Enda bwa kuleshe myanda i mwanka

Enda bwa kuleshe kashibo ka myanda i mwanka

SHAPITRE 33

Kulombana kwa butemuki bwa Yeeshaya

Kulombana kwa butemuki bwa Yeeshaya

MATEO 12:15-21 MAAKO 3:7-12

  • BIBUMBU BYA BANTU BIBEFUBWILA KWI YESU

  • BALOMBASHA BUTEMUKI BWA YEESHAYA

 Nsaa ibapushiishe shi Bafadisee na bantu ba Eroode abaata mpàngo ya kumwipaa, Yesu bakatukile na balongi baaye, abo nkwenda ku Kalunga ka Ngalileya. Kwakwa kibumbu kya bantu ba mpese yooso nkumulonda—Ba ku Ngalileya, ba ku tumisoko twa ku bukunkula bwa Tiire na Sidone mpa na ku lupese lwa kutunduka kwa Mwela wa Yoordano, ku Yelusaleme na kuushi kwibula na Idumeya. Yesu nkupaasha bantu be bungi. Bu kipeta baaba abaadi na mikumbo ilekenelekene abafikanga kwadi. Tababaadi abatengyela shi Yesu e bakume nya abaadi abelwilena nka bwa shi bakamukume.—Maako 3:9, 10.

Bantu abaadi bungi bukile, nyi bwakinyi Yesu balungwile balongi baaye bwashi bamulumbulwile ka bwato kapeela, bwadya kumona bya kakatuka ku kyèse bwashi tabakabanga kwifineena naye. Byabya badi mulombene kwibalongyeesha mu bwato sunga kwenda ingi mbalo ku bukunkula bwa mwela bwa kukwasha bantu be bungi.

Mulongi Mateo aleesha shi mudimo wa Yesu ubalombeene nka bu “kibaadi kyambe Yeeshaya mutemuki.” (Mateo 12:17) Yesu balombeeshe butemuki kinyi?

Balombeshe butemuki abwamba shi: “Ngiwu Mufubi ande andi mwimeene, musangulwe andi mufule’mi nabeene; nee mumupe kikudi kyande, bwa’shi aleeshe bisamba byooso bululame. Teele musaase, taakaamisha eyi, taabaapusha eyi dyaaye mu miseese; taatshokola lukongye lunyekame, taashimi mushinga wa kimunyi awifitshi miishi; aleesha bya kutshiba nsambu mu bululame. Aye teebofusha nya, teeyalusha ku mongo, mpaa’na pakashikamiisha bululame pa nsenga; beena bisengasenga [miilo yooso] abatengyela miiya yaaye.”—Mateo 12:18-21; Yeeshaya 42:1-4.

Yesu mmwikale binyibinyi mufubi abadi bafule bikata kwi Efile Mukulu. Baleesha patooka shi bululame bwaye mbwa binyibinyi, buno bwabakwete kushikiila kwi bipikwa bya bipwilo bya madimi. Bu Bafadisee bakwete kutumikisha Miiya y’Efile Mukulu mu wabo mushindo, ta mbalombeene sunga nkukwasha muntu kwete kukumba mwifuku dya Sabato nya! Bu bibaadi muleeshe kululama kw’Efile Mukulu patooka, na shi kikudi ky’Efile Mukulu kii paadi, Yesu baadi mutentule bantu bushito bwa bipikwa bitwelakane. Pa mwanda wa byabya bakata ba bipiwino abakyebe kumwipaa. Uno ubadi mwanda wa kukaanya!

Bishima abyamba shi: “Teele musaase, taakaamisha eyi, taabaapusha eyi dyaaye mu miseese,” abikyebe kwamba kinyi? Nsaa y’apaasha bantu, Yesu tabaadi mwibatadiile—sunga mba demo bwabadya “kwibiwukisha bantu.” (Maako 3:12, Kilombeno kipya 2014) Tabaadi akumiina shi bantu  bamuukile ku nkumo y’abapalakasha mu miseese, sunga mu mikandu ibubi yabelungusheena.

Dingi, Yesu baadi atwala mukandu wa kunyingisha kwi bantu abaadi bu lukongye lunyekame na lutshokolwe. Baaba bantu be nka bu mushinga ukwete kwifita miishi ubashaala kapindji kapeela ushime. Yesu ta mmusoose elengye dyabadi bekupile sunga shi ta mushime mushinga ukwete kwifita wi peepi na kushima nya. Pa mutwe pa byabya, na kabombeleshi kooso na kifulo, baadi akaamisha bantu basha kwiyisha. Binyibinyi, Yesu nyi muntu abadi balombene kukulupila kwi miilo!