Enda bwa kuleshe myanda i mwanka

Enda bwa kuleshe kashibo ka myanda i mwanka

 DILONGYESHA 54

Yehowa baadi muleeshe Yoona lwishinko

Yehowa baadi muleeshe Yoona lwishinko

Bantu abaadi na mwikeelo wibubi mu Aasiriya mu kibundji kya Niniive. Yehowa nkulungula mutemuki aaye Yoona bwa nkebadimusha bwa kushintuula mwikeelo wabo. Kadi Yoona basukile ku lungi lupese. Aye nkwata mashuwa abaadi aende ku Tarsise, aye nkwenda nao.

Pabadi mashuwa mu meema, kubelele kipapi kikata, kibaadi kikwatshishe bantu moo. Abatekyele b’efile baabo na kwibeepusha shi: ‘Bwakinyi mwanda wi bino?’ Nfudiilo a byoso, Yoona bebalungwile shi: ‘Nnami e na mwanda. Nkwete kusuuka kwabekeele bantume kwi Yehowa. Ntentuleeyi nungyele mu meema bwa shi abatame.’ Bantu abaadi abatambusha mashuwa tababaadi abakumiina kusumbula Yoona, aye nkwibashishikila. Pababaadi bamwele mu meema, kipapi kibalekyele.

Yoona nkumona shi kwaye kubaapu. Pabaadi mwisankamikye abanga kwiyina mu meema, beelele luteko kwi Yehowa. Akupu Yehowa nkutuma mushipa ukata. Ao nkumina Yoona, kadi kushii kumwipaa. Munda mwa mushipa, Yoona beelele luteko shi: ‘Natshipii shi nekala’nka nakukookyela misango yooso.’ Yehowa baadi mulame Yoona na muwa munda mwa mushipa mafuku asatu, akupu aye nkutakula mushipa bwaudya kumulasa ku kyese.

Sunga byekala shi Yehowa baadi mupaashe Yoona, abileesha shi tabaadya kwenda dingi ku Niniive? Nya. Yehowa balungwile dingi  Yoona bwa kwenda kwanka. Wawa musango, Yoona baadi mukookyele. Aye nkwenda mu kulungula baaba bantu babi shi: ‘Ababutula Niniive mu mafuku 40.’ Ako nkukitshika mwanda wa kukaanya, beena Niniive nkupusha mukandu waye, abo nkushituula mwikeelo wabo. Akupu nfumu a beena Niniive nkulungula mwilo waye shi: ‘Muntu ooso eelangye kwi Efile Mukulu. Pangi t’etubutula nya.’ Pabamwene Yehowa shi beena Niniive babelangile kwishimba, tabaadi mwibabutule nya.

Yoona baadi mufiite munda mwanda tababaadi bebatule. Banda kwela binangu: Yehowa bakatukile mu kuleesha Yoona lwishinko, kadi Yoona tabaadi mufwile beena Niniive lusa nya. Pa mwanda wa byabya, bayile akashaala paasha pa lupata muushi mwa mulundo wa ngenete. Akupu keenyi ka mulundo kabaumine, Yoona nkunyiisha kufiita munda. Yehowa nkumulungula shi: ‘Wenyongola bwa uno mulundo kukila bwa beena Niniive. Nebafwila lusa bwa shi bapande.’ Nkinyi kibaadi na muulo? Beena Niniive abaadi na muulo kukila mitshi yooso.

“Yehowa . . . e na lwishinko pa mwanda wenu, mwanda takyebe muntu sunga umune kulwididîla ooo. Akyebe shi bantu boso belangye ku milwisho yabo.”—2 Mpyeele 3:9, EEM