„Na mbei na wan sëmbë . . . tapa unu fuun feni di paka.”​​—KOLOSËN 2:18, NW.

KANDA: 122, 139

1, 2. (a) Un gaan bunu dee dini u Gadu ta wakiti u de feni? (b) Andi ta heepi u fuu ta buta pakisei a di gaan bunu aki? (Luku di peentje a bigi u di woto.)

KEESITU sëmbë di dë salufuwan, o feni wan gaan bunu. De ta wakiti di ten ka de o go libi a Gadu köndë. Apösutu Paulosu bi taki taa de o „wini di paima a Masa Gadu Köndë” (Filipi 3:14). Hën da de o tii makandi ku Jesosi Keesitu a di Könuköndë fëën, nöö de o wooko makandi u puu libisëmbë a zöndu basu (Akoalimbo 20:6). Di soni aki da wan gaan bunu soni seei! Dee woto sikapu ta wakiti u de feni wan woto gaan bunu. De ta wakiti u de libi u teego a di Paladëisi a goonliba aki, nöö di soni aki ta mbei de ta wai seei!​​—2 Petuisi 3:13.

2 Paulosu bi kë heepi dee woto salufuwan u de ta hoi deseei a Gadu nöömö, sö taa de bi sa feni di bunu di Gadu kë da de. A bi piki de taa: „Un buta pakisei fuunu a dee soni u Gadu Köndë ala” (Kolosën 3:2). Dee salufuwan bi musu ta buta pakisei a dee soni di de bi o feni a Gadu köndë ala (Kolosën 1:4, 5). Te dee dinima u Jehovah ta buta pakisei a dee gaan bunu di Jehovah o da de,  nöö a ta heepi de u de an mbei na wan soni puu de pakisei a di dini di de ta dini ën. Dee dinima fëën dee o go libi a liba ala, ku dee o libi a goonliba aki tuu o feni wan gaan bunu.​—1 Kolenti 9:24.

3. Andi Paulosu bi piki dee baaa ku dee sisa u Kolosën?

3 Paulosu bi taki u wanlö soni di sa tapa Keesitu sëmbë u de an feni di bunu di Gadu kë da de. A bi sikifi wan biifi da dee baaa ku dee sisa u Kolosën, u piki de taa poipoi Keesitu sëmbë bi dë a di kemeente, di bi ta hoi di Wëti di Gadu bi da Mosesi, ka u de du dee soni di Keesitu bi taki (Kolosën 2:16-18). Paulosu bi taki tu u soni di sa tapa u a di ten aki fu wa feni di gaan bunu di Gadu kë da u. A bi konda da u andi u musu du fuu sa koti pasi da dee taku hangi dee ta ko a u hati, söseei andi u musu du te u ku dee sëmbë fuu ko abi toobi nasö te u ku wan baaa nasö wan sisa u di kemeente ko abi toobi. Dee soni dee Paulosu bi taki ta heepi u a di ten aki jeti. Boo luku so u dee soni dee a bi sikifi a di biifi di a bi manda da dee baaa ku dee sisa u Kolosën.

PUU DEE TAKU HANGI DEE TA KO A I HATI

4. Faandi mbei u sa taki taa dee taku hangi dee ta ko a u hati sa tapa u fu wa feni di gaan bunu di Gadu kë da u?

4 Baka di Paulosu bi mëni dee baaa ku dee sisa fëën u de an fëëkëtë di gaan bunu di de o feni, hën a piki de taa: „Wë nöö dee sëmbë, di un sabi sö kaa, nöö un musu kaba ku dee takulibi u di goonliba aki e, kuma mötjö libi sö, fanafiti libi, dee taku hangi a di së u manu ku mujëë, langawojo u soni” (Kolosën 3:5). So juu dee taku hangi dee ta ko a u hati sa mbei a taanga da u seei fuu hoi useei a Jehovah, nöö de sa mbei wa feni di gaan bunu di Gadu kë da u. Wan baaa bi libi fanafiti a di së u manu ku mujëë soni, ma bakaten a bi toona ko ta dini Jehovah fajafaja baka. Di baaa aki bi taki taa dee taku hangi dë bi ta mbei a ta taanga dëën seei faa hoi hënseei a Jehovah, hën te u kaba fëën a bi go du wan gaan zöndu.

5. Andi sa heepi u fu wa go du wan soni di sa tja hogi ko da u?

5 U musu ta köni gaanfa seei ku soni di sa mbei wa hoi useei a dee wëti u Jehovah möön. A bi o dë wan köni soni ee wan womi ku wan mujëë di mbei buka u tööu, taki bumbuu a fesi taa de an o panjan deseei nasö bosi deseei a wan fasi di sa weki dee taku hangi dee dë a de hati, söseei taa de an o dë de wanwan a wan kamian te an fiti (Nöngö 22:3). Woto soni dë di sa mbei u du soni di an bunu tu. Hën da te u musu go du wan wooko a wan longi kamian, nasö te u musu wooko ku wan mujëë sëmbë a wan kamian, nasö ku wan womi sëmbë a wan kamian (Nöngö 2:10-12, 16). Andi sa heepi i te a dë sö? Wë piki dee sëmbë dee i ku de ta wooko taa i da wan Jehovah Kotoigi. Tja iseei a wan bunu fasi, nöö nöiti i musu fëëkëtë taa di kai di wan sëmbë ta kai lobi ku wan sëmbë di hën ku ën an tööu, sa tja hogi ko dëën. U musu ta köni te a dë taa u ta tjali nasö te u ta fii kuma u dë u wanwan. Te dee lö fii aki ta möön u, nöö u sa kë u woto sëmbë buta pakisei a u, aluwasi a dë wan sëmbë di an ta dini Jehovah. Di soni aki sa mbei u go du wan gaan hogi soni. Ee sö i ta fii, nöö na go du wan soni di o sa mbei ja feni di gaan bunu di Gadu kë da i. Mbei Jehovah ku dee baaa ku dee sisa fii heepi i.​—Lesi Psalöm 34:18; Nöngö 13:20.

6. Andi u musu ta hoi a pakisei te a nama ku dee soni dee u ta tei u mbei piizii?

6 Ee u kë puu dee taku hangi dee ta ko a u hati, nöö u musu ta köni ku fëlön, poku nasö woto soni ka de ta taki, nasö ka de ta du fanafiti  soni. A di ten aki, dee soni aki ta mbei u mëni di fasi fa soni bi dë a di foto Sodom ku di foto Gomola (Judasi 7). Dee sëmbë dee ta mbei fëlön, poku, ku woto soni di sëmbë ta tei u mbei piizii, ta mbei sëmbë si kuma fanafiti libi a di së u manu ku mujëë soni an hogi seei. Fëën mbei hii juu u musu ta köni ku dee soni aki. Wa musu ta luku, nasö ta haika hiniwan soni di dee sëmbë u di goonliba aki ta tei u mbei piizii. Ma u musu ta köni be di fasi fa u ta mbei piizii an tapa u fuu feni di libi di Gadu kë da u.​—Nöngö 4:23.

I MUSU KO ABI LOBI KU SUTIFASI

7. Andi sa pasa so juu a di kemeente?

7 U ta wai seei taa u dë a di kemeente u Keesitu sëmbë. U ta lei soni a di Wöutu u Gadu te u dë a dee komakandi, söseei u ta da useei taanga. Di soni aki ta heepi u fu wa puu pakisei a dee gaan bunu di Gadu kë da u. Ma so juu u ku dee baaa ku dee sisa fuu sa kisi pikipiki toobi. Ee wa ta mbei möiti fuu seeka dee toobi aki, nöö a sa pasa taa u hoi dee baaa ku dee sisa fuu a bëë.​​—Lesi 1 Petuisi 3:8, 9.

8, 9. (a) Andi o heepi u fuu sa feni dee gaan bunu di Gadu kë da u? (b) Andi sa heepi u fuu sa ta libi fiifii ku useei, aluwasi wan baaa nasö wan sisa du wan soni di hati u?

8 U musu ta köni be wa hoi wan baaa nasö wan sisa fuu a bëë, u di di soni dë sa tapa u fu wa feni di gaan bunu di Gadu kë da u. Paulosu bi taki andi bi o heepi wan Keesitu sëmbë fu an hoi dee wotowan fëën a bëë. A bi taki taa: „Dee sëmbë o, fa Masa Gadu tei u buta apaiti fëën seei aki, nöö a lobi u gaanfa e. Nöö fëën mbei un musu a’ tjalihati u otowan. Un musu libi ku ën ku bunuhati, ku saka fasi. Nöö un musu abi sapifasi ta mëni di otowan fii ta hoi pasensi dëën. Un musu a’ tifihedi da unu na unu e. Ee i ku sëmbë a’ soni, nöö ja musu hoi ën a bëë, leti kumafa [Masa Jesosi] Keesitu an ta hoi i a bëë. Nöö u hii dee libi aki tuu, nöö lobi hën da di mama u de e. Biga te un lobi unu na unu, nöö un sa libi makandi ku wan hati kumafa Gadu kë.”​—Kolosën 3:12-14.

9 Te u lobi dee baaa ku dee sisa fuu, söseei te u abi sutifasi, nöö woo sa ta da de paadon. Ee wan sëmbë taki wan soni nasö du wan soni di hati u, nöö u musu go pakisei fa useei bi taki wan soni nasö du wan soni di bi hati wotowan, hën de da u paadon. U bi wai seei di de bi lei taa de lobi u, söseei di de bi lei taa de abi sutifasi! (Lesi Peleikima 7:21, 22.) U dë ku tangi a hati seei taa Keesitu tja u ko a di tuutuu lei a wan suti fasi (Kolosën 3:15). Hii u tuu lobi di wan seei Gadu, u ta paaja di wan seei bosikopu, söseei dee seei fuka ta miti u. Ee u abi sutifasi, söseei ee u ta lobi useei ta da useei paadon, nöö woo ta möön libi makandi kuma wan famii a di kemeente, söseei woo sa ta buta hii u pakisei a dee gaan bunu di Gadu kë da u.

10, 11. (a) Faandi mbei haun an bunu? (b) Andi u sa du fu wa haun ku wotowan, faa ko dë taa wa feni di gaan bunu di Gadu kë da u?

10 Ee u ta haun ku wotowan, nöö a sa tapa u fuu feni di gaan bunu di Gadu kë da u. Di Bëibel ta piki u unfa di soni aki hogi tjika. Kain bi ta haun ku Abeli u te fa a kii ën. Koola, Daatan, ku Abilam bi ko ta haun ku Mosesi, hën de hopo fia ku ën. Könu Saulosu bi ta haun ku Dafiti, nöö a bi ta pooba u kii ën. Di Wöutu u Gadu an ta ganjan u. A ta taki taa: „Ka sëmbë ta haun ku deseei ta suku bunu u de wanwan, nöö naandë buuja ku hii pei hogilibi dë.”​—Jakobosi 3:16.

11 Ee u ta mbei möiti fuu ta lobi wotowan ku hii u hati, söseei ee u abi sutifasi, nöö an o ta pasa hesihesi taa u haun ku wotowan. Di Wöutu u Gadu ta taki taa: „Ee i lobi wan  sëmbë joo ta hoi pasensi dëën e. Joo ta fii ku ën. Ee i lobi wan sëmbë, ja o ta haun ku ën” (1 Kolenti 13:4). Ee wa kë ko dë wan sëmbë di ta haun ku wotowan, nöö u musu ko ta si soni kumafa Jehovah ta si soni. U musu ta si kuma u ku dee baaa ku dee sisa fuu dë kuma dee kamiankamian u libisëmbë sinkii. Di sinkii aki da di kemeente. Di Bëibel ta taki taa: „Te wan pisi [u di sinkii] kisi gafa, dee oto pisi tuu ta wai” (1 Kolenti 12:16-18, 26). Ee wan u dee baaa ku dee sisa fuu feni wan bunu, nöö woo wai ku ën, ma wa o haun ku ën. Pakisei fa di womi mii u Könu Saulosu de kai Jonatan bi du soni. De bi salufu Dafiti faa toon könu, ma de an bi salufu Jonatan. Hii fa a bi dë sö, tökuseei Jonatan an bi haun ku Dafiti, ma a bi da Dafiti taanga, söseei a bi heepi ën tu (1 Samuëli 23:16-18). Wë useei sa lei taa u lobi wotowan, söseei taa u abi sutifasi kuma Jonatan.

BIINGA BE I KU DEE SËMBË FII FENI DI GAAN BUNU

12. Andi sikifi a di Bëibel di sa heepi u ku dee sëmbë fuu wosudendu fuu feni di gaan bunu di Gadu kë da u?

12 Te hii sëmbë a di wosudendu ta libi ku dee mama wëti u Bëibel, nöö de o ta libi fiifii ku deseei, de o ta dë waiwai, söseei de o feni di gaan bunu di Gadu kë da u. Paulosu bi taki di soni aki da sëmbë u wan wosudendu. A bi taki taa: „Nöö un dee mujëë, un musu ta piki unu manu buka a soni e. Biga sö a fiti biibima u Masa Jesosi fu de musu libi. Nöö un dee womi dee abi mujëë a wosu, un musu lobi dee mujëë fuunu. Wan musu libi hogi ku de e. Nöö un dee mii, un musu ta piki dee gaan sëmbë fuunu buka a hii soni, biga sö Masa Jesosi kë fuun ta libi. Nöö un dee tata, wan musu libi ku dee mii fuunu a wan fasi te de ko ta lasi hati e” (Kolosën 3:18-21). I ta si soni a di tëkisi  aki di sa heepi i ku dee sëmbë fii wosudendu ö?

13. Unfa wan sisa sa heepi hën manu faa kë ko dini Jehovah?

13 Kandë i dë wan sisa, ma di manu fii an ta dini Jehovah. Andi joo du ee i ta si taa an ta libi bunu ku i? Kandë hati fii o boonu, nöö joo bigi buja ku ën. Ma i si kuma di soni dë hën o mbei soni ko möön bunu ö? Aluwasi i buja ku ën u lei ën taa an ta libi bunu, i si kuma di soni dë o mbei a o kë ko dini Jehovah u? Wë kandë ja o heepi ën a di lö fasi dë. Ma ee i ta lei taa i ta lesipeki ën u di a dë hedima u di wosudendu, nöö woon sa ta möön libi fiifii a di wosudendu, söseei joo tja gafa ko da Jehovah. Ee i ta tja iseei a wan bunu fasi, nöö di soni dë sa mbei di manu fii kë ko dini Jehovah. Te u kaba fëën, nöö i ku ën tuu o sa feni di gaan bunu di Gadu kë da u.​—Lesi 1 Petuisi 3:1, 2.

14. Andi wan baaa musu du ee di mujëë fëën an ta lesipeki ën?

14 Kandë i dë wan baaa, ma di mujëë fii an ta dini Jehovah. Andi i sa du ee i ta si kuma an ta lesipeki i? I si kuma di mujëë fii o kë lesipeki i ee i ta suku u gandji dëën u lei ën taa i da basi a di wosu ö? Wë nönö, an o ta lesipeki i! Gadu kë fii djeesi Jesosi, fii sa ko dë wan womi di lobi di mujëë fii (Efeise 5:23). Jesosi da di hedima u di kemeente, nöö hii juu a ta abi pasensi ku u, söseei hii juu a ta lei taa a lobi u (Lukasi 9:46-48). Ee i ta djeesi Jesosi, nöö te u kaba fëën di mujëë fii sa kë ko dini Jehovah tu.

15. Unfa wan baaa sa lei di mujëë fëën taa a lobi ën?

15 Jehovah ta piki dee womi dee tööu taa: „Un musu lobi dee mujëë fuunu. Wan musu libi hogi ku de e” (Kolosën 3:19). Wan womi di lobi hën mujëë, o ta lesipeki ën tu. Na un  futu? Wë a o ta haikëën te a kë konda wan soni dëën, nöö an o ta sösö dee fan fëën (1 Petuisi 3:7). Aluwasi na hii juu di womi o ta du dee soni di hën mujëë taki, ma tökuseei di haika di a o ta haika di mujëë fëën o heepi ën faa du soni a wan möön bunu fasi (Nöngö 15:22). Wan womi di lobi hën mujëë, an o ta musu ën faa lesipeki ën, ma a o ta suku u du soni di sa mbei hën mujëë lesipeki ën. Te wan womi lobi hën mujëë ku dee mii fëën, nöö di soni dë sa mbei de ta dini Jehovah waiwai makandi. Nöö a sö wan fasi de o sa feni di gaan bunu di Gadu kë da u.

Andi u sa du fu wa mbei dee bookohedi dee u ta abi a di wosudendu, tapa u fu wa feni di gaan bunu di Gadu kë da u? (Luku palaklafu 13-15)

UN DEE NJÖNKUWAN, WAN MUSU MBEI NA WAN SONI TAPA UNU FUUN FENI DI GAAN BUNU!

16, 17. Ee i njönku, nöö andi i sa du u hati fii an ta boonu gaanfa poi te dee gaan sëmbë fii ta bai i a soni?

16 Kandë i njönku, nöö i ta si kuma dee gaan sëmbë fii an ta fusutan i, nasö taa de ta buta hia wëti da i poi. Di soni aki sa mbei hati fii boonu tee taa kandë ja kë dini Jehovah möön. Ma ee i disa Jehovah u dini, nöö joo ko si taa na wan sëmbë lobi i kumafa i mama ku i tata lobi i, söseei kumafa dee baaa ku dee sisa fii a di kemeente lobi i.

17 Pakisei di soni aki: Unfa i bi o sabi ee dee gaan sëmbë fii lobi i ee nöiti de ta bai i a soni? (Hebelejën 12:8). A dë sö tuu taa de ta mbei föutu. Fëën mbei di fasi fa de ta bai i a soni sa mbei hati fii boonu. Ma na buta pakisei a di soni dë. Ma te de ta bai i a wan soni, nöö pooba u ko fusutan faandi mbei de ta du ën. Dë piii, nöö na hopo ligei ku de. Di Wöutu u Gadu ta taki taa: „Wan sëmbë di an ta biinga u taki andi a ta pakisei, da wan gaan köni sëmbë. Wan sëmbë di sa’ u wegi soni luku, an ta lasi hënseei hesihesi” (Nöngö 17:27). Biinga fii ko dë wan sëmbë di ta si soni kumafa Jehovah ta si soni, nöö i haika dee gaan sëmbë fii te de ta bai i a soni, aluwasi ja lobi di fasi fa de ta fan ku i (Nöngö 1:8). Nöiti i musu fëëkëtë taa te i abi mama ku tata di ta dini Jehovah, nöö di soni dë dë kuma wan gudu di a abi. I mama ku i tata kë heepi i fii libi u teego.

18. Faandi mbei i dë kabakaba u du hii soni di i sa du fii feni di gaan bunu di Gadu kë da i?

18 Hii u tuu ta wakiti fuu feni gaan bunu a di ten di ta ko, aluwasi ee woo go libi a liba ala nasö ee woo libi a goonliba aki. Woo feni dee bunu aki tuutuu. Di Gadu di mbei di mundu hën paamusi u dee soni aki. A taa: „Di goonliba o fuu ku di lei u Jehovah” (Jesaaja 11:9). Abiti möön hii sëmbë o ko sabi Gadu. Di soni dë da wan gaan bunu seei. Fëën mbei hoi di soni di Jehovah paamusi i a pakisei, nöö na mbei na wan soni tapa i fii feni di gaan bunu di Gadu kë da i!