Enda bwa kuleshe myanda i mwanka

Enda bwa kuleshe kashibo ka myanda i mwanka

 SHAPITRE 25

Bapasha sha maladi a nsudi pa mwanda wa lusa

Bapasha sha maladi a nsudi pa mwanda wa lusa

MATEO 8:1-4 MAAKO 1:40-45 LUKA 5:12-16

  • YESU BAPAASHA MUNTU SHA-NSUDI

Pabadi Yesu na balongi baye bananka bende na kulambukishanga mu “bitumbwilo biabo mu [Ngalileya] mwoso,” mukandu wa myanda ibuwa ibakitshine ubapalakene mbalo yooso. (Maako 1:39, Kilombeeno kipya 2014) Nkumo ya byooso bibakitshiine ibakafikile mu kibundji kibadi muntu badi na maladi a nsudi. Luka munganga aleesha shi badi na “[nsudi] mbidi yooso.” (Luka 5:12) Su uno mukumbo ubayisha, aubangaa kudya kapelakapela bingi bipindji bya mbidi.

Nyi bwakinyi uno sha-nsudi e mu dikyenga dikata, na abitungu akashaale kula na bangi bantu. Kukaasha paapa, abitungu ekale eele misaase shi: “Ntshi mutooshibwe, ntshi mutooshibwe!” Su bantu abefubwila peepi naye, na akumiina kwibakalwila bwa shi tala bafika peepi naye, kupela aa maladi a lwambu ebakwata. (Beena-Levi 13:45, 46) Kadi uno muntu sha-nsudi akitshi binobino kinyi? Aye nkwitamina Yesu na nkukunama kumpala kwaye, nkubanga kwisendeela shi: “A Fumu, su okumiina we mulombeene kuntoosha soo.”—Mateo 8:2, Kilombeeno kipya 2014.

Uno muntu badi na lukumiino lwibukopo mwi Yesu! Kushii mpaka, ano maladi abadi amwikashe bi lusa! Yesu bakitshine naminyi? Boodi mulombeene kukita naminyi su boodi panka? Na lusa looso, Yesu boolola mboko yaye, akupu bamukumu. Yesu nkumulungula shi: “Naakyebe, ikala mutooshibwe.” (Mateo 8:3) Mwanda wa kukaanya, uno mwana mulume badi na maladi a nsudi, badi mupande.

Okumiina kwikala na nfumu sha lusa na sha ngobesha bu Yesu su? Kipaso kibadi mupaashe yawa muntu sha nsudi akitushinkamiisha shi, nsaa ayikala Yesu bu Nfumu a nsenga yooso ishima, buno butemuki bwa mu Bible abwamba shi: “Apushiisha mulanda na mubofule lusa, apaashe muwa wa balanda,” abukalombana. (Misambo 72:13) Oolo, Yesu akyebe kulombasha lukalo lwi mwishimba dyaye bwa booso abakyengye.

Tentekyesha shi sunga kumpala kwa kupaasha yawa muntu sha-nsudi, bantu abadi abasangeela ngofu mudimo wa bulungudi wa Yesu. Binobino, bantu abakyebe kupusha nkumo ya bintu bya kukaanya bibakatuka mu kukita. Kadi Yesu t’akumiina shi bantu bakumiine mwadi nka penda bwa myanda ibabapusha nya. Badi auku buno butemuki abwakula shi “taabapusha eyi dyaye mu miseese,” bwa kukaanyisha bantu nya. (Yeeshaya 42:1, 2) Nyi bwakinyi, Yesu badi mwelele yawa muntu abapashiishe ku maladi a nsudi mwiya shi: “Dimuka, twebilungulanga muntu; anka nda okeleeshe kwi tshiite mwakwidi na olambule mulambu ubambile Moyiise.”—Mateo 8:4, Kilombeeno kipya 2014.

Anka bu bibapanda yawa muntu, e na muloo ukata, ta mulombeene kuumiina nya. Aye nkapalakasha yaaya nkumo mbalo yooso. Abyo nkwibwesha lukalo lwa bantu na kwibatakula bwa kuuka kibakitshika. Byabya bibadya kushikila Yesu bwa kupela kutwela patooka mu dingi eumbo, nyi bwakinyi bayile akashaala ingi mbalo ifwame pa bupenka. Sunga mbyabya, bantu ba mpese yooso abafikile bwa shi ebalongyeshe na kwibapaasha.