Bashkëshorti thotë ose bën diçka që të acaron nervat, por ti përpiqesh të mos e japësh veten. Pastaj, yt shoq e kupton se diçka nuk shkon dhe nis të të pyesë. Kjo t’i ngre nervat edhe më tepër. Si ta kontrollosh zemërimin kur je gati të shpërthesh?

 Çfarë duhet të dish

  • Zemërimi i pakontrolluar mund të të dëmtojë shëndetin. Studimet tregojnë se zemërimi i pafre shton rrezikun e tensionit të lartë, të sëmundjeve të zemrës, të depresionit dhe të problemeve me tretjen. Gjithashtu, zemërimi lidhet me pagjumësinë, ankthin e tepërt, problemet me lëkurën dhe me iktusin. Jo më kot Bibla thotë: «Mos u inatos . . . , që të mos i bësh keq vetes!»—Psalmi 37:8, Bibla ECM.

  • Edhe nëse e ndrydh zemërimin, mund të të dëmtojë. Po të mbetesh i zemëruar, kjo ndjenjë mund të jetë si një sëmundje që të konsumon nga brenda. Për shembull, mund të zhvillosh një qëndrim cinik ose kritik. Bashkëshorti do ta ketë goxha të vështirë të jetojë me ty po të zhvillosh këtë qëndrim dhe ka të ngjarë ta dëmtosh seriozisht martesën.

 Ç’mund të bësh

  • Kërko cilësitë e bukura te bashkëshorti. Rendit tri gjëra që admiron te bashkëshorti. Herën tjetër që të ndodh të zemërohesh me të, mendo për cilësitë që veçove. Kështu mund ta mbash nën kontroll zemërimin.

    Parimi biblik: «Tregohuni mirënjohës.»—Kolosianëve 3:15.

  •  Mëso të falësh. Si fillim përpiqu t’i shohësh gjërat nga pikëpamja e bashkëshortit. Kjo do të të ndihmojë të zhvillosh empati, ose siç thuhet në Bibël, «ndjenja të përbashkëta». (1 Pjetrit 3:8) Pastaj pyet veten: «A është kaq serioze arsyeja pse jam zemëruar, sa të mos fal dot?»

    Parimi biblik: ‘Është gjë e bukur të kapërcesh shkeljen.’—Proverbat 19:11.

  •  Shprehi ndjenjat me dhembshuri e takt. Fol në vetën e parë njëjës. Për shembull, në vend që t’i thuash bashkëshortit «pse s’më more në telefon të më tregoje ku ishe? S’të bëhet vonë fare për mua!», pse të mos i thuash «jam në merak kur është vonë dhe nuk e di ku je». Po të flasësh me butësi, mund ta kontrollosh zemërimin.

    Parimi biblik: «Fjala juaj të jetë gjithnjë me hir dhe e ndrequr me kripë.»—Kolosianëve 4:6.

  •  Dëgjo me respekt. Pasi të flasësh, lëre bashkëshortin të shprehet pa e ndërprerë. Kur bashkëshorti të ketë mbaruar së foluri, përmblidhe atë që ka thënë, që të shohësh nëse e ke kuptuar mirë. Ky veprim i thjeshtë, dëgjimi, mund të të ndihmojë goxha që t’i vësh fre zemërimit.

    Parimi biblik: ‘Ji i shpejtë në të dëgjuar e mos u nxito në të folur.’—Jakovi 1:19.