VËLLEZËRIT TANË I BURGOSIN | «I vendosur të mos e zhgënjej kurrë Jehovain»

LUAJ

Më 19 shtator 2025, Gjykata Krahinore e Proletarskit në Saransk shpalli fajtorë vëllezërit Ivan Neverov dhe Mihail Shjevçuk. Ivanin e dënoi me 7 vjet burg, kurse Mihailin me 6 vjet e gjysmë burg. Ata i arrestuan menjëherë në sallën e gjyqit.

Të dhëna

Ivan Neverovi

Lindur: 1986 (Mineralnje-Vodi, Territori i Stavropolit)

Pagëzuar: 1998

Biografia: Punon në ndërtim. Në vitin 2014 u martua me Tatjanën

Akuza: Organizon mbledhjet fetare të Dëshmitarëve të Jehovait

Ka kaluar gati 2 muaj e gjysmë në paraburgim, e pastaj 3 muaj në arrest shtëpie

Dënimi: Shtatë vjet burg

Komente personale

Shembulli i kujt të ka inkurajuar veçanërisht?

Më mrekullon vazhdimisht guximi i bashkëbesimtarëve të mi. Ata shohin që vëllezërit e motrat që i njohin personalisht përballen me hetime, kontrolle, arrestime, ndjekje penale, madje edhe burgosje. Fare kollaj mund të bien pre e frikës e të përpiqen ta shmangin përndjekjen. Prapëseprapë vazhdojnë t’i shërbejnë Jehovait me besnikëri. Edhe pse vënë në rrezik veten, ata vijnë në gjykatë për të na mbështetur. Kjo më jep shumë zemër dhe më shtyn t’i imitoj. Ndihem krenar që jam pjesë e kësaj familjeje besnike. Për mua është privilegj t’i shërbej Jehovait përkrah tyre.

Mihail Shjevçuku

Lindur: 1986 (Gorjaçevodski, Territori i Stavropolit)

Pagëzuar: 2000

Biografia: Merrej me prodhimin e mobilieve. U martua me Jaroslavnën në vitin 2013

Vëllai i vogël i Mihailit, Aleksandri, ka qenë në burg për shkak të besimit dhe u lirua më 3 nëntor 2023

Akuza: Organizon mbledhjet fetare të Dëshmitarëve të Jehovait

Ka kaluar thuajse 2 muaj e gjysmë në paraburgim, e pastaj 3 muaj në arrest shtëpie

Dënimi: Gjashtë vjet e gjysmë burg

Komente personale

Si ke marrë forcë nga shembujt e besimit të familjarëve të tu?

Në vitet 40, dy nga stërgjyshërit e mi i dënuan me burg dhe i internuan në Siberi. Në vitet 60 dhe 70, edhe dy gjyshërit e mi i burgosën për shkak të besimit. Kurse në fund të viteve 70, babanë tim e burgosën ngaqë nuk pranoi të kryente shërbimin ushtarak. Megjithëse kaluan tërë ato vështirësi larg familjes, asnjë prej tyre nuk u bë i hidhur e as shprehën kurrë keqardhje. Përkundrazi, flisnin pozitivisht për gjërat që kishin kaluar, duke theksuar si ishte kujdesur Jehovai për ta dhe mënyrat e mrekullueshme si i kishte ndihmuar të qëndronin besnikë. Kur filloi vala e re e përndjekjeve, gjyshi më telefonoi dhe më tha: «Tani e ke radhën ti.» Kam vite që përgatitem për këtë moment dhe jam i vendosur të mos e zhgënjej kurrë Jehovain.

E çmojmë jashtë mase shembullin e guximit e të qëndrueshmërisë që kanë treguar gjithë ata shërbëtorë besnikë të Jehovait dhe jemi të vendosur ‘të imitojmë besimin e tyre’.—Hebrenjve 13:7.

Shih edhe

LAJME NDËRKOMBËTARE

Dëshmitarët e Jehovait burgosen për shkak të besimit—Sipas vendeve

Vende ku Dëshmitarët e Jehovait janë burgosur, disa herë në kushte të ashpra, ngaqë praktikojnë besimin e tyre dhe ushtrojnë të drejtat e tyre themelore njerëzore.

LAJME