A paguhen Dëshmitarët e Jehovait për aktivitetet e tyre fetare?

LUAJ

Jo, ne nuk paguhemi për aktivitetet fetare që kryejmë. Ndjekim shembullin e apostullit Pavël, i cili nuk e përdorte shërbimin e tij për ‘të nxjerrë fitime’.—2 Korintasve 2:17, shënimi.

Në këtë artikull

A paguhen Dëshmitarët për të predikuar shtëpi më shtëpi?

Jo. Nuk paguhemi për asnjë nga format e shërbimit ku marrim pjesë, ku përfshihet edhe predikimi shtëpi më shtëpi. (Mateu 24:14) Ne përdorim kohën, paratë dhe zotërimet tona për t’u predikuar të tjerëve dhe për të drejtuar studime të Biblës. Kur dërgoi apostujt për t’u predikuar të tjerëve, Jezui u tha: «Falas morët, falas jepni.»—Mateu 10:7, 8.

A marrin rrogë Dëshmitarët që shërbejnë si pleq kongregacioni?

Jo. Pleqtë a kryejnë falas të gjitha shërbimet fetare, ku përfshihen pagëzimi, ceremonitë martesore dhe funeralet. Shumica e pleqve bëjnë punë shekullare për të mbajtur ekonomikisht veten dhe familjen e tyre. Disa janë në pension, ndërsa pak të tjerë shërbejnë si anëtarë të urdhrit tonë fetar dhe nuk marrin rrogë.

A marrin rrogë anëtarët e urdhrit tonë fetar?

Jo. Atyre u sigurohet ushqim, strehim, kujdes shëndetësor dhe një shumë e vogël monetare për nevoja personale. Si në rastin e Pavlit dhe të disa të krishterëve në shekullin e parë, kjo mbështetje u jep mundësi të angazhohen në kohë të plotë në shërbimin që u është caktuar.—2 Korintasve 11:9; Filipianëve 4:16, 17.

Urdhri fetar përfshin

Misionarët
Pleqtë udhëtues dhe gratë e tyre, të cilët vizitojnë kongregacionet dhe u japin zemër lajmëtarëve
Pionierët specialë, që janë caktuar të shërbejnë në zona ku ka shumë nevojë për predikues
Ata që shërbejnë në kohë të plotë në një zyrë dege
Ata që ndërtojnë vende adhurimi ose që ndihmojnë në raste katastrofash

Anëtarë të urdhrit fetar të Dëshmitarëve të Jehovait në caktime të ndryshme

Si i përdorim kontributet e dhuruara?

I përdorim dhurimet për aktivitetet tona fetare dhe humanitare. Në artikullin «Si i përdorin Dëshmitarët e Jehovait kontributet e dhuruara?» shpjegohen aspektet e ndryshme të veprës sonë. Përveç kësaj, seria e artikujve «Si përdoren dhurimet e tua» përmban shumë shembuj që tregojnë jo vetëm si i përdorim dhurimet, por edhe si nxjerrin dobi nga vepra jonë njerëz nga e gjithë bota.

Ja çfarë thonë disa

Ernesti, i cili ka shërbyer si plak për dekada të tëra, thotë: «Motivi i vetëm për të shërbyer si plak duhet të jetë dashuria për të tjerët. Po të merrnim rrogë, ata që ndihmojmë mund t’i vinin në dyshim motivet tona. Kur jep nga vetja pa u kursyer, ndihesh vërtet mirë.»
Keli, i cili më parë bënte punë shekullare por tani shërben në kohë të plotë në një zyrë dege, thotë: «Mund të kisha bërë goxha pará në një punë shekullare. Kurse tani si anëtar i një urdhri fetar pa rrogë, më duhet të mendohem mirë sa herë që blej diçka. Gjithsesi, jam i plotësuar dhe kam një ndjenjë të thellë kënaqësie që puna shekullare nuk ma jepte dot.»
Xhineta, e cila është misionare, thotë: «Tani bëj një jetë modeste. Para se të bëhesha misionare, studiova për financë në universitet dhe kisha mundësi të mira punësimi. Por lashë gjithçka pas, sepse nuk ka karrierë ose sasi parash që mund të të japë kënaqësinë që vjen kur i ndihmon njerëzit të ndryshojnë jetën për mirë dhe kur u jep diçka që nuk e kanë—shpresë.»

a Kongregacionet e Dëshmitarëve të Jehovait nuk kanë një pastor, një predikues ose një prift që i mbikëqyr. Përkundrazi, një grup pleqsh të emëruar kujdesen për secilin kongregacion. (Veprat 14:23) Vlen të theksohet se ne nuk kemi ndarje në klerikë e besimtarë të thjeshtë, jemi të gjithë njësoj. Jezui u tha dishepujve të tij: «Jeni të gjithë vëllezër.» (Mateu 23:8) Ja pse pleqtë e kongregacionit nuk presin trajtim të veçantë. Encyclopædia Britannica thotë: «Dallimi mes klerit dhe besimtarëve të thjeshtë filloi në shekullin e dytë», pra shumë kohë pas vdekjes së Jezuit dhe të apostujve të tij.

Artikuj të ngjashëm

Pyetje që bëhen më shpesh për Dëshmitarët e Jehovait

Mund të të pëlqejë edhe . . .

PYETJE QË BËHEN MË SHPESH

Dëshmitarët e Jehovait