Skip to content

Skip to secondary menu

Skip to table of contents

Jehovah Kotoigi

Saamakatöngö

Di Hei Wakitimawosu (u lei soni a komakandi)  |  jailiba 2016

 DI WOTO DI NAMA KU DI KAFITI | FAANDI MBEI U MUSU TA LIBI KU WAN LIMBO HATI?

Sëmbë sa ta libi ku wan limbo hati a di ten aki jeti ö?

Sëmbë sa ta libi ku wan limbo hati a di ten aki jeti ö?

Hitoshi bi ta luku möni soni u wan kantoo a di köndë Japan, di bi ta suku wooko da sëmbë. Wan daka di a bi dë ta luku möni soni u di kantoo, hën wan u dee basi piki ën taa de bi kë faa sikifi wan soni di an dë sö tuu. Hën Hitoshi bi piki di basi taa háti fëën an ta dëën pasi u du di soni dë. Te u kaba fëën, di basi u Hitoshi piki ën taa a o puu ën a wooko, hën wë Hitoshi bi ko lasi di wooko fëën.

Dee liba baka di Hitoshi lasi di wooko fëën, a bi ta si kuma an bi o sa feni wooko möön. Wan daka di a go suku wooko, hën a piki dee sëmbë a fesi taa an o du na wan soni di nama ku fufuu nasö u ganjan wotowan. Di sëmbë di bi ta buta hakisi da Hitoshi u luku ee a o tei ën a di wooko, bi taki taa: „Andi da di lö fasi u pakisei aki!” Hii fa dee sëmbë u Hitoshi ku dee mati fëën bi dëën taanga u libi ku wan limbo hati go dou, tökuseei a bi taki taa: „Mi ta hakisi miseei ee mi musu ta piki sëmbë taa ma o du soni u ganjan sëmbë.”

Di woto u Hitoshi ta lei taa na hii sëmbë lobi te sëmbë ta libi ku wan limbo hati. So sëmbë sa si kuma i musu u ganjan wotowan te i ta wooko möni. Wan mujëë di ta libi a Zuid-Afiikan bi taki taa: „Mi ta wooko ku sëmbë di ta ganjan wotowan, nöö so juu a ta taanga fii du soni ku wan limbo hati.”

Wan fasi fa sëmbë an ta libi ku wan limbo hati, hën da te de ta mindi soni. Wan tu jaa pasa, wan data de kai Robert S. Feldman di tay wooko a di Universiteit u Massachusetts, bi taki taa möön leki hafu u dee sëmbë dee ko gaan sëmbë kaa, ta mindi soni a teni miniti dendu te de ta fan. Feldman bi taki taa: „A bi foondo u seei. Wa bi mëni taa sö sëmbë bi o ta mindi soni hiniwan daka.”An ta foondo i u si fa sëmbë ta buuse di mindi di sëmbë ta mindi soni, hii fa gaansë u de ta mindi soni a di ten aki ö?

Faandi mbei sëmbë u di ten fuu aki lo’ u mindi soni, ta lëgëdë ta fufuu sö? Unfa dee lö libi aki sa tja hogi ko miti wotowan? Nöö unfa u sa tjubi useei u na ko dë sëmbë di ta libi dee lö libi aki?