Skip to content

Skip to secondary menu

Skip to table of contents

Jehovah Kotoigi

Saamakatöngö

Di Hei Wakitimawosu (u lei soni a komakandi)  |  baimatu-liba 2016

Soni di dee lesima hakisi

Soni di dee lesima hakisi

Ezekiëli kapitë 37 ta taki u tu pau di ko toon wan pau. Andi di soni aki kë taki?

Jehovah bi mbei di tjabukama fëën de kai Ezekiëli taki a fesi taa dee sëmbë fëën bi o toona go a di Paamusi Köndë, nöö de bi o ko ta libi kuma wan nasiön baka. Di tjabukama aki bi taki tu taa dee sëmbë dee ta dini Gadu a dee lasiti daka aki bi o ko ta libi kuma wan nasiön tu.

Jehovah bi piki Ezekiëli faa sikifi di soni aki buta a tu pau. A wan u dee pau a bi musu sikifi taa „Disi da u Juda ku dee sëmbë u Isaëli dee dë makandi ku ën”. Nöö a di woto pau a bi musu sikifi taa „Disi da u Josëfu, di pau u Efalahim, ku hii dee sëmbë u Isaëli dee dë makandi ku ën”. Dee tu pau aki bi o ko toon „wan pau” a Ezekiëli maun dendu.Ezekiëli 37:15-17.

 Andi „Efalahim” kë taki? Di lö u Efalahim bi dë di möön nëbai lö u hii dee teni lö u basusë u di könuköndë u Isaëli. Jelobiam bi dë di fosu könu di bi ta tii a di könuköndë aki, nöö a bi dë u di lö u Efalahim (Detolonomi 33:13, 17; 1 Könu 11:26). Di lö aki bi dë dee bakamii u Efalahim, di bi dë wan womi mii u Josëfu (Nöbu 1:32, 33). Jaköpu bi da Josëfu wan gaan bunu. Fëën mbei a bi fiti taa „di pau u Efalahim” bi kë taki di teni-lö könuköndë u basusë. Gaanduwe bifö Ezekiëli bi taki di tjabukama woto aki, a di jaa 740 bifö Keesitu, nöö dee Asilia sëmbë bi tja dee sëmbë u di könuköndë u basusë u Isaëli go a katibo (2 Könu 17:6). Baka wantu jaa hën dee Babilon sëmbë go feti ku dee Asilia sëmbë, hën de wini de. A di ten di Ezekiëli bi ta sikifi di tjabukama woto u dee tu pau, nöö gaansë u dee Isaëli sëmbë bi dë paajapaaja a dee köndë di Babilon bi ta tii.

A di jaa 607 bifö Keesitu, hën dee Babilon sëmbë bi go feti ku di tu-lö könuköndë u Juda, hën de tja dee sëmbë go a katibo a Babilon. Kandë de bi tja hii dee sëmbë dee bi fika a di basusë könuköndë u Isaëli go tu. Dee könu u di libasë könuköndë bi dë u di lö u Juda. Dee mindima bi ta libi a Juda tu, u di de bi ta wooko a di Wosu u Gadu a Jelusalen (2 Kloniki 11:13, 14; 34:30). Fëën mbei a bi fiti taa di pau di bi dë „u Juda” bi kë taki di tu-lö könuköndë u libasë.

Na un ten dee tu pau nama ko a wan? Di soni aki pasa a di jaa 537 bifö Keesitu, di dee sëmbë u di könuköndë u libasë ku di könuköndë u basusë kumutu a katibo toona go a Jelusalen u go mbei di Wosu u Gadu baka. Di nasiön u Isaëli an bi dë paatipaati möön. Dee Isaëli sëmbë bi ko ta dini Jehovah makandi baka (Ezekiëli 37:21, 22). Di tjabukama Jesaaja ku di tjabukama Jelemia seei bi taki a fesi taa di soni aki bi o pasa.Jesaaja 11:12, 13; Jelemia 31:1, 6, 31.

Andi Ezekiëli bi taki a fesi u di soifi fasi fa sëmbë musu dini Jehovah? A bi taki taa Jehovah o mbei hii dee sëmbë dee ta dini ën „ko dë wan” (Ezekiëli 37:18, 19). Di soni aki ta pasa tuutuu a di ten fuu aki ö? Wë aai. Di tjabukama woto aki bi bigi pasa tuutuu a di jaa 1919. Bifö di soni aki pasa tuutuu, hën Saatan bi pooba u paati dee sëmbë u Gadu. Ma a di jaa 1919 dee sëmbë u Gadu bi bigi seeka deseei, sö taa de sa dini ën makandi.

A di pisiten dë gaansë u dee sëmbë u Gadu bi abi di biibi taa de o toon könu ku mindima a liba ala makandi ku Jesosi (Akoalimbo 20:6). De bi dë kuma di pau u Juda. Ma dee sëmbë dee bi ta biibi taa de o libi a goonliba aki u teego an bi hia sö. Ma möön dee jaa bi ta pasa, möönmöön dee sëmbë dee bi abi di biibi taa de o libi a goonliba aki bi ta ko möön hia (Sakalia 8:23). De bi dë kuma di pau u Josëfu.

A di ten aki dee tu kulupu aki ta dini Jehovah makandi. Nöö de abi wan kodo Könu, hën da Jesosi Keesitu. A di tjabukama woto, de kai ën „mi futuboi Dafiti” (Ezekiëli 37:24, 25). Jesosi bi begi hën Tata da dee bakama fëën. A bi begi taa: „Be de tuu ko dë wan makandi e, leti kumafa mi ku i dë wan aki. Sö u ku de tuu musu dë wan makandi.” * (Luku di pisi a basu.) (Johanisi 17:20, 21). Jesosi bi taki a fesi tu taa dee salufu bakama fëën di an bi hia sö, o ko dë „wan kodo hipi” ku dee „oto sikafu” (Johanisi 10:16). Leti kumafa Jesosi bi taki, nöö hii dee sëmbë u Gadu a di ten aki dë wan makandi, hii fa de ta wakiti u go libi u teego a liba ala nasö u libi a goonliba aki!

^ pal. 10 Di Jesosi bi ta taki u dee maaka dee ta lei taa u ta libi a dee lasiti daka, hën a bi konda wantu woto da dee bakama fëën. Di fosu woto bi nama ku „di köni saafu di dë u futoou”. De da dee salufu baaa dee bi o tei fesi da dee sëmbë u Gadu (Mateosi 24:45-47). Baka di dë, hën a konda wantu woto di nama ku hii dee salufuwan (Mateosi 25:1-30). Te u kaba fëën, hën a taki u dee sëmbë dee o heepi dee baaa u Keesitu, dee o libi u teego a goonliba aki (Mateosi 25:31-46). Sö nöö di fosu pasi di di tjabukama woto u Ezekiëli bi bigi pasa tuutuu a di ten fuu aki, nöö a bi nama ku dee sëmbë di bi abi di biibi taa de o go libi a liba ala. Nöö hii fa dee teni lö u Isaëli an bi nama ku dee sëmbë dee o libi u teego a goonliba aki, tökuseei di dë di dee teni lö ku dee tu lö bi ko dë wan, ta mbei u mëni di dë di dee sëmbë di o libi a goonliba aki ku dee o go libi a liba ala dë wan makandi.