„Te soni ta miti i, nöö hii juu i sa mindi soni fii puu iseei.”—Samantha, Zuid-Afiikan.

I ta si kuma di soni aki dë sö tuu ö? Kumafa soni bi miti Samantha, sö nöö a ta miti hii u tuu. Ma di fasi fa woo du soni te u ta fii u mindi soni, sa lei andi u ta si kuma di möön fanöudu soni. Ee u ta booko u hedi ku di sen di woo kisi möön gaanfa, nöö woo si kuma u musu u mindi soni fuu sa tjubi useei. Te sëmbë ko sabi unfa soni dë tuutuu, nöö a sa tja hogi ko da u.

TE WA TA LIBI KU WAN LIMBO HATI, NÖÖ SËMBË AN O TA FUTOOU U MÖÖN

Sëmbë ta dë mati, u di de ta futoou deseei. Te tu sëmbë ta futoou deseei, nöö de an ta fëëë taa wan u de u du wan soni di o hati di wotowan. Ma ja ta ko abi futoou a wan sëmbë a wan daka dendu. Sëmbë ta ko ta futoou deseei te de ta du soni makandi, te de ta fan ku deseei ku wan limbo hati, ku te de ta du soni da di wotowan söndö u pakisei deseei nöö. Wan piki soni nöö sëmbë sa du u ganjan di wotowan fëën, nöö a sa mbei taa di wotowan an ta futoou ën möön, nöö a ta taanga u di wotowan toona ko abi futoou nëën baka.

Wan sëmbë di i bi ta mëni taa i ku ën bi dë gaan mati bi ganjan i wan daka kaa u? Ee di soni aki bi miti i, nöö unfa i bi fii? A musu u dë taa a bi hati i. Kandë i bi fii seei kuma di mati fii bi bia baka da i. Ee sö i bi fii, nöö u ta fusutan i. An dë u taki taa te wan sëmbë ganjan i, nöö a ta poi di dë di i ku ën dë mati.

EE JA TA LIBI KU WAN LIMBO HATI KU WOTOWAN, NÖÖ A SA MBEI DE LIBI SÖ KU I TU

Wan sabima u di Universiteit u Kalifornia de kai Robert Innes bi öndösuku wan soni, hën a ko si taa „te sëmbë an ta libi ku wan limbo hati, nöö a sa mbei woto sëmbë libi sö tu”. I sa taki taa a dë kuma wan siki di sa kisi woto sëmbë. Möön i ta hulu wan sëmbë di ta ganjan wotowan, möönmöön iseei sa ko dë sö tu.

Unfa i sa ta tjubi iseei u na ko dë wan sëmbë di ta ganjan wotowan? Wë di Bëibel sa heepi i. Boo taki u wan tu mama wëti u Bëibel.