Enda bwa kuleshe myanda i mwanka

Enda bwa kuleshe kashibo ka myanda i mwanka

SHAPITRE 49

Kulungula mu Ngalileya na kulongyesha batumibwa

Kulungula mu Ngalileya na kulongyesha batumibwa

MATEO 9:35–10:15 MAAKO 6:6-11 LUKA 9:1-5

  • YESU BALONGYESHA DINGI MU NGALILEYA

  • BATUMU BATUMIBWA MU BULUNGUDI

 Yesu badi mupwe kulambukisha na kishima pangi munda mwa bipwa bibidi. Anka tayibadi nsaa ya kukooka na kwikisha Nya. Mu kwilekena na byabya, Yesu badi mupalakashe mudimo waye wa bulungudi pa kutambuka “mu bibalo na mu bibundji byooso [bya mu Ngalileya] alambukisha mu bilangwilo [bitumbwilo] byaabo na kuukisha mukandu wibuwa wa Bufumu bw’Efile Mukulu bapaashanga mikumbo na masungu ooso.” (Mateo 9:35) Bibamwene, bibamupeele lukalo lwa kutamisha mudimo wa bulungudi. Kadi badya kwiukita naminyi?

P’abadi atambuka, Yesu bamwene bantu abadi na lukalo na bukwashi na kunyingishibwa na bya binyibinyi. Abadi bu mikooko ishii na mulami ayikyengye na isumbushene. Badi mwibafwile lusa na kulungula balongi baye shi: “Bya kunwa bibungi, anka bafubi mbapeela. Byabya tekaayi nfumu a byuùmbùlwanga bwadya kutuma bafubi mu efuba dyaye.”—Mateo 9:37, 38.

Yesu baukanga kibadya kukwasha. Basangwile batumibwa 12, aye nkwibabuula babidi babidi, abo nkufika bisaka bisamombo bya balungudi. Akupu bebapeela malango aapushika kalolo shi: “Tanulondanga eshinda dya ku beena angi maumbo, dingi tanutwelanga mu kibalo kya beena Samaadiya; ndayi kwi mikooko ishimine ya nshibo ya Isaleele. Mwishinda, ukishaayi’shi: ‘Bufumu bwa mwiyilu tabudi peepi.’”—Mateo 10:5-7.

Bufumu bubabadi na kya kulungula nyi mbuno abulesha Yesu mu luteko lwa kileshesho. ‘Bufumu bubefubwila pabwipi’ mu kipaso kya’shi Nfumu abadi basangule kwi Efile Mukulu Yesu  Kidishitu bekala kwanka. Binobino nkinyi kibadi na kya kushinkamisha shi balondji baye abadi beena buno Bufumu? Yesu bebapeele bukome bwa kupaasha ba sha mikumbo mpa na kubuusha bafwe, kwibikita kushi kuteka bantu kintu. Kadi batumibwa abadya kulombasha nkalo yaabo bu kidiibwa kya kwifuku naminyi?

Yesu balungwile balongi baye bwa kupela kulumbuula byakudya mu lwalwa lwendo lwa bulungudi. Tababadi na kya kwata oòlo, kyamo kyebakanyi sunga munyinga bwa kwikwasha nya. Tababadi sunga na kya kwata mpaaya a bidiibwa sunga bingi bilamba na bilaato. Bwakinyi? Yesu badi mwibashinkamishe shi: “Mwina mufubo e na kya kupeta efuto dyaye.” (Mateo 10:10) Bantu bababadi na kya kupeta, abasangeela mukandu wabo abadya kulombasha nkalo ya balongi. Yesu bambile shi: “Su nwafika pa mbalo kampanda, nwatwela mu nshibo, nwimushale nyaa na panukatuka yaaya mbalo.”—Maako 6:10.

Yesu bebapeele malango pabitale byabadi balombene kwifubwila peepi na mwina nshibo pa kwibalungula shi: “Pa kutwela mu nshibo, nwakule shi butaale bwikale neenu. Su ino nshibo ngilombene butaale, butaale bwenu butwele mwanka; anka su ta ngibulombene, butaale bwenu bwalukye kwanudi. Su bapela kwinutambula, na su t’abateemesha bishima byanu, pa kutuuka mu yaaya nshibo, sunga mu kyakya kibalo, kukulaayi lufuufi lwa ku ngwa yeenu.”—Mateo 10:12-14.

Bi kwikala shi pangi kibundji kishima sunga musoko ushima ubapele mukandu wabo. Bibadya kulesha kinyi bwa kyakya kibalo? Yesu balesheshe shi ayikapete kiimu kibukopo. Bambile shi: “Eyendo, nenulungula shi efuku dya kiimu, Efile Mukulu akakwatshila kyakya kibalo nsungu kukila Sodome na Gomoore.”—Mateo 10:15.