Skip to content

Skip to secondary menu

Skip to table of contents

Jehovah Kotoigi

Saamakatöngö

Di Hei Wakitimawosu  |  Nö. 1 u 2017

Ko sabi dee wini dee i sa feni te i lo’ u da wotowan soni

Ko sabi dee wini dee i sa feni te i lo’ u da wotowan soni

„DI BESI sa go, ma di sinëisi womi aki o fika!” Di soni aki Alexandra bi jei di a bi dë a wan besi dendu. A bi o kumutu a wan köndë u Zuid-Amerika faa go a wan wotowan. Wë a saka a di besi go luku andi ta pasa, hën a si wan njönku sinëisi womi di ta mbei möiti faa konda da wan siköutu a Sipanjölutöngö andi bi miti ën. U di Alexandra bi dë a wan Sinëisitöngö kemeente u dee Jehovah Kotoigi, mbei a bi sa puu di fan u di womi aki da di siköutu.

Di sinëisi womi bi taki taa a bi abi pampia u di köndë, ma wan sëmbë fufuu de, nöö de fufuu möni fëën tu. Bigibigi di siköutu an bi kë biibi di sinëisi womi, nöö a bi mëni taa Alexandra bi ta bai sëmbë u go sei a wan woto köndë. Te u kaba fëën di siköutu ko biibi de awaa, ma tökuseei di sinëisi womi bi musu paka wan möni u di an bi abi dee pampia fëën. U di di sinëisi womi an bi abi na wan möni, mbei Alexandra leni ën 20 Amëëkandala. Di womi bi tei di soni aki u bigi. Hën a taki taa a o dëën möön leki 20 Amëëkandala baka. Alexandra piki ën taa an bi ta suku paka, ma a ta wai u heepi wotowan, u di a ta fii taa hën a musu du. A da di sinëisi womi wanlö buku di ta konda soni u Bëibel, söseei a dëën degihati faa hakisi dee Kotoigi u de ko lei ën soni u Bëibel.

A ta dë wan piizii soni seei, te u jei taa wotowan ta heepi sëmbë di de an pena sabi seei. Wë sëmbë u hii pei keiki nasö sëmbë dee an nango a keiki seei ta du di soni aki. I bi o dë kabakaba u heepi wotowan a sö wan fasi tu ö? Di fasi fa joo piki di hakisi aki da wan fanöudu soni seei, u di Jesosi bi taki taa: „Dee sëmbë ta da sëmbë soni, de dë waiwai möön leki dee sëmbë ta feni” (Tjabukama 20:35). Könima seei öndösuku di soni aki tu. De taki taa di da di u ta da wotowan soni ta bunu da u seei. Boo go luku na un fasi a ta bunu da u.

„DI SËMBË DI TA DA SONI KU WAI NËËN HATI”

Öndösukuma ko si taa te wan sëmbë ta da wotowan soni, nöö di sëmbë dë ta dë waiwai. Apösutu Paulosu bi sikifi taa „di sëmbë di ta da soni ku wai nëën hati, hën Gadu ta lobi”. A bi ta taki u Keesitu sëmbë di bi ta heepi dee wotowan dee ta dini Gadu makandi ku de (2 Kolenti 8:4; 9:7). Paulosu an bi ta taki taa dee sëmbë aki bi ta da wotowan soni u di de bi ta dë waiwai. Ma de bi ta dë waiwai u di de bi ta da wotowan soni.

Wan u dee soni di öndösukuma ko fusutan, hën da te i ta da wotowan soni, nöö „a ta da i wan fii di ta mbei i ta piizii, di ta mbei i ta kë libi bunu ku wotowan, söseei di ta mbei i ta futoou wotowan tu”. Wan woto soni di öndösukuma ko si tu, hën da „te wan sëmbë ta da wotowan möni, nöö a ta möön dë waiwai möön leki te a bi o tei di möni dë u go bai soni da hënseei”.

I ta fii taa di fasi fa soni nango da i ta mbei a ta taanga da i fii da wotowan soni ö? Hoi a pakisei taa hii sëmbë sa ko abi di piizii di wan sëmbë ta abi te a ta „da soni ku wai nëën hati”. Te i ta da  wotowan soni ku hii i hati, nöö an a’ fu dë wan gaan soni. Wan Jehovah Kotoigi manda wan biifi da dee sëmbë dee ta sikifi di buku aki, nöö a bi manda wan möni tu. A bi sikifi a di biifi taa: „Wan piki möni nöö mi bi sa ta buta a di Könuköndë zali a hii dee jaa dee pasa aki. Ma Jehovah Gadu bi toona da mi möön leki fa mi bi da. . . . Mi ta da di ölganisaasi u Jehovah tangi u di a mbei taa mi sa da möni. Di soni aki ta da mi kötöhati seei.”

Na möni nöö wan sëmbë sa da wan wotowan, ma sömëni woto soni dë tu di wan sëmbë sa da.

TE I TA DA WOTOWAN SONI, NÖÖ I SA KO ABI WAN MÖÖN BUNU GÖSÖNTU

Te i ta da sëmbë soni, nöö i ku wotowan tuu ta feni wini fëën

Di Bëibel ta taki taa: „Wan womi di ta libi bunu ku wotowan o feni wini, ma wan hogihati sëmbë o du soni u hogi miti ën” (Nöngö 11:17). Sëmbë di abi sutifasi ta lo’ u da wotowan soni, söseei de ta dë kabakaba u heepi wotowan ku di ten u de, di kaakiti u de, ku sömëni soni jeti. Di soni aki ta heepi dee lö sëmbë aki u feni wini a peipei fasi. Wë a ta mbei de ko abi wan möön bunu gösöntu.

Dee soni dee könima öndösuku ta lei taa dee sëmbë dee ta heepi wotowan ku hii de hati, an ta abi sinkii hati sö möön, söseei a ta mbei de fii möön bunu. Möön gaanfa de ta abi wan möön bunu gösöntu. Te wan sëmbë ta da wotowan soni ku hii hën hati, nöö a ta heepi ën tu ee a abi wan siki di an sa kula möönsö, boo taa siki kuma HIV. Dee könima ko si tu taa sëmbë di bi ta bebe daan dööngö di ko ta heepi wotowan, an ta fii booko saka sö möön, söseei de an ta toona ta bebe daan dööngö möön.

Di soni mbei u taki di soni aki, hën da de taki taa „te wan sëmbë abi fii da wotowan, te a abi tjalihati u wotowan ku te a abi sutifasi, nöö a ta heepi ën fu an fii booko saka hesihesi”. Te wan sëmbë lo’ u da wotowan soni, nöö an ta abi sö hia bookohedi möön, söseei buuu fëën an ta hei poi. Dee sëmbë dee mujëë u de, nasö manu u de dëdë, ta fii möön bunu te de ta heepi wotowan.

An dë u taki taa te u lo’ u da sëmbë soni, nöö a ta mbei u fii bunu.

TE I TA DA WOTOWAN SONI, NÖÖ WOTOWAN O TA DA I TU

Jesosi bi piki dee bakama fëën taa: „I musu ta da sëmbë soni, nöö i seei o kisi tu. Nöö möön hia seei joo kisi e. Biga Gadu o lai ën a wan gaan manda ta zin ta fugu tee di manda an sa tei möön, nöö a hopo ën da i. Biga ku di wan seepi maaka di i ta maaka da otowan, nöö ku ën seei de o maaka da i tu” (Lukasi 6:38). Te i ta da wotowan soni, nöö de ta dë ku tangi, nöö deseei o ko lo’ u da sëmbë soni tu. Di soni aki sa mbei u ku wotowan ko ta libi makandi, söseei u ku de sa ko dë mati tu.

Te u ta da sëmbë soni, nöö a sa mbei u ku wotowan ko ta libi makandi, söseei u ku de sa ko dë mati tu

Sëmbë di ta öndösuku soni u libisëmbë ko si taa „di da di wan sëmbë ta da wotowan soni hii juu, ta mbei taa wotowan ta kë da wotowan soni tu. Te u ta lesi woto u sëmbë di bi du gaan soni da wotowan, nöö a ta mbei u ta kë du soni da wotowan tu”. Wan woto öndösuku di de bi du ta lei tu taa „wan kodo sëmbë  sa mbei sömëni sëmbë du wan soni, kandë höndöhöndö sëmbë seei, aluwasi a bi sabi de, nasö ee an bi sabi de wan daka”. Di wan kodo pasi di i da wan sëmbë wan soni a di kamian ka i dë, sa mbei taa wotowan ta kë da wotowan soni tu. Ja bi o kë libi a wan kamian ka wotowan ta da sëmbë soni ö? Wë a bi o bunu seei ee möön hia sëmbë bi sa abi di guwenti u ta da wotowan soni.

Wan soni di bi pasa a di foto Florida di dë na Amëëkanköndë, ta lei u taa di soni aki dë sö tuutuu. Wanlö Jehovah Kotoigi bi go heepi sëmbë di wan gaan ventu bi böö booko soni a di foto dë. Di de bi ta wakiti dee lai u seeka di wosu di de bi musu seeka, hën de si taa di peni u wan sëmbë bi booko, hën de seekëën. Di sëmbë di bi abi di peni bi sikifi wan biifi da di hedi kantoo u dee Jehovah Kotoigi. A bi sikifi taa: „Hii juu mi o ta dë ku tangi a hati da di soni aki. Ma bi si sëmbë abi sutifasi sö wan daka.” U di a bi dë ku tangi a hati, mbei a bi da dee Kotoigi wan möni u de sa du di wooko u de.

DJEESI DI SËMBË DI TA MÖÖN DA SËMBË SONI

Wan woto soni di öndösukuma ko fusutan tu, hën da di heepi di wan sëmbë ta kë heepi wotowan, da wan fii di hii libisëmbë abi. Piki mii di an ta pena fan jeti ta lei taa de an ta pakisei deseei nöö. Unfa a waka? Wë di Bëibel ta da u di piki aki te a ta taki taa: „Gadu mbei libisëmbë kumafa hënseei dë”, hën da de abi dee fasi dee Gadu abi tu.Kenesesi 1:27.

Wë Jehovah Gadu lo’ u da sëmbë soni. A da u di libi ku hii soni di u abi fanöudu fuu sa ta dë waiwai (Tjabukama 14:17; 17:26-28). U sa ko sabi di Tata fuu di dë a libi ala, söseei u sa ko sabi dee soni a kë du da u, te u ta lei soni a di Wöutu fëën, di Bëibel. Di Bëibel ta taki tu taa Gadu seeka soni da u fuu sa dë waiwai a di ten di ta ko. * (1 Johanisi 4:9, 10). U di Jehovah da di Sëmbë di bigi da wotowan soni, söseei u di a mbei i kumafa hënseei dë, mbei an musu bigi da i te soni o nango bunu ku i, söseei taa a o ta wai ku i, te i ta djeesi ën a di fasi dë.Hebelejën 13:16.

I sabi Alexandra jeti di u bi taki fëën a bigi u di woto aki ö? Unfa soni bi waka dëën? Hii fa wan woto sëmbë di bi dë a di besi dendu bi taki taa a poi di möni fëën, tökuseei di womi di a bi heepi bi suku baka u wanlö mati fëën di bi dë a di foto ka di besi bi tapa. Nöö Alexandra bi feni di 20 Amëëkandala fëën baka. Boiti di dë, di womi bi du di soni di Alexandra bi piki ën, hën a bi bigi lei soni u Bëibel. A bi wai seei u miti di womi aki dii liba baka di dë, a wan Sinëisitöngö könklësi u dee Jehovah Kotoigi di de bi hoi a Pelu. Di womi bi kai Alexandra ku dee sëmbë dee bi ko ku ën a di könklësi u de go njan a di njanjan wosu fëën.

Te u ta da wotowan soni, söseei te u ta heepi de, nöö u ta dë waiwai. Möönmöön te u ta heepi sëmbë u de ko sabi Jehovah Gadu, di Sëmbë di ta da u hii bunu soni! (Jakobosi 1:17) I ta feni wini u di i ta da sëmbë soni tu ö?

^ pal. 21 Ee i kë sabi möön soni u di woto aki, nöö luku di buku Andi di Bëibel ta lei u tuutuu? di Jehovah Kotoigi tja ko a döö, söseei di dë u feni a di website fuu www.jw.org/srm. Go a BUKU KU WOTO SONI > BUKU KU BROCHURE.