Skip to content

Skip to secondary menu

Skip to table of contents

Jehovah Kotoigi

Saamakatöngö

Di Hei Wakitimawosu (u lei soni a komakandi)  |  baimatu-liba 2017

„Be a heepi i sö taa hii soni di i kë du, sa waka bunu”

„Be a heepi i sö taa hii soni di i kë du, sa waka bunu”

„I musu ta piizii gaanfa seei ku Jehovah, nöö a o da i di soni di i hati kë.”​—PSALÖM 37:4.

KANDA: 135, 81

1. Andi dee njönkuwan musu du te a nama ku di libi u de? Andi o heepi de u de an ta fëëë poi? (Luku di peentje a bigi u di woto.)

UN DEE njönkuwan, un sabi taa te un kë go a wan kamian, nöö un musu luku fosu naasë woon go. Wë sö nöö a dë ku di libi fuunu tu. A dee njönku jaa fuunu un musu sabi kaa andi un kë du ku di libi fuunu. Wë a sa taanga u du di soni aki. Wan njönku sisa de kai Heather bi taki taa: „A ta da mi fëëë seei. Biga i musu luku andi joo du ku di libi fii.” Ee sö i ta fii, nöö i musu hoi a pakisei taa Jehovah taki taa: „Na fëëë, biga mi dë ku i. Na fëëë, biga mi da di Gadu fii. Mi o mbei i ko taanga. Mi o heepi i tuutuu.”​—Jesaaja 41:10.

2. Unfa i du sabi taa Jehovah kë fii seeka soni a fesi sö taa i sa abi wan piizii libi bakaten?

2 Jehovah ta da i di degihati fii seeka soni nöunöu kaa sö taa i sa abi wan piizii libi bakaten (Peleikima 12:1; Mateosi 6:20). A kë fii ta dë waiwai. I ta si di soni aki te i ta luku dee soni dee a mbei, te i ta jei bai u de, ku te i ta njan wan suti soni. Jehovah ta sölugu u a woto fasi tu. A ta piki u andi u musu du, söseei a  ta lei u unfa u musu libi a wan bunu fasi. Fëën mbei te sëmbë an ta kë du andi a taki, nöö an ta wai ku di soni dë. A ta piki dee sëmbë dee an ta piki ën buka taa: „Dee soni dee ma lobi, nöö dee soni dë unu ta du . . . Dee futuboi u mi o piizii, ma sen o kisi unu. Dee futuboi u mi o ta piizii u di hati u de bunu” (Jesaaja 65:12-14). Te u ta du soni a wan köni fasi, nöö u ta tja gafa ko da Jehovah.​—Nöngö 27:11.

SONI DI I SA BUTA TAA JOO DU FII SA TA DË WAIWAI

3. Un soni Jehovah ta si taa bunu da i?

3 Un soni Jehovah ta si taa bunu da i? Ee i kë dë waiwai, nöö i musu ko sabi Jehovah, söseei i musu ta dini ën. A di lö fasi aki Jehovah mbei libisëmbë (Psalöm 128:1; Mateosi 5:3). Di wan kodo soni di mbeti ta du, hën da de ta njan, de ta bebe, nöö de ta pai miii. Ma Jehovah kë fii seti soni a i libi a sö wan fasi taa joo sa ta dë waiwai, söseei taa joo sa abi wan bunu libi. Di Gadu di mbei i „nëën lobi . . . ta kumutu”, hën da di ’piizii Gadu’ di mbei libisëmbë „kumafa hënseei dë” (2 Kolenti 13:11; 1 Timoteo 1:11; Kenesesi 1:27). Joo ta dë waiwai te i ta djeesi di lobihati Gadu fuu. Di Bëibel taki taa: „Dee sëmbë ta da sëmbë soni, de dë waiwai möön leki dee sëmbë ta feni” (Tjabukama 20:35). Sö i ta fii te i ta da sëmbë soni ö? Di soni aki da wan soni di an ta tooka. Fëën mbei Jehovah kë fii seti soni a di libi fii a wan fasi di o lei taa i lobi woto sëmbë, söseei taa i lobi ën.​—Lesi Mateosi 22:36-39.

Joo ta dë waiwai te i ta lei taa i lobi woto sëmbë

4, 5. Andi bi ta mbei Jesosi ta dë waiwai?

4 Jesosi Keesitu bi du soni a wan fasi di njönkuwan sa djeesi ën. Di a bi dë piki mii, nöö a musu u dë sö taa a bi ta pëë, söseei taa a bi ta mbei piizii. Di Wöutu u Gadu taki taa „wan ten dë u lafu”, söseei „wan ten dë u baja” (Peleikima 3:4). Jesosi bi ta ko sabi Jehovah möön bunu, u di a bi ta lei soni a di Wöutu fëën. Di a bi abi 12 jaa, nöö dee sëmbë dee bi ta lei wotowan soni a di Wosu u Gadu bi ta foondo seei u di a bi „abi sö wan bumbuu fusutan te a ta piki dee sëmbë dee ta fan ku ën dë.”​—Lukasi 2:42, 46, 47.

5 Di Jesosi bi ko gaan sëmbë, nöö a bi ta piizii u du dee soni di Gadu bi hakisi ën faa du. Gadu bi kë faa „konda di Bunu Buka fëën da dee pootima”, söseei faa „konda da dee bookowojoma taa dee wojo u de sa ko bunu fu de ko si soni baka” (Lukasi 4:18). Psalöm 40:8 ta taki unfa Jesosi bi ta fii. A taki taa: „Gadu o, mi ta wai seei u du di kë fii.” Jesosi bi ta wai seei u lei sëmbë soni fëën Tata. (Lesi Lukasi 10:21.) Baka di Jesosi bi konda soni u di tuutuu lei da wan mujëë, hën a bi piki dee bakama fëën taa: „Di njanjan u mi, hën da te mi ta du dee soni di Sëmbë manda mi ko aki kë fu mi du, be di wooko fëën go dou” (Johanisi 4:31-34). Jesosi bi ta wai seei, u di a bi lei taa a lobi Gadu ku wotowan. Joo ta dë waiwai ee i ta du di wan seei soni tu.

6. Faandi mbei a bunu fii fan ku wotowan u dee soni dee i kë du a i libi?

6 Sömëni Keesitu sëmbë bi bigi du di pioniliwooko di de bi njönku, nöö a bi ta mbei de ta dë waiwai. Ja bi o kë konda da wantu u de andi i abi a pakisei u du a i libi ö? „Te  sëmbë an ta konda da deseei unfa soni dë tuutuu, nöö hii soni ta buuja, ma te hia laima ko makandi, nöö soni ta waka bunu” (Nöngö 15:22). Kandë dee baaa ku dee sisa aki o piki i taa di pioniliwooko ta lei i soni di o heepi i a i libi. Jesosi bi lei sömëni soni nëën Tata di a bi dë a liba ala. Nöö di a bi dë a goonliba aki ta du di diniwooko fëën, nöö a bi ta lei soni go dou. A bi ta piizii seei u paaja di bunu buka da wotowan, söseei u hoi hënseei a Gadu aluwasi soni bi ta taanga dëën. (Lesi Jesaaja 50:4; Hebelejën 5:8; 12:2.) Boo luku faandi mbei di hii-ten diniwooko sa mbei i ta dë waiwai.

FAANDI MBEI DI HEEPI DI U TA HEEPI SËMBË U KO TOON BAKAMA U KEESITU DA DI MÖÖN BUNU WOOKO?

7. Faandi mbei sömëni njönkuwan ta piizii te de ta heepi sëmbë u ko toon bakama u Jesosi?

7 Jesosi piki u taa u musu go ’paaja di buka da hii sëmbë, be de bia ko dë bakama fëën’ (Mateosi 28:19, 20). Ee i buta taa di wooko aki musu ko dë di wooko di i ta du kaa, nöö joo abi wan suti libi di ta tja gafa ko da Gadu. Leti kumafa a ta tei ten fii ko sa’ u du hiniwan wooko, sö nöö a ta tei ten fii ko sa’ u du di wooko aki tu. Wan baaa de kai Timothy di bi bigi ta du di pioniliwooko di a bi abi 19 jaa, bi taki taa: „Mi lobi di hii-ten diniwooko di mi ta du da Jehovah, u di a sö wan fasi mi ta lei Jehovah taa mi lobi ën. Bigibigi ma bi sa feni sëmbë u lei soni u Bëibel, ma bakaten, hën mi foloisi go a wan woto kamian, nöö a wan liba dendu mi bi sa feni sömëni sëmbë u lei de soni u Bëibel. Wan u de bi bigi ta ko a dee komakandi. Baka di mi go tu liba a di Bëibel-Siköö da baaa di an tööu, hën de manda mi go peleiki a wan woto kamian ka mi bi bigi ta lei fö sëmbë soni u Bëibel. Mi lo’ u lei sëmbë soni u Bëibel u di mi ta si fa di santa jeje ta tooka di libi u de.” * (Luku di pisi a basu.)​—1 Tesalonika 2:19.

8. Andi so njönkuwan du u de bi sa peleiki da möön hia sëmbë?

8 So njönkuwan bi lei wan woto töngö. Jacob di ta libi na Amëëkanköndë bi sikifi taa: „Di mi bi abi seibi jaa, nöö sömëni u dee mii u mi kalasi bi ta fan di Vietnamtöngö. Mi bi kë konda soni u Jehovah da de. Fëën mbei baka wan pisiten, hën mi buta taa mi o lei di töngö u de. Möön gaanfa mi bi ta lei di töngö aki u di mi bi ta lesi di Ingisitöngö Hei Wakitimawosu, nöö baka di dë nöö mi bi ta toona lesi di Vietnamtöngö Hei Wakitimawosu. Mi bi mbei mati ku wanlö baaa ku sisa u wan Vietnamtöngö kemeente di bi dë zuntu ku ka mi bi ta libi. Di mi bi abi 18 jaa, hën mi bigi du di pioniliwooko. Bakaten, hën mi go a di Bëibel-Siköö da baaa di an tööu. Di soni aki bi heepi mi ku di pioniliwooko di mi bi ta du a di Vietnamtöngö kulupu, ka mi wanwan bi dë gaanwomi. Sömëni sëmbë u di köndë Vietnam ta foondo seei taa mi lei di töngö u de. De ta kai mi ko a wosu, nöö möön gaanfa a ta pasa taa mi sa ta lei de soni u Bëibel. So u de go a fesi a di biibi u te de tei dopu.”​—Luku söseei Tjabukama 2:7, 8.

9. Andi u ta lei te u ta heepi sëmbë u de ko toon bakama u Jesosi?

9 Te i ta heepi sëmbë u de ko toon bakama u Jesosi, nöö i ta lei u du wooko a wan bunu fasi, i ta lei u fan ku wotowan a wan bunu fasi, i ta lei unfa i sa dë seiki u wan soni, söseei i ta lei unfa i musu hoi wotowan a pakisei (Nöngö 21:5; 2 Timoteo 2:24). Ma di  wooko aki ta mbei i ta dë waiwai, u di i ta ko sabi unfa i musu lei taa i ta biibi dee soni dee sikifi a di Wöutu u Gadu. I ta lei tu u wooko makandi ku Jehovah.​—1 Kolenti 3:9.

10. Unfa i sa ta piizii te i ta heepi sëmbë u de ko toon bakama u Jesosi, hii fa wantu sëmbë u di pisiwata fii nöö ta kë lei soni u Bëibel?

10 I sa ta piizii ku di heepi di i ta heepi sëmbë ko toon bakama u Jesosi, aluwasi wantu sëmbë u di pisiwata fii nöö ta kë lei soni u Bëibel. Hii di kemeente ta wooko makandi u heepi sëmbë u de ko toon bakama u Jesosi. Aluwasi wan kodo baaa nasö wan kodo sisa bi heepi wan sëmbë faa ko toon bakama u Jesosi, tökuseei hii u tuu ta wai u di hii u tuu bi heepi di sëmbë faa ko toon bakama u Jesosi. Wan baaa de kai Brandon bi ta du di pioniliwooko nëigi jaa longi a wan kamian ka wantu sëmbë nöö bi ta lei soni u Bëibel. A taki taa: „Mi lo’ u paaja di bunu buka da sëmbë, u di di soni aki hën Jehovah kë taa u musu du. Wantewante di mi kaba siköö, hën mi bigi du di pioniliwooko. Mi ta piizii te mi ta da dee njönku baaa degihati a di kemeente, söseei te mi ta si unfa de nango a fesi a di biibi. Baka di mi bi go a di Bëibel-Siköö da baaa di an tööu, hën de manda mi go du di pioniliwooko a wan woto kamian. Na wan sëmbë di mi bi ta lei soni u Bëibel a di pisiwata dë bi tei dopu, ma woto peleikima bi lei sëmbë soni u Bëibel u te de tei dopu. Mi ta wai seei taa mi bi seti soni u heepi sëmbë u de ko toon bakama u Jesosi.”​—Peleikima 11:6.

UNFA DEE SONI DEE I BUTA TAA JOO DU SA HEEPI I BAKATEN?

11. Andi sömëni njönkuwan ta du a di dini u Jehovah?

11 Sömëni soni dë di u sa du a di dini u Jehovah. Sömëni njönkuwan ta heepi mbei kamian ka u ta dini Gadu. U abi höndöhöndö njunjun Könuköndë zali fanöudu. Dee kamian aki ta tja gafa ko da Jehovah. Fëën mbei te i ta heepi u mbei dee kamian aki, nöö i sa ta dë waiwai. I sa ta piizii tu u di i ta wooko makandi ku dee baaa ku dee sisa fii. I sa lei sömëni woto soni seei. I sa lei unfa i musu du wan wooko a wan bunu fasi söndö u sëmbë kisi makei, söseei unfa i sa wooko makandi ku di sëmbë di ta tei fesi.

Dee sëmbë dee ta du di hii-ten diniwooko o feni sömëni gaan bunu (Luku palaklafu 11-13)

12. Unfa di pioniliwooko sa da i di okasi fii du woto soni a di dini u Jehovah?

12 Wan baaa de kai Kevin taki taa: „Sensi di mi bi dë piki mii, hën mi bi kë du di hii-ten diniwooko. Te u kaba fëën, hën mi bigi du di pioniliwooko di mi bi abi 19 jaa. Mi bi ta wooko wantu daka a di wiki da wan baaa di bi ta mbei wosu. Mi bi ko sa’ u buta daki, fënsë, ku döö. Bakaten mi bi wooko tu jaa longi ku dee baaa ku dee sisa dee nango heepi te wan gaan ventu ko booko kamian, nöö u bi ta mbei dee Könuköndë zali baka, söseei u bi ta toona mbei dee wosu u dee baaa ku dee sisa baka. Di mi jei taa de ta suku sëmbë u go heepi mbei kamian ka u ta dini Gadu a Zuid-Afiikan, hën mi bi fuu di pampia taa mi kë heepi tu, hën de kai mi. Baka wantu wiki te u bi kaba mbei wan Könuköndë zali, nöö u bi nango mbei zali a woto kamian  fu Afiikan. Mi ku dee baaa ku dee sisa dee ta mbei Könuköndë zali ta libi kuma wan famii. U ta libi makandi a di wan kamian, u ta lei soni u Bëibel makandi, söseei u ta wooko makandi. Mi ta piizii tu u peleiki makandi ku dee baaa ku dee sisa u di kemeente hiniwan wiki. Dee soni dee mi bi buta taa mi o du di mi bi dë piki mii, bi mbei mi ta dë waiwai möön fa mi bi mëni.”

„Dee soni dee mi bi buta taa mi o du di mi bi dë piki mii, mbei mi ta dë waiwai möön fa mi bi mëni”

13. Faandi mbei sömëni njönkuwan ta piizii te de ta dini Jehovah a Bëtëli?

13 So sëmbë di bi ta du di pioniliwooko ta wooko a Bëtëli nöunöu. Te i ta wooko a Bëtëli, nöö a ta mbei i dë waiwai, u di hii soni di i ta du ala, i ta du da Jehovah. Dee sëmbë dee ta wooko a Bëtëli ta mbei Bëibel, ku buku di ta heepi sëmbë u de ko sabi di tuutuu lei. Wan baaa di ta wooko a Bëtëli de kai Dustin taki taa: „Sensi di mi bi abi nëigi jaa, hën mi buta taa mi o du di hii-ten diniwooko, nöö mi bi bigi du di pioniliwooko di mi kaba siköö. Di mi bi du di pioniliwooko wan jaa ku hafu, hën de kai mi u go wooko a Bëtëli. Naandë mi ko saanfa u wooko ku dee masini dee ta doloki buku, nöö bakaten mi ko sa’ u seti soni a computer. Te mi dë a Bëtëli, nöö mi ta wai seei te mi ta jei unfa di peleikiwooko nango a fesi a hii së u goonliba. Mi lobi di wooko di mi ta wooko a Bëtëli, u di dee soni dee u ta du ta heepi sëmbë u de ku Jehovah ko dë gaan mati.”

 ANDI JOO BUTA TAA JOO DU BAKATEN?

14. Andi i sa du nöunöu kaa fii seeka iseei da di hii-ten diniwooko?

14 Unfa i sa seeka iseei fii du di hii-ten diniwooko? Ee i kë dini Jehovah a wan bunu fasi, nöö i musu ko abi dee fasi di wan Keesitu sëmbë musu abi. I musu ta lei soni a di Wöutu u Gadu hii juu, i musu ta pakisei fundu fëën, söseei i musu mbei möiti fii ta da piki a dee komakandi. Ee i nango a siköö, nöö i sa ta mbei möiti fii sa konda soni u di bunu buka da wotowan. Lei taa i ta booko i hedi ku wotowan, u di joo ta hakisi de a wan lesipeki fasi unfa de ta pakisei u wan soni, nöö haika bunu te de o piki i. Söseei i sa heepi du soni a di kemeente. Kandë i sa heepi seeka di Könuköndë zali faa sa ta dë limbolimbo, nasö i sa heepi mbei wan soni di booko. Jehovah ta piizii u wooko ku sëmbë di abi sakafasi, söseei ku sëmbë di dë kabakaba u du wooko dëën. (Lesi Psalöm 110:3; Tjabukama 6:1-3.) Apösutu Paulosu bi kai Timoteo faa ko du di sëndëlengi wooko ku ën, u di a bi „abi bunu në a dee otowan fëën”.​—Tjabukama 16:1-5.

Ee i nango a siköö, nöö i sa ta mbei möiti fii sa konda soni u di bunu buka da wotowan

15. Andi i sa du fii feni wan wooko di o heepi fii du di pioniliwooko?

15 Gaansë u dee sëmbë dee ta du di hii-ten diniwooko musu ta wooko u sölugu deseei (Tjabukama 18:2, 3). Kandë i sa go lei wan wooko di o sa heepi i fii feni wan wooko a di pisiwata fii, ka joo ta wooko wantu daka a di wiki nöö. Fan ku di keling-gaanwomi fii, söseei ku woto baaa ku sisa di ta du di pioniliwooko, nöö piki de andi i kë du, söseei hakisi de be de da i lai. Kumafa di Bëibel taki, nöö „buta dee wooko fii a Jehovah maun, nöö dee soni dee i kë du o waka bunu”.​—Nöngö 16:3; 20:18.

16. Unfa di hii-ten diniwooko sa seeka i da woto faantiwöutu di joo ko abi bakaten?

16 I sa dë seiki taa Jehovah kë fii abi wan piizii libi bakaten. (Lesi 1 Timoteo 6:18, 19.) Di hii-ten diniwooko ta heepi i fii ko dë wan Keesitu sëmbë di abi wan taanga biibi, te i ta wooko ku woto sëmbë di ta du di hii-ten diniwooko. So sëmbë bi ko si taa u di de bi ta du di hii-ten diniwooko a dee njönku jaa u de, mbei a bi heepi de a di tööu libi u de. Möön gaanfa dee sëmbë dee bi ta du di pioniliwooko ufö de tööu, ta du di wooko aki makandi go dou baka di de tööu.​—Loomë 16:3, 4.

17, 18. Unfa dee soni dee i buta taa joo du musu nama ku i hati?

17 Psalöm 20:4 taki taa: „Be a [Jehovah] da i hii soni di i hati kë, söseei be a heepi i sö taa hii soni di i kë du, sa waka bunu.” Te joo taki andi i kë du bakaten, nöö i musu pakisei bunu andi i kë du ku di libi fii. Pakisei dee soni dee Jehovah ta du a di ten fuu aki, nöö luku un wooko i sa du dëën. Baka di dë, nöö du di soni di ta kai ku ën.

18 Te i buta hii i libi a di dini u Jehovah, söseei te i ta gafëën, nöö joo ta dë waiwai seei. Joo „ta piizii gaanfa seei ku Jehovah, nöö a o da i di soni di i hati kë”.​—Psalöm 37:4.

^ pal. 7 Di siköö aki ko dë di Könuköndë Peleikima Siköö.