Ezekieli 42:1-20

  • Blloku i dhomave të ngrënies (1-14)

  • Maten katër anët e zonës përreth kompleksit të tempullit (15-20)

42  Pastaj më nxori në oborrin e jashtëm, në drejtim të veriut,+ dhe më çoi te blloku i dhomave të ngrënies, i cili gjendej afër hapësirës së lirë,+ në veri të ndërtesës ngjitur.*+  Blloku ishte 100 kute* i gjatë në veri, ku kishte një hyrje, dhe 50 kute i gjerë.  Ai ndodhej midis oborrit të brendshëm, që ishte 20 kute i gjerë,+ dhe trotuarit të oborrit të jashtëm. Dhomat e ngrënies kishin ballkone përballë njëra-tjetrës dhe formonin tri kate.  Përpara dhomave* të ngrënies ishte një rruginë+ 10 kute e gjerë dhe 100 kute e gjatë;* hyrjet e tyre ishin me drejtim nga veriu.  Dhomat e ngrënies në kat të tretë ishin më të vogla se ato të katit të parë dhe të dytë, për shkak të ballkoneve.  Dhomat e ngrënies ngriheshin shkallë-shkallë në tri kate, dhe meqë nuk kishin kolona si kolonat e oborreve, dhomat e katit të tretë kishin më pak hapësirë sesa të katit të parë dhe të dytë.  Muri i jashtëm prej guri, që ishte afër dhomave të ngrënies në anën e oborrit të jashtëm, të cilat ishin përballë dhomave të tjera të ngrënies, ishte 50 kute i gjatë.  Gjatësia e dhomave të ngrënies që ishin në anën e oborrit të jashtëm, ishte 50 kute, kurse gjatësia e atyre që ishin në anën e shenjtërores, ishte 100 kute.  Dhomat e ngrënies kishin një hyrje në anën lindore, që të mund të hyje në to nga oborri i jashtëm. 10  Edhe në jug, mbrapa* murit prej guri që ishte me drejtim nga lindja, kishte dhoma ngrënieje; ato ishin afër hapësirës së lirë dhe ndërtesës ngjitur.*+ 11  Edhe përpara këtyre dhomave ishte një rruginë e ngjashme me atë të dhomave të ngrënies në veri.+ Ato kishin po atë gjatësi dhe gjerësi, si edhe të njëjtat dalje dhe planimetri. Hyrjet e këtyre dhomave 12  ishin me drejtim nga jugu. Në krye të rruginës, te muri prej guri me drejtim nga lindja, kishte një hyrje që të mund të hyje në to.+ 13  Ai më tha: «Dhomat e ngrënies në veri dhe ato në jug, të cilat ndodhen afër hapësirës së lirë,+ janë dhomat e shenjta të ngrënies ku priftërinjtë që i afrohen Jehovait, hanë blatimet shumë të shenjta.+ Atje vënë blatimet shumë të shenjta, blatimet në drithë, blatimet për mëkatin dhe blatimet për fajin, sepse vendi është i shenjtë.+ 14  Pasi të kenë hyrë, priftërinjtë nuk duhet të dalin nga vendi i shenjtë për të vajtur në oborrin e jashtëm pa hequr më parë rrobat me të cilat kryejnë shërbimin,+ sepse ato janë të shenjta; ata duhet të veshin rroba të tjera për të shkuar në vendet ku lejohet populli.» 15  Pasi mbaroi matjet në kompleksin e tempullit,* ai më nxori jashtë nga porta që është në drejtim të lindjes,+ dhe mati gjithë zonën përreth tij. 16  Ai mati murin lindor me kallamin matës;* sipas kallamit matës, ai ishte 500 kallama i gjatë, nga njëri krah në tjetrin. 17  Mati murin verior, që ishte 500 kallama i gjatë, sipas kallamit matës. 18  Mati murin jugor, që ishte 500 kallama i gjatë, sipas kallamit matës. 19  Shkoi në murin perëndimor, e mati, dhe ishte 500 kallama i gjatë, sipas kallamit matës. 20  Ai e mati zonën përreth kompleksit të tempullit në të katër anët; ajo kishte një mur rreth e qark,+ i cili ishte 500 kallama i gjatë dhe 500 kallama i gjerë,+ që të ndante gjërat e shenjta nga gjërat e zakonshme.+

Shënime në fund të faqes

Domethënë, ndërtesës në perëndim të shenjtërores.
I referohet kutit të gjatë. Shih Shtojcën B14.
Ose «sallave».
Sipas Septuagintës greke, «dhe 100 kute i gjatë». Teksti në hebraisht thotë: «dhe një kalim një kut.» Shih Shtojcën B14.
Fjalë për fjalë «përgjatë».
Domethënë, ndërtesës në perëndim të shenjtërores.
Fjalë për fjalë «pjesën e brendshme të shtëpisë».