13 TETOR 2025
RUSI

Nga e majta në të djathtë, rreshti i parë: Vasili Bondarevi, Ivan Nikitini, Nikolai Kovadnevi dhe Radion Shitovi. Rreshti i mesit: Sergei Saçnevi, Svetlana Zharkovi, Marina Vojtko dhe Mihail Dorofejevi. Rreshti i fundit: Ulita Saçnevi dhe Irina Bondarevi

Me ndihmën e Jehovait qëndrojnë besnikë e ruajnë gëzimin

LUAJ

Më 1 tetor 2025, Gjykata Krahinore e Komsomolskut në Territorin e Habarovskut shpalli fajtorë Vasili Bondarevin, Irina Bondarevin, Mihail Dorofejevin, Nikolai Kovadnevin, Ivan Nikitinin, Sergei Saçnevin, Ulita Saçnevin, Radion Shitovin, Marina Vojtkon dhe Svetlana Zharkovin. Mihailin, Nikolain dhe Radionin e dënoi secilin me 6 vjet vënie në provë. Vasilin, Irinën, Ivanin, Sergein, Ulitën, Marinën dhe Svetlanën e dënoi secilin me 2 vjet vënie në provë. Për momentin nuk u kërkohet të futen në burg.

Të dhëna

Vasili Bondarevi

Lindur: 1996 (Komsomolsk-mbi-Amur)

Pagëzuar: 2014

Biografia: Punon si ndihmësmjek. Mamaja e tij, Irina, u shpall fajtore në të njëjtën çështje penale

Akuza: Merr pjesë në mbledhjet fetare të Dëshmitarëve të Jehovait

Dënimi: Dy vjet vënie në provë

Komente personale

Si të ka dhënë zemër shembulli i të tjerëve?

Jam natyrë e ndrojtur, prandaj e kam shumë të vështirë të flas para gjykatës. Megjithatë, jam inkurajuar shumë nga motrat e vëllezërit e moshuar që e mbrojnë me guxim besimin e tyre, edhe pse kanë probleme shëndetësore e vështirësi të tjera. Dobësia e tyre fizike e bën edhe më të dukshme mbështetjen e Jehovait. Këta shembuj më nxitin të besoj edhe më shumë te Jehovai dhe të përqendrohem te privilegji që kam për të mbrojtur emrin e tij.

Irina Bondarevi

Lindur: 1961 (Komsomolsk-mbi-Amur)

Pagëzuar: 1993

Biografia: Bashkëshorti i saj humbi jetën në vitin 2020. Ka një djalë dhe një vajzë. Djali i saj, Vasili, u shpall fajtor në të njëjtën çështje penale

Akuza: Merr pjesë në mbledhjet fetare të Dëshmitarëve të Jehovait

Dënimi: Dy vjet vënie në provë

Komente personale

Çfarë të ndihmon ta kapërcesh shkurajimin?

Përveç stresit që sjell përndjekja, kam edhe shumë probleme shëndetësore që ma vështirësojnë jetën. Ndërkohë, s’e kam marrë akoma veten pas humbjes së bashkëshortit. Kur shkurajohem, i kujtoj vetes se vështirësitë që po kaloj, janë të përkohshme. Për shembull, mbaj një bllok me një listë projektesh që dua të realizoj në botën e re. Derisa të vijë ajo ditë, përpiqem të jem e kënaqur dhe të çmoj miqësinë time me Jehovain.

Nikolai Kovadnevi

Lindur: 1960 (Razdolnoje, Territori i Primorjes)

Pagëzuar: 1995

Biografia: Ka punuar si llogaritar. Tani është në pension. Në vitin 2012 u martua me Marinën. Ajo vdiq më 2023

Akuza: Organizon mbledhjet fetare të Dëshmitarëve të Jehovait nëpërmjet videokonferencës

Dënimi: Gjashtë vjet vënie në provë

Komente personale

Si e ke ndier mbështetjen e Jehovait gjatë kësaj periudhe të vështirë?

Bashkëshortja ime humbi jetën në vitin 2023, dy muaj pasi na kontrolluan shtëpinë. Humbja e saj ka qenë gjëja më e vështirë që kam përjetuar ndonjëherë. Ne bënim gjithçka bashkë. Megjithatë kam parë që Jehovai nuk më ka lënë kurrë të vetëm para vështirësive. Ai më ndihmon t’ia dal përballë çdo problemi dhe ndërkohë më ka dhënë mundësinë të zhvilloj cilësi që do të më duhen në të ardhmen. Ç’është më e rëndësishmja, kam mësuar si të mbështetem plotësisht tek ai. Tani nuk lutem që të shmang sprovat, por i kërkoj Jehovait të më ndihmojë t’u bëj ballë, të qëndroj besnik dhe t’i sjell lavdi emrit të tij. Ndiej se më ka pushtuar një paqe e thellë dhe jam i sigurt se Jehovai është Burimi i saj.

Radion Shitovi

Lindur: 1972 (Komsomolsk-mbi-Amur)

Pagëzuar: 1998

Biografia: Ka punuar si psikolog në një kopsht për fëmijë me vështirësi fizike dhe mendore. Në vitin 1998 u martua me Janën. Kanë një vajzë

Akuza: Organizon mbledhjet fetare të Dëshmitarëve të Jehovait nëpërmjet videokonferencës

Dënimi: Gjashtë vjet vënie në provë

Komente personale

Çfarë ta ka forcuar besimin se ke mbështetjen e Jehovait?

Një nga sfidat më të mëdha për mua ka qenë të mbaj nën kontroll ankthin dhe emocionet. Kur mendoj si i mbështeti Jehovai besnikët e tij gjatë vështirësive, bindem se Ai do të kujdeset edhe për mua. Dashuria e durimi që tregoi Jehovai ndaj Elijas, Jonait, Lotit dhe Pjetrit, më sigurojnë se Ai i kupton papërsosmëritë e mia dhe nuk më gjykon ashpër. Vetë fakti që rrethanat aktuale nuk më kanë vënë poshtë, dëshmon se Jehovai po më mbështet. Jam i bindur se me ndihmën e tij, mund të qëndroj besnik dhe të ruaj gëzimin.

Jemi pranë vëllezërve e motrave që po hasin përndjekje. Nga ana tjetër jemi të kënaqur që vazhdojnë t’i japin lavdi Jehovait nëpërmjet besimit të tyre të jashtëzakonshëm.—1 Korintasve 12:25, 26.

Shih edhe

LAJME NDËRKOMBËTARE

Dëshmitarët e Jehovait burgosen për shkak të besimit—Sipas vendeve

Vende ku Dëshmitarët e Jehovait janë burgosur, disa herë në kushte të ashpra, ngaqë praktikojnë besimin e tyre dhe ushtrojnë të drejtat e tyre themelore njerëzore.

LAJME