Isaia 39:1-8

  • Të dërguarit nga Babilonia (1-8)

39  Në atë kohë mbreti i Babilonisë, Merodak-Baladani, biri i Baladanit, i dërgoi Hezekisë+ letra dhe një dhuratë, pasi kishte dëgjuar se kishte qenë sëmurë dhe ishte shëruar.+  Hezekia i mirëpriti me gëzim* të dërguarit dhe u tregoi shtëpinë e tij të thesarit:+ argjendin, arin, vajin e balsamit dhe vajrat e tjera cilësore, gjithë arsenalin e armëve, si dhe gjithçka kishte në thesar. Ai s’la gjë pa u treguar nga shtëpia* dhe nga mbretëria e vet.  Pas kësaj, profeti Isaia vajti te mbreti Hezekia dhe e pyeti: «Ç’thanë ata burra dhe nga vinin?» Hezekia iu përgjigj: «Vinin nga një vend i largët, nga Babilonia.»+  Isaia vazhdoi: «Ç’panë në shtëpinë tënde?» Hezekia iu përgjigj: «Panë gjithçka. S’lashë gjë pa u treguar nga thesari im.»  Atëherë Isaia i tha Hezekisë: «Dëgjo se çfarë thotë Jehovai i ushtrive:  ‘Ja, po vijnë ditët kur gjithçka që gjendet në shtëpinë tënde dhe që paraardhësit e tu kanë grumbulluar deri më sot, do të çohet në Babiloni. S’do të mbetet asgjë,+​—thotë Jehovai.+—​  Edhe disa nga djemtë që do të të lindin, do t’i marrin dhe do t’i bëjnë zyrtarë oborri në pallatin e mbretit të Babilonisë.’»+  Atëherë Hezekia i tha Isaisë: «Jam dakord me këto fjalë të Jehovait.» Pastaj shtoi: «Të paktën do të ketë paqe dhe stabilitet* gjatë jetës sime.»*+

Shënime në fund të faqes

Fjalë për fjalë «u gëzua për».
Ose «nga pallati mbretëror».
Ose «të vërtetë».
Fjalë për fjalë «ditëve të mia».