PROFETËT e lashtë tregonin besim te Perëndia. Ata i besonin premtimet e tij dhe e ndërtuan jetën rreth tyre. Çfarë përfshinin ato premtime?

Menjëherë pasi Adami dhe Eva u rebeluan në Eden, Perëndia premtoi se do të caktonte dikë që do t’i shtypte kokën «gjarprit», i cili përfaqësonte ‘dragoin e madh, gjarprin e hershëm, që quhet Djall dhe Satana’, e do ta shkatërronte përgjithmonë. (Zanafilla 3:​14, 15; Zbulesa 12:​9, 12) Pra, profetët po pritnin dikë që do të vinte t’i ndihmonte. Kush do të ishte ai?

Rreth 2.000 vjet pasi dha profecinë e parë, Jehovai i premtoi profetit Abraham se Ai që duhej të vinte, do të ishte një pasardhës i tij. Perëndia i tha Abrahamit: «Me anë të farës [pasardhjes] sate do të arrijnë të marrin bekime të gjitha kombet e tokës, falë faktit që ti e dëgjove zërin tim.»​​—Zanafilla 22:18.

Në vitin 1473 p.e.s, Perëndia i dha profetit Moisi informacione të tjera për ‘farën’. Moisiu u tha bijve të Izraelit: «Jehovai, Perëndia juaj, do t’ju japë një profet si unë nga gjiri juaj, nga vëllezërit tuaj​—atë duhet të dëgjoni.» (Ligji i përtërirë 18:15) Ashtu si Moisiu, ky profet do të vinte nga fëmijët e Abrahamit.

Ky profet do të ishte edhe pasardhës i mbretit David e do të bëhej edhe ai mbret i madh. Perëndia i premtoi mbretit David: «Unë do të nxjerr pas teje një pasardhës [dhe] do ta bëj të patundur fronin e mbretërisë së tij përgjithnjë.» (2 Samuelit 7:​12, 13) Perëndia zbuloi gjithashtu se ky pasardhës i Davidit do të quhej «Princ i Paqes»  dhe shtoi: «Sundimi i tij i madh princëror dhe paqja nuk do të kenë fund në fronin e Davidit dhe në mbretërinë e tij, që ajo të vendoset patundshmërisht dhe të qëndrojë me anë të drejtësisë dhe veprave të drejta që tani e në përjetësi.» (Isaia 9:​6, 7) Po, ky Udhëheqës i drejtë do të rivendoste paqe dhe drejtësi në mbarë botën. Por, kur do të vinte ai?

Më vonë, engjëlli Gabriel i tha profetit të Perëndisë, Danielit: «Ti duhet ta dish e të kesh gjykim të thellë, se që nga dalja e fjalës për të restauruar dhe për të rindërtuar Jerusalemin deri te Mesia, Udhëheqësi, do të kalojnë shtatë javë, si edhe gjashtëdhjetë e dy javë.» (Danieli 9:25) Këto 69 javë ishin 69 grupe vitesh, me nga 7 vjet secili grup, dhe përbënin gjithsej 483 vjet. Shtriheshin nga viti 455 p.e.s., deri në vitin 29 të e.s. a

A erdhi vërtet në vitin 29 të e.s., Mesia, domethënë ‘fara’ e shumëpritur dhe profeti që do të ishte si Moisiu? Le të shohim.