Gjykatësit 17:1-13

  • Idhujt e Mikesë dhe prifti i tij (1-13)

17  Në rajonin malor të Efraimit+ ishte një njeri që quhej Mikea.  Ai i tha nënës së tij: «1.100 monedhat e argjendit që t’i kishin marrë, për të cilat ti the një mallkim, që e dëgjova me veshët e mi, i kam unë. T’i kisha marrë unë.» Ajo i tha: «Jehovai e bekoftë djalin tim!»  Kështu, ai ia ktheu nënës së tij 1.100 monedhat e argjendit, por ajo i tha: «Këtë argjend do t’ia shenjtëroj me dorën time Jehovait, prandaj dua që ta përdorësh për të bërë një shëmbëlltyrë të gdhendur dhe një statujë prej metali*+ për veten tënde. Kështu ky argjend do të jetë yti.»  Pasi ia ktheu argjendin, ajo mori 200 monedha argjendi e ia dha një argjendari, i cili bëri me to një shëmbëlltyrë të gdhendur e një statujë prej metali.* Ato i vendosën në shtëpinë e Mikesë.  Mikea kishte një shtëpi perëndish; kështu bëri një efod+ dhe idhuj shtëpie*+ dhe emëroi* njërin nga djemtë e tij që t’i shërbente si prift.+  Në atë kohë nuk kishte mbret në Izrael.+ Secili bënte çfarë i dukej e drejtë në sytë e vet.*+  Tani, në Betlehem+ të Judës ishte një djalë i ri nga familja e Judës.* Ai ishte levit+ dhe kishte ca kohë që banonte atje.  Ai u largua nga qyteti i Betlehemit të Judës që të gjente një vend për të banuar. Gjatë udhëtimit, arriti në rajonin malor të Efraimit, te shtëpia e Mikesë.+  Mikea e pyeti: «Nga vjen?» Ai iu përgjigj: «Jam levit nga Betlehemi i Judës dhe po shkoj të gjej një vend për të banuar.» 10  Atëherë Mikea i tha: «Rri me mua e shërbemë si këshilltar* e si prift. Unë do të të jap dhjetë monedha argjendi në vit dhe do të të siguroj rrobat e ushqimin.» Kështu leviti hyri brenda 11  dhe pranoi të qëndronte tek ai. Djali i ri u bë për të si një nga djemtë e tij. 12  Përveç kësaj, Mikea e emëroi* levitin që t’i shërbente si prift,+ dhe ai banoi në shtëpinë e Mikesë. 13  Atëherë Mikea tha: «Tani e di që Jehovai do të jetë i mirë me mua, sepse kam për prift një levit.»

Shënime në fund të faqes

Ose «shtatore të derdhur».
Ose «shtatore të derdhur».
Ose «perëndi shtëpie». Fjalë për fjalë «terafimë».
Fjalë për fjalë «ia mbushi dorën».
Ose «çfarë mendonte se ishte e drejtë».
Kjo mund t’i referohet thjesht faktit që ai banonte në territorin e Judës.
Ose «atë».
Fjalë për fjalë «ia mbushi dorën».