Skip to content

Skip to secondary menu

Skip to table of contents

Jehovah Kotoigi

Saamakatöngö

Di Hei Wakitimawosu (u lei soni a komakandi)  |  bakajailiba 2017

Soni di dee lesima hakisi

Soni di dee lesima hakisi

Apösutu Paulosu bi taki taa Jehovah „an o disa unu be wan fuka miti unu di hebi da unu poi fuun tja” (1 Kolenti 10:13, NW). Di soni aki kë taki taa Jehovah ta sabi un fuka u sa tja, nöö a ta mbei di fuka dë miti u ö?

Ee sö a dë tuutuu, nöö pakisei unfa di soni aki bi o mbei u fii. Wan womi mii u wan baaa bi kii hënseei. Di baaa bi fii booko saka seei. A bi ta hakisi hënseei ee Jehovah bi sabi di soni aki a fesi, hën a taki taa hën ku ën mujëë bi o sa tja di fuka aki. Sömëni fuu o miti fuka a di goonliba di u ta libi aki. Ma nöö u musu biibi taa Jehovah hën ta mbei fuka ta miti u ö?

Te u buta pakisei a di soni di sikifi a 1 Kolenti 10:13, nöö woo si taa di Bëibel an ta taki taa Jehovah ta sabi a fesi un fuka u sa tja, nöö a ta taki un fuka musu miti u. Faandi mbei u sa taki di soni aki? Wë boo go luku fö soni.

Di fosu soni, hën da Jehovah mbei libisëmbë a sö wan fasi taa de sa taki da deseei andi de kë du. A kë fu useei taki andi woo du (Detolonomi 30:19, 20; Josua 24:15). Ee u ta du soni di ta kai ku Jehovah, nöö u sa abi di futoou taa a o tii u (Nöngö 16:9). Ma te wa ta du soni di ta kai ku Jehovah, nöö u musu sabi taa soni an o waka bunu da u (Galasia 6:7). Wë ee Jehovah hën ta taki un fuka musu miti u, nöö u bi o sa taki tuutuu taa u ta taki da useei andi u kë du ö?

Di u tu soni, hën da Jehovah an ta tjubi u da soni di ta miti u „a wan juu di wa bi mëni” (Peleikima 9:11). Wan gaan hogi sa miti wan sëmbë u di a dë a di kamian ka di hogi ta pasa. Jesosi bi taki u wan gaan hei wosu di bi booko kii 18 sëmbë. A bi taki gbelingbelin taa na Gadu hën bi mbei dee sëmbë aki dëdë (Lukasi 13:1-5). An bi o bunu fuu go pakisei taa ufö wan gaan hogi pasa, nöö Gadu hën ta taki a fesi ambë o libi ku ambë an o libi.

Di u dii soni, hën da hiniwan fuu musu hoi useei a Jehovah. Saatan taki taa dee dinima u Jehovah ta dini ën u di a ta da de soni. Saatan taki tu taa wa o hoi useei a Jehovah te fuka ta miti u (Jöpu 1:9-11; 2:4; Akoalimbo 12:10). Ee Jehovah bi o ta tjubi u u so fuka an miti u, nöö a bi o djei kuma Saatan abi leti.

Di u fö soni, hën da na hii juu Jehovah ta suku u sabi a fesi andi o pasa ku u. Jehovah sa sabi andi o pasa a fesi ee a kë (Jesaaja 46:10). Ma di Bëibel ta lei u taa na hii juu a ta suku u sabi a fesi andi o pasa ku u (Kenesesi 18:20, 21; 22:12). Jehovah lobi sëmbë, nöö a ta du soni a wan leti fasi. Fëën mbei an ta tapa u fuu taki da useei andi u kë du.Detolonomi 32:4; 2 Kolenti 3:17.

Andi Paulosu bi kë taki di a taki taa Jehovah „an o disa unu be wan fuka miti unu di hebi da unu poi fuun tja”? Wë Paulosu bi kë taki andi Jehovah ta du te fuka ta miti u, ma na andi a ta du ufö di fuka miti u. Ee u buta futoou a Jehovah, nöö a o heepi u ku hiniwan fuka di ta miti u (Psalöm 55:22). Nöunöu woo go luku tu soni di mbei Paulosu bi sa taki di soni aki.

Di fosu soni, hën da dee fuka dee ta miti u ta miti „otowan tu”. Wë fuka o ta miti hii u tuu, solanga u ta libi a di goonliba u Saatan aki. Ma ee u ta buta futoou a Jehovah, nöö woo sa hoi dou te fuka ta miti u, söseei woo sa hoi useei a Jehovah tu (1 Petuisi 5:8, 9). A 1 Kolenti kapitë 10 Paulosu bi taki tu u so u dee tesi dee bi miti dee Isaëli sëmbë di de bi dë a di sabana (1 Kolenti 10:6-11). Dee sëmbë dee bi buta  futoou a Jehovah bi sa pasa dee tesi dë. Ma so u dee Isaëli sëmbë an bi kë piki Jehovah buka. De an bi hoi deseei a Jehovah, u di de an bi buta futoou nëën.

Di u tu soni, hën da „Gadu dë u futoou”. Andi di soni aki kë taki? Te u ta luku unfa Jehovah bi sölugu dee dinima fëën a dee ten di pasa, nöö u ta si taa hii juu a ta heepi „dee sëmbë dee lobi ën, söseei dee sëmbë dee ta hoi dee wëti fëën” (Detolonomi 7:9). U sabi taa hii juu Jehovah ta du dee soni dee a paamusi u (Josua 23:14). U sa dë seiki u dee soni aki: (1) Jehovah an o da pasi taa wan fuka miti u di o hebi da u poi taa wa sa tjëën. (2) A o ’mbei wan baaku da u nöömö fuu pasa be wa kai’.

Jehovah ta „kötö dee sëmbë hati dee ta tja sitaafu”

Unfa Jehovah ta „mbei wan baaku” da dee sëmbë dee ta buta futoou nëën? Wë Jehovah sa puu wan tesi da u. Ma hoi a pakisei taa Paulosu bi taki taa Jehovah o ’mbei wan baaku da u nöömö fuu pasa be wa kai’. Hën da möön gaanfa Jehovah ta mbei wan baaku da u, u di a ta da u taanga fuu sa hoi useei nëën. Boo go luku so u dee fasi fa a ta du di soni aki.

  • Jehovah ta „kötö dee sëmbë hati dee ta tja sitaafu” (2 Kolenti 1:3, 4). A sa heepi u ku di Bëibel, di santa jeje fëën ku di saafu di dë u futoou, sö taa u sa ta dë bööböö.Mateosi 24:45; Johanisi 14:16; Loomë 15:4.

  • Jehovah sa wooko ku di santa jeje fëën u tii u (Johanisi 14:26). Di santa jeje sa heepi u fuu toona mëni dee woto dee dë a Bëibel, ku dee mama wëti u Bëibel sö taa u sa ta du soni ku köni.

  • Jehovah sa wooko ku dee ëngëli fëën u heepi u.Hebelejën 1:14.

  • Jehovah sa wooko ku dee baaa ku dee sisa u di kemeente u heepi u. De sa da u taanga ku dee soni di de ta taki söseei ku dee soni di de ta duKolosën 4:11.

Wë andi u lei u dee soni dee Paulosu bi taki a 1 Kolenti 10:13? Jehovah an ta taki un pei fuka musu miti u. Ma u sa dë seiki taa ee u buta futoou a Jehovah, nöö woo sa hoi dou aluwasi un fuka ta miti u. U sabi taa hii juu Jehovah o heepi u fuu sa hoi useei nëën.