Yeezabele bapushiishe bibaadi bikitshikile batemuki ba Baale, aye nkufiita munda bikata. Aye nkutuma mukandu kwi Eliya shi: ‘Malooba, abakwipaa namu nka bu batemuki ba Baale.’ Eliya nkupusha moo, aye nkusuuka mu kabaaka. Aye nkuteka shi: ‘Yehowa ntshi na kwandja kwenda dingi nya. Ntadiile nfwe.’ Na kukooka kooso, Eliya balaadile tulo muushi mwa mutshi.

Mwikeyilu bamubushishe, amulungula na kalolo kooso shi: ‘Buuka odye.’ Eliya bamwene mukate ushiikwe pa mabwe apye kaalo na kalondo ka meema. Aye nkudya na kutoma, akupu nkwalukila dingi mu tulo. Mwikeyilu nkumubuusha dingi amulungula shi: ‘Edya. Abitungu opete bukome bwa lwendo.’ Eliya nkudya dingi. Akupu aye nkutambuka munda mwa mafuku 40 bufuku na kaanya, mpa na bibakafikile ku mwengye wa Horebe. Kwakwa, Eliya baladile mu lubwebwe. Kadi Yehowa baadi mwisambe naye. Amwipusha shi: ‘Okwete kukita kinyi paapa Eliya?’ Eliya nkumwaluula shi: ‘Beena Isaleele abakutwa kulombasha mulayilo wabo. Abalwisha kilambwilo na kwipaa batemuki boobe. Binobino tabakimbi na kungipaa dingi.’

Yehowa nkumulungula shi: ‘Enda okemane ku mwengye.’ Kya kumpala, kubeelele kipapi kikata kibakyebele kutanya mbwebwe. Akupu kubaadi kutshinka kwa nsenga na kaalo. Ku nfudiilo, Eliya bapushiishe kapapi kapeela, n’eyi ditaale. Aye nkubwikila mpala yaaye na kikotshi, aye nkwimana paasha pa lubwebwe. Yehowa nkumwipusha bwakinyi baadi asuuku. Eliya nkwakula shi: ‘Nashala nka bupenka.’ Kadi Yehowa nkumulungula shi: ‘Twe bupenka nya. Kukii bantu 7 000 mu Isaleele bakya bandangwila. Enda osangule Elisha bu mutemuki pa mbalo yoobe.’ Eliya nkwenda musango umune mu kukita bibamulungwile Yehowa. Omono shi Yehowa e nkukwasha namu p’okimbi kukita byakumiina su? Oolo, e nkukwasha. Tubande kutala pabitale mwanda ubaadi ukitshikye mu munanga.

“Tanwikalanga mashimba kwiyilu pa kintu su nkimune, anka, nguba ooso, mu kwiyaaya na mu ntumbu, uukishaayi Efile Mukulu nkalo yenu.”—Beena-Fidipe 4:6