Enda bwa kuleshe myanda i mwanka

Enda bwa kuleshe kashibo ka myanda i mwanka

  11

Mushindo kinyi awitukwasha miiya ya mu Bible?

Mushindo kinyi awitukwasha miiya ya mu Bible?

1. Bwakinyi twi na lukalo lwa kukunkushibwa?

Mushindo kinyi ulombeene miiya ya mu Bible kwitukwasha bwatudya kwilama ku bintu bilombeene kwitufwishila masaku?—MISAMBO 36:9.

Mupangi etu e na binangu kwitukila. Bu byadi Yaaya sha kifulo, etatshisha ngofu bwetu. Na dingi, tabaadi mwitupangye bwashi twikale atwikunkusha atwe banabene nya. (Yeelemiya 10:23) Byabya nka bu bi mwana mukinga e na lukalo lwashi baledi baaye bamukunkushe, atwe namu atukyebe shi Efile Mukulu etukunkushe. (Yeeshaya 48:17, 18) Miiya ya mu Bible ayitukunkusha kalolo, nyi nkya buntu ky’Efile Mukulu.​—Badika 2 Timotee 3:16.

Miiya ya Yehowa ayitulesha nshalelo ebuwa na mushindo wa kupeta muwa wa looso mu mafuku aafiki. Bu byabidi shi Efile Mukulu nyi baadi mwitupangye, bibuwa tukumine bwashi etukunkushe. ​— Badika Misambo 19:7, 11; Bifumbulwe 4:11.

2. Mushindo kinyi awitukunkusha Eyi dy’Efile Mukulu?

Angi mayi a binyibinyi akata a mu Bible aetulesha akitutekye Efile Mukulu bwashi tukite mu myanda ibungi. Ingi miiya ngitale penda myanda kampanda. (Miiya Ikituulwe 22:8) Abitungu shi twele binangu kalolo bwa kuuka akitutekye Bible bwashi tukite pabitale mwanda watudi nawo. (Myeele 2:10-12) Bu kileshesho, Bible alongyesha shi muwa nyi kya buntu ky’Efile Mukulu. Uno mwanda awisamba Bible ngukumbeene kwitukunkusha patudi ku mudimo, ku nshibo na patudi mu lwendo. Awitutumu mu kukita mwetu mooso bwashi tatukitanga kintu kilombeene kutuula muwa wetu sunga wa bangi bantu mu masaku.​—Badika Bikitshino 17:28.

3. Miiya kinyi ibidi ikile bukata?

Yesu bakwile pabitale miiya ibidi ikile ingi yooso. Wa kumpala aulesha bwakinyi bantu be na muwa: bwa kuuka Efile Mukulu, kumufula, na kumufubila na kululama kooso. Abitungu kulama uno mwiya wa kumpala mu bitshibilo byetu byooso byatwata. (Myeele 3:6) Baaba abalama uno mwiya abekala na kipwano  kibuwa n’Efile Mukulu, na abakapete muwa wa looso, na muloo wa binyibinyi.​—Badika Mateo 22:36-38.

Mwiya wa kabidi ngukumbeene kwitukwasha bwa kwikala mu kipwano kibuwa na bangi. (1 Beena-Kodinto 13:4-7) Bwa kulama uno mwiya wa kabidi abitungu kwambula Efile Mukulu mu mushindo waye wa kukitshina bantu myanda.​—Badika Mateo 7:12; 22:39, 40.

4. Mushindo kinyi awitukwasha miiya ya mu Bible?

Miiya ya mu Bible ayikwasha bifuko bwa bidya kwikala na buumune mu kifulo. (Beena-Kolose 3:12-14) Na dingi, Eyi dy’Efile Mukulu adikalwila bifuko bibungi padilongyesha ungi mwiya ukata—awamba shi: abitungu dibaka dikale kipwano kya looso.​—Badika Kibangilo 2:24.

Kulonda kwa malongyesha a mu Bible nkukumbeene kulama mbidi yetu na binangu byetu. Tubande kwata kileshesho, misango ibungi bakata ba midimo abakuminaa shi, bantu babaata ku mudimo bekale abanemeka miiya ya mu Bible pabitale kwikala beena mudimo ba kishima na abepaana ku mudimo wabakitshi. (Myeele 10:4, 26; Beena-Ebreeyi 13:18) Eyi dy’Efile Mukulu aditulongyesha dingi shi abitungu tusangale nka penda na byatudi nabyo na shi twikale atwata kipwano kyetu n’Efile Mukulu na muulo kukila bintu bya ku mbidi.​—Badika Mateo 6:24, 25, 33; 1 Timotee 6:8-10.

Kulonda miiya ya mu Bible nkukumbeene kwitukalwila bwashi twikale na mbidi bukome na binangu bifukame. (Myeele 14:30; 22:24, 25) Bu kileshesho: Kulonda mwiya w’Efile Mukulu aupele kukolwa malofu akwitukalwila ku mikumbo na angi masaku. (Myeele 23:20) Yehowa akumina bwashi twikale atutomo malofu kadi kushi kukishakisha. (Misambo 104:15; 1 Beena-Kodinto 6:10) Miiya y’Efile Mukulu ayitukwasha mwanda ayitulongyesha myanda ayilama bikitshino byetu mpa na binangu byetu. (Misambo 119:97-100) Kadi, beena Kidishitu ba binyibinyi, tabanemekaa miiya y’Efile Mukulu penda bwa kukimba buuwa bwabo nya. Abakitaa byabya bwa kutumbisha Yehowa.​—Badika Mateo 5:14-16.