Skip to content

Skip to table of contents

Wan fasi di Gadu abi di dii möön djamanti sitonu

Wan fasi di Gadu abi di dii möön djamanti sitonu

Sëmbë ta si djamanti kuma wan gaan dii sitonu. I musu abi milionmilion Amëëkan dala u bai so u dee sitonu aki. Ma soni dë di Gadu ta si kuma möön dii soni möön djamanti sitonu nasö woto sitonu ö?

 Wan mujëë de kai Haykanush, da wan peleikima di an dopu jeti, di ta libi na Alimeinia. A bi feni wan pasipö zuntu ku ka a ta libi. A di pasipö dendu i bi abi wantu kaita di de ta bai soni, nöö gaan hia möni bi dë a di pasipö dendu tu. A piki di manu fëën taa sö a feni wan pasipö. Di manu fëën seei bi dë wan peleikima di an dopu jeti.

Di womi ku di mujëë aki bi dë ku gaan möni fuka. De bi abi wan gaan paima. Ma de tja di möni go a di kamian di bi sikifi a di pasipö liba. Di womi di bi abi di pasipö, ku dee sëmbë fëën wosudendu bi foondo seei. Haykanush ku hën manu bi piki de taa u di de bi ta lei soni u Bëibel, mbei de an bi tei di pasipö ku di möni. De bi tei di okasi dë u de konda soni u Jehovah Kotoigi da de, nöö de bi da dee sëmbë u di wosudendu wantu buku.

Dee sëmbë bi kë da Haykanush wan möni u dëën tangi. Ma an bi kë tei ën. Di debooko fëën, di mujëë go luku Haykanush ku hën manu a de pisi. U di a bi kë lei de taa a bi tei di soni di de du u bigi, mbei a bi kë nömönömö taa Haykanush tei wan djamanti andelu.

Leti kumafa di womi ku hën mujëë bi foondo u di soni di Haykanush ku hën manu bi du, sö nöö sömëni sëmbë bi o foondo u di soni di de du aki. Ma Jehovah bi foondo u di soni aki ö? Unfa a bi si di soni di de bi du aki? De bi feni wini u di soni di de bi du ö?

DEE FASI DI SËMBË SA ABI DI DII MÖÖN DEE GUDU U DI GOONLIBA AKI

Dee piki u dee hakisi dee u kai djunsu dë, an taanga u feni. Faandi mbei u taki sö? U di dee dinima u Gadu sabi taa di djeesi di de musu djeesi Jehovah a dee fasi dee a abi, dii möön djamanti. De dii möön goutu, söseei de dii möön hiniwan woto gudu di sëmbë bi sa abi. Na dee soni dee libisëmbë ta si kuma dii soni, Jehovah hën a ta si kuma dii soni (Jesaaja 55:8, 9). Dee dinima u Jehovah ta si di mbei di de ta mbei möiti u djeesi Jehovah a dee fasi dee a abi kuma wan dii soni.

U sa si di soni aki, te u luku di soni di di Bëibel ta taki u di köni di wan sëmbë ta abi. Nöngö 3:13-15 ta taki taa: „Bunu dë da di sëmbë di kisi köni, söseei bunu dë da di sëmbë di abi di köni u si soni a wan bunu fasi. Biga te wan sëmbë abi köni kuma gudu, nöö di soni dë bunu möön di soofu di wan sëmbë ta abi. Te wan sëmbë köni gaanfa, nöö di soni dë bunu möön di goutu di wan sëmbë ta abi. Köni dii möön di sitonu de kai koraal, nöö na wan woto soni sa da i piizii kuma köni.” U ta fusutan gbelingbelin taa Jehovah ta si dee fasi aki kuma möön gaan soni möön hiniwan gudu di dë a goonliba aki.

Ma nöö unfa a dë ku di libi di u musu ta libi ku wan limbo hati?

Jehovah da wan Gadu di an ta ganjan sëmbë. „An sa ganjan sëmbë” (Titusi 1:2). A bi mbei apösutu Paulosu sikifi wan biifi da dee Hebelejën Keesitu sëmbë u fesiten. A bi taa: „Dee sëmbë, u si kuma u abi wan limbo hati, an ta toobi u a soni möön, nöö u kë fuun ta begi da u be u ta libi a sö wan leti fasi nango nöömö.”Hebelejën 13:18.

Jesosi Keesitu bi lei u unfa u musu ta libi ku wan limbo hati. Di Kaba Hei Begima de kai Kajafasi bi piki Jesosi taa: „Mi manda i e, fii soi da mi a di libilibi Gadu fesi aki, taa di soni joo piki mi, a o dë tuutuu soni. Nöö mi hakisi i taa ee ju da di Könu di Gadu bi paamusi taa a o manda ko? Ju da di Mii u Gadu nö?” Wë Jesosi an bi ganjëën, nöö a bi piki hën taa hën da di Mësiasi. A bi piki ën fa soni bi dë tuutuu, hii fa a bi sabi taa dee sëmbë u di kuutuwosu u dee Dju bi o sa kuutu ën taa a kosi Gadu, nöö di soni dë bi o sa mbei de kii ën.Mateosi 26:63-67.

Ma unfa a dë ku u? U bi o ganjan wan sëmbë ee u bi o feni möni nasö wini a wan soni, u di  wa konda finifini unfa soni dë tuutuu, nasö u di woo tooka di woto pikisö u?

DEE SONI DEE SA MBEI A TAANGA DU U FU WA GANJAN SËMBË

A sa taanga da u fu wa ganjan sëmbë a dee lasiti daka u di goonliba aki, ka sëmbë „lobi deseei nöö”, söseei ka de „lobi möni” (2 Timoteo 3:2, NW). Te möni fuka dë a wan köndë nasö te a taanga u feni wooko, nöö an ta toobi so sëmbë u fufuu wotowan, nasö u ganjan wotowan. Gaansë u sëmbë ta pakisei sö, u di de ta si kuma di wan kodo fasi fa de sa feni soni, da te de ta ganjan sëmbë. So Keesitu sëmbë seei bi „suku u wini soni a wan fasi di na fiti”, nöö di soni dë bi poi di në di de bi abi a di kemeente.1 Timoteo 3:8; Titusi 1:7.

Ma gaansë u dee Keesitu sëmbë ta waka a Jesosi baka. De si taa a möön bunu u abi dee fasi di Gadu abi, möön hii gudu di de bi sa abi. Fëën mbei njönku Keesitu sëmbë di nango a siköö, an ta fufuu luku soni u feni bunu cijfer (Nöngö 20:23). Na hii juu sëmbë o da u wan soni u di wa ta ganjan sëmbë, kumafa de bi da Haykanush wan soni. Ma te wa ta ganjan sëmbë, hën da u ta du andi Gadu feni bunu, nöö háti fuu  an o ta fon u. Di soni aki da wan soni di dii a Gadu wojo seei.

Di soni dë u ta si tu a di woto u Gagik. A bi taki taa: „Ufö mi toon wan Keesitu sëmbë, mi bi ta wooko a wan gaan masikapei, ka di basi an bi ta kë paka di möni di a bi musu ta paka lanti u di köndë. Tjë sö u di möni di u bi ta mbei a di wooko nöö u bi ta sikifi da lanti. U di mi bi dë wan sëmbë di ta tei fesi a di wooko, mbei mi bi musu piki di lantima di ta ko luku di kamian taa di möni dë di masikapei bi ta mbei tuutuu. Te u kaba fëën, de bi ko ta si mi kuma wan sëmbë di ta ganjan wotowan. Di mi ko lei soni u di tuutuu lei, hën mi bi piki de taa ma o du di soni dë möön, aluwasi de bi ta paka mi hia möni. Hën mi hopo u miseei masikapei. Di fosu daka seei mi bi go buta di masikapei u mi a lantibuku, nöö mi bi ta paka lanti di möni di mi bi musu ta paka de.”2 Kolenti 8:21.

Gagik taki taa: „Mi bi ko ta kisi hafu u di möni di mi bi ta kisi, nöö a bi ta taanga da mi u mi sölugu dee sëmbë u di wosudendu u mi. Ma tökuseei mi ko ta dë waiwai. Jehovah ta si taa háti u mi dë limbolimbo. Mi ta tja miseei a wan fasi di dee tu womi mii u mi sa djeesi, nöö mi ko abi dee fasi di mbei mi kisi gaandi a di kemeente. Nöunöu dee lantima ku dee sëmbë dee mi ta wooko ku de ta si mi kuma wan sëmbë di an ta ganjan wotowan.”

JEHOVAH TA HEEPI U

Jehovah lobi dee sëmbë dee ta tja gafa ko dëën, u di de ta djeesi ën a dee fasi dee a abi. Wan u dee fasi aki da di ganjan di wa ta ganjan wotowan (Titusi 2:10). Jehovah ta paamusi u taa a o heepi u te u ta djeesi ën a dee fasi dee a abi. A bi mbei Könu Dafiti taki taa: „Mi bi dë wan njönku kijoo, ma nöunöu mi ko gaandi kaa. Ma nöiti mi si taa Gadu disa wan sëmbë di ta libi bunu nëën wojo, hën wanwan. Nöiti mi si taa dee mii fëën ta waka ta suku soni u njan.”Psalöm 37:25.

Di woto u Luti ta lei u taa sö a dë tuutuu. Luti bi fika ku hën mai Naomi, nöö an bi go disëën u di a bi ko gaandi. Luti bi foloisi go a Isaëli ka a bi sa dini di tuutuu Gadu (Luti 1:16, 17). An bi ta ganjan sëmbë, ma a bi ta wooko taanga, u di a bi ta pii di soni kuma alisi a dee goon, kumafa di Wëti bi seti da dee pootima. Leti kumafa Jehovah an bi disa Dafiti, sö nöö Jehovah an bi disa Luti ku Naomi (Luti 2:2-18). Ma a bi da Luti möön soni möön di sölugu di a bi sölugu ën. A bi tei ën ko wan sëmbë di bi dë a di famii u Könu Dafiti, ku di Mësiasi di a bi paamusi!Luti 4:13-17; Mateosi 1:5, 16.

A sa taanga da so u dee dinima u Jehovah u de feni möni tjika u bai dee soni di de abi fanöudu. De ta wooko taanga, ka u de go suku wan wooko di an taanga, ka de musu ta ganjan sëmbë u feni möni. Te de ta du di soni aki, nöö de ta lei taa de ta djeesi Jehovah a dee fasi dee a abi. Wan u dee fasi aki da di ganjan di wa ta ganjan sëmbë. U ta si dee fasi aki möön fanöudu möön hiniwan woto soni di u bi sa abi.Nöngö 12:24; Efeise 4:28.

Leti kumafa Luti bi abi di biibi taa Jehovah o sa heepi ën, sö nöö dee Keesitu sëmbë a hii së u goonliba abi di biibi taa a o sa heepi de tu. Dee Keesitu sëmbë aki ta futoou di sëmbë di paamusi di soni aki: „Ma o disa i seepi, kwetikweti. Na wan juu mi o disa i wanwan möönsö” (Hebelejën 13:5). Hiniwan ten Jehovah bi lei taa a sa heepi dee sëmbë dee an ta ganjan wotowan, nöö a bi lei taa a o du ën tu. Hii juu a hoi hënseei a di paamusi di a bi paamusi dee dinima fëën taa a o ta mbei de feni dee soni di de abi fanöudu.Mateosi 6:33.

Wë libisëmbë ta si djamanti sitonu ku woto gudu kuma gaan soni. Ma u sa dë seiki taa di Tata fuu di dë a liba ala, ta si taa di ganjan di wa ta ganjan wotowan, nasö dee woto bunu fasi dee u abi, dii möön hiniwan woto dii sitonu!

Te wa ta ganjan sëmbë, nöö háti fuu an o ta fon u te woo ta fan ku sëmbë a di peleikiwooko