandi ku de te de musu seeka soni u njan da dee gaan sëmbë, nasö ee de musu seeka wan soni a di wosu u de. Te dee njönkuwan ku dee njunjun peleikima ta si unfa dee baaa ku dee sisa ta heepi de na de, nöö de o kë du di wan seei soni tu. Wan gaanwomi bi lo’ u go luku dee baaa ku dee sisa dee bi ta libi a wan boiti kamian te de bi go peleiki a dee kamian dë. Wan baaa di bi lo’ u go ku ën bi lei wan soni a di gaanwomi aki, nöö a bi ta pakisei andi a bi sa du u heepi dee baaa ku dee sisa fëën tu.Loomë 12:10.

15. Faandi mbei a dë fanöudu taa dee gaanwomi musu ta buta pakisei a di fasi fa dee womi sëmbë u di kemeente musu go a fesi?

15 Jehovah da womi nëngë di faantiwöutu u ta lei sëmbë soni u di Wöutu fëën a di kemeente. Fëën mbei a dë fanöudu taa dee baaa musu ko saanfa u hoi wan taki a wan bunu fasi, sö taa sëmbë sa lei soni a de. Ee i da wan gaanwomi, nöö kandë i sa haika bunu te wan dinai ta hoi wan taki fii sa heepi ën faa sa go a fesi. (Nehemia 8:8) [3]—Luku di pisi a kaba u di woto.

16, 17. (a) Unfa Paulosu bi ta buta pakisei a di go di Timoteo bi musu go a fesi? (b) Unfa dee gaanwomi sa lei dee woto baaa soni a wan bunu fasi, u de sa luku di kemeente?

16 A dë fanöudu fuu lei möön baaa u de ko dë sikapuma a di kemeente. Paulosu bi lei Timoteo soni, nöö a bi dëën degihati faa lei wotowan soni tu. Paulosu bi taki taa: „I musu da Jesosi Keesitu pasi faa libi ku i ku ën bunuhati e, be a da i taanga. Nöö mi bi lei i ku dee otowan sömëni soni, nöö i musu toona tei dee soni dë ta lei bumbuu sëmbë dee ta abi köni tjika u toona lei oto sëmbë tu” (2 Timoteo 2:1, 2). Timoteo bi lei sömëni soni a Paulosu, di bi dë wan gaanwomi ku wan apösutu tu. Paulosu bi lei ën unfa a musu go a fesi a di fasi fa a ta peleiki ku unfa a musu heepi wotowan a di kemeente.2 Timoteo 3:10-12.

17 Paulosu bi ta dë makandi ku Timoteo, u di a bi kë dë seiki taa Timoteo kisi lei tjika (Tjabukama 16:1-5). Dee gaanwomi sa djeesi Paulosu, u di de o tei dinai di ta du de wooko bunu, u go ku de te de nango luku dee baaa ku dee sisa a de pisi u da de degihati. A sö wan fasi dee dinai aki o lei a dee gaanwomi unfa de sa lei wotowan soni, unfa de sa abi pasensi ku lobi, söseei unfa de sa  abi futoou a Jehovah te de ta luku dee sëmbë fëën, kumafa sëmbë ta luku sikapu.1 Petuisi 5:2.

A DË FANÖUDU FUU TA LEI SËMBË SONI

18. Faandi mbei di lei di u musu lei wotowan soni, musu dë wan fanöudu soni da u a di dini u Jehovah?

18 U di u dë a di pisiten u di kaba u di goonliba aki, mbei a dë fanöudu fuu lei dee njunjun peleikima soni, u de sa go a fesi a di fasi fa de ta du di peleikiwooko. A dë fanöudu u lei baaa soni, u de sa luku di kemeente. Jehovah kë u hii dee dinima fëën kisi bunu lei, nöö a da u di gaandi fuu heepi njunjun peleikima. Fëën mbei a dë fanöudu fuu mbei taanga möiti u lei wotowan soni, leti kumafa Jesosi ku Paulosu bi du ën. U di sömëni soni dë u du jeti a di peleikiwooko ufö di kaba dou, mbei u musu mbei taanga möiti fuu lei wotowan soni.

19. Faandi mbei i sa dë seiki taa soni o waka bunu te i ta mbei möiti u lei wotowan soni a di dini u Jehovah?

19 A ta tei ten ku möiti u lei njunjun peleikima soni. Ma u sa dë seiki taa Jehovah ku Jesosi o heepi u fuu ko sabi unfa u sa lei wotowan soni a di möön bunu fasi. Woo ta wai seei te u ta si fa dee sëmbë dee u lei soni, ta wooko taanga a di kemeente nasö a di peleikiwooko (1 Timoteo 4:10). A di wan seei ten u musu ta mbei möiti go dou fuu go a fesi a di biibi, fuu ko abi dee fasi dee Keesitu sëmbë musu abi, söseei fuu ko möön zuntu ku Jehovah.

^ [1] (palaklafu 7) Jesosi bi piki dee bakama fëën taa: (1) de musu paaja di bunu buka u di Könuköndë; (2) de musu futoou a Gadu taa a o da de soni u njan ku soni u bisi di de abi fanöudu; (3) de an musu ta buja ku sëmbë; (4) de musu buta futoou a Gadu te sëmbë ta du ku de, ku (5) de an musu fëëë andi sëmbë sa kë du ku de.

^ [2] (palaklafu 9) U sa feni bunu lai di ta lei u unfa u sa fan ku sëmbë a di peleikiwooko, a bladsëidë 62-64 u di buku „Kisi wini fu a Theokrasia Diniwroko-skoro”.

^ [3] (palaklafu 15) U sa feni bunu lai di ta lei u unfa wan baaa sa go a fesi a di fasi fa a ta hoi taki a di kemeente, a bladsëidë 52-61 u di buku „Kisi wini fu a Theokrasia Diniwroko-skoro”.