Enda bwa kuleshe myanda i mwanka

Enda bwa kuleshe kashibo ka myanda i mwanka

 SHAPITRE 27

Abayitanyina Mateo

Abayitanyina Mateo

MATEO 9:9-13 MAAKO 2:13-17 LUKA 5:27-32

  • YESU B’ETANYINA MATEO MUDISHI A BITADI

  • KIDISHITU BEBUNGU NA BA NKITSHISHY’A BUBI NA KWIBAKWASHA

Kapindji kapeela kunyima kwa kupaasha kishetshi, Yesu bashaleele mu Kapernaume dya ku Kalunga ka Ngalileya. Bibumbu bya bantu bibafikile dingi kwadi, aye nkubanga kwibalongyesha. Pabadi akidi, bamwene Mateo ababadi abayitanyina dingi bu Leevi, badi mushaale ku mesa a kuudisha bitadi. Yesu nkumwitanyina na muloo ooso shi: “Ikala mulondji ande.”—Mateo 9:9, EEM.

Anka bu Mpyeele, Andree, Shake na Yowano, abimweka shi Mateo badi mupwe kubanga kupetekyelwa ku ndambukisho na bilengyeleshi bya Yesu mu kibundji kyabo. Anka bu’bo, Mateo bakumiina musango umune. Mateo ebilesha mu Evangile aye p’akula shi: ‘Aye [Mateo nabeene] nkwibwa, nkulonda’ Yesu. (Mateo 9:9) Musango umune, Mateo balekyele mudimo waye wa kuudisha bitadi na kufika mulongi a Yesu.

Dingi efuku, pangi bwa kuleesha shi basangeela lwitamino lwa Yesu lwi pa bwalo, Mateo bakitshiishe musangeelo umune ukata kwaye ku nshibo. Kukaasha Yesu na balongi baye, mmbannanyi babadi mwitanyine dingi? Beena mudimo naye bakala, bangi baudishi ba bitadi abadi kwanka. Abadi abaudiisha bakata beena Looma bitadi, mpa na bitadi bya maato abadi aayimana mwifwa, bitadi bya bantu abadi abakitshi nyendo mu mashinda akata, bitadi bya bintu bibadi abifiki mu angi maumbo. Beena Yuuda abadi abamono baudishi ba bitadi naminyi? Bantu abebayipulaa mwanda misango ibungi, abadi abeele ntenteko ku makuta ababadi batshibe bwa kitadi. Ku musangeelo kubadi dingi “ba nkitshishy’a bubi,” bantu abadi baukikwe bu basha mwikelo wibubi.—Luka 7:37-39.

Nsaa ibabadi abatala Yesu ku musangeelo na baba bantu, Bafadisee abemonaa bu’bo balulame abadi paapa, abayipwishe balongi baye shi: “Bwakinyi mulambukishi eenu adi na baudishi ba bitadi na basha-milwisho?” (Mateo 9:11) Pabapushiishe Yesu byabya, bebalulwile shi: “Ta mbee na mbidi bukome bee na lukalo na munganga, anka ba-sha-mikumbo. Byabya ndayi mu kuyiya kino kyambilo: ‘Ndusa lwankyebe, ta mmilambu.’ Mwanda ntshi mufikye mu kwitanyina, mululame nya, nee mufikye bwa ba-sha-milwisho.” (Mateo 9:12, 13; Osea 6:6) Nsaa i Bafadisee abayitanyina Yesu bu “mulambukishi,” t’abikatukila mwishimba dyabo nya, kadi mbalombeene kulongyela kintu kampanda kwadi pabitale kukita myanda ibuwa.

Abimweka shi, Mateo badi mwitanyine baudishi ba bitadi na bankitshishy’a bubi kwaye ku nshibo bwa shi bamone bya kuteemesha Yesu bwabadya kupaashibwa mu kikudi, “mwanda babadi bungi, na babamulondanga.” (Maako 2:15, Kilombeeno kipya 2014) Yesu akumiina kwibakwasha bwa shi bekale mu kipwano kibuwa n’Efile Mukulu. Mu kwilekeena na Bafadisee abadi abemono bu’bo balulame, Yesu tabadi musabuule baba bantu nya. Bu byasamba bantu na kwibafwila lusa; badi mulombeene kwikala munganga a mu kikudi bwa baba booso abadi abakumbu mu kikudi.

Yesu bafikile bwa baudishi ba bitadi na ba nkitshishy’a bubi, kushii kukalasheena milwisho yabo, kadi ebaleesha kalolo nka bi kaaka kabaleesha muntu kwete kukumba ku mbidi. Bu kileshesho, tentekyesha nsaa ibakumine muntu sha mukumbo wa nsudi na lusa looso, bakwile shi: “Nankumiina ikala mutooshiibwe.” (Mateo 8:3, Kilombeeno kipya 2014) Tatwi balombeene kwitatshisha bwa kwikala na mweneno a lusa na kukwasha baba be mu lukalo, bikishekishe nsaa y’atwibakwatshisheena mu kikudi su?