Enda bwa kuleshe myanda i mwanka

Enda bwa kuleshe kashibo ka myanda i mwanka

 SHAPITRE 102

Nfumu batwele mu Yeelusaleme mmukamine ku mwana a mpunda

Nfumu batwele mu Yeelusaleme mmukamine ku mwana a mpunda

MATEO 21:1-11, 14-17 MAAKO 11:1-11 LUKA 19:29-44 YOWANO 12:12-19

  • YESU BATWELE NA NTUMBO MU YELUSALEME

  • ABATEMUKA KABUTU KA YELUSALEME

Butookye, mu Dyamposo mwifuku dya 9 mweshi wa Nisane, Yesu bakatukile ku Betanii eenda mutadiile ku Yelusaleme. Pababadi abefubwila na kibundji kya Betfagee, ku Mwengye wa Olive, Yesu balungwile babidi ba ku balongi baye shi:

“Endaayi mu kibalo kii kumpala kwenu, anusanganga mpunda mukashi, abadi bashitshikye, na mpunda mwana peepi naaye; mushituleeyi, nwiyintwadile yooso. Su muntu enwipusha mwanda nwaluule shi: ‘Mmwanaana e nayo lukalo,’ paapa eyitadiila yende.”—Mateo 21:2, 3.

Balongi abakutshilwe kumona shi kwibatuma kwa Yesu kubadi kutale butemuki kampanda bwa mu Bible. Anka kunyima, abapushishe kulombana kwa butemuki bwa Zakarii. Badi mutemukye shi Nfumu mulayibwe n’Efile Mukulu badi na kya kufika mu Yelusaleme “mwiyishe, akaamina pa mpunda, pa mwan’a-mpunda.”—Zakarii 9:9.

Pabafikile balongi ku Betfagee abo nkwata mwana-mpuda na nyinaye, bantu abadi mu bwipi abebayipwishe shi: “Kyanwangwila mpunda mwana nkinyi?” (Maako 11:5) Kadi pababapushishe shi Mwanana nyi badi nayo lukalo, abalekyele balongi bwabadya kwiyitwadila Yesu. Balongi abadiishe bilamba byabo pa mpunda na pa mwana a mpunda, anka Yesu bakaamine pa mwana a mpunda.

Kibumbu kibafwimine pabadi Yesu efubwila peepi na Yelusaleme. Bantu bebungi abadiishe bilamba mu nsenga. Bangi abadiishe tutabi twa mitshi sunga na “masaki bibabadi abatshibi mu mapya.” Babadi abeele misaase shi: “Ozaana! Uno afiki! Ende ntumbo mwishina dya Yehowa! Bufumu abufiki bwende ntumbo, Bufumu bwa Daviide nsheetu!” (Maako 11:8-10) Bafadisee abadi mu kibumbu abafitshile munda pa mwanda wa byabya. Abo nkulungula Yesu shi: “Mulambukishi, saashila balongi boobe baumiine!” Yesu bebalulwile shi: “Neenulungula shi, su abo baumiina, mabwe, aeele misaase.”—Luka 19:39, 40.

Pabadi Yesu mumone Yelusaleme, badidile na kwakula shi: “Su obe naamu boody’a kuuka leelo uno, kyakukita bwa kupeta butaale babo! Anka, akyo kibadi kikufwame!” Yelusaleme badya kufuta bwa nshaleelo e bubi a kupela kukookyela. Yesu badi mutemukye shi: “Akukakufikila mafuku aakakushaleela beeshikwanyi noobe, bakwifuunyishe bwa kukulwisha ngoshi, naa abakufinakasha mpese yooso. Abakakusooso, obe na bana boobe boodi nabo, dingi taabakulekyela, ebwe pa dikwabo.” (Luka 19:42-44) Eyendo, mayi a Yesu abadi aalombane mu kipwa kya 70 B.B. pa kabutu ka Yelusaleme.

Pabatwelele Yesu mu Yelusaleme, ‘kibundji kishima kibadi bu kikwatshibwe ku maasa, babadi abeyipusha shi: “A nnanyi uno?”’ Anka kibumbu kibadi kitungunukye na kwakula shi: “Nyi Yesu mutemuki, a mu Nazarete, mu Ngalileya.” (Mateo 21:10, 11) Bangi mu kibumbu abamwene kubadi Yesu musangushe Lazaare abadi abalungula bangi bwa kyakya kilengyeleshi. Bafadisee abadi abedidi mwanda abamonanga shi abafudiila. Abadi abelungushena shi: “Anumono bantu booso abamulondo.”—Yowano 12:18, 19.

Nka bu bibadi kipikwa kyaye pabadi afiki mu Yelusaleme, Yesu bayile mu kulongyesha mu ntempelo. Kwakwa nyi kubadi mupaashe muntu mpofu na mulemane. Pabadi bakata ba tshiite mwakwidi na bafundji bamone bibakitanga na kupusha bana abele misaase mu ntempelo shi: “Ozaana kwi Mwana a Daviide!” abafiitshile munda. Bakata ba bipwilo abayipwishe Yesu shi: “Opusha kyabamba?” Yesu bebalulwile shi: “Oolo, tanwabadile kino kifundwe akyakula shi: ‘mukanwa mwa twana tukinga naa mwa byaàlààlà, we mutuushe bishima bya nkupa nabyo nkumo’?”—Mateo 21:15, 16.

Yesu batadile bintu bibadi mbwipi mwa ntempelo. Anka takubadi kukyolwa, aye nkukatuka na batumibwa. Kumpala kw’efuku dya 10 mweshi wa Nisane kubanga, bayile ku Betanii kubakishishe bufuku mu Dyamposo.