Skip to content

Skip to secondary menu

Skip to table of contents

Jehovah Kotoigi

Saamakatöngö

Di Hei Wakitimawosu (u lei soni a komakandi)  |  höndima-liba 2016

Di womi di bi dë ku di soni di sikifibiifima ta buta ënki wata da Jesosi Keesitu. Hën da di sëmbë di o maaka dee sëmbë dee o feni tjubi

Soni di dee lesima hakisi

Soni di dee lesima hakisi

Ambë da di womi di bi dë ku di soni di sikifibiifima ta buta ënki wata di Ezekiëli bi si a di wojolimbo sunjan fëën? Nöö ambë da dee sikisi womi dee a bi si di dë ku fetilai u naki sëmbë kii?

Dee womi aki da dee ëngëli dee dë a liba ala, di bi booko Jelusalen kaba a sösö, nöö deseei o booko di goonliba u Saatan kaba a sösö na Amagedon tu. Disi da wan njunjun fasi fa u ko fusutan di woto aki. Faandi mbei a bi dë fanöudu fuu tooka di fasi fa u bi ta fusutan di woto?

Ufö di jaa 607 Bi.K., Jehovah lei Ezekiëli a wan wojolimbo sunjan andi bi o pasa a Jelusalen ufö de poi ën kaba a sösö. A di wojolimbo sunjan, Ezekiëli bi si sömëni hogi di sëmbë bi ta du. Hën a si sikisi womi di bi dë ku „fetilai a de maun u naki sëmbë kii”. Boiti di dë, a bi si wan womi di bi dë ku de tu. Di womi bi bisi wan „gaan limbo koosu faan”, nöö a bi dë ku „wan soni di sikifibiifima ta buta ënki wata” (Ezekiëli 8:6-12; 9:2, 3). De bi piki di womi aki faa go a di foto, nöö a bi musu „buta wan maaka a dee sëmbë mindifesi dee ta djëmë u dee hogi soni dee sëmbë ta du a di foto”. Hën wë de piki dee sikisi womi dee bi dë ku dee fetilai taa de musu kii hii dee sëmbë a di foto dee an abi maaka a de mindifesi (Ezekiëli 9:4-7). Andi u sa lei a di wojolimbo sunjan aki, nöö ambë da di womi di dë ku di soni di sikifibiifima ta buta ënki wata?

A di jaa 612 Bi.K., Gadu bi lei Ezekiëli di soni aki a wan wojolimbo sunjan. Feifi jaa baka di Jehovah bi da dee sodati u Babilon pasi u dee booko Jelusalen kaba a sösö, hën di tjabukama woto aki bi pasa tuutuu di fosu pasi. A sö wan fasi, Jehovah bi mbei dee Babilon sëmbë sitaafu dee sëmbë fëën di bi ko abi taangajesi (Jelemia 25:9, 15-18). Ma unfa a dë ku dee limbohati Dju di an bi lobi dee hogi soni dee bi ta pasa a di foto? Wë Jehovah bi tjubi de.

 Ezekiëli an bi maaka dee sëmbë mindifesi tuutuu a di wojolimbo sunjan, söseei nëën bi kii dee sëmbë a di foto. Ma dee ëngëli de bi mbei de booko Jelusalen kaba a sösö. U sa taki taa di tjabukama woto ta mbei u ko fusutan unfa soni ta pasa a liba ala. Jehovah bi piki dee ëngëli fëën u de seti soni u kii dee hogihati sëmbë, söseei u de tjubi dee limbohati sëmbë. *

Di tjabukama woto aki o pasa a di ten di ta ko tu. U bi guwenti u taki taa di womi di dë ku di soni di sikifibiifima bi ta buta ënki wata bi dë dee salufuwan dee dë a libi a goonliba aki jeti. U bi guwenti u taki tu taa sëmbë bi ta kisi di maaka aki te de bi haika di bunu buka di u ta paaja, söseei te de bi tei ën. Ma a di ten di pasa aki, u ko fusutan gbelingbelin taa u musu tooka di fasi fa u bi puu di tjabukama woto aki. Di tëkisi u Mateosi 25:31-33 bi heepi u fuu ko fusutan taa Jesosi da di sëmbë di o kuutu libisëmbë. A o du di soni aki a di pisiten u di gaan fuka di ta ko. A di ten dë, dee sëmbë dee o dë kuma sikapu o feni libi, nöö de o kii dee sëmbë dee o dë kuma kaabita.

Wë andi u ta lei u di soni di Ezekiëli bi si a di wojolimbo sunjan? Luku feifi soni di u ta lei:

  1.  Ufö de poi Jelusalen kaba a sösö, Ezekiëli, Jelemia, ku Jesaaja bi bai dee sëmbë taa sö wan gaan soni bi o pasa ku di foto. De bi dë kuma wakitima. A di ten aki, Jehovah ta wooko ku wan piki kulupu u salufuwan u lei dee sëmbë fëën soni, söseei u piki sëmbë taa abiti möön di gaan fuka o ko. Te u luku ën bunu, nöö hii dee sëmbë u Gadu, hën da dee futuboi u Keesitu, ta bai sëmbë ufö di ten dë dou.Mateosi 24:45-47.

  2.  Ezekiëli an bi maaka dee sëmbë dee bi o feni tjubi. Sö nöö dee sëmbë u Jehovah an ta maaka sëmbë a di ten aki tu. Paaja nöö de ta paaja di bunu baka da sëmbë, söseei de ta piki de andi o pasa a di ten di ta ko. Dee ëngëli de ta heepi u fuu du di peleikiwooko aki a hii së u goonliba.Akoalimbo 14:6.

  3.  Dee sëmbë dee bi feni tjubi a di ten u Ezekiëli, an bi abi wan tuutuu maaka a de mindifesi. Sö nöö dee sëmbë dee o feni tjubi a di ten di ta ko, an o abi wan tuutuu maaka a de mindifesi tu. Andi sëmbë musu du u de sa pasa di gaan fuka libilibi? Wë te de jei di buka di u ta paaja, nöö de musu ko ta djeesi Keesitu, de musu tei dopu, söseei de musu ta djeesi dee baaa u Keesitu u di de o ta paaja di bunu buka tu (Mateosi 25:35-40). A di pisiten u di gaan fuka, de o buta di maaka da dee sëmbë aki. Di soni aki kë taki taa Gadu tei de u de pasa di gaan fuka libilibi.

  4.  Di womi di dë ku di soni di de bi ta buta ënki wata da Jesosi. A di pisiten u di gaan fuka, Jesosi o buta wan maaka da dee gaan hia sëmbë di a si taa dë kuma sikapu. Nöö de o sa abi di okasi u libi u teego a goonliba aki.Mateosi 25:34, 46. *

  5.  A di ten aki, dee sikisi womi dee bi dë ku fetilai u naki sëmbë kii, da dee ëngëli u liba ala, ku Jesosi di dë di fesima u de. Abiti möön de o ko kii dee nasiön sëmbë ku hii dee hogihati sëmbë abiti möön.Ezekiëli 10:2, 6, 7; Akoalimbo 19:11-21.

Dee soni dee u ta lei a di wojolimbo sunjan aki, ta heepi u fuu biibi taa Jehovah an o kii dee sëmbë dee ta libi bunu nëën wojo makandi ku dee hogihati sëmbë (2 Petuisi 2:9; 3:9). Dee soni dee u lei a di woto aki ta mëni u tu taa di peleiki di u ta peleiki a di ten aki da wan gaan fanöudu soni. Hii sëmbë musu jei di buka di u ta paaja ufö di kaba dou!Mateosi 24:14.

^ pal. 6 De bi tjubi Baluku (di sikifibiifima u Jelemia), söseei de bi tjubi di womi u Etiopia de kai Ebëti-Melëki, ku dee bakamii u Lekabi, ma de an bi abi tuutuu maaka a de mindifesi (Jelemia 35:1-19; 39:15-18; 45:1-5). Di maaka an bi dë wan tuutuu maaka, ma a bi ta lei taa dee sëmbë dë bi o feni tjubi.

^ pal. 12 Dee salufuwan dee hoi deseei a Gadu an o abi di maaka aki fanöudu u de sa pasa di gaan fuka libilibi. Ma Gadu o buta di lasiti sitampu da de ufö de dëdë nasö ufö di gaan fuka bigi.Akoalimbo 7:1, 3.