Enda bwa kuleshe myanda i mwanka

Enda bwa kuleshe kashibo ka myanda i mwanka

 SHAPITRE 18

Nkumo ya Yesu ibakaamina, ya Yowano namu ibapeele

Nkumo ya Yesu ibakaamina, ya Yowano namu ibapeele

MATEO 4:12 MAAKO 6:17-20 LUKA 3:19, 20 YOWANO 3:22–4:3

  • BALONGI BA YESU ABABATSHISHA BANTU

  • YOWANO MUBATSHISHI E MU LUKANO

Kunyima kwa Kidibwa kya lukilo mu printemps a kipwa kya 30 B.B., Yesu na batumiibwa abakatukile ku Yelusaleme. Kadi tababadi balukye kwabo ku Ngalileya musango umune nya. Abayile mu kibundji kya Yuudeya abo nkubatshisha bantu bebungi. Yowano Mubatshishi bapu kukita wawa mudimo takudi pangi kipwa, na bangi ba ku balongi baye bakii naye, pangi kwibanda dya Mwela wa Yoordano.

Yesu nabene tabadi abatshisha bantu nya—anka badi atumu balondji baye bwabadya kwibabatshisha. Kubanga nka mbangilo a mudimo wa Yesu, booso na Yowano abadi abalongyesha beena Yuuda abelanga ku mashimba, mwanda abatshibile kipwano kya Miiya y’Efile Mukulu.—Bikitshino 19:4.

Kadi balongi ba Yowano abakwatshile Yesu kyutu pa kulungula Yowano shi: “Yawa [Yesu] badi noobe . . . baabanga naamu kubatshisha, dingi bantu booso abende kwadi.” (Yowano 3:26) Kadi Yowano tabadi na kyutu nya. Badi na muloo bwa mudimo wa Yesu na kukimba shi balongi baaye basankye namu. Yowano badi mwibatentekyeshe shi: “Anwe banabeene nwi bashinguule binaadi mwambe shi: ‘Ami ntshi Kidishitu nya, anka ne yawa abaabadi batume kumpala kwaye.’” Badi mwibipatuule bwa’shi booso bapushe pa kwakula shi: “Sha-mukashi ngyawa mumwibakile. Kuuku a mwibakile namu, payimana peepi na kuteemesha, awuule na muloo pa kupusha eyi dya mulunda. Byabya ngi bi wande muloo upwidikye.”—Yowano 3:28, 29.

Nka bu kuukw’a mwibakile, Yowano badi musangale myeshi kumpala p’aye kufwisha balongi baaye kwi Yesu. Bangi ba kwabadi abaalondele Yesu abadi na kya kwedibwa mwimu wa kikudi kiselele mwenda mafuku. Yowano badi akimbi dingi bwa shi balongi abadi paapa balonde Yesu. Mudimo wa Yowano ubadi wa kulumbuula eshinda bwa mudimo wa Kidishitu. Yowano badi mupatuule shi: “Bibuwa aye eekale mukata, ami ngikale peela.”—Yowano 3:30.

Ungi Yowano badi alondo Yesu kumpala bafundjile kunyima pabitale nsulo na mudimo ukata wa Yesu bwa kipandjilo kya bantu shi: “Afiki mwiyilu e kunundu a byoso. . . . Yaaya mmufule Mwana, dingi mmutuule byoso mu maasa aaye. Akumiina Mwana ee na muwa wa ikalaika; apele kukumiina tapete muwa anka nsungu y’Efile Mukulu ayishala paadi.” (Yowano 3:31, 35, 36) Ubadi mukandu wa binyibinyi ubaukile bantu!

Mafuku apeela na Yowano Mubatshishi kwakula shi, mudimo na nkumo yaaye bibadi na kya kupeela, abadi bamwele mu lukano kwi Nfumu Eroode. Eroode baatshile mukashi a mukwabo Fidipe Erodyade amwibakila. Pabadi Yowano mwakule patooka bwa bundumba bwa Eroode, badi mumweleshe mu lukano. Pabapushile Yesu musango umune shi abakwata Yowano, bakatukile mu Yudeya na balongi baaye aye ‘nkwenda mu Ngalileya.’—Mateo 4:12; Maako 1:14.