Skip to content

Skip to secondary menu

Skip to table of contents

Jehovah Kotoigi

Saamakatöngö

Di Hei Wakitimawosu (u lei soni a komakandi)  |  jailiba 2016

„U kë go ku unu”

„U kë go ku unu”

„U kë go ku unu, biga u jei taa Gadu dë ku unu.”SAKALIA 8:23.

KANDA: 65, 122

1, 2. (a) Andi Jehovah bi taki taa bi o pasa a di ten fuu? (b) Un hakisi woo luku a di woto aki? (Luku di peentje a bigi u di woto.)

JEHOVAH bi taki taa a di ten fuu aki, nöö „teni womi o kumutu a hii dee peipei nasiön, di ta fan peipei töngö, nöö de o kisi wan Dju panjan hoi nëën koosu, nöö de o taki taa: „U kë go ku unu, biga u jei taa Gadu dë ku unu” (Sakalia 8:23). Di „Dju” aki da dee sëmbë dee Gadu salufu ku di santa jeje fëën. De ta kai de „dee Isaëli sëmbë u Gadu” tu (Galasia 6:16). Dee „teni womi” da dee sëmbë dee o libi u teego a goonliba aki. Dee sëmbë aki sabi taa Jehovah dë ku dee salufuwan, nöö de ta si ën kuma wan gaandi u dini Jehovah makandi ku de.

2 Di tjabukama u Gadu de kai Sakalia bi taki taa dee sëmbë u Gadu o ta libi makandi ku deseei. Wë di wan seei soni nöö Jesosi bi taki tu. A bi taki u dee sëmbë dee ta wakiti u go libi a liba ala taa de „dë biti seei”, nöö dee sëmbë dee ta wakiti u libi a goonliba aki da dee „oto sikafu”. Jesosi bi taki taa hii de tuu bi o dë „wan kodo hipi” nöö de bi o waka nëën baka, biga hën da di „wan kodo sikafuma” u de (Lukasi 12:32; Johanisi 10:16). Wë u di tu kulupu dë, mbei so sëmbë sa hakisi deseei taa: (1) Dee woto sikapu musu u sabi dee në u hii dee salufuwan u di ten aki ö? (2) Unfa dee salufuwan  musu ta pakisei u deseei? (3) Unfa mi musu libi ku wan sëmbë a di kemeente di bigi ta njan di bëëë, ta bebe di win, te u ta mëni di dëdë u Jesosi? (4) Mi musu ta booko mi hedi te mi ta si taa dee salufuwan dee ta njan di bëëë, ta bebe di win, ta ko möön hia te u ta mëni di dëdë u Jesosi ö? Di woto aki o piki dee hakisi aki.

U MUSU U SABI DEE NË U HII DEE SALUFUWAN U DI TEN AKI Ö?

3. Faandi mbei wa sa sabi seiki ambë ku ambë o dë a dee 144.000 sëmbë dendu?

3 Dee woto sikapu musu u sabi dee në u hii dee salufuwan u di ten aki ö? Wë nönö. Faandi mbei? Wë u di na wan fuu sabi seiki ee dee salufuwan aki o kisi di paka u de. [1] (Luku di pisi a kaba u di woto.) Gadu kai de u go libi a liba ala, ma te de hoi deseei a Gadu, nëën ufö de o sa go libi ala. Saatan sabi di soni aki, nöö a ta tei ’ganjanganjan tjabukama’ u mbei möiti u „ganjan” de (Mateosi 24:24). Dee Keesitu sëmbë dee dë salufuwan an sa dë seiki taa de o feni di paka u de, u te Jehovah o mbei de sabi taa a ta si de kuma sëmbë di ta hoi deseei nëën. Jehovah o da de di lasiti sitampu ufö de dëdë nasö kölö sö ufö di „gaan hogi sitaafu [gaan fuka, NW]” bigi.Akoalimbo 2:10; 7:3, 14.

4. Ee wa sa ko sabi dee në u hii dee salufuwan dee dë a goonliba a di ten aki, nöö unfa dee woto sikapu o „go ku” de?

4 Ee wa sa ko sabi dee në u hii dee salufuwan dee dë a goonliba a di ten aki, nöö unfa dee woto sikapu o „go ku” de? Di Bëibel ta taki taa dee „teni womi” bi o „kisi wan Dju panjan hoi nëën koosu, nöö de o taki taa: ’U kë go ku unu, biga u jei taa Gadu dë ku unu.’” Di Bëibel tëkisi aki ta taki u wan kodo Dju, ma dee wöutu „unu” ta lei u taa na wan kodo sëmbë nöö a dë. Di soni aki kë taki taa di Dju an dë wan kodo sëmbë nöö, ma a dë hii dee salufuwan tuu. Dee woto sikapu sabi di soni aki, nöö de ta dini Jehovah makandi ku hii dee salufuwan aki. An dë fanöudu u de sabi dee në u hiniwan u dee salufuwan u de go ta waka a hiniwan u de baka. Jesosi da di Fesima fuu, nöö di Bëibel ta piki u taa nëën baka wanwan u musu ta waka.Mateosi 23:10.

UNFA DEE SALUFUWAN MUSU TA PAKISEI U DESEEI?

5. Andi da di soni di dee salufuwan musu pakisei fundu fëën, nöö faandi mbei de musu pakisei fundu fëën?

5 Dee salufuwan musu pakisei fundu u di soni di sikifi a 1 Kolenti 11:27-29. (Lesi ën.) Unfa wan salufuwan sa ta njan di bëëë, ta bebe di win „a wan fasi di an fiti”, te u ta mëni di dëdë u Jesosi? Wë ee an dë wan mati u Jehovah, söseei ee an ta hoi ënseei nëën, nöö te a ta njan di bëëë, ta bebe di win, nöö a ta lei taa an abi lesipeki da di seti aki (Hebelejën 6:4-6; 10:26-29). Di soni aki ta mëni dee salufuwan taa de musu hoi deseei a Gadu ee de kë feni ’di paima a Masa Gadu Köndë ala di a mbei Masa Jesosi Keesitu kai de fu de ko tei’.Filipi 3:13-16.

6. Unfa dee salufuwan musu pakisei u deseei?

6 Paulosu bi piki dee salufuwan taa: „Fa i si mi dë a dunguwosu aki, nöö fu di Buka u Masa Jesosi di mi ta konda hedi e. Nöö mi ta begi unu gaantangi taa fa i si Gadu tei unu fuun ko sëmbë fëën dë kaa, nöö un libi kumafa a fiti u sëmbë fëën musu libi.” Unfa de musu du di soni aki? Paulosu bi piki de taa: „Un musu a’ sakafasi ku saapifasi. Un musu ta hoi pasensi da unu seei nöömö. Un musu ta tei di otowan fii kumafa a dë, fu di un lobi ën hedi. Söseei un musu mbei möiti be un ta libi fiifii ku unu seei. Un musu dë ku wan hati kumafa di Akaa [santa jeje, NW] u Masa Gadu buta unu.” (Efeise 4:1-3). Di santa jeje u Jehovah ta heepi dee dinima fëën u de abi sakafasi, ma na u de abi gaanfasi (Kolosën 3:12). Fëën mbei dee salufuwan an ta si kuma de bunu möön wotowan. De sabi  taa na u di de dë salufuwan, mbei Jehovah o da de möön santa jeje möön dee dinima fëën dee an dë salufuwan. Nöö de an ta fii tu taa de sa fusutan dee lei u Bëibel bunu möön woto sëmbë. Söseei de an o piki wan sëmbë taa a musu ta njan di bëëë, ta bebe di win te u ta mëni di dëdë u Jesosi, u di de ta si kuma di sëmbë dë da wan salufuwan. Ma de abi sakafasi, nöö de sabi taa Jehovah wanwan tö sa kai sëmbë u de go libi a liba ala.

7, 8. Andi dee salufuwan an musu ta pakisei, nöö faandi mbei de an musu ta pakisei sö?

7 Hii fa dee salufuwan ta si di kai di de kisi u go libi a liba ala kuma wan gaan soni, tökuseei de an ta pakisei taa sëmbë musu libi ku de a wan apaiti fasi (Efeise 1:18, 19; lesi Filipi 2:2, 3). De sabi tu taa di Jehovah salufu de, nöö an bi piki hii sëmbë taa a salufu de. Fëën mbei an ta foondo wan salufuwan te so sëmbë an ta biibi wantewante taa a dë wan salufuwan. Di salufuwan ta fusutan taa di Bëibel ta piki u taa wa musu biibi wan sëmbë hesihesi te a taki taa Gadu dëën wan apaiti wooko u du (Akoalimbo 2:2). U di wan salufuwan an ta suku taa sëmbë pakisei musu dë nëën hii juu, mbei an o go piki wan sëmbë di a miti fosu pasi taa a dë wan salufuwan. Kandë an o piki na wan sëmbë seei. Söseei an o ta njan buka taa a o go du gaan soni a liba ala.1 Kolenti 1:28, 29; lesi 1 Kolenti 4:6-8.

8 Dee salufuwan an ta si kuma de musu ta abi ten da dee woto salufuwan nöö, kuma de dë a wan feleniki. De an ta suku woto salufuwan u de sa taki soni u di salufu di Gadu salufu de nasö u de ko makandi u lei soni u Bëibel de wanwan (Galasia 1:15-17). Dee sëmbë u di kemeente an o sa libi makandi ku deseei ee dee salufuwan bi o ta libi sö. De an bi o ta wooko a wan fasi di ta kai ku di santa jeje, di ta heepi dee sëmbë u Gadu u libi fiifii ku deseei.Lesi Loomë 16:17, 18.

UNFA I MUSU LIBI KU DEE SALUFUWAN?

9. Faandi mbei i musu luku bunu be ja libi a wan fasi ku dee sëmbë dee ta njan di bëëë, ta bebe di win te u ta mëni di dëdë u Jesosi? (Luku di pisi „ Ee i lobi wan sëmbë, ja o ta du fanafiti soni ku ën”.)

9 Unfa i musu libi ku dee baaa ku dee sisa fii dee dë salufuwan? Jesosi bi piki dee bakama fëën taa: „Un tuu dë baaa ku baaa makandi.” Hën a taki möön taa: „Ee wan sëmbë i ta suku u hopo i seei, nöö Gadu o booko i saka. Ma ee i saka i seei, nöö Gadu o buta i möön hei” (Mateosi 23:8-12). Fëën mbei an bi o fiti taa u ta gafa wan sëmbë poi, aluwasi a dë wan salufu baaa u Keesitu. Te di Bëibel ta taki soni u dee gaanwomi, nöö a ta da u taanga u djeesi de a di biibi di de abi, ma di Bëibel an ta piki u taa u sa tei libisëmbë kuma fesima fuu (Hebelejën 13:7). A dë sö tuu taa di Bëibel ta taki taa so u de „musu kisi möön hia hei”. Ma de musu kisi di hei aki u di de „ta du de wooko a wan bunu fasi”, söseei u di de ’ta konda di buka da sëmbë bunu söseei de ta lei sëmbë a wan finifini fasi’, ma na u di de dë salufuwan (1 Timoteo 5:17). Ee u ta gafa de nasö ta buta pakisei a dee salufuwan tumisi, nöö woo mbei de fii sen. Nasö u sa mbei de ko abi gaanfasi seei (Loomë 12:3). Na wan fuu kë du wan soni di sa mbei wan u dee salufu baaa u Keesitu mbei sö wan gaan föutu!Lukasi 17:2.

Unfa i musu libi ku wan sëmbë a di kemeente fii di bigi ta njan di bëëë, ta bebe di win, te u ta mëni di dëdë u Jesosi? (Luku palaklafu 9-11)

10. Unfa u sa lei taa u ta lesipeki dee sëmbë dee Jehovah salufu?

10 Unfa u sa lei taa u ta lesipeki dee sëmbë dee Jehovah salufu? Wë, wa o ta hakisi de unfa de du ko dë salufuwan, biga an dë wan soni di u abi leti u sabi (1 Tesalonika 4:11; 2 Tesalonika 3:11). Wa o go ta hakisi di manu u de, di mujëë u de, dee gaan sëmbë u de, nasö dee famii u de, ee de da salufuwan tu. Wan sëmbë an ta toon salufuwan u di sëmbë fëën bi dë wan salufuwan (1 Tesalonika 2:12). U musu ta köni u na ta hakisi sëmbë soni di sa hati de. Hën da wa o ta hakisi di mujëë u wan salufuwan unfa a ta  fii u di a o libi u teego a goonliba aki söndö di manu fëën. U sa dë seiki taa a di njunjun goonliba, Jehovah o „da hiniwan soni di dë ku libi di soni di a kë”.Psalöm 145:16.

11. Unfa u ta tjubi useei te u ta luku bunu u na ta „gafa sëmbë pasa maaka”?

11 Woo sa tjubi useei te wa ta libi a wan apaiti fasi ku dee salufuwan möön fa u ta libi ku wotowan. Unfa sö? Di Bëibel ta piki u taa a sa pasa taa „wanlö sëmbë ta ganjan taa de dë biibima” o dë a di kemeente di o ta taki taa de da salufuwan (Galasia 2:4, 5; 1 Johanisi 2:19). Söseei a sa kan taa na hii salufuwan o hoi deseei a Jehovah (Mateosi 25:10-12; 2 Petuisi 2:20, 21). Ma ee u ta luku bunu u na „ta ganjan sëmbë ta naki tëtë [gafa sëmbë pasa maaka, NW]”, nöö wa o ta waka a wotowan baka, aluwasi de da salufuwan, aluwasi a dë wan baaa nasö sisa di hia sëmbë sabi, nasö di ta dini Jehovah sömëni jaa kaa. Ee de go disa Jehovah, nasö ee de go disa di kemeente, nöö di soni dë an o mbei u lasi biibi a Jehovah, nasö u disa di dini di u ta dini Jehovah.Judasi 16.

U MUSU TA BOOKO U HEDI U SABI UN MËNI SALUFUWAN DË U?

12, 13. Faandi mbei wa musu ta booko u hedi u sabi un mëni sëmbë ta njan di bëëë, ta bebe di win, te u ta mëni di dëdë u Jesosi?

12 Fosufosu u bi ta si taa dee sëmbë dee bi ta njan di bëëë, ta bebe di win bi ta ko möön biti te u ta mëni di dëdë u Jesosi. Ma a dee jaa dee pasa dee salufuwan ko möön hia. U musu ta booko u hedi ku di soni aki ö? Wë nönö. Boo go luku faandi mbei.

13 ’Jehovah sabi ambë da dee sëmbë fëën.’ (2 Timoteo 2:19). Dee baaa dee ta konda un mëni sëmbë ta njan di bëëë, ta bebe di win te u ta mëni di dëdë u Jesosi, an sabi ambë da salufuwan tuutuu, ma Jehovah nöö sabi. Hën da a hii dee sëmbë dee ta njan di bëëë, ta bebe di win dendu, i abi sëmbë di ta mëni taa de da salufuwan. So u de bi ta njan di bëëë ta bebe di win, ma bakaten de an ta du ën möön. Woto sëmbë ta du ën, u di fusutan u de an ta wooko sö bunu, nöö de bi ta biibi taa de o tii makandi ku Keesitu a liba ala. Ma a dë gbelingbelin u si taa wa sabi finifini un mëni salufuwan dë a goonliba aki jeti.

14. Andi di Bëibel ta taki u dee un mëni salufuwan dee o dë a goonliba aki jeti ufö di gaan fuka bigi?

14 Salufuwan o dë a sömëni kamian u goonliba te Jesosi o ko tei de tja go a liba ala. Di Bëibel taki taa Jesosi o manda „dee basia fu Masa Gaangadu köndë u ta waka ta pii hii dee sëmbë u Gadu tuu hai tja ko buta a wan kamian. De o pii de a hii kamian ka de bi dë, ee a sonu go, ee a sonu kumutu, ee a basusë, ee a libasë. Sö dee basia o hai de ko makandi” (Mateosi 24:31). Di Bëibel taki söseei taa dee salufuwan an o hia möön a dee lasiti daka a goonliba aki (Akoalimbo 12:17). Ma di Bëibel an ta taki un mëni u dee salufuwan o dë aki jeti te di gaan fuka o bigi.

15, 16. Andi u abi fanöudu u fusutan soni u dee 144.000 sëmbë dee Jehovah ta salufu?

15 Jehovah hën ta taki na un ten wan sëmbë  dë wan salufuwan (Loomë 8:28-30). Jehovah bigi salufu sëmbë baka di Jesosi weki ko a libi baka. A djei kuma hii dee Keesitu sëmbë u fesiten bi dë salufuwan. Ma höndöhöndö jaa baka di dë, gaansë u sëmbë di bi ta taki taa de da Keesitu sëmbë an bi ta waka a Jesosi baka tuutuu. Tökuseei a dee jaa dë Jehovah bi salufu wan tu u de di bi dë tuutuu Keesitu sëmbë. Dee tuutuu Keesitu sëmbë aki bi dë kuma dee bumbuu böngö dee Jesosi bi taki taa bi o göö a dee taku uwii dendu (Mateosi 13:24-30). Jehovah ta salufu möön sëmbë a dee lasiti daka aki jeti, u de ko dë wan u dee 144.000 sëmbë. [2] (Luku di pisi a kaba u di woto.) Wë ee Gadu o salufu so sëmbë kölö sö ufö di kaba u di goonliba aki ko, nöö wa o hakisi useei ee bumbuu soni a ta du. (Jesaaja 45:9; Daniëli 4:35; lesi Loomë 9:11, 16.) [3] (Luku di pisi a kaba u di woto.) U musu ta köni taa wa du kuma dee wookoma dee bi ta kuutu di masa u de u di fasi fa a bi libi ku dee wookoma dee bi bigi wooko a di lasiti juu.Lesi Mateosi 20:8-15.

16 Na hii dee sëmbë dee o go libi a liba ala da sëmbë u „di köni saafu di dë u futoou(Mateosi 24:45-47). Leti kuma a di ten u dee Keesitu sëmbë u fesiten, sö nöö Jehovah ku Jesosi ta wooko ku wan tu sëmbë nöö, u da sömëni sëmbë njanjan nasö u lei de soni. Wan tu salufu Keesitu sëmbë u fesiten nöö bi sikifi dee Giiki buku u Bëibel. A di ten aki, wan tu salufuwan nöö abi di faantiwöutu u da dee sëmbë u Gadu „njanjan a di soifi ten”.

17. Andi i bi lei a di woto aki?

17 Andi u bi lei a di woto aki? Jehovah buta taa a o da gaansë u dee sëmbë fëën teego libi a goonliba aki, nöö dee sëmbë dee o tii makandi ku Jesosi o feni teego libi a liba ala. Jehovah o paka hii dee dinima fëën, hën da di „Dju” ku dee „teni womi” tuu. A kë u de tuu hoi dee wëti fëën. Hii juu de musu ta lei taa de abi sakafasi, nöö de musu ta dini ën makandi tu. Söseei de tuu musu mbei möiti u de ta libi fiifii ku deseei a di kemeente. Boo ta dini Jehovah nöömö fa u ko dë möön zuntu ku di kaba u di goonliba aki, söseei boo ta waka a Jesosi baka kuma wan kodo hipi.

^ [1] (palaklafu 3) A kan taa a di ten di ta ko, Gadu o mbei u ko sabi dee në u hii dee sëmbë dee o go tii makandi ku Jesosi a libi ala, kumafa Psalöm 87:5, 6 ta taki.Loomë 8:19.

^ [2] (palaklafu 15) Hii fa Tjabukama 2:33 ta lei taa Jesosi ta mbei santa jeje ko a sëmbë liba u de toon salufuwan, tökuseei Jehovah hën ta taki ambë a o tei.

^ [3] (palaklafu 15) Ee i kë sabi möön soni nöö luku di pisi „Aksi fu leisiman” a di Waktitoren u 1 u gaanliba u 2007, bladsëidë 31.