Skip to content

Skip to secondary menu

Skip to table of contents

Jehovah Kotoigi

Saamakatöngö

Di Hei Wakitimawosu (u lei soni a komakandi)  |  piki-deewei-liba 2016

Faandi mbei u musu ta ko makandi u dini Gadu?

Faandi mbei u musu ta ko makandi u dini Gadu?

„Un boo buta mëni a di fa u sa du heepi u seei. . . . Wan boo disa u ta miti makandi e.”HEBELEJËN 10:24, 25.

KANDA: 20, 119

1-3. (a) Unfa dee Keesitu sëmbë ta kë ko makandi seei? (Luku di peentje a bigi u di woto.) (b) Andi woo luku a di woto aki?

WAN sisa de kai Corinna bi abi 17 jaa, di de bi kisi hën mama tja go söötö a wan dunguwosu, di dë a wan longi kamian. Bakaten, de kisi Corinna seei tja go söötö a di kamian de kai Siberië, di dë longi ku ka a bi ta libi. De bi mbei a ta wooko goon, nöö de bi butëën faa ta wooko kuma saafu. So juu de bi ta duwengi ën faa wooko a döö te kamian bi kötö seei, nöö de an bi ta dëën bumbuu soni u bisi faa sa tapa kötö. Hii fa a bi taanga da Corinna, tökuseei hën ku wan woto sisa bi buta taa de o mbei hii möiti u de sa kumutu a di goon ka de bi ta wooko, sö taa de sa go a dee komakandi.

2 Corinna bi taki taa: „U bi kumutu a di wooko kamian fuu a ndeti, nöö u bi waka söwan 25 kilomëti fuu go dou a di kamian ka de ta tei loko. A tu juu ganian kanda di loko bi kumutu naandë, nöö a bi lëi söwan sikisi juu longi. Di u saka kumutu a di loko, hën u waka teni kilomëti ufö u dou a di komakandi  kamian.” Corinna bi wai seei taa a bi du di soni dë. A bi taki taa: „A di komakandi, u bi lei soni a Di Hei Wakitimawosu, nöö u bi kanda Könuköndë kanda tu. A bi da u degihati seei, nöö di soni di u bi du dë bi mbei di biibi fuu ko möön taanga.” Baka dii daka, hën dee tu sisa aki bi toona go a di goon, ma di sëmbë di bi ta luku di goon, an bi pena sabi taa de bi kumutu dë seei.

3 Hii juu dee sëmbë u Jehovah ta kë dë makandi ku deseei. Dee fesiten Keesitu sëmbë bi ta kë dë makandi u de dini Jehovah, söseei u de lei soni fëën (Hebelejën 10:24, 25). Kandë iseei ta kë go a dee komakandi tu. Ma leti kumafa a ta taanga da dee baaa ku dee sisa fii u nango a dee komakandi hii juu, sö nöö a sa ta taanga da i tu. Kandë a ta taanga da i, u di i musu ta wooko longi, nasö u di i abi hia soni u du, nasö u di hii juu i ta dë weiwei. Andi o heepi u fuu sa du hii soni di u sa du fuu sa ta dë a dee komakandi? [1] (Luku di pisi a kaba u di woto.) Unfa u sa heepi dee sëmbë dee u ta lei soni u Bëibel ku woto sëmbë, u de ta ko hii juu a dee komakandi? Di woto aki o taki u dii soni di o lei u faandi mbei u musu nango a dee komakandi. (1) De bunu da u, (2) de ta heepi wotowan, ku (3) de ta gafa Jehovah. [2]—Luku di pisi a kaba u di woto.

DEE KOMAKANDI BUNU DA U

4. Unfa dee komakandi ta heepi u fuu lei soni u Jehovah?

4 U ta lei soni a dee komakandi. A hiniwan komakandi u ta lei möön soni u Jehovah. A dee ten dee pasa aki, gaansë u dee kemeente bi ta lei soni a di buku Kon krosibei na Jehovah a di Kemeente Bëibel-lei. Unfa i bi ta fii di u bi ta lei soni u dee fasi u Jehovah, söseei di i bi ta jei fa dee baaa ku dee sisa bi ta taki unfa de ta pakisei u Jehovah? Wë u dë seiki taa di soni dë bi mbei i ko möön lobi Jehovah. A dee komakandi u ta lei möön soni u Bëibel te u ta buta pakisei a dee taki de ta hoi, a dee demo, nasö te u ta haika bunu te de ta lesi wan pisi a di Bëibel (Nehemia 8:8). Pakisei dee sömëni soni dee u ta ko sabi hiniwan wiki te u ta seeka useei a di lesipisi u Bëibel, söseei te u ta jei dee soni di dee wotowan bi lei a di pisi dë.

5. Unfa dee komakandi heepi i fii sa du dee soni dee i ta lei a di Bëibel, söseei fii sa peleiki möön bunu?

5 Dee komakandi ta lei u unfa u musu du dee soni dee u ta lei a di Bëibel (1 Tesalonika 4:9, 10). I bi go a wan komakandi ka de bi taki u wan soni a di Hei Wakitimawosu-lei, di bi mbei i kë du möön soni a di dini di i ta dini Jehovah u? A bi mbei i kë begi möön bunu ö? Nasö a bi mbei i kë da wan baaa nasö wan sisa paadon u? Di komakandi di u ta hoi mindi wiki ta lei u unfa u musu paaja di bunu buka, söseei unfa u musu heepi wotowan u de ko fusutan dee tuutuu lei u Bëibel.Mateosi 28:19, 20.

6. Unfa dee komakandi fuu ta da u degihati, söseei unfa de ta da u taanga fuu dini Jehovah go dou?

6 Dee komakandi ta da u degihati. Di goonliba u Saatan ta pooba u suwaki di biibi  fuu, nöö a ta mbei u fii bookosaka tu. Ma dee komakandi ta da u degihati, nöö de ta da u taanga fuu dini Jehovah go dou. (Lesi Tjabukama 15:30-32.) So juu a dee komakandi fuu, u ta taki soni u dee tjabukama woto dee bi pasa tuu. Di soni aki sa heepi u fuu dë möön seiki taa Jehovah o du dee soni dee a paamusi u a di ten di ta ko. Na te dee baaa ku dee sisa fuu ta hoi taki wanwan nöö de ta da u degihati, ma de ta da u degihati te de ta da piki tu, söseei te de ta kanda ku hii de hati da Jehovah (1 Kolenti 14:26). Te u ta da woto ku dee baaa ku sisa fuu te di komakandi bigi ku te di komakandi kaba, nöö u ta fii bunu u di u abi sömëni mati di ta booko de hedi ku u.1 Kolenti 16:17, 18.

Dee komakandi fuu ta da u degihati, nöö de ta da u taanga fuu dini Jehovah go dou

7. Faandi mbei a dë fanöudu seei fuu ta dë a dee komakandi?

7 Gadu ta da u di santa jeje fëën faa heepi u te u dë a dee komakandi. Jesosi ta tii dee kemeente ku di santa jeje fëën. Fëën mbei a piki u taa u musu ta ’jei andi di santa jeje ta taki da dee sëmbë a dee kemeente’ (Akoalimbo 2:7). Di santa jeje sa heepi u fuu hoi dou te tesi ta miti u, söseei fuu peleiki fajafaja. A sa heepi u söseei fuu sabi andi u musu du te u kë du wan soni. Fëën mbei u musu du hii soni di u sa du fuu sa ta dë a dee komakandi fuu, sö taa Gadu sa da u di santa jeje fëën faa heepi u.

U TA HEEPI WOTOWAN TE U NANGO A DEE KOMAKANDI

8. Unfa u ta heepi dee baaa ku dee sisa fuu te de ta si u a dee komakandi, te de ta jei u ta da piki, ku te de ta jei fa u ta kanda? (Söseei luku di pisi „ Hii juu a ta fii bunu te a kumutu a komakandi”.)

8 Te u nango a dee komakandi, nöö u ta feni di okasi u lei dee baaa ku dee sisa fuu taa u lobi de. Sömëni sëmbë a di kemeente fuu ta miti sömëni fuka. Apösutu Paulosu bi sikifi taa: „Un boo buta mëni a di fa u sa du heepi u seei” (Hebelejën 10:24, 25). U sa lei taa u ta booko u hedi ku dee baaa ku dee sisa fuu te u ta ko makandi u da useei degihati. Te u nango a dee komakandi, nöö u ta lei dee baaa ku dee sisa fuu taa u ta kë dë makandi ku de, u ta kë fan ku de, söseeitaa u ta kë sabi unfa a nango ku de. U ta da de degihati tu te de ta jei unfa u ta da  piki ku unfa u ta kanda ku hii u hati.Kolosën 3:16.

9, 10. (a) Konda unfa di soni di Jesosi taki a Johanisi 10:16 ta heepi u fuu fusutan faandi mbei u musu ta ko makandi ku dee baaa ku dee sisa fuu. (b) Unfa di go di u nango hii juu a dee komakandi sa heepi wan baaa nasö wan sisa fuu, di dee famii fëën an ta hulu möön?

9 Te u nango a dee komakandi, nöö u ta heepi dee sëmbë u di kemeente u de dë makandi ku deseei hii juu. (Lesi Johanisi 10:16.) Jesosi bi taki taa a dë kuma wan sikapuma, nöö dee bakama fëën dë kuma wan hipi sikapu. Pakisei di soni aki: Boo taa tu sikapu dë a wan kuun, nöö tu wotowan dë a wan möön lagi kamian, nöö wan wotowan dë tee a wan woto kamian. U sa taki taa dee feifi sikapu aki dë a wan hipi ö? Wë nönö, biga wan hipi sikapu ta dë makandi a wan kamian, nöö de ta waka a di sikapuma u de baka. Sö nöö an musu pasa taa wa ta kë dë makandi ku dee baaa ku dee sisa fuu, u di wa ta ko a dee komakandi. U musu ta ko makandi fuu sa ko dë „wan kodo hipi sikapu” nöö u musu ta waka a „wan kodo sikafuma” baka.

10 Dee komakandi ta heepi u fuu dë makandi kuma sëmbë u wan famii di lobi deseei (Psalöm 133:1). Dee famii u so u dee baaa ku dee sisa a di kemeente an ta hulu de möön. Dee famii aki sa dë de mama ku de tata, nasö dee baaa ku dee sisa u de. Ma Jesosi paamusi de taa a o da de wan famii di lobi de, ku di o ta heepi de (Maikusi 10:29, 30). Ee i nango a dee komakandi hii juu, nöö joo sa ko dë kuma wan tata, wan mama, wan baaa, nasö wan sisa da wan sëmbë a di kemeente. Te u ta pakisei di soni aki, nöö woo kë mbei hii möiti fuu sa ta dë a hii dee komakandi.

 WOO TA GAFA JEHOVAH

11. Unfa u ta da Jehovah di soni di a abi leti u kisi, te u nango a dee komakandi?

11 Te u nango a dee komakandi, nöö u ta da Jehovah di soni di a abi leti u kisi. U di Jehovah hën mbei u, mbei u musu ta dëën tangi, nöö u musu ta gafëën tu. (Lesi Akoalimbo 7:12.) U sa du dee soni aki te u ta begi Jehovah a dee komakandi, te u ta kanda dëën, ku te u ta konda soni fëën da sëmbë. A dë wan gaandi di u abi seei u dini Jehovah hiniwan wiki!

Jehovah ta si taa u ta kë go a dee komakandi tuutuu, nöö a ta tei ën u bigi taa u ta mbei möiti u go a dee komakandi

12. Unfa Jehovah ta fii te u ta piki hën buka, u di u nango a dee komakandi?

12 Jehovah hën mbei u, nöö u musu ta piki hën buka. A piki u taa u musu ta ko makandi hii juu, möönmöön fa di kaba u di goonliba aki ta ko möön zuntu. Te u ta du di soni di Jehovah piki u aki, nöö a o wai ku u (1 Johanisi 3:22). A ta si taa u ta kë go a dee komakandi tuutuu, nöö a ta tei ën u bigi taa u ta mbei möiti u go a dee komakandi.Hebelejën 6:10.

13, 14. Unfa u ta ko dë gaan mati ku Jehovah ku Jesosi te u nango a dee komakandi?

13 Te u nango a dee komakandi, nöö u ta lei Jehovah taa u kë ko dë gaan mati ku ën ku di Womi Mii fëën. A dee komakandi u ta lei soni a di Bëibel, söseei Jehovah ta lei u andi u musu du ku unfa u musu libi (Jesaaja 30:20, 21). Te sëmbë di an ta dini Jehovah ko a dee komakandi, nöö de o si taa Gadu dë ku u (1 Kolenti 14:23-25). Jehovah ta tii dee komakandi fuu ku di santa jeje fëën, nöö nëën dee soni dee u ta lei ta kumutu. Fëën mbei te u nango a dee komakandi, nöö u musu ta haika andi Jehovah ta piki u, u musu ta si fa a lobi u tjika, söseei u musu ko dë gaan mati ku ën tu.

14 Jesosi di dë di Hedima u di kemeente bi taki taa: „Ka tu dii fuunu ko makandi fu di un nama ku mi, nöö mi seei o dë leti a unu mindi dë” (Mateosi 18:20). Di Bëibel taki söseei taa Jesosi „ta waka ta lomboto” a dee kemeente (Akoalimbo 1:20–2:1). A dë gbelingbelin u si taa Jehovah ku Jesosi dë ku u, nöö de ta da u taanga te u dë a dee komakandi. Unfa i si kuma Jehovah ta fii te a ta si taa i ta mbei hii möiti fii sa ko dë gaan mati ku ën ku di Womi Mii fëën?

15. Unfa di go di u nango a dee komakandi ta lei Gadu taa u kë piki ën buka?

15 Te u nango a dee komakandi, nöö u ta lei Jehovah taa u ta kë piki hën buka a soni. Jehovah an ta musu u fuu du dee soni dee a ta taki (Jesaaja 43:23). Fëën mbei te useei kë piki Jehovah buka, u di u nango a dee komakandi, nöö u ta lei taa u lobi ën, söseei taa u ta biibi taa a abi di leti u piki u unfa u musu ta libi (Loomë 6:17). Andi woo du ee di basi di u ta wooko da, hakisi u fuu du wan wooko di o mbei taa wa o sa nango a dee komakandi hii juu? Kandë dee tiima piki u taa woo paka wan butu ee u nango a dee komakandi u go dini Jehovah nasö de ta piki u taa de o söötö u. Kandë de sa piki u taa de o du wan möön hogi soni ku  u. Nasö so juu u kë go du wan woto soni ka fuu go a dee komakandi. Aluwasi undi u dee soni aki ta tapa u fu wa go a dee komakandi, tökuseei u musu hoi a pakisei taa useei hën musu taki andi woo du (Tjabukama 5:29). Ma hiniwan juu te u ta piki Jehovah buka, nöö a ta wai ku u.Nöngö 27:11.

I MUSU TA KO MAKANDI KU DEE BAAA KU DEE SISA FII NÖÖMÖ

16, 17. (a) Unfa u du sabi taa dee fesiten Keesitu sëmbë bi ta si dee komakandi kuma wan fanöudu soni seei? (b) Unfa Baaa George Gangas bi ta si dee komakandi?

16 Baka di dee Keesitu sëmbë bi ko makandi a di Pensiti Daka a di jaa 33, hën de bi ta ko makandi hii juu u dini Jehovah. De bi ta ’buta mëni a di fa de sa du u heepi deseei’, nöö de bi ’ta ko makandi ta da deseei taanga nöömö’ (Hebelejën 10:24, 25). Hii fa dee tiima u Loomë ku dee hedima u di Dju keiki bi ta du ku de, tökuseei de bi ta ko makandi hii juu. A bi ta taanga da de, ma de bi ta du hii soni di de bi sa du, u ta ko makandi hii juu.

17 Dee dinima u Jehovah a di ten aki seei ta tei ën u bigi taa de sa nango a dee komakandi, nöö de ta fii bunu seei te de dë a dee komakandi. George Gangas, di bi dë wan baaa u di Tii kulupu söwan 22 jaa longi, bi taki taa: „Di ko di mi ta ko makandi ku dee baaa ku dee sisa u mi, da wan u dee möön piizii soni a mi libi, nöö a ta da mi degihati tu. Mi lo’ te mi dë kuma wan u dee fosu sëmbë di dou a zali, söseei mi lo’ te mi dë wan u dee lasiti sëmbë di ta kumutu a di zali, ee a kan. Mi ta fii bunu te mi ta fan ku dee sëmbë u Gadu. Te mi dë makandi ku de, nöö mi ta fii kuma mi dë a wosu ku dee famii u mi. A ta dë kuma mi dë a di paladëisi kaa.” A bi taki söseei taa: „Di go di u musu nango a dee komakandi, da di soni di ta dë a mi hati seei.”

18. Unfa i ta si dee komakandi fuu, nöö andi i dë kabakaba u du?

18 I ta si di dini du u musu ta dini Jehovah a di wan seei fasi tu ö? Wë ee i ta si ën sö, nöö ta mbei möiti nöömö fii sa ta dë makandi ku dee baaa ku sisa fii a dee komakandi, aluwasi a ta taanga da i so juu. Lei Jehovah taa i ta fii kumafa Könu Dafiti bi ta fii, di a bi taki taa: „Jehovah o, mi lobi te mi dë a di wosu ka i ta dë.”Psalöm 26:8.

^ [1] (palaklafu 3) Wantu soni dë di ta tapa so u dee baaa ku dee sisa fuu u de an sa go a dee komakandi. Kandë de abi wan siki. Ma de sa dë seiki taa Jehovah ta fusutan andi ta miti de, söseei taa a ta tei ën u bigi taa de ta mbei möiti u dini ën. Dee gaanwomi sa seeka soni u heepi dee lö sëmbë aki u de sa haika dee komakandi a tëlëfön nasö u de sa hai de tei da de.

^ [2] (palaklafu 3) Luku di pisi „ Faandi mbei u musu nango a dee komakandi?