Emri grek i librit biblik të Zbulesës, Apokálipsis (apokalipsi), do të thotë «zbuloj». Ky emër tregon domethënien e këtij libri​—zbulon çështjet që kanë qenë të fshehura dhe ngjarjet që do të ndodhnin mjaft kohë pasi u shkruan. Shumë nga profecitë e saj do të plotësohen në të ardhmen.

Një ide e përgjithshme për librin e Zbulesës

•   Hyrja.​—Zbulesa 1:1-9.

•   Mesazhet e Jezuit për shtatë kongregacionet.​—Zbulesa 1:10–3:22.

•   Një vegim i Perëndisë, hipur në fronin e tij në qiell.​—Zbulesa 4:1-11.

•   Një seri vegimesh, secili çon te tjetri:

  •   Shtatë vulat.​—Zbulesa 5:1–8:6.

  •   Shtatë trumbetat, tri të fundit prej tyre lajmërojnë tri mjerime.​—Zbulesa 8:7–14:20.

  •   Shtatë kupat, secila mban një plagë që përfaqëson gjykimin hyjnor që duhet derdhur mbi tokë.​—Zbulesa 15:1–16:21.

  •   Vegimet për shkatërrimin e armiqve të Perëndisë.​—Zbulesa 17:1–20:10.

  •   Vegimet e bekimeve të Perëndisë për qiellin dhe tokën.​—Zbulesa 20:11–22:5.

•   Mbyllja.​—Zbulesa 22:6-21.

Për të kuptuar librin e Zbulesës, mbaj parasysh:

1.   Mesazhi i tij është pozitiv, jo i frikshëm a i tmerrshëm për ata që i shërbejnë Perëndisë. Edhe pse shumë e lidhin fjalën «apokalips» me një shkatërrim të madh, libri i Zbulesës fillon dhe mbaron duke thënë se ata që e lexojnë, e kuptojnë dhe e zbatojnë mesazhin e tij do të jenë të lumtur.​—Zbulesa 1:3; 22:7.

2.   Zbulesa përdor shumë ‘shenja’ ose simbole që nuk duhen marrë në kuptimin e mirëfilltë.​—Zbulesa 1:1.

3.   Shumë nga personat dhe simbolet kryesore në librin e Zbulesës janë përmendur edhe më parë në Bibël:

   •   Jehovai​—«Perëndia i vërtetë lart në qiej» dhe Krijuesi i gjithçkaje.​—Ligji i përtërirë 4:39; Psalmi 103:19; Zbulesa 4:11; 15:3.

   •   Jezu Krishti​—«Qengji i Perëndisë».​—Gjoni 1:29; Zbulesa 5:6; 14:1.

   •   Satana Djalli​—kundërshtari i Perëndisë.​—Zanafilla 3:14, 15; Gjoni 8:44; Zbulesa 12:9.

   •   Babilonia e Madhe​—ashtu si Babilonia e lashtë (Babeli), një armike e Perëndisë Jehova dhe e popullit të tij. Burimi i gënjeshtrave fetare.​—Zanafilla 11:2-9; Isaia 13:1, 11; Zbulesa 17:4-6; 18:4, 20.

   •   «Deti»​—njerëzimi i lig që kundërshton Perëndinë.​—Isaia 57:20; Zbulesa 13:1; 21:1.

   •   Aspektet që korrespondojnë me tabernakullin e lashtë, i cili përdorej në adhurimin e Perëndisë​—ndër to, arka e besëlidhjes, deti i qelqtë (legeni për larje), llambat, temjani dhe altari i flijimeve.​—Dalja 25:10, 17, 18; 40:​24-32; Zbulesa 4:5, 6; 5:8; 8:3; 11:19.

   •   Bishat​—simbol i qeverive njerëzore.​—Danieli 7:1-8, 17-26; Zbulesa 13:2, 11; 17:3.

   •   Numrat që përdoren në mënyrë simbolike.​—Zbulesa 1:20; 8:13; 13:18; 21:16.

4.   Vegimet zbatohen për «ditën e Zotërisë», e cila filloi më 1914 kur u vendos Mbretëria e Perëndisë dhe kur Jezui nisi të mbretëronte. (Zbulesa 1:10) Prandaj mund të presim që Zbulesa ta ketë përmbushjen kryesore në kohën tonë.

5.   Për ta kuptuar librin e Zbulesës, kemi nevojë për ato gjëra që na ndihmojnë të kuptojmë edhe pjesën tjetër të Biblës. Këtu përfshihet mençuria nga Perëndia dhe ndihma e atyre që tashmë e kuptojnë.​—Veprat 8:26-39; Jakovi 1:5.