Enda bwa kuleshe myanda i mwanka

Enda bwa kuleshe kashibo ka myanda i mwanka

 DILONGYESHA 43

Mulwisho wa Nfumu Daavide

Mulwisho wa Nfumu Daavide

Pabafwiile Saule, Daavide bekeele bu nfumu. Baadi na bipwa 30. Bipwa bipeela kunyima kwaye kwikala bu nfumu, bamwene ungi mwana mukashi e buwa bufuku pabaadi ku kisasa kya nshibo. Daavide nkushinguula shi baadi Betesheba, mukashi abaabadi bebakile kwi ungi musalayi abetamina bu Uriya. Daavide nkwitamisha Betesheba kwaye. Abo nkutambuka lusandji aye nkupeta eyimi. Davide kupima kufwamisha bibaadi mukite. Aye nkulungula mukata a basalayi bwadya kutuula Uriya ku mulongo wa kumpala wa ngoshi na kumutadiila. Abayipayile Uriya ku ngoshi, Daavide nkwibakila Betesheba.

Anka Yehowa bamwene bubi booso bubaadi bukidikye. Baadya kukita kinyi? Yehowa batumine mutemuki Natane kwi Daavide. Natane nkumulungula shi: ‘Kwi mpeta baadi na mikooko ibungi, mulanda baadi penda na ka mukooko kaana kakashi kabaadi mufule bikata. Yawa mpeta baatshile mulanda ka mukooko kaaye.’ Daavide baafiitshile munda aye nkumulungula shi: ‘Yawa muntu mmukumbeene lufu!’ Nyi Natane nkulungula Daavide shi: ‘Yawa muntu nnobe!’ Daavide nkwinyongola bikata kwishimba aye nkulungula Natane shi: ‘Nakitshiina Yehowa mulwisho.’ Uno mulwisho ubaadi utushiishe Daavide nkalakashi ibungi na kifuko kyaye. Yehowa nkunyooka Daavide, kadi amuleka na muwa mwanda baadi mululame na mwiyishe.

Daavide bakimbile kwibakila Yehowa ntempelo, kadi Yehowa nkusangula Salomone mwana a Daavide bwa kwibaka ntempelo.  Daavide babangile kulumbulwila Salomone bintu p’aye kwakula shi: ‘Abitungu ntempelo a Yehowa eekale ebuwa. Kadi Salomone kii mukinga, anka namukwasha bwa kumulumbulwila bintu.’ Daavide baadi mutuushe nfwalanga yaaye ibungi bwa midimo ya lwibako. Aye nkukimba bafubi ba midimo ya bu nsendwe. Abunga oolo na kyamo kyebakanyi na mitshi ibuwa ya mu Tyre na ya mu Sidone. Kumpala kwa kufwa, Daavide baadi mupe Salomone kifwatulo akilesha bipidi bya kipaso kya kwibaka ntempelo. Aye nkwakula shi: ‘Yehowa banfudjila bino bwobe. Yehowa akyebe nkukwasha. Topushanga moo nya. Ikala munyingye wepaane mu mudimo.’

“Muntu adidi kufwamisha bito byaye t’obesha nya, anka ebisokola bwa kwibileka abamufwila lusa.”—Nkindji 28:13