Skip to content

Skip to secondary menu

Skip to table of contents

Jehovah Kotoigi

Saamakatöngö

Di Hei Wakitimawosu (u lei soni a komakandi)  |  höndima-liba 2016

Na mbei dee föutu u wotowan mbei i go disa Jehovah

Na mbei dee föutu u wotowan mbei i go disa Jehovah

„Un musu . . . ta da unuseei paadon ku hii unu hati.”KOLOSËN 3:13, NW.

KANDA: 121, 75

1, 2. Unfa di Bëibel bi taki a fesi fa dee sëmbë u Jehovah bi o ko hia tjika?

SËMBË dë a wan ölganisaasi a hii së u goonliba, di lobi Jehovah, söseei di kë dini ën. Dee sëmbë aki da dee Jehovah Kotoigi. Hii fa dee sëmbë u Jehovah ta mbei föutu, tökuseei a ta tii de ku di santa jeje fëën. Boo go luku wantu fasi fa a ta mbei de feni gaan bunu.

2 A di jaa 1914, sëmbë an bi dë hia di bi ta dini Jehovah. Ma Jehovah bi mbei soni waka bunu da dee sëmbë fëën di de bi ta du di peleikiwooko. Te u kaba fëën, milionmilion sëmbë ko sabi dee soni dee sikifi a di Bëibel, hën de ko toon Jehovah Kotoigi. Jehovah bi taki fa dee sëmbë aki bi o ko hia tjika. A bi taa: „Wan piki kulupu o toon wan kulupu u dusudusu sëmbë, nöö di piki kulupu sëmbë, o toon gaan hia sëmbë. Mi, Jehovah, o mbei di soni aki pasa hesihesi te di juu fëën dou” (Jesaaja 60:22). A di ten aki, u ta si gbelingbelin taa di tjabukama woto aki pasa tuutuu. Dee sëmbë u Jehovah ko dë gaan hia sëmbë. Te u luku ën bunu, nöö sömëni nasiön sëmbë dë a goonliba di an dou di nöbu di dee sëmbë u Jehovah dou a di ten aki.

3. Unfa dee sëmbë u Gadu bi lei taa de lobi wotowan?

 3 A dee lasiti daka u di goonliba aki, Jehovah ta heepi dee sëmbë fëën u de ko lobi deseei möön gaanfa. Di Bëibel taki taa „Masa Gadu, hën hatiböö da lobi”, nöö fëën mbei dee sëmbë fëën ta djeesi ën (1 Johanisi 4:8). Jesosi bi piki dee bakama fëën taa de musu ’lobi deseei’. A bi piki de tu taa: „Te un ta lobi sö kaa, nöö hii sëmbë o si taa bakama u mi gbelin un dë e” (Johanisi 13:34, 35). A dee jaa dee pasa, dee Jehovah Kotoigi bi lei taa de bi lobi de na de a di lö fasi aki, di gaan feti bi dë. Söwan 55 milion sëmbë dëdë a di u Tu Goonliba Feti. Ma dee sëmbë u Jehovah an bi kii na wan sëmbë a di feti dë. (Lesi Mika 4:1, 3.) A sö wan fasi ’sëmbë buuu an dë a de liba’.Tjabukama 20:26.

4. Faandi mbei u sa taki taa di ko di dee sëmbë u Jehovah ta ko möön hia dë wan apaiti soni?

4 Möönmöön dee sëmbë u Gadu ta ko hia, hii fa Saatan, di gaan felantima u de, ta du ku de. Saatan „hën dee sëmbë u goonliba ta tei kuma gadu u de de ta dini” (2 Kolenti 4:4). Saatan hën ta tii dee politiki ölganisaasi u di goonliba aki. Hënseei ta tii dee soni ka i sa jei njunsu. Dee soni aki da ladio, teefei, nasö Internet. Nöö a ta wooko ku de u di a kë tapa di paaja di u ta paaja di bunu buka. Ma an sa tapa di wooko aki. Saatan sabi taa di ten fëën ko sati, nöö fëën mbei a ta mbei möiti nöömö u tapa u fu wa dini Jehovah möön.Akoalimbo 12:12.

JOO HOI ISEEI A JEHOVAH TE WOTOWAN TA MBEI FÖUTU Ö?

5. Faandi mbei a sa pasa taa wotowan taki wan soni nasö du wan soni di hati u? (Luku di peentje a bigi u di woto.)

5 Dee dinima u Gadu ko sabi taa a dë taanga fanöudu u lobi Gadu ku woto sëmbë. Jesosi bi taki taa: „I musu lobi Gadu i Masa te dou ku hii i hati ku hii i akaa [libi, NW] ku hii di pakisei fii di i abi. Hën da di möön hebi wan u hii dee wëti tuu. Ma nöö wan otowan dë leti nëën baka, hën da i musu lobi di otowan fii leti kumafa i lobi i seei” (Mateosi 22:35-39). Ma di Bëibel ta lei taa hii u tuu da zöndu libisëmbë, u di u da bakamii u Adam. (Lesi Loomë 5:12, 19.) Fëën mbei a sa pasa taa so sëmbë u di kemeente taki wan soni nasö du wan soni di hati u. Andi woo du te sö wan soni pasa? Woo lobi Jehovah kumafa u lobi ën jeti ö? Woo hoi useei nëën u, nöö woo hoi useei a dee sëmbë fëën tu ö? Di Bëibel ta konda soni u so u dee dinima u Gadu di bi taki soni nasö di bi du soni di bi hati wotowan. Boo go luku andi u sa lei u dee soni dee bi ko pasa ku de bakaten.

Andi i bi o du ee i bi ta libi a Isaëli a di ten u Eli ku dee womi mii fëën? (Luku palaklafu 6)

6. Unfa u du sabi taa Eli an bi sitaafu dee womi mii fëën?

6 Luku di woto u Eli. A bi dë wan gaan mindima u Isaëli, ma dee tu womi mii fëën an bi ta hoi dee wëti u Jehovah. Di Bëibel ta taki taa: „Dee womi mii u Eli bi dë hogihati womi. De an bi abi lesipeki da Jehovah” (1 Samuëli 2:12). Eli bi sabi taa dee womi mii fëën bi ta du gaan hogi. Ma an bi ta gandji da de tjika. Baka wan pisiten, hën Jehovah sitaafu Eli ku dee tu womi mii fëën. Bakaten, Jehovah an disa dee bakamii u Eli u de dini ën kuma gaan minidima möön (1 Samuëli 3:10-14). Ee i bi ta libi a di ten u Eli, i bi o dini Jehovah go dou ee i bi sabi taa Eli ta disa dee womi mii fëën ta du gaan hogi soni ö? Di soni aki bi o mbei ja ko abi biibi a Jehovah möön u? Nasö a bi o mbei ja ta dini ën möön u?

7. Un gaan zöndu Dafiti bi du, nöö andi Gadu bi du?

7 Dafiti bi abi sömëni bunu fasi, nöö fëën  mbei Jehovah bi lobi ën seei (1 Samuëli 13:13, 14; Tjabukama 13:22). Ma Dafiti seei bi du wan gaan hogi. Di Ulia bi go a feti, hën Dafiti duumi ku di mujëë u Ulia de kai Batiseiba. Te u kaba fëën, hën di mujëë ko dë ku bëë. Dafiti an bi kë u na wan sëmbë sabi andi a bi du. Fëën mbei a bi manda kai Ulia, hën a pooba u ganjëën faa go nëën pisi. Dafiti bi kë u Ulia duumi ku Batiseiba, nöö a sö wan fasi dee sëmbë bi o si kuma Ulia hën da di tata u di mii. Ma Ulia an bi go nëën pisi. Fëën mbei Dafiti bi seti soni u de kii Ulia a di feti. U di Dafiti bi du gaan zöndu, mbei gaan fuka bi miti hën ku dee sëmbë u di wosudendu fëën (2 Samuëli 12:9-12). Tökuseei Jehovah bi abi tjalihati u Dafiti, nöö a bi dëën paadon. A bi sabi taa Dafiti bi ta kë du soni a wan bunu fasi (1 Könu 9:4). Ee i bi libi a di ten u Dafiti, nöö unfa i bi o feni di soni di Dafiti bi du? Ja bi o dini Jehovah möön u?

8. (a) Unfa a du pasa taa Petuisi an bi hoi hënseei a di soni di a bi taki? (b) Faandi mbei Jehovah bi da Petuisi pasi faa du wooko dëën jeti, baka di a bi mbei wan föutu?

8 U sa lei wan soni a di woto u apösutu Petuisi di sikifi a Bëibel tu. Jesosi bi tei Petuisi u ko dë apösutu fëën. Ma tökuseei a bi pasa taa Petuisi bi ta taki soni nasö ta du soni di an bi bunu. Sö nöö a bi taki wan daka taa nöiti a o go disa Jesosi aluwasi woto sëmbë o go disëën (Maikusi 14:27-31, 50). Ma di de bi ko kisi Jesosi, hën hii dee apösutu go disëën, te kisi Petuisi seei tu. Bakaten, hën Petuisi taki dii pasi taa an sabi Jesosi seepiseepi (Maikusi 14:53, 54, 66-72). Ma di soni di Petuisi bi du aki bi hati ën gaanfa seei. Fëën mbei Jehovah bi dëën paadon, nöö a bi dëën pasi faa du wooko  dëën jeti. Ee i bi dë wan bakama u Jesosi a di ten dë, hën i bi sabi di soni di Petuisi bi du, i bi o abi futoou a Jehovah jeti ö?

I sa dë seiki taa hii juu Jehovah o ta du soni a wan leti fasi

9. Faandi mbei i abi di futoou taa hii juu Gadu ta du soni a wan leti fasi?

9 Dee woto aki ta lei u taa so u dee dinima u Jehovah bi du hogi soni, di bi hati wotowan gaanfa seei. Andi joo du ee dee soni aki ko pasa a di ten aki? Ja o go a dee komakandi möön u, nasö joo go disa Jehovah ku dee sëmbë fëën u? Naa joo si taa Jehovah da wan Gadu di abi tjalihati, söseei taa a ta wakiti u wan sëmbë lei taa a ta tjali u di soni di a du? Ma so juu a sa pasa taa wan sëmbë di du wan gaan zöndu an ta tjali u di soni di a du. Joo abi di futoou taa Jehovah sabi di soni aki ö, söseei taa a o du wan soni te di juu dou ö? Kandë a sa puu di sëmbë dë a di kemeente seei ee a dë fanöudu. I ta biibi taa hii juu Jehovah o ta du soni a wan leti fasi ö?

HOI ISEEI A JEHOVAH HII JUU

10. Unfa Jesosi bi si dee föutu di Judasi Isikaliotu ku Petuisi bi mbei?

10 A di Bëibel u ta lesi taa sömëni sëmbë bi hoi deseei a Jehovah ku dee sëmbë fëën, hii fa wotowan di bi dë a de mindi bi ta mbei gaan föutu. Jesosi da di möön bunu sëmbë di u sa djeesi a di lö fasi dë. Baka di a bi begi hën Tata wan hii ndeti longi faa heepi ën, hën a tei dee 12 apösutu. Ma wan u dee apösutu aki bi tjëën go sei. Di apösutu aki da Judasi Isikaliotu. Söseei apösutu Petuisi bi taki taa an sabi Jesosi (Lukasi 6:12-16; 22:2-6, 31, 32). Jesosi hati an bi boonu ku Jehovah, söseei hati fëën an bi boonu ku dee woto bakama fëën, u di so u de an bi libi bunu ku ën. Jesosi an bi go disa hën Tata, ma a bi dini ën go dou ku hii hën hati. Te u kaba fëën Jehovah bi weki Jesosi ko a libi baka, hën bakaten a mbei a toon Könu u di Könuköndë di dë a liba ala.Mateosi 28:7, 18-20.

11. Andi di Bëibel bi taki a fesi u dee dinima u Jehovah u di ten aki?

11 Di fasi fa Jesosi bi libi, ta lei u taa u sa hoi useei a Jehovah ku dee sëmbë fëën. Sömëni soni dë di mbei u musu kë djeesi ën. U ta si taa Jehovah ta tii dee dinima fëën a di pisiten u di kaba u di goonliba aki. A ta heepi de u peleiki a hii së u goonliba, nöö de da dee wan kodo sëmbë di ta du di wooko aki. De ta libi tuutuu makandi kuma wan famii, nöö de ta dë waiwai u di Jehovah ta lei de soni. Jehovah bi taki di soni aki di a bi taki taa: „Dee futuboi u mi o ta piizii u di hati u de bunu.”Jesaaja 65:14.

An bi o dë wan köni soni seepiseepi u go disa Jehovah ku dee sëmbë fëën, u di wan sëmbë u di kemeente mbei wan föutu

12. Unfa u musu ta si dee föutu u wotowan?

12 U ta dë waiwai seei u di Jehovah ta tii u, söseei u di a ta heepi u fuu du bunu soni seei. Ma dee sëmbë u di goonliba u Saatan an ta dë waiwai, söseei de an abi di biibi taa de o sa feni wan möön bunu libi a di ten di ta ko. An bi o dë wan köni soni seepiseepi ee wan baaa nasö wan sisa go disa Jehovah ku dee sëmbë fëën, u di wan sëmbë u di kemeente taki wan soni nasö du wan soni di an fiti! Ma u musu hoi useei a Jehovah, söseei u musu ta du dee soni dee a ta piki u. Boiti  di dë, u musu ko sabi unfa u musu ta si dee föutu u wotowan, söseei andi u musu du te de mbei wan föutu.

ANDI I MUSU DU TE WOTOWAN MBEI WAN FÖUTU?

13, 14. (a) Faandi mbei u musu ta abi pasensi ku wotowan? (b) Andi da di soni di Gadu paamusi u di u musu hoi a pakisei?

13 Andi i musu du ee wan baaa nasö wan sisa fii du wan soni di hati i? Di Bëibel ta da u di lai aki: „Ja musu dë wan sëmbë di hati fii ta boonu hesi, biga don sëmbë wanwan hati ta boonu hesi” (Peleikima 7:9). Hii u tuu da zöndu libisëmbë, nöö hii u tuu ta mbei föutu. Fëën mbei wa musu ta dë ku di mëni taa dee baaa ku dee sisa fuu o ta taki bunu soni nasö ta du bunu soni hii juu. Nöö an bi o dë wan bunu soni fuu ta pakisei dee föutu u de nöömö. Ee u ta pakisei dee föutu u de nöömö, nöö wa o ta dini Jehovah waiwai möön. Söseei a sa pasa taa biibi fuu ko suwaki, nöö kandë u go disa di ölganisaasi u Jehovah. Te u kaba fëën, wa o sa dini Jehovah möön, söseei wa o sa dë ku di mëni taa woo sa libi a di njunjun goonliba fëën.

14 Wë nöö andi sa heepi i fii sa ta dini Jehovah waiwai te wotowan du wan soni di ta toobi i? Hoi di soni di Gadu paamusi u aki a pakisei: „Wë luku, mi o mbei njunjun mundu ku wan njunjun goonliba. Sëmbë an o mëni dee fesiten soni möön, nöö dee soni dë an o ta toobi de möön” (Jesaaja 65:17; 2 Petuisi 3:13). Jehovah o da i dee gaan bunu aki ee i ta hoi iseei nëën nöömö.

15. Andi Jesosi bi taki taa u musu du te wotowan mbei wan föutu?

15 A dë sö tuu taa wa dë a di njunjun goonliba jeti. Fëën mbei ee wan sëmbë du wan soni di hati u, nöö u musu pakisei fundu fuu ko sabi andi Jehovah kë fuu du. Jesosi bi taki taa: „Ee un ta hoi sëmbë a bëë u dee hogi de ta du unu, nöö unu Tata a liba ala o hoi unu a bëë tu e, u dee hogi dee un ta du. Ma ee un puu di otowan fuunu a bëë, nöö unu Tata a liba ala o puu unu a bëë tu.” Di Petuisi bi hakisi Jesosi ee a bi musu da sëmbë paadon „te dou sëbën pasi”, hën Jesosi bi piki ën taa: „I musu ta puu ën a bëë nöömö, ee sëbënteni toon sëbën pasi seei.” Jesosi bi lei u taa hii juu u musu ta dë kabakaba u da wotowan paadon.Mateosi 6:14, 15; 18:21, 22.

16. Un bunu soni Josëfu lei u?

16 Di woto u Josëfu ta lei u andi u musu du te wotowan du wan soni di hati u. Josëfu ku hën piki baaa nöö Jakopu bi pai ku Lakëli. Jakopu bi abi teni woto womi mii, ma a bi lobi Josëfu möön hii de tuu. Di soni dë bi mbei dee baaa u Josëfu bi ta haun ku ën gaanfa seei. De bi buusëën sö tee taa de sei ën kuma saafu da wanlö sëmbë, hën dee sëmbë dë tjëën go a Egepiti. Baka sömëni jaa, hën di könu u Egepiti mbei Josëfu ko toon di u tu sëmbë di bi abi makiti a di köndë dë, u di a bi lobi fa Josëfu bi ta wooko. Bakaten, dee baaa u Josëfu bi ko a Egepiti u  ko bai soni u njan, u di hangi pena bi dë a di köndë u de. Di de si Josëfu, de an bi sabi taa hën bi di dë, ma hën a bi sabi taa dee baaa fëën di dë. Hii fa de libi hogi ku ën, tökuseei an bi sitaafu de, ma a bi pooba de luku ee de bi tooka tuutuu. Di Josëfu ko si taa dee baaa fëën bi tooka, hën a piki de taa hën da de baaa Josëfu. Bakaten, a da de kötöhati. A piki de taa: „Wan fëëë. Mi o ta heepi unu fuun ku dee mii fuunu feni soni u njan.”Kenesesi 50:21.

17. Andi i kë du te wotowan mbei wan föutu?

17 Hoi a pakisei taa u di hii u tuu ta mbei föutu, mbei a sa pasa taa iseei sa du wan soni di hati wotowan. Fëën mbei ee i ko si taa i du wan soni di mbei wan sëmbë hati boonu, nöö du andi di Bëibel ta taki. Hakisi di sëmbë faa da i paadon, söseei mbei möiti fii ku ën ko bunu baka. (Lesi Mateosi 5:23, 24.) U lobi te wotowan ta da u paadon. Fëën mbei u musu ta da de paadon tu. Kolosën 3:13 ta piki u taa: „Un musu hoi pasensi da unuseei ta da unuseei paadon ku hii unu hati, aluwasi un feni taa wan wotowan du wan soni di hati unu. Leti kumafa Jehovah ta da unu paadon, sö nöö un musu ta da wotowan paadon tu.” (NW) Ee u lobi dee baaa ku dee sisa fuu tuutuu, nöö hati fuu an o ta boonu ku de nöömö, u di de bi du wan soni di hati u (1 Kolenti 13:5). Ee u ta da wotowan paadon, nöö Jehovah o ta da u paadon tu. Fëën mbei te wotowan mbei wan föutu, nöö boo lei taa u abi tjalihati da de kumafa u Tata Jehovah abi tjalihati ku u.Lesi Psalöm 103:12-14.