Skip to content

Skip to secondary menu

Skip to table of contents

Jehovah Kotoigi

Saamakatöngö

Di Hei Wakitimawosu (u lei soni a komakandi)  |  bakajailiba 2016

I musu ta dini Jehovah waiwai nöömö

I musu ta dini Jehovah waiwai nöömö

PAKISEI un daka bi dë di möön piizii daka a i libi. A bi dë di daka di i tööu ö, nasö di daka di i bi pai di fosu mii fii ö? Naa a bi dë di daka di i tei dopu? Kandë di daka dë bi dë di möön gaan daka ku di möön piizii daka a i libi. A di daka dë, dee baaa ku dee sisa fii bi wai seei di de si taa i lei taa i lobi Gadu ku hii i hati, ku hii i libi, ku hii i pakisei, söseei ku hii i kaakiti!Maikusi 12:30.

A musu u dë sö taa i bi ko ta wai seei a di dini di i ta dini Jehovah sensi di daka di i tei dopu. Ma sömëni peleikima an ta wai möön kumafa de bi ta wai bigibigi. Faandi mbei di soni aki bi ko pasa? Andi musu da u taanga fuu ta dini Jehovah waiwai go dou?

FAANDI MBEI SO SËMBË AN TA DË WAIWAI MÖÖN?

Di Könuköndë bosikopu di u ta paaja ta mbei u ta dë waiwai. Faandi mbei? U di Jehovah paamusi u taa abiti möön di Könuköndë o poi di hogi goonliba aki kaba a sösö, nöö a o mbei u libi a di njunjun goonliba fëën. Sefanja 1:14 ta piki u taa: „Di gaan daka u Jehovah dë zuntu. A dë zuntu, nöö a ta ko paapaa seei.” Ma ee u ta si kuma u ta wakiti di njunjun goonliba longi poi, nöö wa bi o ta dë waiwai möön. A bi o mbei taa wa bi o ta dini Gadu fajafaja möön tu.Nöngö 13:12.

Te u ta piizii makandi ku dee baaa ku dee sisa fuu, nöö a o ta da u taanga fuu ta dini Jehovah waiwai nöömö. Kandë di fasi fa dee sëmbë u Jehovah ta tja deseei, bi hai u ko a di tuutuu biibi, nöö a bi heepi u fuu bi bigi ko ta dini Gadu waiwai tu (1 Petuisi 2:12). Ma andi bi o sa pasa ee de bë wojo da wan baaa nasö wan sisa fuu, u di an bi piki Gadu buka? Di soni aki sa mbei so u dee sëmbë a di kemeente lasi hati, nöö a sa mbei taa de an ta dë waiwai möön.

Ee u ta biinga a gudu baka, nöö a sa mbei wa ta dë waiwai möön. Faandi mbei u taki sö? Di goonliba u Saatan kë fuu biibi taa u musu ta bai soni, hii fa wa abi de fanöudu tuutuu. Fëën mbei boo ta mëni dee soni di Jesosi bi taki. A bi taa: „Na wan sëmbë sa dini tu masa makandi e. I musu fu lobi wan möön wan, ee nasö joo hëngi a wan möön wan. Nöö söseei tu, ja sa waka a Masa Gadu baka ku dee gudu u goonliba aki baka makandi e, kwetikweti” (Mateosi 6:24). Wa sa dini Jehovah waiwai, nöö a di wan seei ten u ta pooba u feni hii dee soni u di goonliba aki.

U TA DË WAIWAI TE U TA DINI JEHOVAH

Te u lobi Jehovah, nöö di dini di u ta dini ën an ta hebi da u (1 Johanisi 5:3). Hoi a pakisei taa Jesosi bi taki taa: „Ee wan sëmbë i dë fukafuka, i ko wei u dee lai dee i ta tja, nöö be i ko a mi e. Nöö mi o mbei i ko dë bööböö. Dee sëmbë, un saka unu seei da mi o, be mi ta tii unu ta lei unu soni. Biga fa mi dë aki, mi abi tjalihati, mi a saka fasi, nöö ee wan sëmbë i ko a mi nöö joo feni böö te dou a i hati. Biga di tii u mi an taanga e, nöö dee lai dee mi o da  unu fuun tjai, de dë fukëfukë” (Mateosi 11:28-30). Te i dë wan tuutuu Keesitu sëmbë, nöö i ta fii bunu, söseei i ta dë waiwai tu. U sabi taa sömëni soni dë di ta mbei taa u ta dë waiwai a di dini di u ta dini Jehovah. Boo buta mëni a dii u dee soni dë.Habaki 3:18.

U ta dini di Gadu di da u libi, di ta dë waiwai (Tjabukama 17:28; 1 Timoteo 1:11). U ta fusutan taa u dë a libi u di Gadu mbei u. Fëën mbei boo ta dini ën waiwai go dou, aluwasi u tei dopu sömëni jaa kaa.

Héctor ta dë waiwai nöömö, u di a ta hoi dee soni u di Könuköndë a pakisei, nöö a ta du di peleikiwooko fajafaja

Luku di woto u Héctor, di du di keling-wooko 40 jaa longi. Hii fa ’uwii fëën ko weti seei’, tökuseei a ta dini Jehovah waiwai go dou (Psalöm 92:12-14). Di di mujëë fëën bi ko siki, nöö an bi sa ta du di keling-wooko kumafa a bi ta du ën möön. Ma Héctor bi ta dë waiwai go dou. A taki taa: „A bi tjali taa di mujëë u mi bi ko siki möön gaanfa, nöö a bi ko taanga da mi u ta sölugu ën. Ma ma bi mbei di soni aki tapa mi u dini di tuutuu Gadu waiwai go dou. Mi sabi taa Jehovah hën mbei mi dë a libi, nöö a sa’ faandi mbei a mbei libisëmbë buta a goonliba. Di soni dë wanwan bi mbei taa mi bi ko ta lobi ën möön gaanfa, nöö mi bi ko ta dini ën ku hii mi hati tu. Mi mbei möiti u dë fajafaja a di peleikiwooko go dou, nöö mi mbei möiti tu u hoi dee soni u di Könuköndë a mi pakisei, sö taa mi sa ta dë waiwai go dou.”

Jehovah seeka di lusupaima da u, nöö fëën mbei u sa ta dë waiwai a di libi fuu. Awa, „Masa Gadu lobi libisëmbë sö tee a da de di wan kodo Womi Mii fëën di a abi. Nöö ee wan sëmbë i ta biibi a di Mii fëën aki liba, nöö ja o lasi go kaba a sösö möönsö, ma i abi di libi u teego kaa” (Johanisi 3:16). Gadu sa da u paadon u dee zöndu fuu, nöö u sa feni di libi u teego te u ta buta biibi a di lusupaima di Gadu seeka da u. Di soni aki da wan soni di musu mbei taa u dë ku tangi a hati seei! Nöö di soni dë o da u taanga fuu ta dini Jehovah waiwai.

Jesús an ta biinga a gudu baka möön, nöö sömëni jaa kaa a ta dini Jehovah waiwai

Wan baaa de kai Jesús, di bi ta libi a di köndë Mëkisikou bi taki taa: „Mi bi ta wooko ta kii miseei. So juu mi bi ta wooko möön hia, hii fa an bi ta dë fanöudu. Mi bi ta du ën, u di mi bi kë kisi hia möni. Hën wë mi ko lei soni u Jehovah ku di manda di a manda di Womi Mii fëën ko dëdë da libisëmbë. Mi bi kë dini Jehovah seei. Fëën mbei mi bi buta mi libi a Jehovah maun. Mi bi wooko 28 jaa da di masikapei, ma mi ko disa di wooko, hën mi go du di hii-ten diniwooko.” A sö wan fasi Jesús bi bigi ta dini Gadu waiwai.

U ta libi a wan fasi di fiti, di ta mbei u ta dë waiwai. I sabi jeti unfa di libi fii bi dë ufö i bi ko sabi soni u Jehovah u? Apösutu Paulosu bi toona mëni dee Keesitu sëmbë u Loomë taa de bi dë „saafuma a hogidu [zöndu, NW] basu”, ma de bi ko toon  ’saafu seei da Gadu u de ta libi wan leti libi nëën wojo’. U di de bi ko ta libi a wan fasi di fiti, mbei de bi sa dë ku di mëni taa de bi o sa feni di libi u teego (Loomë 6:17-22). Useei ta hoi dee wëti u Jehovah tu. Fëën mbei wa ta libi fanafiti a di së u manu ku mujëë, söseei wa ta du hogihati soni di sa mbei u tjali bakaten. Di soni aki musu mbei u ta dë waiwai seei!

„Dee jaa dee mi dini Jehovah da dee möön piizii jaa a mi libi.”—Jaime

Luku di woto u Jaime. A bi dë wan sëmbë di an bi ta biibi taa Gadu hën mbei hii soni, nöö a bi ta biibi di lei de kai evolutie-lei, söseei a bi ta bökusu tu. Jaime bi bigi go a dee komakandi, nöö a bi foondo seei di a si fa dee sëmbë bi lobi deseei a di kemeente. U di Jaime an bi kë libi kumafa a bi ta libi möön, mbei a bi begi Jehovah faa heepi ën faa buta biibi nëën. Jaime taki taa: „Pikipiki mi bi ko sabi taa wan lobihati Tata dë di mbei u, nöö a dë wan Gadu di abi tjalihati tu. Di hoi di mi bi ta hoi dee wëti u Jehovah bi tjubi mi. Ee ma bi bia libi, sonte mi bi dëdë kaa, kumafa dee mati u mi di bi ta bökusu dëdë kaa. Dee jaa dee mi dini Jehovah da dee möön piizii jaa a mi libi.”

HOI DOU!

Unfa u musu ta fii, hii fa u ta wakiti di kaba u di hogi goonliba aki? Hoi a pakisei taa u ta du di kë u Gadu, nöö u ta wakiti u feni di libi u teego. „Fëën mbei u musu ta du bunu nango nöömö. Wa musu wei möönsö. Nöö ee wa lasi hati nöö te di lepi ten dou nöö woo koti nöömö” (Galasia 6:8, 9). Be Jehovah heepi u fuu sa hoi dou, söseei boo mbei taanga möiti u ko abi dee fasi dee u abi fanöudu u pasa di gaan fuka, nöö boo ta dini Jehovah waiwai go dou.Akoalimbo 7:9, 13, 14; Jakobosi 1:2-4.

U sa dë seiki taa Jehovah o paka u, u di u ta hoi dou. A o du ën, u di a sabi fa u ta wooko dëën ku fa u lobi ën ku di në fëën tjika. Ee u ta dini Jehovah waiwai nöömö, nöö woo sa dë kuma Dafiti, di bi taki taa: „Hii juu kaa mi ta mëni Jehovah. U di hën dë a mi letimaun së, mbei ma o naki futu. Fëën mbei hati u mi ta piizii tuutuu. Aai, mi ta wai seei. Boiti di dë, soni o ta waka bunu da mi.”Psalöm 16:8, 9.