Enda bwa kuleshe myanda i mwanka

Enda bwa kuleshe kashibo ka myanda i mwanka

 DILONGYESHA 97

Korneye bapete kikudi kiselele

Korneye bapete kikudi kiselele

Kubaadi ungi mukata a basalayi ba beena Looma abetamina bu Korneye baadi mu kibundji kya Kezaree. Sunga byekala shi tabaadi mwina Yuuda, beena Yuuda abaadi abamunemeka. Baadi na kalolo ka kukwasha balanda na be mu lukalo. Korneye baadi mukumiine mwi Yehowa na kumuteka kushii kukooka. Dingi efuku, mwikeyilu baadi mumumwenekyele amulungula shi: ‘Efile Mukulu bapusha nteko yoobe. Binobino, tuma bantu ku kibundji kya Yopee kwi Mpyeele bwa shi bamulungule afikye koodi.’ Korneye batumine bantu basatu musango umune ku Yopee mu bilometre bifikye ku 50 dya kuushi.

Mu yaaya nsaa ku Yopee, Mpyeele bapetele kimonwa. Bamwene nyema y’abadi bakandjikye beena Yuuda bwa kudya, na bapushiishe eyi adimulungula bwadya kwiyidya. Mpyeele bapelele, aakula shi: ‘Kasha Ntandjiile nyema ibutete nya mu nshalelo ande.’ Eyi dibamulungwile shi: ‘Leka kwitanyina yaya nyema bu ibutete. Efile Mukulu mmupwe kwibitoosha.’ Abalungwile dingi Mpyeele shi: ‘Mbaaba bantu basatu be ku kibelo kyobe. Enda nabo.’ Mpyeele nkutuka ku kibelo bwa kwipusha bwakinyi baaba bantu abadi paapa. Abo nkumwaluula shi: ‘Abetutumu kwi Korneye mukata a basalayi ba beena Looma. Abitungu wende ku nshibo yaaye ku Kezaree.’  Mpyeele nkuteka baaba bantu bwabadya kushala kwaye bufuku bushima bu beenyi baaye. Efuku dibalondele, bayile nabo ku Kezaree pamune na bangi bakwabo ba mu Yopee.

Pabaadi Korneye mumone Mpyeele, baadi mupone ku ngwa yaaye. Anka Mpyeele bamulungwile shi: ‘Ebwee! Ami namu ne muntu nka byodi. Efile Mukulu bantumu mu nshibo yoobe, sunga byekala shi beena Yuuda t’abendaa kwa bantu ba Bingi bisamba. Binobino nakyebe kuuka bwakinyi bongitamina.’

Korneye balungwile Mpyeele shi: ‘Natekanga Efile Mukulu takudi mafuku ananka, mwikeyilu nkundungula shi abikyebe nkwitamine. Etulongyeshe namu mayi a Yehowa.’ Mpyeele nkwakula shi: ‘Nashinkamisha binyibinyi shi Efile Mukulu te na ntondo. Apokyeela muntu ooso akumiina kumulangwila.’ Mpyeele nkwibalongyesha bintu bibungi pabitale Yesu. Akupu, kikudi kiselele kibayikile kwi Korneye na booso babaadi naye, abo nkubatshishiibwa.

“Mu kisamba kyoso, muntu ooso amutshinyi [Efile Mukulu,] na akitshi myanda ya bululame apokyelwa kwadi.”—Bikitshino 10:35