Skip to content

Skip to secondary menu

Skip to table of contents

Jehovah Kotoigi

Saamakatöngö

Di Hei Wakitimawosu (u lei soni a komakandi)  |  piki-deewei-liba 2016

Te u abi biibi, nöö libi fuu o kai ku Gadu

Te u abi biibi, nöö libi fuu o kai ku Gadu

„Be un ta djeesi dee otowan nöömö, dee bi tai hati ta biibi tefa de feni dee soni dee Gadu bi paamusi de.”HEBELEJËN 6:12.

KANDA: 86, 54

1, 2. Andi bi miti Jefita ku di mujëë mii fëën?

WAN njönku mujëë ta kule go miti hën tata. A ta wai seei taa hën tata toona ko libilibi baka, di a kumutu a wan feti. Di wini di hën tata bi wini di feti bi mbei taa a bi ta kanda ta baja seei. Ma di soni di hën tata bi du ku di soni di a bi taki, bi musu u mbei di mujëë mii foondo seei. Hën wë di tata tënë dee soni dee a bi bisi, hën a bai taa: „Kee di mujëë mii u mi baa! I ta mbei mi ta tjali seei.” Baka di dë, hën a piki di mujëë mii fëën taa a bi mbei wan buka ku Jehovah, nöö di soni dë o tooka hii hën libi. Di buka di a bi mbei ku Jehovah, bi o mbei taa di mujëë mii fëën an bi o sa tööu, nöö an bi o sa pai miii tu. Ma wantewante dë hën di mujëë mii piki hën tata taa a musu hoi hënseei a di buka di a bi mbei, nöö di soni dë bi da hën tata taanga seei. Di soni di a bi taki bi ta lei taa a ta biibi taa hii soni di Jehovah hakisi ën faa du o tja bunu ko dëën (Kuutuma 11:34-37). Di tata bi ta wai ku di mujëë mii fëën seei di a bi si fa a bi abi biibi tjika. Di tata bi wai ku di mujëë mii fëën,  u di di mujëë mii bi dë kabakaba u mbei Jehovah hati piizii.

2 Jefita ku di mujëë mii fëën bi abi biibi a Jehovah gaanfa seei, nöö de bi lobi di fasi fa Jehovah ta du soni. De bi abi biibi a Jehovah aluwasi a bi ta taanga da de. De bi kë u Jehovah feni de bunu, nöö di soni dë bi bunu möön hiniwan woto soni di de bi sa da Jehovah.

3. Unfa di woto u Jefita ku di mujëë mii fëën sa heepi u a di ten aki?

3 So juu a ta taanga u lei taa u abi biibi a Jehovah. U musu „biinga seei da di Buka u Gadu di a buta a u dee sëmbë fëën maun fuu biibi aki” (Judasi 3). Ee u kë du di soni aki, nöö u musu ko sabi unfa Jefita ku di mujëë mii fëën bi hoi dou, hii fa soni bi ta miti de a de libi. Unfa de bi lei taa de bi abi biibi a Jehovah?

DE AN MBEI DEE SONI U DI GOONLIBA AKI MBEI DI BIIBI U DE KO SUWAKI

4, 5. (a) Andi Jehovah bi piki dee Isaëli sëmbë taa de musu du, di de bi go a di Paamusi Köndë? (b) Andi bi pasa ku dee Isaëli sëmbë di de an bi piki Gadu buka, te u luku andi sikifi a Psalöm 106?

4 Hii daka Jefita ku di mujëë mii fëën bi ta mëni andi bi pasa ku dee Isaëli sëmbë di de an bi piki Jehovah buka. Söwan 300 jaa a fesi Jehovah bi piki dee Isaëli sëmbë taa de musu kii hii dee sëmbë u di Paamusi Köndë dee bi ta dini poipoi gadu, ma dee Isaëli sëmbë an bi haikëën (Detolonomi 7:1-4). Sömëni u dee Isaëli sëmbë bi ta djeesi dee Kaana sëmbë dee bi ta dini poipoi gadu, söseei dee bi ta libi fanafiti a di së u manu ku mujëë.Lesi Psalöm 106:34-39.

5 U di dee Isaëli sëmbë an bi piki Jehovah buka, mbei an bi tjubi de da dee felantima u de (Kuutuma 2:1-3, 11-15; Psalöm 106:40-43). A bi musu u taanga da dee sëmbë dee lobi Jehovah u lei taa de abi biibi a di ten dë. Ma di Bëibel ta taki taa sëmbë bi dë di bi abi biibi a Jehovah. Wantu u de da Jefita ku di mujëë mii fëën, Elikana, Hana ku Samuëli. De bi ta du soni u mbei Jehovah hati piizii.1 Samuëli 1:20-28; 2:26.

6. Andi ta dë a dee sëmbë u di goonliba aki pakisei, nöö andi u musu du?

6 Dee sëmbë u di ten fuu aki ta libi kuma dee Kaana sëmbë. Womi ku mujëë soni, hogidu ku möni nöö ta dë a de pakisei. Ma Jehovah ta bai u a dee soni aki. A kë tjubi u, kumafa a bi kë tjubi dee Isaëli sëmbë da dee soni aki. U sa lei wan soni a dee föutu di de bi mbei ö? (1 Kolenti 10:6-11) Wë u musu du hii soni di u sa du fu wa ta pakisei kuma dee sëmbë u di goonliba aki (Loomë 12:2). Woo mbei möiti u du di soni aki ö?

JEFITA BI LEI TAA A BI ABI BIIBI HII FA SONI AN BI PASA KUMAFA A BI MËNI

7. (a) Andi dee sëmbë u Jefita bi du ku ën? (b) Andi Jefita bi du?

7 A di ten u Jefita, dee Filisiti sëmbë ku dee Amon sëmbë bi ta du ku dee Isaëli sëmbë, u di de an bi ta piki Jehovah buka möön (Kuutuma 10:7, 8). Boiti di dë, dee felantima u dee Isaëli sëmbë bi ta du ku Jefita. Ma dee baaa fëën ku dee hedima u Isaëli seei bi ta du ku ën tu. U di dee baaa fëën bi ta haun ku ën, söseei u di de bi ta buuse ën, mbei de bi jakëën puu a di kamian di a bi musu kisi kuma gudu (Kuutuma 11:1-3). Jefita an bi mbei di hogihati fasi fa de bi libi ku ën, mbei a ko dë wan hogihati sëmbë tu. Unfa u du sabi di soni dë? Wë di dee gaanwomi u di köndë bi hakisi ën faa ko heepi de, nöö a  bi ko heepi de wantewante (Kuutuma 11:4-11). Faandi mbei Jefita bi ko heepi de?

8, 9. (a) Un soni bi dë a di Wëti di Gadu bi da Mosesi, bi sa heepi Jefita? (b) Andi bi dë di möön fanöudu soni da Jefita?

8 Jefita bi dë wan taanga sodati, nöö a bi sabi soni u dee Isaëli sëmbë, söseei a bi sabi di Wëti di Gadu bi da Mosesi bunu. Di fasi fa Jehovah bi ta libi ku dee sëmbë fëën, bi mbei a ko sabi andi da bunu ku andi da hogi (Kuutuma 11:12-27). U di Jefita bi sabi andi da bunu ku andi da hogi, mbei a bi ta sabi andi a bi musu du te a kë du wan soni. A bi sabi taa Jehovah an lobi sëmbë di abi taanga hatiboonu, ku sëmbë di ta toona du hogi ku wan sëmbë di bi du hogi ku ën. Söseei a bi sabi taa Gadu kë u dee sëmbë fëën lobi de na de. Boiti di dë, di Wëti di Gadu bi da Mosesi, bi lei ën unfa a musu ta libi ku wotowan, söseei unfa a musu ta libi ku dee sëmbë dee ta buuse ën.Lesi Ëkisodesi 23:5; Leifitiki 19:17, 18.

9 Kandë di woto u Josëfu hën bi heepi Jefita. Kandë a bi lei unfa Josëfu bi abi tjalihati da dee baaa fëën, hii fa de bi ta buuse ën (Kenesesi 37:4; 45:4, 5). Kandë di pakisei di Jefita bi pakisei u di woto aki, bi heepi ën u du soni a wan fasi di ta kai ku Jehovah. Dee soni di dee baaa u Jefita bi du ku ën bi hati ën seei. Ma Jefita an bi luku a di soni dë. Di feti di a bi musu feti da di në u Jehovah, ku dee sëmbë fëën, bi dë di möön fanöudu soni dëën (Kuutuma 11:9). A bi dë kabakaba u hoi hënseei a Jehovah. Di soni aki mbei Jehovah bi mbei hën ku dee Isaëli sëmbë bi feni gaan bunu.Hebelejën 11:32, 33.

Wa musu kë disa u dini Jehovah u di wan sëmbë du wan soni ku u di hati u

10. Unfa dee lai dee Gadu ta da u sa heepi u fuu ta du soni kuma Keesitu sëmbë a di ten aki?

10 U sa lei wan soni a di woto u Jefita u? Andi woo du ee wan baaa nasö wan sisa fuu du wan soni ku u di hati u, nasö ee u ta si kuma de an libi bunu ku u? Wa musu kë disa u dini Jehovah u di wan sëmbë du wan soni di hati u. Nöiti wa musu disa u go a dee komakandi, nasö u du soni makandi ku di kemeente. Boo djeesi Jefita, nöö boo piki Jehovah buka. Di soni aki o heepi u fuu saandi u musu du te wan soni ta taanga da u. A sö wan fasi woo sa ko dë sëmbë di wotowan sa djeesi.Loomë 12:20, 21; Kolosën 3:13.

U TA LEI TAA U ABI BIIBI TE U DË KABAKABA U DU SONI DA JEHOVAH

11, 12. Andi Jefita bi paamusi Jehovah, nöö andi di soni aki bi kë taki?

11 Jefita bi sabi taa a bi abi Gadu fanöudu u heepi ën u fii dee Isaëli sëmbë puu a dee Amon sëmbë maun. A bi paamusi Jehovah taa ee a mbei a wini di feti, nöö a o dëën di fosu sëmbë di o kumutu nëën wosu ko miti ën te a kumutu a di feti. Di sëmbë aki bi o dë kuma wan soni di a o „tjuma kuma paima” da Gadu (Kuutuma 11:30, 31). Andi di soni aki kë taki?

12 Jehovah ta buuse di tjuma di sëmbë ta  tjuma sëmbë paka paima. Nöö fëën mbei u sabi taa Jefita an bi o tjuma wan sëmbë da Gadu tuutuu (Detolonomi 18:9, 10). A di Wëti di Gadu bi da Mosesi, di tjuma di wan sëmbë bi o tjuma wan soni da Jehovah, bi dë kuma wan apaiti kado di a ta tja go dëën. Jefita bi kë taki taa di sëmbë di a bi o da Jehovah bi o ta dini ën a di tenti fëën hii ën libi longi. Jehovah bi haika Jefita, nöö a bi heepi ën faa wini di feti (Kuutuma 11:32, 33). Ma ambë Jefita bi o da Jehovah?

13, 14. Unfa dee soni dee Jefita taki a Kuutuma 11:35 ta lei fa a bi abi biibi tjika?

13 Pakisei di woto di u bi konda a bigi u di woto aki. Di Jefita kumutu a di feti, nöö di fosu sëmbë di ko miti ën, da di wan kodo mujëë mii fëën di a lobi gaanfa seei! Jefita bi o hoi hënseei a di soni di a bi paamusi Jehovah u? A bi o da Jehovah di mujëë mii fëën faa go ta dini ën hii hën libi longi a di tenti u Gadu ö?

14 Wë u sa taki taa dee mama wëti dee dë a dee wëti di Gadu bi da Mosesi bi heepi Jefita faa bi du di möön bunu soni. Kandë a bi mëni di soni di sikifi a Ëkisodesi 23:19, di ta taki taa dee sëmbë u Gadu musu dë kabakaba u da Jehovah dee möön bunu soni di de abi. Di Wëti ta taki söseei taa te wan sëmbë mbei wan buka ku Jehovah „nöö a musu du di soni di a taki. A musu du hii soni di a taki taa a o du” (Nöbu 30:2). Hana bi abi wan taanga biibi. Nöö a kan taa a bi libi a di ten u Jefita. Leti kumafa Hana bi musu hoi hënseei a di buka di a bi mbei, sö nöö Jefita bi musu hoi hënseei a di buka di a bi mbei tu, hii fa a bi sabi taa a bi o taanga da hën ku di mujëë mii fëën. U di di mujëë mii fëën bi o dini Gadu a di tenti fëën, mbei an bi o sa pai miii nöiti. Nöö na wan sëmbë bi o dë u tja di në u Jefita go dou, söseei na wan sëmbë bi o feni dee gudu fëën (Kuutuma 11:34). Hii fa a bi dë sö, tökuseei Jefita bi lei taa a bi abi biibi a  Gadu, di a bi taki taa: „Mi jabi mi buka paamusi Jehovah wan soni, nöö nöunöu ma sa bia buka möön” (Kuutuma 11:35). Jehovah bi wai ku di gaan soni di Jefita bi dë kabakaba u du dëën, nöö a bi mbei Jefita feni gaan bunu tu. I bi o lei taa i abi biibi kuma Jefita tu ö?

15. Un buka sömëni fuu mbei, nöö unfa u sa lei taa u abi biibi?

15 Te u buta u libi a Jehovah maun, hën da u ta mbei wan buka ku ën taa woo du di kë fëën, aluwasi a sa taanga da u. U sabi taa so juu a bi o ta taanga da u fuu du di soni di u paamusi ën. Ma unfa a dë te de hakisi u fuu du wan soni di an ta kai ku u? Ee u ta mbei möiti u piki Gadu buka aluwasi a taanga da u, nöö a sö wan fasi u ta lei taa u ta hoi useei a di buka di u bi mbei. Kandë a sa taanga da u fuu disa so soni di u lobi seei, ma dee bunu dee Jehovah o da u, o bigi möön dee soni dë (Maleaki 3:10). Ma andi di mujëë mii u Jefita bi du? Andi a bi du di a jei di soni di hën tata bi paamusi Jehovah?

Unfa u sa lei taa u abi biibi kuma Jefita ku di mujëë mii fëën? (Luku palaklafu 16, 17)

16. Andi di mujëë mii u Jefita bi du di a jei di soni di hën tata paamusi Gadu? (Luku di peentje a bigi u di woto.)

16 Di soni di Jefita bi paamusi Jehovah an bi dë kuma di u Hana. Hana hën a bi paamusi Jehovah taa a o dëën di womi mii fëën Samuëli, faa ta dini ën a di tenti fëën kuma wan Nasilei sëmbë (1 Samuëli 1:11). Ee wan sëmbë bi dë wan Nasilei sëmbë, nöö a bi sa tööu, söseei a bi sa pai miii. Ma Jefita bi da Gadu di mujëë mii fëën kuma wan soni di de ta tja go „tjuma kuma paima”. Nöö fëën mbei an bi o sa abi wan manu, nöö an bi o sa pai miii tu (Kuutuma 11:37-40). Pakisei di soni aki! Di mujëë mii u Jefita bi o sa tööu ku di möön bumbuu womi u di köndë, u di hën tata bi dë wan hedima u Isaëli. Ma na di libi dë a bi o ko abi, ma a bi o ta wooko a di tenti u Gadu. Andi di njönku mujëë aki bi du? A bi lei taa di dini u Jehovah bi dë di fosu soni nëën libi. Fëën mbei a bi piki hën tata taa: „Du ku mi kumafa i paamusi ën” (Kuutuma 11:36). Di mujëë mii u Jefita bi buta taa an bi o tööu, nöö an bi o pai miii tu, u di dini u Jehovah hedi. Unfa u sa djeesi ën a di fasi fa a bi dë kabakaba u disa dee soni dee a bi o kë du?

Di mujëë mii u Jefita bi buta taa an bi o tööu, nöö an bi o pai miii tu, u di dini u Jehovah hedi

17. (a) Unfa u sa djeesi Jefita ku di mujëë mii fëën a di biibi di de bi abi? (b) Unfa dee soni dee sikifi a Hebelejën 6:10-12 ta da u taanga fuu disa soni fuu sa dini Jehovah?

 17 Dusudusu njönku Keesitu sëmbë ta buta taa de an o tööu, söseei taa de an o pai miii. So juu de ta dë sö u wan pisiten nöö. Faandi mbei de ta du di soni aki? Wë u di de kë buta pakisei a di dini u Jehovah möön gaanfa. Boiti di dë, sömëni u dee sëmbë dee ko gaandi kaa ta tei di ten di de bi musu dë ku dee mii u de, nasö ku dee mii dee kai de avo, u du möön soni a dini u Jehovah. So u de ta heepi di ölganisaasi u mbei zali, nasö de nango a di Siköö da Könuköndë peleikima, nöö de ta foloisi go heepi kemeente di abi möön hia peleikima fanöudu tu. Wotowan ta seeka soni a fesi u de sa peleiki möön hia a di pisiten di u ta mëni di dëdë u Jesosi. Nöiti Jehovah o fëëkëtë dee soni di dee sëmbë aki bi dë kabakaba u du, u di de bi abi biibi. (Lesi Hebelejën 6:10-12.) Unfa a dë ku i? Joo dë kabakaba u disa so soni di i bi ta du fii sa dini Jehovah möön gaanfa u?

ANDI U LEI A DI WOTO AKI?

18, 19. Andi u bi lei a di Bëibel woto u Jefita ku di mujëë mii fëën, nöö unfa u sa djeesi de?

18 Andi bi heepi Jefita di sömëni soni bi ta taanga dëën? A bi mbei Jehovah lei ën andi a bi musu du. An bi mbei sëmbë puu hën pakisei a di dini u Jehovah. Söseei a bi lei taa a bi abi biibi aluwasi woto sëmbë bi du soni di bi hati ën. Jehovah bi mbei Jefita ku di mujëë mii fëën feni bunu, u di de bi dë kabakaba u disa soni di de bi o kë du u di dini fëën hedi. Nöö a bi tei de u mbei di tuutuu biibi go a fesi. Hii fa wotowan an bi ta du bunu soni möön, tökuseei Jefita ku di mujëë mii fëën bi lei taa de abi biibi a Jehovah.

19 Di Bëibel ta piki u taa u musu „ta djeesi dee otowan nöömö, dee bi tai hati ta biibi tefa de feni dee soni dee Gadu bi paamusi de” (Hebelejën 6:12). Boo djeesi Jefita ku di mujëë mii fëën, u di woo ta hoi a pakisei taa te u ta hoi useei a Jehovah, nöö a o mbei u feni bunu.