1. Bible mmukanda wa nanyi?

Mukandu wibuwa washi bantu abakyebe kushaale na muwa pa nsenga bwa looso wi mu Bible. (Misambo 37:29) Mu Bible mwi mikanda ipeela 66. Efile Mukulu batumine bantu 40 basha kululama bwa kwiyifunda. Mikanda itano ya kumpala abaadi beyifunde kwi Moyiise takudi bipwa pepi 3 500. Mukanda wa nfudiilo abaadi beufunde kwi Yowano takudi bipwa bikile 1 900. Bantu abafundile Bible abaadi bafunde na binangu bya nanyi? Efile Mukulu baadi mwisambe na bafundji ba Bible ku bukwashi bwa kikudi kiselele. (2 Samwele 23:2) Abaadi bafunde na binangu by’Efile Mukulu, kushi byabo abo banabeene nya. Byabya, Bible mmukanda wa Yehowa.​—Badika 2 Timotee 3:16; 2 Mpyeele 1:20, 21.

2. Nkinyi akitushinkamisha shi Bible mmukanda w’Efile Mukulu?

Atuuku shi Bible mukanda w’Efile Mukulu mwanda ukwete kutemuka kalolo myanda ayikakitshika mu mafuku e kumpala. Takwi muntu su ngumune mukumbeene kwibikita nya. (Yooshwa 23:14) Anka penda Efile Mukulu Sha-bukome booso ndjo mukumbeene kumona myanda ayikakitshikila bantu mu mafuku e kumpala.​—Badika Yeeshaya 42:9; 46:10.

Twi bakumbeene kukulupila shi mukanda w’Efile Mukulu wikale wilekene na ingi mikanda, na wi nka byabya. Mbapwe kutuusha na kwabila midiyala na midiyala ya ma Bible mu ndimi nkama na nkama. Sunga wekala mukanda wa kala, Bible kwete kwakula myanda ipushene na yabadi bashinkamishe kwi beena sianse. Na dingi, banfundji ba Bible booso 40 ta mbakule bikutwene na bakwabo nya. * Byabya, byooso abyakula Bible pabitale kifulo mbikumbeene kwikala nka abitukila kwi Efile Mukulu a binyibinyi—Efile Mukulu sha kifulo na e na bukome bwa kushintuula nshalelo ya bantu bwashi bekale bibuwa. Ino myanda yooso ayitakuula binunu bya bantu mu kukumina shi Bible nyi Eyi dy’Efile Mukulu.​—Badika 1 Beena-Tesalonika 2:13.

 3. Myanda kinyi i mu Bible?

Bible akula ngofu pabitale mukandu wibuwa wa mpango ya kifulo i nayo Efile Mukulu bwa bantu. Bifundwe abipatuula mushindo ubaadi muntu a kumpala mushimishe kinemo kyaye kya kushala mu mpaladiiso pa nsenga na mushindo aukyebe Efile Mukulu kwalusha yawa mpaladiiso.​—Badika Bifumbulwe 21:4, 5.

Mwiyi dy’Efile Mukulu mwi miiya, mayi a kulonda, na malango. Na dingi mu Bible mwi myanda ayilesha mushindo ubaadi Efile Mukulu mutambukye na bantu​—myanda ayilesha bu muntu bw’Efile Mukulu. Byabya, Bible mukumbeene nkukwasha bwa kuuka Efile Mukulu. Alesha mushindo oodi mukumbeene kwikala kuuku aaye.​—Badika Misambo 19:7, 11; Jaake 2:23; 4:8.

4. Mushindo kinyi odi mukumbeene kupusha Bible?

Uno broshire akyebe nkukwasha bwa kupusha Bible su bokitshi bibaadi Yesu akitshi. Bwa “kupatuula Bifundwe,” baadi atalula maverse ebungi.​—Badika Luuka 24:27, 45.

Takwi bintu bibungi abitusangashaa bu mukandu wibuwa w’Efile Mukulu nya. Kadi, bangi bantu tabakumina mukandu wibuwa nya, na bangi naamu bakwete kwiushikwa. Tabikubofushanga nya. Su olonga bwa kuuka Efile Mukulu kalolo we kwikala na lukulupilo lwa kupeta muwa wa looso.​—Badika Yowano 17:3.

 

^ par. 3 Tala broshire a Un livre pour tous.