Enda bwa kuleshe myanda i mwanka

Enda bwa kuleshe kashibo ka myanda i mwanka

 DILONGYESHA 48

Mwana a mukashi kilele basanguka

Mwana a mukashi kilele basanguka

Mu mafuku a munanga, Yehowa balungwile Eliya shi: ‘Ebwe wende ku Sarepta. Mukashi kilele akakupa bidiibwa kwakwa.’ Ku kitwelelo kya kibundji, Eliya bamwene mukashi kilele mulanda asangula nteete. Aye nkumuteka ekopo dya meema. Pabaadi ende mu kumutwadila, Eliya nkumulungula dingi shi: ‘Ntwadile namu kipese kya mukate.’ Yawa mukashi bamulungwile shi: ‘Ntshi na kintu su nkimune kilumbuule nya. Ne’nka penda na tu bukula tupeela na ndambo a mwimu bwandja kuteekyela mwana’nde n’ami nabeene.’ Eliya nkumulungula shi: ‘Yehowa amba shi: elondo dya bukula t’adipu, kyaasa kya mwimu t’akikama mpaa na kwifuku adikanoko mpeshi.’

Mukashi kilele bayile, aye nkukitshiina mutemuki a Yehowa mukate. Anka bu bibaadi Yehowa mulee, mukashi kilele na mwan’aye abaadi’nka na bidiibwa mu mafuku ooso a munanga. Elondo dyaye na kyaasa kya mwimu bibaadi’nka biwule.

Kubaadi kukitshikye mwanda wa kukaanya kunyima. Ka nsongwalume ka mukashi kilele kabakumbile ako nkufwa. Yawa  mwana mukashi nkwiyayila Eliya bwa shi abuushe mwana aye. Eliya bamwatshile mu maboko, enda naaye ku kadimbo ka kwiyilu. Bamuladiishe pa lusala aye nkuteka shi: ‘Yehowa, muuwa wa uno mwana walukye namu munda mwaye.’ Ouku bwakinyi bibaadya kwikala mwanda wa kukaanya bwa Yehowa kumusangusha? Mwanda takubaadi muntu mubande kusanguka kubanga kala nya. Akupu uno mukashi kilele na ka nsongwalume kaaye tababaadi sunga beena Isaleele nya.

Ka nsongwalume nkwalukiila na muwa! Eliya nkulungula mukashi kilele shi: ‘Tala! Mwan’obe balukiila na muwa.’ Baadi na muloo ukata, aye nkulungula Eliya shi: ‘Mbinyibinyi, we mutemuki a Efile Mukulu. Mwanda wakula’nka abikulungula Yehowa.’

‘Beekyeelayi byonyi bya manganga; taabikunaa sunga kuumbula, tabii na nshibo sunga kisasa kya kulamina; ank’Efile Mukulu eebidiishaa. Anwe, tanwi na kineemo kukila kya toonyi su?’—Luka 12:24