Skip to content

Skip to secondary menu

Skip to table of contents

Jehovah Kotoigi

Saamakatöngö

Di Hei Wakitimawosu (u lei soni a komakandi)  |  höndima-liba 2016

„Jehovah di Gadu fuu, da wan kodo Jehovah nöö”

„Jehovah di Gadu fuu, da wan kodo Jehovah nöö”

„Un haika, un dee Isaëli sëmbë: Jehovah di Gadu fuu, da wan kodo Jehovah nöö.”DETOLONOMI 6:4.

KANDA: 138, 112

1, 2. (a) Faandi mbei sömëni sëmbë sabi di soni di sikifi a Detolonomi 6:4? (b) Faandi mbei Mosesi taki dee soni dee sikifi a di tëkisi dë?

HÖNDÖHÖNDÖ jaa longi dee Dju ta wooko ku di soni di sikifi a Detolonomi 6:4 te de ta begi. A dë wan apaiti begi di de ta kai Sjema. Di wöutu aki da di fosu wöutu u di tëkisi aki a Hebelejëntöngö. Gaansë u dee Dju ta begi di begi aki a mamate ku sapate u lei taa Gadu wanwan de ta dini.

2 Dee wöutu aki da wan pisi u di lasiti taki di Mosesi bi hoi da dee Isaëli sëmbë. A di jaa 1473 bifö Keesitu, dee Isaëli sëmbë bi dë a di köndë Moab, nöö de bi dë kabakaba u aba di Joodan Lio u go tei di Paamusi Köndë (Detolonomi 6:1). Mosesi bi waka 40 jaa longi ku dee Isaëli sëmbë, nöö a bi kë u de abi degihati u pasa dee taanga ten di bi o ko miti de. De bi musu abi futoou a Jehovah di Gadu u de, nöö de bi musu hoi deseei nëën. Fëën mbei dee lasiti soni di Mosesi bi taki, bi da de degihati u du di soni dë. Baka di Mosesi bi da dee Isaëli sëmbë dee Teni Wëti ku dee woto wëti dee Jehovah bi dëën, hën a mëni  de di soni di sikifi a Detolonomi 6:4, 5 (Lesi ën.)

3. Un hakisi woo luku a di woto aki?

3 Dee Isaëli sëmbë bi sabi taa Jehovah di Gadu u de da „wan kodo Jehovah nöö”. Dee Isaëli sëmbë dee bi ta dini Gadu ku hii de hati bi ta dini wan kodo Gadu nöö. Di Gadu aki bi dë di Gadu u dee avo u de. Ma faandi mbei Mosesi bi toona mëni de taa Jehovah di Gadu u de da „wan kodo Jehovah nöö”? Unfa di soni aki nama ku di dini di u musu ta dini Gadu ku hii u hati, ku hii u libi, söseei ku hii u kaakiti? Nöö unfa di soni di sikifi a Detolonomi 6:4, 5 nama ku u a di ten aki?

DI GADU FUU DA „WAN KODO JEHOVAH NÖÖ”

4, 5. (a) Andi a kë taa Jehovah da „wan kodo Jehovah nöö”? (b) Unfa Jehovah tooka ku dee woto gadu?

4 An dë kuma dee woto gadu. Te Bëibel ta taki Jehovah da „wan kodo Jehovah nöö”, nöö a kë taki taa an dë kuma dee woto gadu. Faandi mbei Mosesi bi taki di soni dë? Na di biibi di sëmbë ta biibi taa Gadu dë dii sëmbë a wan, Mosesi bi ta taki. Ma a bi kë taki taa Jehovah da di sëmbë di mbei liba ala ku goonliba aki, nöö hën da di Tiima u hii di mundu. Hën da di wan kodo tuutuu Gadu, nöö na wan gadu dë kuma ën (2 Samuëli 7:22). Fëën mbei Mosesi bi kë toona mëni dee Isaëli sëmbë taa Jehovah wanwan nöö de musu dini. De an bi musu djeesi dee woto sëmbë dee bi ta liba zuntu ku de, di bi ta dini sömëni poipoi gadu ku sömëni mujëë gadu. Dee sëmbë aki bi ta biibi taa dee gadu u de bi sa basi wantu soni u di goonliba.

5 Dee Egepiti sëmbë bi ta dini di sonu gadu Ra, di mujëë gadu u liba de kai Nut, di gadu u goonliba de kai Geb, di gadu u Nëili lio de kai Hapi, söseei de bi ta dini sömëni mbeti tu. Jehovah bi lei taa a hei möön hii dee poipoi gadu aki, di a bi mbei dee Teni Sitaafu ko a dee Egepiti sëmbë. Gaansë u dee Kaana sëmbë bi ta dini di gadu Baali. Dee Kaana sëmbë bi ta biibi taa di poipoi gadu aki hën bi mbei hii soni di ta libi. De bi ta biibi taa di gadu aki bi dë di gadu u liba ala, ku di gadu u di tjuba ku di gadu u gaan ventu. A sömëni kamian de bi ta biibi taa Baali o tjubi de (Nöbu 25:3). Dee Isaëli sëmbë bi musu hoi a pakisei taa Jehovah di Gadu u de, di dë „di tuutuu Gadu” an dë kuma dee woto gadu. A dë „wan kodo Jehovah nöö”.Detolonomi 4:35, 39.

Jehovah an ta tooka möönsö. I sa biibi ën hii juu, a ta hoi hënseei a dee soni dee a taki, söseei a ta taki tuutuu soni

6, 7. Andi „wan kodo” kë taki tu, nöö unfa Jehovah lei taa a dë „wan kodo” nöö?

6 Jehovah an ta tooka möönsö, nöö a ta hoi hënseei a dee soni dee a taki. Dee wöutu „wan kodo”, a di pisi ka di Bëibel taki taa Jehovah da „wan kodo Jehovah nöö”, kë taki tu taa hii juu u sa futoou ën te a taki taa a o du wan soni, söseei te a du wan soni. Jehovah an ta tooka möönsö. I sa biibi ën hii juu, a ta hoi hënseei a dee soni dee a taki, söseei a ta taki tuutuu soni. Fëën mbei a bi paamusi Abahamu taa dee bakamii fëën bi o  libi a di Paamusi Köndë. Nöö Jehovah bi du sömëni gaan foombo wooko u hoi hënseei a di soni di a bi paamusi. Hii fa Jehovah bi paamusi di soni aki fö höndö ku dii teni jaa pasa, tökuseei an bi tooka pakisei möönsö.Kenesesi 12:1, 2, 7; Ëkisodesi 12:40, 41.

7 Höndöhöndö jaa baka di dë, Jehovah bi kai dee Isaëli sëmbë dee Kotoigi fëën, nöö a bi piki de taa: „Mi ta dë di wan Sëmbë. Ufö mi na wan Gadu bi dë, nöö baka mi na wan Gadu o dë tu.” Jehovah bi piki de gbelingbelin taa dee pakisei fëën an ta tooka möönsö. Fëën mbei a bi taki taa: „Hii juu mi ta dë di wan Sëmbë” (Jesaaja 43:10, 13; 44:6; 48:12). Dee Isaëli sëmbë bi abi wan gaandi seei u dini wan Gadu di an ta tooka möönsö, söseei di ta hoi hënseei hii juu a dee soni dee a taki! Di wan seei gaandi u abi a di ten aki tu.Maleaki 3:6; Jakobosi 1:17.

8, 9. (a) Unfa Jehovah kë u dee dinima fëën dini ën? (b) Unfa Jesosi bi lei taa di soni di Mosesi bi taki da wan fanöudu soni seei?

8 Mosesi bi toona mëni dee Isaëli sëmbë taa di lobi di Jehovah lobi de, ku di booko di a ta booko hën ku de, an o tooka möönsö. Ma Jehovah bi kë taa de bi musu ta dini hën wanwan nöö, nöö de bi musu lobi ën ku hii de hati, ku hii de libi, söseei ku hii de kaakiti. Dee mama ku dee tata seei bi musu lei dee mii u de soni u Jehovah hiniwan juu baka, sö taa dee njönkuwan seei bi sa ta dini Jehovah wanwan nöö.Detolonomi 6:6-9.

9 Nöiti Jehovah ta tooka dee soni dee a abi a pakisei. Fëën mbei nöiti a o tooka di fasi fa a kë u dee tuutuu dinima fëën dini ën. Ee u kë u di fasi fa u ta dini Jehovah kai ku ën, nöö u musu dini hën wanwan nöö, söseei u musu lobi ën ku hii u hati, ku hii u pakisei, söseei ku hii u kaakiti. Jesosi bi taki taa di soni aki da di möön gaan wëti. (Lesi Maikusi 12:28-31.) Boo lei ku dee soni dee u ta du taa u ta biibi taa „Jehovah di Gadu fuu, da wan kodo Jehovah nöö”.

U MUSU DINI JEHOVAH WANWAN NÖÖ

10, 11. (a) Na un fasi u sa taki taa Jehovah wanwan nöö u ta dini? (b) Unfa dee njönku Hebelejën kijoo dee bi dë a Babilon bi lei taa de ta dini Jehovah wanwan nöö?

10 Jehovah da di wan kodo tuutuu Gadu fuu. Fëën mbei hën wanwan nöö u ta dini. Wa sa dini na wan woto gadu, söseei wa sa tja di dini di u ta dini ën go nama ku poipoi lei nasö guwenti di an bunu. Na hei nöö Jehovah hei möön dee woto gadu, söseei na makiti nöö a abi möön dee woto gadu tu, ma hën da di tuutuu Gadu. Fëën mbei Jehovah wanwan nöö u musu dini.Lesi Akoalimbo 4:11.

11 A di Bëibel buku Daniëli u ta lesi soni u dee Hebelejën njönku kijoo de kai Daniëli, Hanania, Misaëli, ku Asalia. De bi lei taa Jehovah wanwan nöö de bi ta dini, di de an bi kë njan dee soni di dinima u Jehovah an bi musu njan. Dee dii mati u Daniëli aki an bi kë bendi hedi da di goutu pindi u Nebukatinesali. De bi sabi taa Jehovah wanwan nöö de musu dini, nöö de bi hoi deseei nëën ku hii de hati.Daniëli 1:1–3:30.

U musu ta buta Jehovah a di fosu kamian a u libi

12. Ku andi u musu ta köni ee u kë dini Jehovah wanwan nöö?

12 U musu ta buta Jehovah a di fosu kamian a u libi. Ee u kë dini Jehovah wanwan,  nöö u musu luku bunu be woto soni an tei hën kamian. Andi sa dë dee woto soni dee sa tei hën kamian? A dee Ten Wëti, Jehovah bi taki taa dee sëmbë fëën an musu dini dee woto gadu. De an bi musu du na wan soni di nama ku poipoi gadu (Detolonomi 5:6-10). A di ten aki sömëni fasi dë fa sëmbë ta dini poipoi gadu, nöö a sa taanga da sëmbë u sabi so u dee fasi dë. Ma Jehovah an tooka di fasi fa a kë fuu dini ën. A dë di „wan kodo Jehovah” jeti. Boo go luku unfa u sa köni ku dee fasi fa sëmbë ta dini poipoi gadu a di ten aki.

13. Andi u sa ko lobi möön fa u lobi Jehovah?

13 A Kolosën 3:5 (Lesi ën.), u ta lesi u soni di sa poi u ku Jehovah. U ta lesi taa ee wan sëmbë abi langawojo, nöö a dë kuma a ta dini poipoi gadu. Faandi mbei u taki sö? Wë, te u kë wan soni nömönömö, nöö a sa ko dë di möön fanöudu soni a u libi, hën da a sa ko dë kuma wan gadu fuu. Dee soni dee u sa ta kë nömönömö da di hia möni ku di hia gudu di sëmbë ta kë abi. Hii dee zöndu dee sikifi a Kolosën 3:5 nama ku langawojo, nöö de dë kuma te sëmbë ta dini poipoi gadu. Fëën mbei ee u ta kë dee soni aki gaanfa poi, nöö woo sa ko lobi dee soni aki möön fa u lobi Gadu. Nöö Jehovah an bi o dë di „wan kodo Jehovah” da u möön. Wë wa bi o kë u sö wan soni pasa ku u.

14. Andi apösutu Paulosu bi taki taa wa musu du te a nama ku di lobi di u musu lobi Gadu?

14 Apösutu Johanisi bi taki sö wan soni tu. A bi taki taa: „Wan musu lobi dee soni u di goonliba aki e, dee an ta kai ku Gadu. Biga ee i ta lobi de, nöö hën da ja ta lobi u Tata Masa Gadu. Biga dee taku kë u libisëmbë hati ku langawojo ku gaan fasi, nöö dee lö soni dë dë soni u goonliba. (1 Johanisi 2:15, 16). Fëën mbei hii juu u musu ta öndösuku useei luku ee wa ko ta lobi dee soni u di goonliba aki. Kandë u sa ko si taa u bigi ta lobi dee piizii, dee sëmbë, dee modo, ku dee peipei fasi fa de ta bisi soni a di goonliba aki. Nasö kandë u ta suku „gaan soni”, nöö kandë fëën mbei u nango a hei siköö (Jelemia 45:4, 5). Di njunjun goonliba dë zuntu seei. Fëën mbei wa musu fëëkëtë di soni di Mosesi bi taki! Ee u ta fusutan taa „Jehovah di Gadu fuu, da wan kodo Jehovah nöö”, söseei ee u ta biibi di soni dë, nöö hën wanwan nöö woo ta dini, söseei woo dini ën kumafa a kë.Hebelejën 12:28, 29.

U MUSU TA LIBI MAKANDI KUMA WAN FAMII NÖÖMÖ

15. Faandi mbei Paulosu bi toona mëni dee Keesitu sëmbë taa Jehovah da „wan kodo Jehovah nöö”?

15 Te di Bëibel taki taa Jehoavah da „wan kodo Jehovah nöö”, nöö a ta heepi u fuu fusutan taa Jehovah kë u dee dinima fëën libi makandi kuma wan famii. Nöö de musu abi di wan seei maaka a di libi. A dee kemeente u dee fesiten Keesitu sëmbë, i bi abi Dju sëmbë, Giiki sëmbë, Loomë sëmbë ku woto köndë sëmbë tu. De bi kiija a peipei fasi, de an bi abi dee seei guwenti, söseei de an bi lobi dee seei soni. Di soni dë bi mbei a bi taanga  da so u de u tei wan njunjun fasi u dini Jehovah, nasö u disa dee awoo guwenti u de. Fëën mbei Paulosu bi musu toona mëni de taa Keesitu sëmbë abi wan kodo Gadu nöö, hën da Jehovah.Lesi 1 Kolenti 8:5, 6.

Jehovah kë u dee dinima fëën libi makandi kuma wan famii. Nöö de musu abi di wan seei maaka a di libi

16, 17. (a) Un tjabukama woto ta pasa tuutuu a di ten fuu aki, nöö un soni a tja ko tu? (b) Andi sa mbei wa ta libi makandi kuma wan famii moön?

16 Ma unfa a dë ku di kemeente u Keesitu sëmbë a di ten aki? Di tjabukama Jesaaja bi taki taa „a dee lasiti daka” sëmbë u hii nasiön bi o ko makandi u dini Jehovah. De bi o taki taa: „A o lei u dee pasi fëën, nöö woo waka a dee pasi liba” (Jesaaja 2:2, 3). U ta wai seei te u ta si fa di tjabukama woto aki ta pasa tuutuu a di ten aki! Dee baaa ku dee sisa fuu dë sëmbë u peipei kamian, de ta fan peipei töngö, nöö de kiija a peipei fasi tu. Ma tökuseei u ta dini Jehovah makandi kuma wan famii. Ma u di u tooka sö, mbei so juu u ta abi pikipiki toobi.

I ta mbei möiti fuu sa ta libi makandi kuma wan famii a di kemeente u? (Luku palaklafu 16-19)

17 Wë unfa i ta si dee baaa ku dee sisa dee kiija a peipei fasi? Wë di töngö u de, di fasi fa de ta bisi soni, dee manii u de, ku dee soni de ta njan sa tooka gaanfa ku di u fii. I ta  suku fasi u na nama ku de u? I ta nama möön gaanfa ku dee baaa ku dee sisa dee i ku de ta du soni a di wan seei fasi ö? Unfa i ta si dee gaanwomi u di pisiwata fii di njönku möön i, nasö di dë u wan woto föluku nasö di kiija a wan woto fasi? Ee wa luku bunu, nöö u sa mbei dee soni aki mbei wa ta libi makandi kuma wan famii möön.

18, 19. (a) Un lai u ta kisi a Efeise 4:1-3? (b) Andi u sa du fuu ta libi makandi kuma wan famii a di kemeente

18 Andi u sa du u mbei taa dee lö soni dë an poi di libi di u ta libi makandi kuma wan famii? Paulosu bi piki dee Keesitu sëmbë dee bi libi a Efeise wan bunu soni. Di foto aki bi dë wan gudu foto ka sömëni sëmbë di bi kiija a peipei fasi bi ta libi. (Lesi Efeise 4:1-3.) Paulosu bi taki taa de bi musu abi sakafasi, saapifasi, pasensi, ku lobi. Dee fasi aki dë kuma dee taanga posu dee ta hoi wan wosu a pë. Ma ee i kë seeka wan wosu faa ta dë bumbuu, nöö i musu wooko taanga. Paulosu bi kë u dee Keesitu sëmbë u Efeise wooko taanga ’ku wan hati kumafa di Akaa [santa jeje, NW] u Masa Gadu buta de’.

19 Hii u tuu musu mbei möiti fuu ta libi kuma wan famii a di kemeente. Unfa u sa du di soni aki? Di fosu soni di u musu du, hën da u musu ko abi dee fasi dee Paulosu bi taki. Dee fasi aki da: sakafasi, saapifasi, pasensi, ku lobi. Di u tu soni di u musu du, hën da u musu wooko taanga u lei taa u ta libi ku „wan hati”. Di fusutan di wa ta fusutan useei so juu sa mbei taa pikipiki toobi ko dë a di libi di u ta libi makandi kuma wan famii. Fëën mbei u musu wooko taanga u seeka dee soni aki fuu sa ta libi fiifii makandi.

20. Unfa u sa lei taa u ta fusutan taa „Jehovah di Gadu fuu, da wan kodo Jehovah nöö”?

20 „Jehovah di Gadu fuu, da wan kodo Jehovah nöö.” Nöö sö di soni aki dë tuutuu! Di soni di Mosesi bi mëni dee Isaëli sëmbë aki, bi da de taanga u hoi dou di soni bi ta taanga da de, di de bi musu go tei di Paamusi Köndë. Dee soni dee a bi taki aki sa taanga u tu fuu sa pasa di gaan fuka, söseei fuu sa mbei di goonliba ko toon wan Paladëisi. Boo ta dini Jehovah wanwan nöö. U musu lobi ën, söseei u musu dini ën ku hii u hati, ku hii u pakisei, ku hii u kaakiti. Nöö u musu ta mbei taanga möiti fuu sa ta libi fiifii makandi kuma wan famii ku dee baaa ku dee sisa fuu. Te u ta du dee soni aki nöömö, nöö Jesosi o si u kuma sikapu te a o kuutu sëmbë. Nöö woo si fa dee soni dee a taki o pasa tuutuu. A bi taki taa: „Wë un dee sëmbë Gadu limbo fesi da aki, un pasa ko tei di kamian fuunu a mi Tata köndë aki e, di i si a bi seeka buta dë gaanduwe da unu kaa bifö a seti mbei goonliba.”Mateosi 25:34.