Skip to content

Skip to secondary menu

Skip to table of contents

Jehovah Kotoigi

Saamakatöngö

Di Hei Wakitimawosu (u lei soni a komakandi)  |  jailiba 2016

Be di „gaan gudu” di Gadu da u heepi i fii djeesi ën a di lobi di a abi

Be di „gaan gudu” di Gadu da u heepi i fii djeesi ën a di lobi di a abi

„Gaantangi u Gadu fu di a manda Masa Jesosi kuma wan gaan gudu ko da u.”2 KOLENTI 9:15.

KANDA: 121, 63

1, 2. (a) Andi di „gaan gudu” di Gadu da u kë taki tu? (b) Un hakisi woo luku a di woto aki?

JEHOVAH da u di möön gaan gudu u lei taa a lobi u. A bi manda di Womi Mii fëën Jesosi di a lobi gaanfa seei, ko a goonliba (Johanisi 3:16; 1 Johanisi 4:9, 10). Apösutu Paulosu bi kai di soni di Jehovah du aki „wan gaan gudu” (2 Kolenti 9:15). Faandi mbei Paulosu bi kai ën sö?

2 Paulosu bi sabi taa di dëdë di Jesosi dëdë da u, da wan soni di ta lei u taa dee soni dee Gadu paamusi u o pasa tuutuu. (Lesi 2 Kolenti 1:20.) Di soni aki kë taki taa di „gaan gudu” di Gadu da u aki, da di dëdë di Jesosi dëdë da u, ku hii dee bunu soni di Jehovah du da u, u lei taa a lobi u. Wa sa kaba taki finifini unfa di gudu aki bigi tjika. Unfa u musu si di apaiti gudu aki? Nöö andi di gudu aki musu mbei u du te u ta seeka useei da di mëni di woo mëni di dëdë u Jesosi a pikisaba 23 u gaanliba u di jaa 2016?

 WAN APAITI GUDU DI GADU DA U

3, 4. (a) Unfa i ta fii te wan sëmbë da i wan kado? (b) Unfa wan apaiti kado di wan sëmbë da i sa tooka di libi fii?

3 U lobi te wan sëmbë da u wan kado. Ma so kado di sëmbë ta da u ta bigi seei taa a ta tja wan gaan tooka ko a di libi fuu. Boo taa i du wan gaan hogi. Nöö di sitaafu di i musu kisi da dëdë. Ma te fii kë mëni, hën wan sëmbë di ja pena sabi seei, piki i taa a o dëdë a i kamian. Unfa i bi o fii?

4 Di apaiti kado di di sëmbë da i aki o mbei i go pakisei andi i sa tooka a di libi fii. Wë, i bi o kë ta da sëmbë soni seei, nöö i bi o ko ta möön lobi wotowan, söseei i bi o kë da hiniwan sëmbë di du wan hati soni ku i paadon. Hii i libi longi i bi o kë ta lei taa i tei di soni di di sëmbë du da i u bigi.

5. Unfa di lusupaima di Gadu da u, bigi möön hiniwan woto soni di sëmbë bi o sa da u?

5 Di lusupaima di Gadu seeka da u bigi möön di kado di u bi taki fëën djunsu dë (1 Petuisi 3:18). Pakisei di soni aki: Hii u tuu kisi zöndu u Adam, nöö di sitaafu di sëmbë ta kisi u zöndu da dëdë (Loomë 5:12). U di Jehovah lobi u, mbei a manda Jesosi ko a goonliba u „tei di dëdë fu hii sëmbë” (Hebelejën 2:9). Ma di dëdë di Jesosi dëdë paka da u aki o heepi u a woto soni tu! A o puu dëdë u teego (Jesaaja 25:7, 8; 1 Kolenti 15:22, 26). Hiniwan sëmbë di ta biibi a Jesosi o libi bööböö, nöö de o dë waiwai u teego. So u de o tii kuma könu makandi ku Keesitu a liba ala, nöö wotowan o libi a di tii u Gadu basu a goonliba aki (Loomë 6:23; Akoalimbo 5:9, 10). Un wini di gudu di Jehovah da u aki o tja ko da u möön?

6. (a) Undi u dee wini u di gudu di Jehovah da u, ii ta wakiti? (b) Kai dii soni di di gudu di Gadu da u, o mbei u du.

6 Di gudu di Gadu da u aki, o mbei di goonliba toon wan paladëisi, a o mbei suwakima ko bëtë, nöö dee dëdë sëmbë o ko a libi baka (Jesaaja 33:24; 35:5, 6; Johanisi 5:28, 29). U lobi Jehovah ku di lobi Womi mii fëën, u di de da u di „gaan gudu” aki. Andi di gudu aki o mbei u du? (1) A o mbei u waka soifi a Jesosi baka, (2) a o mbei u lobi dee baaa ku dee sisa fuu, ku (3) a o mbei u ta da wotowan paadon ku hii u hati.

DI „GAAN LOBI MASA JESOSI KEESITU LOBI U”

7, 8. Unfa u musu ta si di lobi di Keesitu lobi u, nöö andi a musu mbei u du?

7 Di fosu soni, hën da u musu kë du soni di ta gafa Jesosi. Apösutu Paulosu bi taki taa: „Biga fu di u sabi taa sö wan gaan lobi Masa Jesosi Keesitu lobi u, nöö fëën mbei u musu ta konda di Buka”. (Lesi 2 Kolenti 5:14, 15.) Paulosu bi sabi taa ee u ta tei di lobi di Jesosi lobi u u bigi, nöö a o mbei u lobi Jesosi, söseei a o mbei u gafëën. Te u ko fusutan di soni di Jehovah du da u u di a lobi u, nöö di soni dë o mbei u libi a wan fasi di ta lei taa u ta gafa Jesosi. Unfa u sa du di soni aki?

8 Te u lobi Jehovah, nöö a u mbei u waka soifi a Jesosi baka (1 Petuisi 2:21; 1 Johanisi 2:6). Te u ta piki Gadu ku Jesosi buka a soni, nöö di soni dë o lei taa u lobi de. Jesosi bi taki taa: „Di sëmbë di sabi andi ku andi mi mandëën faa du nöö a ta piki mi buka, nöö di sëmbë dë, hën lobi mi e. Nöö ee wan sëmbë i lobi mi sö, nöö söseei mi Tata o lobi i tu. Nöö miseei o lobi i, nöö mi o hopo miseei da i fii sa ko sabi mi.”—Johanisi 14:21; 1 Johanisi 5:3.

9. Andi sa pasa ku u ee wa luku bunu?

9 A di pisiten aki di u ta mëni di dëdë u Jesosi, nöö a bi o bunu fuu pakisei luku andi da dee soni di u ta du a u libi. I sa  hakisi iseei di soni aki: ’Andi da dee soni dee mi ta du di ta lei taa mi ta waka a Jesosi baka kaa? Andi mi sa du möön bunu? A dë fanöudu fuu ta hakisi useei dee soni aki, u di dee sëmbë u di goonliba aki ta suku u mbei u libi kumafa de ta libi (Loomë 12:2). Ee wa luku bunu, nöö a sa pasa taa u bigi ta djeesi dee leima u di goonliba aki, söseei dee nëbai sëmbë, nasö dee gaan sportma u di goonliba aki (Kolosën 2:8; 1 Johanisi 2:15-17). Unfa u sa finga futu da dee soni aki?

10. Andi u sa hakisi useei a di pisiten aki di u ta mëni di dëdë u Jesosi, nöö andi dee piki u dee hakisi aki o mbei u kë du? (Luku di peentje a bigi u di woto.)

10 A bi o bunu fuu tei ten a di pisiten di u ta mëni di dëdë u Jesosi fuu buta mëni a dee soni u ta bisi, dee fëlön u ta luku, dee poku u ta haika, söseei dee soni dee dë a di computer fuu, di tëlëfön fuu nasö di tablet fuu. Hakisi iseei di soni aki: ’Sen bi o kisi mi ee Jesosi bi dë aki u si andi mi bisi ö?’ (Lesi 1 Timoteo 2:9, 10.) ’Dee soni mi ta bisi ta lei taa mi da wan bakama u Keesitu ö? Jesosi bi o kë luku dee fëlön mi ta luku ö? A bi o kë haika dee poku dee mi ta haika u? Ee mi bi o leni Jesosi di tëlëfön u mi nasö di tablet u mi, sen bi o kisi mi te a si dee soni dee dë nëën u? A bi o taanga da mi u konda da Jesosi faandi mbei mi lobi dee game dee mi ta pëë u?’ Di lobi di u lobi Jehovah musu mbei u tuwë hiniwan soni di an fiti Keesitu sëmbë, aluwasi a taanga da u (Tjabukama 19:19, 20). Di u bi buta u libi a Jehovah maun, u bi paamusi ën taa woo du hii soni u gafa Keesitu. Fëën mbei wa musu du na wan soni di sa mbei a taanga da u fuu sa djeesi Jesosi.Mateosi 5:29, 30; Filipi 4:8.

11. (a) Andi di lobi di u lobi Jehovah ku Jesosi o mbei u du a di peleikiwooko? (b) Unfa lobi o mbei u heepi wotowan a di kemeente?

11 U di u lobi Jesosi mbei u ta peleiki, söseei u ta lei sëmbë soni fajafaja (Mateosi 28:19, 20; Lukasi 4:43). I sa seeka soni sö taa i sa du di heepi pioniliwooko a di ten di u ta mëni di dëdë u Jesosi ö? I sa peleiki 30 juu nasö 50 juu a di pisiten dë u? Wan baaa di abi 84 jaa, di mujëë fëën dëdë, bi mëni taa an bi o sa du di heepi pioniliwooko, u di a bi ko gaan sëmbë kaa, nöö a bi ta siki. Ma dee pionili dee bi ta libi zuntu ku ën, bi kë heepi ën. De bi seeka wagi dëën u de sa ta tjëën go a di peleikiwooko, nöö de bi nango peleiki a kamian di an bi taanga dëën u go. Te u kaba fëën, di baaa bi sa peleiki 30 juu. I sa heepi wan sëmbë a di kemeente fii u du di heepi pioniliwooko a gaanliba nasö a piki-deewei-liba u? A dë sö tuu taa na hii u tuu sa du di pioniliwooko, ma u sa tei di ten fuu ku di kaakiti fuu di u abi fuu du möön soni a di dini di u ta dini Jehovah. Ee u ta du sö, nöö leti kuma Paulosu woo lei taa di lobi di Jesosi lobi u hën ta mbei u du dee soni aki. Un woto soni di lobi di Gadu lobi u o mbei u du?

U MUSU LOBI USEEI

12. Andi di lobi di Gadu lobi u ta mbei u du?

12 Di u tu soni, hën da di lobi di Gadu lobi u musu mbei u lobi dee baaa ku dee sisa fuu. Apösutu Johanisi bi sikifi taa: „Un dee lobi mati u mi dë, di Masa Gadu lobi u sö kaa, nöö an fiti fuu lobi u seei tu nö?” (1 Johanisi 4:7-11) Wë ee u ta biibi taa Gadu lobi u, nöö u seei musu lobi dee baaa ku dee sisa fuu tu (1 Johanisi 3:16). Unfa u sa lei dee baaa ku dee sisa fuu taa u lobi de?

13. Unfa Jesosi bi lei u fuu ta lobi wotowan?

 13 Jesosi bi lei u unfa u sa lobi wotowan. Di a bi dë a goonliba aki, nöö a bi ta heepi sëmbë, möönmöön dee sakafasi sëmbë. A bi ta kula dee sëmbë dee dë ku siki, dee lanma, dee bookowojoma, dee bookojesima ku dee tapabukama (Mateosi 11:4, 5). Jesosi an bi dë kuma dee hedima u keiki. A bi lo’ u lei dee sëmbë dee bi ta kë lei soni u Gadu (Johanisi 7:49). A bi lobi dee sakafasi sëmbë aki, nöö a bi ta mbei taanga möiti u heepi de.Mateosi 20:28.

I sa heepi wan baaa nasö wan sisa di ko gaan sëmbë kaa, faa du di peleikiwooko u? (Luku palaklafu 14)

14. Andi i sa du u lei dee baaa ku dee sisa fii taa i lobi de?

14 Di pisiten di u ta mëni di dëdë u Jesosi, da wan bunu ten u pakisei unfa i sa heepi dee baaa ku dee sisa fii a di kemeente, möönmöön dee gaan sëmbë. I si kuma joo sa go luku de u? Joo sa boi wan soni tja go da de u? Joo sa ta lëi de tja go a dee komakandi ö? Nasö u kai de u ko ku i a di peleikiwooko u? (Lesi Lukasi 14:12-14.) Be di lobi di Gadu lobi i heepi i fii lei dee baaa ku dee sisa fii taa i lobi de!

U MUSU TA ABI TJALIHATI DA DEE BAAA KU DEE SISA FUU

15. Andi u musu ko fusutan?

15 Di u dii soni, hën da di lobi di Jehovah lobi u musu mbei u ta da dee baaa ku dee sisa fuu paadon. Adam mbei hii u tuu kisi zöndu, nöö hii u tuu ta dëdë tu. Fëën mbei na wan sëmbë sa taki taa: „Ma abi di lusupaima fanöudu.” Wan dinima u Gadu di ta hoi hënseei a Gadu hii juu, seei abi di lusupaima fanöudu. Hiniwan fuu kisi paadon u di de paka wan gaan paima da u! Faandi mbei a dë fanöudu fuu fusutan di soni aki? Wë i sa feni di piki u di hakisi aki a wan u dee woto u Jesosi.

16, 17. (a) Andi di woto di Jesosi bi konda u di könu ku di saafu musu lei u? (b) Baka di i pakisei fundu u di woto u Jesosi, nöö andi i dë kabakaba u du?

16 Jesosi bi konda wan woto u wan könu di bi abi wan saafu di bi musu pakëën 60.000.000 denali. Ma bakaten wan woto saafu bi musu paka di saafu dë 100 denali nöö. Di tjalihati di di könu bi abi da di saafu fëën bi musu mbei a abi tjalihati ku di woto saafu kuma ën tu. Di Könu hati bi boonu di a jei taa di saafu fëën an bi abi tjalihati da di woto saafu kuma hënseei di bi musu pakëën wan piki möni nöö. Di könu bi taki taa: „Ju hogihatima ju, hii di gaan hia möni di i bi abi u paka mi nöö hën wë mi disa i fu di i bi begi mi. Wë nöö an bi bunu da i fii abi tjalihati da di otowan fii nö?” (Mateosi 18:23-35) Leti kumafa di könu bi piki di saafu fëën taa aan fu pakëën di paima möön, sö nöö Jehovah piki u taa an dë fuu pakëën di gaan paima di u bi musu pakëën möön. Andi di lobi ku di tjalihati di Jehovah abi da u musu mbei u du?

17 Te woo seeka useei u mëni di dëdë u  Jesosi, nöö u sa hakisi useei dee soni aki: ’Wan baaa nasö wan sisa bi du wan soni di hati mi ö? A ta taanga da mi u dëën paadon u?’ Ee sö, nöö di pisiten aki bi o dë wan bunu ten fuu djeesi Jehovah, di ta dë „kabakaba u da sëmbë paadon” (Nehemia 9:17; Psalöm 86:5). Ee u ta tei di tjalihati di Jehovah abi da u u bigi, nöö woo abi tjalihati da wotowan tu, söseei woo ta da de paadon ku hii u hati. Ee wa lobi dee baaa ku dee sisa fuu, söseei ee wa ta da de paadon, nöö wa musu mëni taa Jehovah o lobi u nasö taa a o ta da u paadon tu (Mateosi 6:14, 15). Hii fa te u ta da wotowan paadon an ta puu taa di soni di de du ku u an bi hati u, ma a o heepi u fuu ko ta dë möön waiwai.

18. Unfa di lobi di Gadu lobi u bi heepi wan sisa faa bi sa libi bunu ku wan woto sisa, hii fa di sisa dë bi abi suwakifasi?

18 So juu a sa taanga da u fuu libi ku dee baaa ku dee sisa fuu u di de abi suwakifasi. (Lesi Efeise 4:32; Kolosën 3:13, 14.) Ma wan sisa de kai Lily bi du di soni aki. [1] (Luku di pisi a kaba u di woto.) A bi heepi wan mujëë de kai Carol, di manu fëën bi dëdë. A bi ta tja Carol go a hii kamian ka a bi kë go, a bi ta tjëën go bai dee soni di a bi abi fanöudu, nöö a bi ta du sömëni woto soni dëën jeti. Ma hii fa Lily bi ta du hii dee soni aki, tökuseei Carol bi ta kuutu ën, nöö a bi ta taanga dëën faa heepi ën. Ma Lily bi ta buta pakisei a dee bunu fasi u Carol, nöö a bi heepi ën sömëni jaa u te fa a bi ko siki, hën bakaten a ko dëdë. Hii fa a bi taanga da Lily u heepi Carol, tökuseei a bi taki taa: „Mi ta wakiti di ten ka mi o sa si Carol te a o toona ko a libi baka. Mi kë sabi fa a o dë te an o abi zöndu möön.” A dë gbelingbelin u si taa te u ko fusutan di lobi di Gadu lobi u, nöö a sa mbei u libi bunu ku dee baaa ku dee sisa fuu, söseei a sa mbei u buta pakisei a di ten di ta ko ka na wan libisëmbë o abi zöndu möön.

19. Andi di „gaan gudu” di Gadu da u, o mbei u du?

19 Jehovah da u wan „gaan gudu” seei. Boo ta tei ën u bigi hii juu! Di pisiten di woo mëni di dëdë u Jesosi da wan bunu ten fuu pakisei fundu u hii dee soni di Jehovah ku Jesosi du da u. Be di lobi di de lobi u, da u taanga fuu waka soifi a Jesosi baka. Be a mbei u lei dee baaa ku dee sisa fuu taa u lobi de, söseei be a heepi u fuu ta da de paadon ku hii u hati.

^ [1] (palaklafu 18) So u dee në u di woto aki tooka.