Skip to content

Skip to secondary menu

Skip to table of contents

Jehovah Kotoigi

Saamakatöngö

Di Hei Wakitimawosu (u lei soni a komakandi)  |  sebitaa-liba 2016

Go „paaja di buka u mi da hii sëmbë, be de bia ko dë bakama u mi”

Go „paaja di buka u mi da hii sëmbë, be de bia ko dë bakama u mi”

„Un musu ta waka . . . ta paaja di buka u mi da hii sëmbë, be de bia ko dë bakama u mi kuma unu. Nöö un musu dopu de . . . un musu ta lei de u de piki hii dee soni tuu dee mi manda unu fuun musu ta du kaa.”MATEOSI 28:19, 20.

KANDA: 141, 97

1, 2. Andi u sa hakisi useei te u luku di soni di Jesosi taki a Mateosi 24:14?

JESOSI bi taki taa a dee lasiti daka u di goonliba aki, di bunu buka u di Könuköndë bi o paaja be hii sëmbë jei (Mateosi 24:14). Sëmbë sabi u kuma Jehovah Kotoigi a hii së u goonliba ku di peleiki di u ta peleiki. So sëmbë lobi di buka di u ta paaja, ma so sëmbë an lobi ën. Ma hii fa so sëmbë an lobi di wooko di u ta du, tökuseei de abi lesipeki dëën. U da dee sëmbë dee ta du di wooko di Jesosi bi taki taa sëmbë bi o du. U abi di leti u taki sö wan soni ö? Unfa u sa dë seiki taa di peleikiwooko di u ta du, da di wooko di Jesosi bi taki taa sëmbë bi o du?

2 Sëmbë u dee peipei keiki ta taki taa de ta paaja di buka di Jesosi bi taki taa sëmbë bi o ta paaja. Ma te i luku ën bunu, nöö a keikiwosu, a teefei ku Internet nöö de ta peleiki. Nasö piki nöö de ta piki sëmbë unfa de ko sabi soni u Jesosi. Woto keikima ta si kuma de ta peleiki te de ta heepi dee sëmbë dee dë ku fuka, nasö te de dë a wan ölganisaasi ka de sa ta du data wooko, sösutu wooko nasö ka de ta lei sëmbë soni. Ma te sëmbë ta du dee soni aki, hën da de ta du di peleikiwooko di Jesosi bi taki taa sëmbë bi o ta du ö?

3. Andi da dee fosu soni di dee bakama u Jesosi musu du, te u luku di soni di Jesosi taki a Mateosi 28:19?

 3 Jesosi bi kë taa dee bakama fëën musu ta wakiti u sëmbë hën musu ko a de u? Wë nönö! Baka di Gadu weki Jesosi ko a libi baka, hën Jesosi bi piki dee höndöhöndö bakama fëën taa: „Un musu ta waka a dee köndëköndë u goonliba ta paaja di buka u mi da hii sëmbë, be de bia ko dë bakama u mi kuma unu. Nöö un musu dopu de . . . un musu ta lei de u de piki hii dee soni tuu dee mi manda unu fuun musu ta du kaa” (Mateosi 28:19, 20). Fëën mbei u kuma bakama u Keesitu musu ta du fö soni. U musu ta heepi sëmbë u ko toon bakama u Jesosi, u musu dopu de, nöö u musu lei de soni tu. Ma di fosu soni hën da u musu waka go a dee sëmbë. Wan sëmbë di ta öndösuku soni u Bëibel bi taki taa: „Hiniwan biibima abi di faantiwöutu u waka go a dee sëmbë, aluwasi a musu go a wan longi kamian, nasö a wan kamian di an longi.”Mateosi 10:7; Lukasi 10:3.

4. Andi sëmbë musu du ee de kë „kisi libisëmbë” kumafa de ta kisi fisi?

4 Andi Jesosi bi kë u dee bakama fëën musu du? A bi kë u de ta peleiki de wanwan u, naa a bi kë u de ta du ën makandi? Wë u di wan kodo sëmbë wanwan an bi o sa „waka a dee köndëköndë u goonliba” u paaja di buka aki, mbei u sa taki taa de bi musu du di wooko aki makandi. Di soni aki Jesosi bi kë taki di a bi piki dee bakama fëën taa de musu „kisi libisëmbë” leti kumafa de ta kisi fisi. (Lesi Mateosi 4:18-22.) Jesosi an bi kë taki taa wan kodo sëmbë nöö bi o dë ku wan huku ta wakiti u fisi ko njan di huku fëën. Ma di woto di a bi konda, bi nama ku wan nëti di sëmbë ta kisi fisi. Te sëmbë bi kë kisi fisi a sö wan fasi, nöö de bi musu wooko taanga, de bi musu seeka deseei a fesi, söseei sömëni sëmbë bi musu dë u du di wooko aki makandi.Lukasi 5:1-11.

5. Andi da dee fö hakisi dee u musu piki, nöö faandi mbei u musu piki de?

5 Ee u kë sabi ambë ta paaja di bunu buka a di ten aki, nöö u musu piki dee fö hakisi aki:

  • Un buka dee bakama u Jesosi musu paaja?

  • Andi musu mbei taa de ta du di wooko aki?

  • Na un fasi de musu ta peleiki?

  • Naasë de musu du di wooko aki dou, nöö un longi de musu du ën?

Dee piki u dee hakisi aki o heepi u fuu sabi ambë ta du di wooko aki, di o mbei sëmbë feni libi, söseei de o da u taanga fuu ta du di peleikiwooko go dou.1 Timoteo 4:16.

UN BUKA DE MUSU TA PAAJA?

6. Faandi mbei i sa dë seiki taa dee Jehovah Kotoigi de ta paaja di buka di Jesosi bi taa sëmbë bi o ta paaja?

6 Lesi Lukasi 4:43. Jesosi bi paaja „di Bunu Buka” u di Könuköndë, nöö a bi kë u dee bakama fëën du di wan seei soni. Un kulupu sëmbë ta paaja di buka aki da hii sëmbë? Dee Jehovah Kotoigi wanwan ta du di soni dë! Dee sëmbë dee an lobi u seei ta taki taa sö a dë. Luku wan soni di wan paiti di bi libi a peipei köndë, bi piki wan Jehovah Kotoigi. A hiniwan u dee köndë aki di paiti bi hakisi dee Jehovah Kotoigi ee un buka de ta paaja. Di paiti bi taki taa: „Don nöö de don sö te hii de tuu ta taki di wan seei soni. De tuu ta piki taa: ’U ta paaja di bunu buka u di Könuköndë.’” Di soni di di paiti taki aki ta lei taa na don u don, ma u ta wooko makandi u du di wooko aki kuma tuutuu Keesitu sëmbë (1 Kolenti 1:10). Soni di nama ku di Könuköndë u Gadu hën ta dë möön gaanfa a di buku fuu de kai Di Hei Wakitimawosu a ta bai basia da di Könuköndë u Jehovah. Di buku aki dë u feni a 254 töngö, nöö de ta mbei söwan 59.000.000 u di buku aki hiniwan pasi. Hën da di buku di sëmbë paaja möön gaanfa a hii di goonliba!

7. Unfa u du sabi taa dee hedima u dee keiki dee ta kai deseei Keesitu sëmbë, an ta paaja di buka di Jesosi bi taki taa sëmbë bi o ta paaja?

7 Dee hedima u dee keiki dee ta taki taa de da bakama u Jesosi, an ta paaja di bunu buka u di Könuköndë u Gadu. Te de musu taki soni u di  Könuköndë, nöö sömëni u de ta taki taa a dë wan fii di dë a sëmbë hati (Lukasi 17:21). De an ta lei sëmbë taa di Könuköndë u Gadu da wan tii di dë a liba ala, di Jesosi ta tii kuma könu. Ma de lo’ u taki soni u Jesosi a Bëdaki nasö a di pisiten di de ta mëni di daka di Jesosi toona weki baka. De an ta konda da sëmbë taa di Könuköndë u Gadu o puu hii dee fuka di libisëmbë abi, söseei taa a o puu hii dee hogi dee ta pasa a goonliba (Akoalimbo 19:11-21). A dë gbelingbelin u si taa dee hedima u dee keiki dee ta kai deseei Keesitu sëmbë an sabi andi Jesosi, di Könu u di Könuköndë u Gadu o du. Nöö u di de an ta fusutan di buka di Jesosi bi taki taa sëmbë bi o ta paaja, mbei de an ta fusutan faandi mbei de musu ta peleiki tu.

ANDI MUSU MBEI U TA DU DI WOOKO AKI?

8. Ku un pakisei wa musu ta du di peleikiwooko?

8 Dee bakama u Jesosi an musu ta peleiki u di de kë feni möni, nasö u di de kë mbei gaangaan wosu u hai sëmbë pakisei. Jesosi bi taki taa: „Fa un kisi di kaakiti aki, na bai un bai ën e, nöö wan musu mbei sëmbë paka unu fëën tu” (Mateosi 10:8). Fëën mbei di peleikiwooko an musu dë wan wooko ka sëmbë ta suku u feni möni (2 Kolenti 2:17). Dee bakama u Jesosi an musu ta hakisi sëmbë möni u di peleikiwooko di de ta du. (Lesi Tjabukama 20:33-35.) Hii fa di soni di Jesosi bi taki, dë gbelingbelin u fusutan, tökuseei gaansë u dee keiki ta buta pakisei a di möni di de musu ta feni, sö taa de sa ta paka da di keiki u de, nasö u de ta paka dee hedima u dee keiki, nasö u paka woto wookoma. Di soni aki mbei sömëni u dee hedima u dee keiki dee ta kai deseei Keesitu sëmbë ko gudu seei.Akoalimbo 17:4, 5.

9. Unfa dee Jehovah Kotoigi lei taa de ta du di peleikiwooko u wan bunu soni hedi?

9 Dee Jehovah Kotoigi ta pii möni a dee kemeente komakandi nasö a dee könklësi u de u? Nönö! Sëmbë ta da möni u heepi de ku di wooko di de ta du (2 Kolenti 9:7). A di jaa di pasa, dee Jehovah Kotoigi wooko söwan tu dusu milion juu u paaja di bunu buka, nöö de bi ta lei möön leki nëigi milion sëmbë soni u Bëibel hiniwan liba. Hii fa de an ta paka de u di peleiki di de ta peleiki, tökuseei de ta dë waiwai te de ta tei di u deseei möni u du di wooko aki. Wan sëmbë di ta öndösuku soni bi taki taa: „Di soni di dee Jehovah Kotoigi ta du möön gaanfa, hën da di peleiki di de ta peleiki ku di lei di de ta lei sëmbë soni u Bëibel.” A bi taki tu taa dee Jehovah Kotoigi an abi hedima di de ta paka kumafa dee woto keiki ta du ën. Wë ee wa ta peleiki u möni hedi, nöö andi da di soni di ta mbei u ta peleiki? U ta du di wooko aki ku hii u hati u di u lobi Jehovah, söseei u di u lobi sëmbë. Di soni aki ta  mbei di tjabukama woto di sikifi a Psalöm 110:3 pasa tuu. (Lesi ën.)

UNFA U MUSU DU DI WOOKO AKI?

U ta peleiki a hii kamian ka u ta feni sëmbë (Luku palaklafu 10)

10. Unfa Jesosi ku dee bakama fëën bi ta du di peleikiwooko?

10 Unfa Jesosi ku dee bakama fëën bi ta du di peleikiwooko? De bi nango a hii kamian ka de bi sa miti sëmbë. De bi ta peleiki a dee sitaati ku dee wojowojo. De bi nango peleiki a dee sëmbë pisi tu (Mateosi 10:11; Lukasi 8:1; Tjabukama 5:42; 20:20). Di peleiki di de bi nango peleiki a sëmbë pisi, da wan fasi fa de bi sa miti hii pei sëmbë.

11, 12. Andi u sa taki u di fasi fa dee keiki dee ta kai deseei Keesitu sëmbë ta paaja di bunu buka, te u luku di fasi fa dee sëmbë u Jehovah ta paajëën?

11 Dee keiki dee ta kai deseei Keesitu sëmbë ta paaja di bunu buka kumafa Jesosi bi ta du ën u? Wë möön gaanfa a ta pasa taa te de paka dee hedima u keiki, nöö de ta hoi wan taki da dee sëmbë u di keiki u de. Dee hedima u keiki aki an ta suku njunjun sëmbë u ko toon sëmbë u di keiki u de, ma hoi nöö de ta kë hoi dee sëmbë di de abi kaa. So juu de bi ta pooba u da dee sëmbë u di keiki u de degihati u go peleiki. Sö a bi pasa a di jaa 2001. Di möön gaan hedima u Lomusu keiki de kai John Paul II, bi taki a wan biifi taa dee sëmbë u di keiki fëën musu go peleiki, nöö de musu du ën fajafaja kuma apösutu Paulosu, di bi taki taa: ’Helu u mi tu ee ma konda di Buka.’ Di hedima u Lomusu keiki aki bi taki tu taa na wantu sëmbë di de lei u peleiki nöö musu du di peleikiwooko, ma hii dee sëmbë u di keiki tuu musu ta du ën. Wë wantu sëmbë nöö bi du di soni aki bakaten.

12 Unfa a dë ku dee Jehovah Kotoigi? Wë, de wanwan ta paaja di buka taa Jesosi dë Könu ta tii sensi di jaa 1914. De ta du di soni di Jesosi bi taki, nöö de buta di peleikiwooko kuma di fosu soni a de libi (Maikusi 13:10). Di buku de kai Pillars of Faith—American Congregations and Their Partners, taki taa dee Jehovah Kotoigi ta si di peleikiwooko kuma wan fanöudu soni. Di buku ta taki tu taa te dee Jehovah Kotoigi ta miti sëmbë di an abi soni u njan, sëmbë di dë de wanwan, ku sëmbë di siki, nöö de ta mbei möiti u heepi de. Ma de an ta fëëkëtë taa di möön fanöudu soni di de musu du, hën da de musu piki sëmbë taa Gadu o poi di goonliba aki kaba a sösö, söseei taa de musu lei de andi de musu du u de sa feni tjubi. Dee Jehovah Kotoigi ta paaja di buka aki go dou, nöö de ta djeesi Jesosi ku dee bakama fëën a di fasi fa de bi ta peleiki.

TE NAASË U MUSU DU DI PELEIKIWOOKO DOU, NÖÖ UN LONGI U MUSU TA DU ËN?

13. Te naasë u musu paaja di bunu buka dou?

13 Jesosi bi taki taa dee bakama fëën bi o ta paaja di bunu buka ta lei sëmbë soni „te dou hii goonliba”. A bi piki de tu taa de musu heepi sëmbë u hii „dee köndëköndë u goonliba” be de bia ko dë bakama fëën (Mateosi 24:14; 28:19, 20). Di soni aki kë taki taa sëmbë bi musu paaja di bunu buka a hii së u goonliba.

14, 15. Andi ta lei taa dee Jehovah Kotoigi mbei di tjabukama woto di Jesosi bi taki pasa tuutuu, di a bi taki ka dee bakama fëën bi o paaja di bunu buka dou? (Luku dee peentje a bigi u di woto.)

14 Dee Jehovah Kotoigi wanwan ta mbei di tjabukama woto di Jesosi bi taki pasa tuutuu, di a bi taki taa di bunu buka musu paaja a hii së u goonliba. Faandi mbei u taki sö? Na Amëëkanköndë, 600.000 hedima u keiki dë a dee keiki di ta kai deseei Keesitu sëmbë, ma söwan 1.200.000 Jehovah Kotoigi ta paaja di bunu buka a di köndë aki. A hii di goonliba i abi 400.000 paiti u Lomusu keiki, ma möön leki 8 milion Jehovah Kotoigi ta paaja di bunu buka a 240 köndë. A dë gbelingbelin u si taa dee Jehovah Kotoigi ta paaja di bunu buka a hii së u goonliba, nöö di soni aki ta tja gafa ko da Jehovah!Psalöm 34:1; 51:15.

15 Di möön fanöudu soni di u kuma Jehovah Kotoigi kë du, hën da u kë paaja di bunu buka da hii sëmbë di u sa paajëën da ufö di kaba dou. Fuu  sa du di wooko aki, u bi puu buku buta ko a woto töngö, söseei u bi mbei milionmilion buku, talakitaati, ku dee pampia dee u ta kai sëmbë u ko a dee könklësi fuu, ku dee pampia dee u ta paati u kai sëmbë ko mëni di dëdë u Jesosi. U bi du ën a möön leki 700 töngö. Wa ta hakisi sëmbë möni te u ta da de dee soni aki. Di jaa di pasa dë, u bi mbei 4500 milion buku di ta taki soni u Bëibel. Söseei u bi mbei möön leki 200 milion Bijbel-Nyun-Grontapuvertaling a möön leki 130 töngö. Nöö u sa feni soni a möön leki 750 töngö a di website fuu. Dee Jehovah Kotoigi wanwan ta du di apaiti wooko aki.

16. Unfa u du sabi taa dee Jehovah Kotoigi abi di santa jeje u Gadu?

16 Un longi woo du di wooko aki jeti? Jesosi bi taki taa di bunu buka bi o paaja u te di kaba dou. Di wan kodo soni di mbei u kuma Jehovah Kotoigi sa hoi dou fuu paaja di buka a dee lasiti daka aki, hën da u di Jehovah da u di santa jeje fëën (Tjabukama 1:8; 1 Petuisi 4:14). So sëmbë di nango a keiki ta taki taa: „U abi di santa jeje u Gadu.” Ma de sa ta du di wooko di dee Jehovah Kotoigi ta du a dee lasiti daka u di goonliba aki ö? Wë, so keiki bi pooba u ta peleiki kumafa u ta peleiki, ma de an bi sa du ën. Wotowan dë kabakaba u go peleiki, ma te de du ën dou wan pisiten nöö de ta tapa. A sa pasa tu taa wotowan nango peleiki a sëmbë pisi, ma tökuseei de an ta paaja di bunu buka u di Könuköndë u Gadu. Fëën mbei u sa taki taa de an ta du di wooko di Jesosi ku dee bakama fëën bi bigi du.

AMBË TA PAAJA DI BUNU BUKA A DI TEN AKI TUUTUU?

17, 18. (a) Faandi mbei u sa dë seiki taa dee Jehovah Kotoigi wanwan ta paaja di bunu buka u di Könuköndë a di ten aki? (b) Unfa a du ko taa u sa ta du di wooko aki go dou?

17 Ambë ta paaja di bunu buka u di Könuköndë a di ten aki? Dee Jehovah Kotoigi wanwan ta paajëën! Unfa u du sabi? U di u ta paaja di buka di Jesosi bi taki taa u musu ta paaja. Hën da di bunu buka u di Könuköndë. U ta suku sëmbë u peleiki da. Fëën mbei u sa taki taa u ta du di wooko aki kumafa Jesosi bi ta du ën. U ta peleiki u wan bunu soni hedi, hën da u di u lobi Jehovah, söseei u di u lobi sëmbë. U ta peleiki da möön hia sëmbë, u di u ta peleiki da hii nasiön sëmbë di ta fan peipei töngö. Nöö woo ta paaja di bunu buka u di Könuköndë aki nöömö te dou di kaba!

18 A ta foondo u seei u si fa dee sëmbë u Jehovah ta paaja di bunu buka aki a dee lasiti daka u di goonliba aki. Ma unfa a du ko taa u sa ta du di wooko aki a hii së u goonliba? Apösutu Paulosu bi taki taa: „[Gadu] wë ta wooko a i hati fii kë du dee soni dee ta dëën piizii, nöö hënseei ta toona da i taanga tu fii sa du de” (Filipi 2:13). Be Jehovah da u di taanga di u abi fanöudu fuu sa mbei hii möiti fuu paaja di bunu buka go dou!2 Timoteo 4:5.