Enda bwa kuleshe myanda i mwanka

Enda bwa kuleshe kashibo ka myanda i mwanka

 DILONGYESHA 14

Mpika baadi mukookyele Efile Mukulu

Mpika baadi mukookyele Efile Mukulu

Yoosefe baadi kamukala ka ku bana ba Yakobo. Ba tuutu baaye babamwene shi nshabo baadi mufule Yoosefe bikata. Omono shi abaadi abapusha naminyi? Abaadi bakwatshile Yoosefe kyutu, abo nkumushikwa. Pabaadi Yoosefe muloote bilootwa, baadi mulungule bakwabo. Abelele binangu ku bibaadi abipatula bilootwa shi dingi’efuku abakamukunamina. Abo nkunyiisha dingi kumushikwa!

Dingi efuku ba tuutu ba Yoosefe abayile mu kudiisha mikooko peepi n’eumbo dya Shekeme. Yakobo batumine Yoosefe bwa nkebatala. Pabaabadi bamone Yoosefe ku bula, abo nkwilungushena shi: ‘Muntu sha bilootwa ngyawa afiki. Tumwipeeyi!’ Abo nkumukwata, nkumutakula mu kitonko kishii na meema. Kadi Yuuda, umune a ku ba tuutu baaye bambile shi: ‘Tanumwipanga nya! Tumupaneeyi mu bupika.’ Abo nkupaana Yoosefe ku nfwalanga 20 kwi bansunga ba beena Madyane abaadi abende ku Ejiipitu.

Akupu, ba tuutu baaye abaatshile nkandjo aaye bamufundakasha mu mase a mbushi, abo nkumutwadila nshabo na kwakula shi: ‘Tundula su nkandjo a mwan’oobe?’ Yakobo nkupwandjikisha shi nyema a mu kisuku bayipayile Yoosefe. Aye nkwinyongola kwishimba bikata. Takubaadi bya shi muntu a musamba nya.

Abaadi baudishe Yoosefe mu Ejiipitu bu mpika kwa muntu mukata abetanyina bu Potifare. Anka Yehowa baadi na Yoosefe. Potifare nkumona shi Yoosefe baadi mufubi ebuwa aadi mulombeene kukulupila. Munda mwa mafuku apeela, Potifare batudile Yoosefe kunundu kwa bintu byaye byooso.

Mukashi a Potifare nkumona shi Yoosefe baadi buwa bwa mpala na e bukome. Baadi atekye Yoosefe efuku dyooso bwa kulaala naye bulunda. Yoosefe baadya kukita kinyi? Baadi mupele na kwakula shi:  ‘Nya! Bibubi. Nfumw’ami munkulupile, dingi obe we mukashi aaye. Su nalaala noobe bulunda, nakitshi mulwisho ukata kwi Efile Mukulu!’

Dingi efuku mukashi a Potifare nkutompa kutwata Yoosefe pabukopo bwa shi alaale naye bulunda. Aye nkumukwata ku kilamba, anka Yoosefe basuukile. Nsaa ibalukiile Potifare, bamulungwile shi Yoosefe nyi bamukwatshile. Tabamulungwile bya binyibinyi nya. Potifare baadi mufiite munda bikile, aye nkwela Yoosefe mu lukano. Kadi Yehowa tabaadi mwilwankane Yoosefe nya.

“Ikalayi beeyishiishe muushi mw’eyaasa dii bukome dy’Efile Mukulu, bwa shi eenukamishe pa nguba mutshibiibwe.”—1 Mpyeele 5:6