Skip to content

Skip to secondary menu

Skip to table of contents

Jehovah Kotoigi

Saamakatöngö

Di Hei Wakitimawosu (u lei soni a komakandi)  |  ëlufumu-liba 2016

I abi gaan lesipeki da di Wöutu u Jehovah u?

I abi gaan lesipeki da di Wöutu u Jehovah u?

„Di u konda di Buka da unu naandë, nöö un piki ën leti kuma a Gadu a kumutu.”1 TESALONIKA 2:13.

KANDA: 114, 113

1-3. Andi bi sa dë di soni di bi mbei Jodia ku Sentike bi kisi toobi? Unfa u sa köni be dee lö toobi aki an pasa? (Luku di peentje a bigi u di woto.)

U TA tei ën u bigi taa u abi di Bëibel, u di u sabi taa a dë di Wöutu u Gadu. Di Bëibel abi lai di sa heepi u fuu köni be hogi an miti u, söseei a sa leti u buta a pasi te u mbei wan föutu. Andi u ta du te de ta da u lai di kumutu a Bëibel? Pakisei dee tu mujëë de ta kai Jodia ku Sentike, di bi dë salufuwan a di ten u dee fesiten Keesitu sëmbë. Di Bëibel ta piki u taa de bi kisi toobi, ma an ta piki u faandi mbei de bi kisi toobi. Boo go luku andi bi sa dë di soni di bi mbei de kisi toobi.

2 A sa dë sö taa Jodia kai wantu baaa ku sisa u de ko njan nëën pisi. Ma an bi kai Sentike. Bakaten di Sentike ko jei dee wotowan ta taki fa de bi go njan a Jodia pisi, hën hati fëën boonu seei. Kandë a bi pakisei taa: ’Ma sa biibi taa Jodia an kai mi seei! Mi bi mëni taa mi ku ën bi dë gaan mati.’ Sentike bigi ta fii kuma Jodia an bi lobi ën tuutuu, söseei taa an bi kë hulu ën möön. Fëën mbei Sentike kai dee seei sëmbë ko njan nëën pisi, ma an kai Jodia! Kandë di soni aki bi toobi wotowan a di kemeente. Di Bëibel ta lei u  taa Paulosu bi bai dee tu sisa aki, nöö a bi da de taanga u libi fiifii ku deseei. A sa dë sö taa de bi haikëën, hën de dini Jehovah waiwai go dou.Filipi 4:2, 3.

3 So juu useei sa abi wan toobi ku wan baaa nasö wan sisa a di kemeente fuu. Ma ee u du dee soni dee sikifi a Bëibel, nöö u sa seeka dee lö toobi dë. U sa ta köni be dee toobi aki an pasa tu. Nöö te u du dee soni di di Bëibel ta piki u, nöö woo lei taa u ta tei di Wöutu u Jehovah u bigi tu.Psalöm 27:11.

DI BËIBEL TA LEI U FUU DUWENGI DEE FII FUU

4, 5. Un lai di Wöutu u Gadu ta da u te a nama ku di duwengi di u musu duwengi dee fii fuu?

4 A ta taanga da u fuu duwengi dee fii fuu. Te wan sëmbë kosi u nasö te wan sëmbë an libi bunu ku u, kandë u di u da sëmbë u wan woto lö, nöö a sa hati u seei, nasö hati fuu sa boonu. Di soni aki sa hati u seei, möönmöön ee di sëmbë di ta kosi u da wan baaa fuu nasö wan sisa fuu a di biibi. Un lai dë a di Wöutu u Gadu di sa heepi u?

5 Jehovah sabi andi sa pasa te sëmbë an ta duwengi dee fii u de. Te hati fuu boonu, nöö u sa taki soni nasö du soni di sa hati u bakaten. A di Bëibel Jehovah ta piki u taa u musu duwengi useei te hati fuu boonu. A ta taki taa: „Ja musu dë wan sëmbë di hati fii ta boonu hesi.” Pakisei unfa wa o ta abi toobi te u ta du di soni di sikifi a di tëkisi aki! (Lesi Peleikima 7:9; Nöngö 16:32.) Di Bëibel ta piki u tu taa u musu ta da wotowan paadon. Jesosi bi taki taa ee wa ta da wotowan paadon, nöö Jehovah an o da u paadon tu (Mateosi 6:14, 15). I musu ko abi möön pasensi ö? I ta dë kabakaba u da wotowan paadon u?

6. Andi sa pasa ee wa ta duwengi dee fii fuu?

6 Ee wa ta duwengi dee fii fuu, nöö kandë hii juu hati fuu o ta boonu, nöö kandë woo bigi ta buuse wan sëmbë tu. U sa mbei wotowan a di kemeente ta du di wan seei soni tu. Hii fa woo ta pooba u du kuma hati fuu an boonu, tökuseei woto sëmbë o ko si ën bakaten. Te di soni aki pasa, nöö dee baaa ku dee sisa fuu an o kë hulu u möön (Nöngö 26:24-26). Dee gaanwomi o mbei möiti u heepi u ku di Bëibel be hati fuu an musu boonu sö möön, fu wa ta buuse wotowan möön, ma fuu ta da wotowan paadon (Leifitiki 19:17, 18; Loomë 3:11-18). Te dee gaanwomi mbei möiti u heepi u, nöö woo du dee soni di di Wöutu u Jehovah ta piki u ö?

JEHOVAH HËN TA TII U

7, 8. (a) Unfa Jehovah ta tii dee sëmbë fëën? (b) Andi da so u dee soni di di Bëibel ta piki u, nöö faandi mbei u musu du de?

7 A di ten aki Jehovah ta tii dee sëmbë dee dë a di ölganisaasi fëën a goonliba aki, söseei a ta lei de soni tu. Na un futu? A buta Keesitu kuma „hedima fuu dee sëmbë fëën”, nöö Keesitu buta di „köni saafu di dë u futoou”, u lei dee sëmbë u Gadu soni, söseei u tii de (Efeise 5:23; Mateosi 24:45-47). Leti kumafa di tii kulupu u di ten u dee fesiten Keesitu sëmbë bi ta tei di Bëibel u bigi, u di a dë di Wöutu u Gadu, sö nöö di köni saafu ta tei ën u bigi tu. (Lesi 1 Tesalonika 2:13.) Andi da so u dee soni di di Bëibel ta piki u?

8 Di Bëibel ta piki u taa u musu nango hii juu a dee komakandi (Hebelejën 10:24, 25). A ta da hii u tuu taanga fuu biibi dee soni di di Bëibel ta lei u (1 Kolenti 1:10). A ta piki u söseei taa u musu ta „suku di Könuköndë fosu” (Mateosi 6:33, NW). Di Bëibel ta piki u taa u musu go peleiki da dee sëmbë a de pisi, a kamian ka hia sëmbë ta pasa, söseei a hii së ka u sa feni sëmbë (Mateosi 28:19, 20; Tjabukama 5:42; 17:17; 20:20). A ta piki dee gaanwomi taa de musu ta heepi dee sëmbë u di kemeente u de libi limbolimbo a Gadu wojo (1 Kolenti 5:1-5,  13; 1 Timoteo 5:19-21). A ta piki u taa u sinkii musu ta dë limbolimbo, söseei a ta piki u taa wa musu ta pakisei soni nasö du soni di Jehovah ta buuse.2 Kolenti 7:1.

9. Ambë Jesosi buta u heepi u fuu fusutan di Wöutu u Gadu?

9 Kandë so sëmbë sa taki taa de an abi sëmbë fanöudu u ko lei de soni u Bëibel. Ma sensi di jaa 1919, hën Jesosi ta wooko ku di „köni saafu di dë u futoou”, u heepi dee sëmbë u Gadu u ko fusutan andi di Bëibel ta lei, söseei u de du andi a ta taki. Te u ta du dee soni di di Bëibel ta taki, nöö woo ta libi limbolimbo a Gadu wojo a di kemeente, woo ta libi fiifii ku useei, söseei woo ta libi makandi kuma wan famii. I sa hakisi iseei di soni aki: ’Mi o lei taa mi ta hoi miseei a Jesosi, u di mi o ta du dee soni di di saafu di dë u futoou ta piki mi ö?’

DI WAGI U JEHOVAH NANGO HESIHESI SEEI!

10. Andi di buku u Ezekiëli ta taki u di pisi u di ölganisaasi u Jehovah di dë a liba ala?

10 Di Bëibel ta lei u taa dee ëngëli u Jehovah an ta du soni fanjanfanjan tu. Ezekiëli bi si a wan wojolimbo sunjan fa Jehovah ta lëi wan wagi di sa lëi hesihesi go a hiniwan kamian ka a kë faa go (Ezekiëli 1:4-28). Di wagi aki da di pisi u di ölganisaasi u Gadu di dë a liba ala, di ta du wantewante andi a taki. Nöö a ta mbei di ölganisaasi fëën a goonliba aki ta du di wan seei soni tu. Pakisei dee sömëni soni dee tooka a di ölganisaasi u Gadu a dee teni jaa dee pasa aki. Hoi a pakisei taa Jehovah hën ta mbei dee soni aki ta tooka sö. Abiti möön Keesitu ku dee ëngëli o kii dee hogihati sëmbë puu a goonliba. Nöö hii sëmbë o ta lesipeki Jehovah ku di në fëën, söseei na wan sëmbë o ta kuutu di fasi fa a ta tii möön!

U ta tei ën u bigi taa dee baaa ku dee sisa aki ta wooko taanga u mbei dee zali ku dee woto kamian ka u ta dini Gadu! (Luku palaklafu 11)

11, 12. Andi di ölganisaasi u Jehovah du a dee lasiti daka aki?

11 Luku andi di ölganisaasi u Jehovah ta du a di ten aki. De ta mbei komakandi kamian. Höndöhöndö baaa ku sisa bi wooko taanga u mbei di njunjun hedikantoo u Jehovah Kotoigi di dë a Warwick na Amëëkanköndë. Dusudusu baaa ku sisa di kumutu a hii së u goonliba ta heepi u mbei dee Könuköndë zali ku dee Bëikantoo. Di kantoo di ta seti soni u mbei komakandi kamian a hii di goonliba di dë a New York, hën ta manda dee baaa ku dee sisa aki u go heepi. U ta tei ën u bigi taa dee baaa ku dee sisa aki ta wooko taanga sö! Nöö dee dinima u Jehovah dee dë a hii së u goonliba ta da möni u heepi du di wooko aki. Jehovah ta mbei dee sëmbë fëën feni gaan bunu, u di de abi sakafasi, söseei u di de ta hoi deseei nëën.Lukasi 21:1-4.

12 De ta kisi lei. Jehovah lo’ u lei dee sëmbë fëën soni (Jesaaja 2:2, 3). Pakisei dee peipei siköö dee u abi. U abi di Pionili-siköö, di Siköö da Könuköndë peleikima, di Giliati-siköö, di Siköö da njunjun sëmbë di ko a Bëtëli, di Siköö da Keling-gaanwomi ku de mujëë, di Gaanwomi-siköö, ku di Siköö da dee baaa u di Bëikantoo Komite ku de mujëë. Nöö a di website fuu jw.org, u sa feni di Bëibel ku woto buku jeti a höndöhöndö töngö. Di website abi wan pisi ka i sa feni soni da miii ku sëmbë u wan wosudendu, söseei wan pisi dë ka i sa lesi njunsu u Jehovah Kotoigi tu. I ta wooko ku jw.org te i ta peleiki, söseei te i ta du di Wosudendu Dini ö?

HOI ISEEI A JEHOVAH, NÖÖ WOOKO MAKANDI KU DI ÖLGANISAASI FËËN

13. Andi da dee soni di dee sëmbë u Jehovah musu ta du?

13 A dë wan gaandi u dë a di ölganisaasi u Jehovah, söseei fuu ko sabi andi a kë fuu du! Wë, u di u ko sabi andi ta kai ku Gadu, mbei u musu ta piki ën buka, söseei u musu ta du bunu soni. Hii fa sömëni sëmbë lo’ u du soni di an  bunu, tökuseei wa „musu lobi hogidu” leti kumafa Jehovah an lobi hogidu tu (Psalöm 97:10). Nöiti u musu dë kuma dee sëmbë dee ta pakisei taa „bunu da hogi, nöö hogi da bunu” (Jesaaja 5:20). U kë mbei Jehovah wai ku u. Fëën mbei u ta mbei hii möiti fuu ta libi limbolimbo nëën wojo (1 Kolenti 6:9-11). Dee soni dee Jehovah ta piki u a di Bëibel, da soni di sa tja wini ko da u. U lobi Jehovah, nöö u kë hoi useei nëën. Fëën mbei u ta du dee soni dee a ta piki u fuu du, te u dë a wosu, te u dë a zali, te u dë a wooko, te u dë a siköö, nasö a hiniwan woto kamian ka u dë (Nöngö 15:3). Pakisei na un woto ten u musu ta hoi useei a Gadu tu.

14. Unfa mama ku tata sa hoi deseei a Jehovah?

14 Di fasi fa u musu ta kiija dee mii fuu. A di Bëibel, Jehovah ta piki dee mama ku dee tata unfa de musu kiija dee mii u de. Keesitu sëmbë musu luku bunu u de an ko ta pakisei kumafa dee sëmbë u di goonliba aki ta pakisei (Efeise 2:2). Kandë a so kamian dee tata sa ta pakisei di soni aki: ’Wë aki mujëë hën ta kiija miii.’ Ma di Bëibel ta piki dee tata taa de musu ta lei dee mii u de soni u Jehovah (Efeise 6:4). Dee mama ku dee tata dee lobi Jehovah ta kë u dee mii u de dë gaan mati ku Jehovah, leti kumafa Samuëli bi dë wan gaan mati u Jehovah, di a bi dë mii jeti.1 Samuëli 3:19.

15. Unfa u sa lei taa u ta hoi useei a Jehovah, te u buta taa woo du wan fanöudu soni a u libi?

15 Di fasi fa u musu ta du soni. Ufö u buta taa woo du wan fanöudu soni a u libi, nöö u ta kë sabi ufö andi Jehovah ta pakisei fëën, sö taa u sa hoi useei nëën. Di Bëibel ku di ölganisaasi  u Jehovah sa heepi u. A di ten aki, so mama ku tata di foloisi go disa di köndë u de, buta taa de o manda di mii u de, go baka a di köndë ka de kumutu, faa go dë ku dee famii u de. Nöö a sö wan fasi di tata ku di mama sa wooko u de feni möni. A dë sö tuu taa a dë wan soni di deseei musu taki andi de o du, ma de musu hakisi deseei di soni aki: ’Unfa Jehovah o pakisei u di soni di u buta taa woo du?’ (Lesi Loomë 14:12.) A bi o möön bunu u pakisei andi di Bëibel ta taki ufö u du wan soni di nama ku di wosudendu fuu, nasö ku di wooko fuu. U abi di Tata fuu fanöudu faa heepi u, u di wa sa taki da useei naasë u musu tuwë futu.Jelemia 10:23.

16. Andi wan mama bi musu du, di a bi pai wan womi mii? Andi bi heepi ën faa du di möön bunu soni?

16 Baka di wan womi ku hën mujëë bi foloisi go a wan woto köndë, hën de ko pai wan womi mii. De taki taa de o manda di mii go baka a di köndë ka de kumutu, faa go libi ku dee avo fëën. Ma a di wan seei ten dë, di mujëë bigi lei soni u Bëibel ku dee Jehovah Kotoigi. A bi lei taa hën abi di faantiwöutu u lei di womi mii fëën soni u Jehovah (Psalöm 127:3; Nöngö 22:6). Di mujëë bi begi Jehovah, leti kumafa a bi lei a di Bëibel. A bi hakisi Jehovah faa heepi ën u du di möön bunu soni (Psalöm 62:7, 8). A bi fan ku di sisa di bi ta lei ën soni u Bëibel, söseei a bi fan ku wotowan a di kemeente tu. Hii fa dee famii fëën ku dee mati fëën bi ta piki ën taa a musu manda di mii go da dee avo fëën, tökuseei a bi taki taa an bi o bunu u du sö wan soni. Di manu fëën bi si unfa dee baaa ku dee sisa u di kemeente bi ta heepi di mujëë fëën, ku di mii u de. Di soni aki bi bigi dëën tee taa a bi bigi ta lei soni u Bëibel tu, söseei a bi bigi nango a dee komakandi makandi ku di wosudendu fëën. Pakisei unfa di mujëë aki bi wai seei di a si fa Jehovah bi piki di begi fëën!

17. Un soni u musu ta du, te u ta lei wan sëmbë soni u Bëibel?

17 Di fasi fa u musu ta du dee soni dee Jehovah ta piki u. Ee u ta hoi useei a Gadu, nöö woo du dee soni dee a ta mbei di ölganisaasi fëën ta piki u. Luku andi u musu du baka te u bigi lei wan sëmbë soni a di buku Andi di Bëibel ta lei u tuutuu? De piki u taa u musu ta tei wantu miniti baka te u lei wan sëmbë soni u Bëibel, fuu heepi di sëmbë ko sabi möön soni u di ölganisaasi u Jehovah. U sa lei ën di fëlön Andi de ta du a wan Könuköndë zali? Söseei u sa lei ën soni a di brochure Ambë ta du di kë u Jehovah a di ten aki? Te u kaba lei di sëmbë soni ku di Bëibel lei-buku, nöö u sa heepi ën faa ko abi wan möön „taanga” biibi, u di woo lei ën soni ku di buku „Meki Gado tan lobi yu”, aluwasi a tei dopu kaa (Kolosën 2:7). I ta du di soni di di ölganisaasi taki aki ö?

18, 19. Andi da wantu soni di musu mbei u da Jehovah tangi?

18 U musu da Jehovah tangi u dee sömëni soni di a du da u! Wan u dee soni aki hën da u di „hën ta da u libi, mbei u ta dë ta buli” (Tjabukama 17:27, 28). A da u di Wöutu fëën tu, di Bëibel. Leti kumafa dee Keesitu sëmbë u Tesalonika bi ta tei di kado aki u bigi, sö nöö useei ta tei ën u bigi tu, u di a dë di Wöutu u Gadu.1 Tesalonika 2:13.

19 Di Bëibel bi heepi u fuu ko dë zuntu ku Jehovah, nöö hënseei ko zuntu ku u tu (Jakobosi 4:8). U dë ku tangi a hati seei taa di Tata fuu kai u fuu ko a di ölganisaasi fëën! U ta fii leti kumafa di Psalöm sikifima bi ta fii, di a bi sikifi taa: „Da Jehovah tangi, biga a abi bunuhati. Di bunuhati fëën dë u teego” (Psalöm 136:1). A hii dee vers u Psalöm 136, di Psalöm sikifima bi toona taki taa: „Di bunuhati fëën dë u teego.” Ee u hoi useei a Jehovah, söseei ee u ta du dee soni dee a ta mbei di ölganisaasi fëën ta piki u, nöö a o da u di libi u teego, söseei a o hoi hënseei a u, u teego tu!