Skip to content

Skip to secondary menu

Skip to table of contents

Jehovah Kotoigi

Saamakatöngö

Di Hei Wakitimawosu (u lei soni a komakandi)  |  piki-deewei-liba 2016

I musu ta hoi dou fii ko dë „wan gbelingbelin sëmbë a Gadu wojo”

I musu ta hoi dou fii ko dë „wan gbelingbelin sëmbë a Gadu wojo”

„Di fa joo ta hoi pasensi ta tja dee sitaafu dë, nöö hën o puu föutu a i buta i ko wan gbelingbelin sëmbë a Gadu wojo.”JAKOBOSI 1:4.

KANDA: 135, 139

1, 2. (a) Andi u sa lei u di hoi di Gidion ku dee 300 womi fëën bi hoi dou? (Luku di peentje a bigi u di woto.) (b) Faandi mbei u musu hoi dou, te u luku di soni di sikifi a Lukasi 21:19?

POOBA u pakisei unfa a bi taanga da dee Isaëli sodati u feti ku dee felantima u de, söseei fa a bi taanga da Kuutuma Gidion, di bi dë di hedima u dee sodati. Hii di ndeti Gidion ku dee sodati fëën bi ta kule a dee Midian sodati baka ku dee woto sëmbë dee bi dë ku de a wan së. De bi ta kule a de baka u feti ku de. Nöö de kule a de baka söwan 32 kilomëti! Di Bëibel ta piki u andi bi pasa baka di dë. A taki taa: „Di Gidion dou a Joodan lio, nöö hën ku dee dii höndö womi dee bi dë ku ën, aba di lio.” Ma de an bi wini di feti jeti, de bi musu feti ku 15.000 sodati jeti. Sömëni jaa longi dee felantima aki bi ta du ku de, nöö dee Isaëli sëmbë an bi o sa disa di feti sö. Fëën mbei Gidion ku dee sodati fëën bi ta kule a dee felantima u de baka nöömö. Te u kaba fëën de feti ku de, hën de wini de!Kuutuma 7:22; 8:4, 10, 28.

2 Useei abi wan taanga feti ta feti a di ten aki tu. Dee  felantima fuu da Saatan, di goonliba aki, ku dee suwakifasi fuu. Sömëni fuu ta feti ku dee felantima aki sömëni jaa longi kaa. Ma u di Jehovah ta heepi u, mbei u bi wini sömëni u dee felantima aki. Ma tökuseei wa wini di lasiti feti jeti. So juu u sa ko wei u feti, söseei u sa ko wei u wakiti di kaba u di hogi goonliba aki. Jesosi bi piki u taa gaangaan fuka bi o ta miti u a dee lasiti daka aki, nöö sëmbë bi o ta du ku u tu. Ma a bi taki tu taa ee u hoi dou, nöö woo sa wini di feti. (Lesi Lukasi 21:19.) Andi a kë taki te wan sëmbë ta hoi dou? Andi o heepi u fuu hoi dou? Andi u sa lei u dee sëmbë dee bi hoi dou? Nöö unfa u sa hoi dou fuu ko dë „wan gbelingbelin sëmbë a Gadu wojo”?Jakobosi 1:4.

ANDI A KË TAKI U HOI DOU?

3. Andi a kë taki u hoi dou?

3 Te di Bëibel ta piki u taa u musu hoi dou, nöö an kë taki nöö taa wa o ta booko u hedi ku wan soni di ta miti u. Ma a nama ku di fasi fa u ta si di fuka di ta miti u. Te u ta hoi dou, nöö a ta heepi u fuu ko abi degihati, fuu ko abi biibi, söseei fuu ko abi pasensi. Wan buku ta taki taa di hoi di u ta hoi dou da wan fasi di ta heepi u fuu abi wan taanga biibi, söseei fu wa lasi hati te fuka ta miti u. A ta heepi u fuu hoi dou aluwasi fa di fuka hebi tjika. Nöö a ta heepi u fuu pasa dee fuka dee ta miti u, söseei fuu buta pakisei a dee maaka dee u abi, nöö wa o ta buta pakisei a dee fuka fuu.

4. Faandi mbei u sa taki taa lobi hën ta da u taanga fuu hoi dou?

4 Lobi ta da u taanga fuu hoi dou. (Lesi 1 Kolenti 13:4, 7.) Na un fasi lobi ta da u taanga fuu hoi dou? Te u lobi Jehovah, nöö di soni dë ta da u taanga fuu hoi dou a hiniwan soni di Jehovah ta da pasi faa pasa ku u (Lukasi 22:41, 42). Di lobi di u lobi dee baaa ku dee sisa fuu ta heepi u fuu sa libi bunu ku de, hii fa de abi suwakifasi (1 Petuisi 4:8). Sëmbë di abi wan bunu tööu libi seei ta miti „fuka”, ma di lobi di u lobi di sëmbë di u ku ën tööu ta heepi u fuu hoi dou, söseei a ta heepi u fuu ko abi wan möön bunu tööu libi.1 Kolenti 7:28.

ANDI O HEEPI I FII SA HOI DOU?

5. Faandi mbei Jehovah da di möön bunu sëmbë di sa heepi u fuu hoi dou?

5 Hakisi Jehovah be a da i taanga. Jehovah da di „Gadu di ta mbei u hoi dou, nöö hën ta da u kötöhati tu” (Loomë 15:5, NW). Hën da di wan kodo sëmbë di ta fusutan u bumbuu, nöö a ta fusutan unfa u ta fii, söseei a ta fusutan unfa de kiija u. Nöö a sabi bumbuu andi u abi fanöudu u hoi dou. Di Bëibel ta taki taa: „A o mbei taa hii dee sëmbë dee ta lesipeki ën, feni dee soni hati u de ta kë. Te de ta suku heepi nëën, a o jei de, nöö a o puu de a fuka” (Psalöm 145:19). Ma unfa Gadu o piki di begi di u ta begi ën faa da u taanga fuu hoi dou?

Jehovah ta fusutan u bumbuu, nöö a sabi bumbuu andi u abi fanöudu u hoi dou

6. Unfa Jehovah ’o mbei wan baaku da u nöömö fuu pasa’ kumafa a paamusi u a di Bëibel?

6 Te u ta hakisi Jehovah faa heepi u fuu hoi dou, nöö a ta paamusi u taa ’a o mbei wan baaku da u nöömö fuu pasa’. (Lesi 1 Kolenti 10:13.) Unfa Jehovah ta du di  soni dë? So juu a sa puu dee fuka dee ta miti u. Ma möön gaanfa a ta da u taanga fuu sa hoi dou „ku pasensi, ku wai a hati seei” (Kolosën 1:11). U di Jehovah sabi andi u sa du ku andi wa sa du, mbei an o mbei wan fuka miti u di o hebi da u tee taa wa sa hoi dou.

7. Konda wan woto di ta lei faandi mbei u musu ta lei soni u Bëibel fuu sa hoi dou.

7 Lei soni u Bëibel be di biibi fii ko möön taanga. Faandi mbei dee soni di Gadu ta lei u dë fanöudu? Luku wan woto aki: Di kuun de ta kai Everest da di möön hei kuun u goonliba. Ee wan sëmbë kë subi di kuun aki te dou hedi fëën, nöö a musu njan bunu seei. Sö nöö useei musu ta lei soni u Bëibel seei fuu sa hoi dou u te u dou di maaka fuu. U musu ta dë kabakaba u tei ten u lei useei soni u Bëibel, söseei u musu nango a dee komakandi fuu. Te u ta du dee soni aki, nöö de o heepi u fuu sa abi wan taanga biibi hii juu.Johanisi 6:27.

8, 9. (a) Andi u musu hoi a pakisei te fuka ta miti u, te u luku di soni di sikifi a Jöpu 2:4, 5? (b) Te fuka ta miti i, nöö andi i musu pooba u si a i fesi?

8 Na fëëkëtë di hoi di i musu hoi iseei a Gadu. Te fuka ta miti u, nöö u ta tja sitaafu. Ma di soni aki nama ku wan woto soni tu. Hën da te fuka ta miti u, nöö u musu lei taa u ta hoi useei a Gadu. Di soni di woo du te fuka ta miti u, ta lei ee u ta si Jehovah kuma di Tiima u hii di mundu. Faandi mbei u taki sö? Wë Saatan di felantima u Jehovah di ta fia ku di tii fëën, ta mbei Jehovah fa, u di a taki taa libisëmbë ta dini Jehovah u di de ta suku wini da deseei nöö. Saatan bi taki taa: „Hii soni di wan sëmbë abi a o da faa sa tan a libi.” Saatan bi piki Jehovah faa du wan soni ku Jöpu. A bi taa: „Tëndë i maun, nöö puu hii soni di a abi nëën maun dendu, nöö joo si ee an o siba i leti a i fesi dë” (Jöpu 2:4, 5). Saatan ko tooka, baka di a bi taki di soni aki ö? Na seei! Baka sömëni jaa di de tuwë Saatan puu a liba ala, hën a dë ta kaagi dee dinima u Gadu di ta hoi deseei nëën (Akoalimbo 12:10). A di ten aki, Saatan ta taki jeti taa libisëmbë ta dini Gadu u di de ta suku wini u deseei nöö. A dë seei ta luku fuu taki taa Gadu an abi leti u tii, söseei fu wa dini ën möön.

9 Te i ta tja sitaafu u di fuka ta miti i, nöö pooba u si di soni aki a i fesi. Saatan ku dee taku jeje dë a wan së. De dë seei ta luku andi joo du, nöö de ta taki taa ja o dini Jehovah möön. Ma Jehovah, di könu fuu Jesosi Keesitu, dee salufuwan dee dë a Gadu Köndë ala kaa, ku dee dusudusu ëngëli dë a di woto së. De ta si fa i ta mbei möiti, nöö de ta da i taanga! De ta wai seei te de ta si taa i sa hoi dou, ku fa i ta hoi iseei a Jehovah. Nöö i ta jei Jehovah ta piki i taa: „Baa o, libi a wan köni fasi e, be hati u mi dë ku piizii, sö taa mi sa piki di sëmbë di ta kaagi mi.”Nöngö 27:11.

Jesosi bi ta buta pakisei a di gaan bunu di a bi o feni te a hoi dou

10. Unfa i sa djeesi Jesosi te i ta buta pakisei a dee gaan bunu dee joo feni te i ta hoi dou?

10 Buta pakisei a dee gaan bunu dee joo feni. Pakisei taa i nango a wan kamian, ma di woto daka fëën ufö joo dou a di kamian ka i nango. Fii sa dou a di kamian, i musu waka wan hii ndeti. Hii së ka i tuwë wojo luku go dë dungudungu kankan. Ma i sabi taa abiti möön didia o ko, söseei i sabi taa  ee i waka go dou, joo dou ka i nango. Di libi fuu sa dë kuma di woto di u konda aki. Joo ta miti sömëni soni a di libi, nöö dee soni dë sa ta da i bookohedi. Jesosi seei bi sa fii sö tu. Di de bi ta pekëën buta a di posu, de bi ta sösö ën, nöö a bi ta fii pen gaanfa seei. Di pisiten dë bi musu u dë di möön taanga ten nëën libi! Ma andi bi heepi ën faa hoi dou? Di Bëibel ta taki taa a bi ta buta pakisei a „di wai di a o wai a bakaten” (Hebelejën 12:2, 3). Jesosi bi ta buta pakisei a di gaan bunu di a bi o feni te a hoi dou. Ma di möön fanöudu soni di a bi ta hoi a pakisei, hën da di gafa di a bi musu gafa di në u Gadu, söseei dee soni dee a bi ta du u lei taa Gadu hën abi hii leti u tii. A bi sabi taa dee fuka dee bi ta miti ën bi o dë u wan pisiten nöö, ma a bi sabi tu taa di gaan bunu di a bi o feni a liba ala bi o dë u teego. Dee fuka dee i ta miti a di ten aki sa hebi da i gaanfa seei, nöö de sa dë soni di ta hati i tu, ma i musu hoi a pakisei taa de o dë u wan pisiten nöö.

’DEE SËMBË DEE BI TAI HATI GO DOU’

11. Faandi mbei u musu luku dee woto u ’dee sëmbë dee bi tai hati go dou’?

11 Wa dë u wanwan te u ta hoi dou. Apösutu Paulosu bi da dee Keesitu sëmbë degihati u hoi dou, hii fa Saatan bi ta du ku de. A bi piki de taa: „I musu abi biibi a Gadu fii sa taanpu tuwë gogo dëën e, be an feni i kisi. Fa un ta tja sitaafu dë fu di un ta biibi ën hedi, nöö na unu nöö ta tja dee sitaafu dë e, dee sëmbë. Sö nöö dee otowan fuunu dee ta biibi Masa a kamiankamian a di goonliba aki ta tja de tu” (1 Petuisi 5:9). Dee woto u ’dee sëmbë dee bi tai hati go dou’ ta lei u unfa u sa hoi useei a Gadu hii juu, söseei de ta mbei u dë seiki taa u sa feni bunu, nöö de ta mëni u taa woo feni gaan bunu tu, u di u ta hoi useei a Gadu (Jakobosi 5:11). Boo go luku wantu u dee woto aki. [1]—Luku di pisi a kaba u di woto.

12. Andi u ta lei u dee kelupi-ëngëli dee bi taanpu a di djai u Eden fesi?

12 Dee kelupi-ëngëli da ëngëli di ta du gaan fanöudu wooko. Baka di Adam ku Eva du zöndu, hën Jehovah da so u dee kelupi-ëngëli wan njunjun wooko a goonliba aki. Di wooko dë bi tooka gaanfa seei u di wooko di de bi ta du a liba ala. Di fasi fa de bi hoi dou ta lei u unfa u sa hoi dou te de da u wan taanga wooko u du. Di Bëibel ta taki taa Jehovah buta dee „kelupi-ëngëli a di së u sonu kumutu u di djai. A buta wan feti ufangi di bi dë ku faja, nöö a bi ta bia ta lontu nöömö u tapa di pasi ka i nango a di pau di de ta kai ’Libi’” [2] (Luku di pisi a kaba u di woto.) (Kenesesi 3:24). Di Bëibel an ta taki taa dee kelupi-ëngëli bi ta guunjan, nasö taa de bi ta fii kuma de hei poi da di njunjun wooko dë. De an bi ta fuufei, nöö de an bi go disa di  wooko tu. Ma de bi dë ta du di wooko u de u tee a kaba. Kandë de du di wooko aki möön leki 1600 jaa longi te kisi di pisiten di di Gaan Wata ko!

13. Unfa Jöpu bi du hoi dou di dee sömëni fuka bi ta miti ën?

13 Jöpu bi dë wan womi di bi hoi hënseei a Gadu. So juu wan mati fii nasö wan famii fii sa taki wan soni di hati i, nöö di soni dë sa mbei i fii bookosaka. Nasö kandë i dë ku wan suwaki, nasö i ta tjali u di wan sëmbë fii dëdë. Ma aluwasi andi pasa, di woto u Jöpu sa da i kötöhati (Jöpu 1:18, 19; 2:7, 9; 19:1-3). Jöpu an bi sabi faandi mbei sömëni fuka bi ko ta miti ën sö, ma tökuseei a bi hoi dou. Andi bi heepi ën faa hoi dou? Di fosu soni di bi heepi ën, hën da di lobi di a bi lobi Jehovah, nöö a bi ta fëëë u du soni di an ta kai ku ën (Jöpu 1:1). Jöpu bi kë gafa Jehovah te soni bi nango bunu ku ën ku te soni an bi nango bunu ku ën. Boiti di dë, Jehovah bi heepi Jöpu faa si fa a abi kaakiti tjika, u di a bi ta konda da Jöpu fa a mbei sömëni foombo soni. Di soni aki bi mbei Jöpu bi dë seiki taa Jehovah bi o puu dee fuka fëën te di juu dou (Jöpu 42:1, 2). Nöö sö a pasa tu. „Jehovah puu Jöpu a di fuka di bi ta miti ën. Hën Jehovah da Jöpu hii dee soni dee a bi abi fosu. Jehovah dëën tu toon möön leki fa a bi abi kaa.” Jöpu bi libi „wan suti libi u te a bi ko gaandi seei, hën a dëdë”.Jöpu 42:10, 17.

14. Unfa di hoi di Paulosu bi hoi dou bi heepi wotowan u hoi dou, te u luku 2 Kolenti 1:6?

14 Apösutu Paulosu. I ta tja sitaafu u di sëmbë ta du ku i ö? I dë wan gaanwomi nasö wan keling-gaanwomi di ta si kuma dee faantiwöutu fii hia da i poi ö? Wë ee a dë sö, nöö di woto u Paulosu sa heepi i. De bi du ku Paulosu gaanfa seei, nöö hii juu a bi ta booko hën hedi ku dee baaa ku dee sisa fëën a dee kemeente (2 Kolenti 11:23-29). Ma Paulosu bi hoi dou, nöö di woto fëën ta da woto sëmbë taanga u deseei hoi dou tu. (Lesi 2 Kolenti 1:6.) Di hoi di i ta hoi dou, sa da wotowan degihati u de hoi dou tu.

 „JOO TA HOI PASENSI TA TJA DEE SITAAFU” Ö?

15, 16. (a) Unfa di hoi di woo ta hoi dou ’o puu föutu a u buta u ko wan gbelingbelin sëmbë a Gadu wojo’? (b) Konda andi u sa du u mbei di u ta hoi dou ’puu föutu a u buta u ko wan gbelingbelin sëmbë a Gadu wojo’.

15 Gadu bi mbei Jakobosi sikifi taa: „Di fa joo ta hoi pasensi ta tja dee sitaafu dë, nöö hën o puu föutu a i buta i ko wan gbelingbelin sëmbë a Gadu wojo” (Jakobosi 1:4). Unfa di hoi di woo ta hoi dou ’o puu föutu a u buta u ko wan gbelingbelin sëmbë a Gadu wojo’? Hën da te fuka ta miti u, nöö u ta ko si taa u musu abi möön pasensi, u musu ta möön dë ku tangi a hati, söseei taa u musu ko abi möön lobi. Te u ta hoi dou, nöö woo lei u abi dee fasi aki möön gaanfa, söseei woo ko dë wan möön bunu Keesitu sëmbë.

Te u ta hoi dou te fuka ta miti u, nöö woo ko dë möön bunu Keesitu sëmbë (Luku palaklafu 15, 16)

16 U di di hoi di u ta hoi dou sa mbei u ko dë wan möön bunu Keesitu sëmbë, mbei wa bi o kë pasa dee wëti u Jehovah u di u kë böö u dee fuka dee ta miti u. Boo taa i ta mbei möiti u na ta pakisei fanafiti soni a di së u manu ku mujëë. Wë nöö na disa u mbei möiti! Hakisi Jehovah faa heepi i be ja ta pakisei fanafiti soni möön. Wan famii fii ta du ku i u di i ta dini Gadu ö? Na disëën be a wini i, ma hoi dou! I musu dë kabakaba u dini Jehovah go dou. Nöö te u kaba fëën, joo ko abi biibi a Jehovah möön gaanfa. Hoi di soni aki a pakisei: Ee u kë u Gadu feni u bunu, nöö u musu hoi dou.Loomë 5:3-5; Jakobosi 1:12.

17, 18. (a) Konda wan woto di lei faandi mbei a dë fanöudu fuu hoi dou tee a di kaba. (b) Fuun soni u sa dë seiki fa di kaba u di goonliba aki zuntu?

17 U musu hoi dou, ma wa musu hoi dou u wan pisiten nöö, ma u musu hoi dou u tee a di kaba. Pakisei taa wan boto ta singi. Ee dee sëmbë dee dë a di boto kë feni tjubi, nöö de musu sun go a tela. Ma ee wan u dee sëmbë bigi sun hën a ko wei, nöö a o dëdë. Söseei ee wan u dee sëmbë ta sun tee a zuntu ku tela hën a ko wei, nöö a o dëdë tu. Ee u kë libi a di njunjun goonliba, nöö u musu ta hoi dou nöömö. Boo ko dë kuma apösutu Paulosu di bi taki taa: „Wa ta lasi hati e.”2 Kolenti 4:1, 16.

18 Leti kumafa Jehovah bi heepi Paulosu u hoi dou, sö nöö useei dë seiki taa Jehovah o heepi u fuu hoi dou tee a di kaba tu. Paulosu bi sikifi taa: „U dë gaanfa möön winima e! Biga di Sëmbë di i si lobi u aki sö hën wë wooko sö da u. Nöö hën mbei mi ko sabi gbelin taa na wan soni dë di sa paati u ku di fa Gadu lobi u tjika aki e. Na dëdë, na libi, na wan basia u Gadu Köndë ee nasö dee u didibi köndë, na wan soni u di ten u dë aki, na wan soni u bakaten tu, na wan makiti sa paati u puu a di lobi u Gadu aki. Na wan soni a liba ala, na wan soni a basu aki tu. Na wan kodo soni seei a hii di mundu di Gadu mbei aki abi di kaakiti u sa paati u ku di lobi di Gadu lobi u aki e, dee sëmbë, fu di u nama ku Jesosi Keesitu di Masa fuu” (Loomë 8:37-39). A dë sö tuu taa woo ta wei so juu. Ma boo djeesi Gidion ku dee sodati fëën. De bi ko wei tu, ma de bi hoi dou. „De bi ta kule a dee felantima u de baka nöömö!”Kuutuma 8:4.

^ [1] (palaklafu 11) Joo si tu taa joo feni degihati a dee woto u dee dinima u Gadu dee bi hoi dou a di ten aki. I sa lesi de a di Jaarboek u 1992, 1999, ku di u 2008, söseei i sa lesi dee woto u dee baaa ku dee sisa fuu u di köndë Etiopia, Malaawi, ku Losiaköndë.

^ [2] (palaklafu 12) Di Bëibel an ta taki un mëni kelupi-ëngëli bi ta du di wooko aki.