Kundërshtimi i ashpër i autoriteteve ruse ndaj Dëshmitarëve të Jehovait po fillon të ndikojë edhe në Krime. Në Rusi, qeveria jo vetëm që ka ndaluar entet tona ligjore, por edhe ka treguar qartë se synon të shkatërrojë adhurimin tonë paqësor. Që kur ndaluan veprën në prill të vitit 2017, autoritetet ruse kanë bastisur disa mbledhje të Dëshmitarëve në gjithë Rusinë. Për pasojë shumë prej tyre i kanë arrestuar dhe burgosur. Të njëjtat taktika të egra po përdoren kundër Dëshmitarëve të Jehovait në Krime.

Bastisjet e para në masë në Krime ndodhën më 15 nëntor 2018, në Xhankoi, kur mbi 200 policë dhe forca speciale bastisën 8 shtëpi private ku mblidheshin grupe të vogla të Dëshmitarëve që flitnin për Biblën. Të paktën 35 policë të maskuar e të armatosur hynë me forcë në shtëpinë e Sergei Filatovit, ku ishin mbledhur 6 Dëshmitarë, të cilët u terrorizuan. Policët përplasën në mur një 78-vjeçar, pastaj e shtrinë përtokë, e prangosën dhe e rrahën aq keq sa iu desh ta çonin me urgjencë në spital. Edhe dy të moshuar të tjerë u traumatizuan aq shumë, sa u desh që t’i çonin në spital, ngaqë iu rrit tensioni jashtë mase. Mjerisht, një grua e re së cilës iu bastis shtëpia, dështoi foshnjën e saj.

Pas bastisjes, z. Filatov e akuzuan penalisht se kishte shkelur nenin 282.2(1) të Kodit Penal Rus, sepse kishte organizuar veprimtari të një «organizate ekstremiste». Më 5 mars 2020, gjykata krahinore në Krime dënoi z. Filatov me 6 vite burg. Atë e çuan menjëherë në burg.

Pas bastisjeve në Xhankoi më 2018, policë të forcave speciale vazhdojnë të hyjnë me forcë në shtëpitë e Dëshmitarëve që janë të dyshuar për aktivitete ekstremiste. Bastisja më e fundit ndodhi më 7 gusht 2024. Disa policë të armatosur dhe me maska kontrolluan shtëpitë e 5 Dëshmitarëve, përfshirë shtëpinë e Tamara Bratsevit 68-vjeçare që jeton në fshatin Razdolnoje. Zonjën Bratsevi e akuzuan se organizon aktivitete të një organizate ekstremiste dhe çështja e saj është në proces gjyqësor. Në tetor 2024, 2 Dëshmitarë të Jehovait, Juri Gerashçenko dhe Sergei Parfenoviçi u dënuan me 6 vjet burg. Fillimisht ishin dënuar me vënie në provë, por prokuroria kërkoi një dënim më të rëndë, që u shpall me vendim gjykate. Ata u arrestuan menjëherë në sallën e gjyqit dhe u dërguan në burg.

Për shkak të bastisjeve të shtëpive dhe të proceseve penale e të dënimeve që pasuan, aktualisht në burg ka 14 Dëshmitarë që po vuajnë dënime deri në 6 vjet e gjysmë burg. Të gjithë janë akuzuar se nxitin aktivitetet e një organizate ekstremiste.

Tabelë kronologjike

1. 18 mars 2025

   Aktualisht janë të burgosur 14 Dëshmitarë të Jehovait nga Krimeja.

2. 3 tetor 2024

   Juri Gerashçenko dhe Sergei Parfenoviçi dënohen me 6 vjet burg.

3. 7 gusht 2024

   Forcat ligjzbatuese bastisin 5 shtëpi të Dëshmitarëve të Jehovait në Alushtë, Razdolnoje dhe Senokosnoje. Ngrihet një çështje penale kundër Tamara Bratsevit.

4. 5 gusht 2021

   Kontrollojnë 8 shtëpi të Dëshmitarëve. Arrestojnë Aleksandër Dubovjenkon dhe Aleksandër Litviniukun.

5. 1 tetor 2020

   Autoritetet bastisin 9 shtëpi në Sevastopol. Igor Shmidin e arrestojnë dhe e futin në paraburgim.

6. 4 qershor 2019

   Forcat speciale bastisin 10 shtëpi në Sevastopol. Më vonë, z. Stashevski e akuzojnë për organizim të veprimtarive ekstremiste.

7. 20 mars 2019

   Forcat speciale bastisin 8 shtëpi të Dëshmitarëve të Jehovait në Alupkë dhe në Jaltë. Z. Gerasimov e morën në pyetje dhe pastaj e akuzuan për organizim të veprimtarive ekstremiste.

8. 15 nëntor 2018

   Mbi 200 policë dhe forca speciale bastisën 8 shtëpi në Xhankoi, përfshirë dhe atë të z. Filatov.