Mafuku ekumi kunyima kwa Yesu kwalukiila mwiyilu, balondji baaye abapetele kikudi kiselele. Mubaadi mu Pantekote mu kipwa kya 33 B.B., na bantu abakatukile mu ma mbalo ebungi bwa kwenda ku musangeelo mu Yeelusaleme. Balondji ba Yesu bafikye ku 120 abaadi bebungye mu kadimbo ka nshibo ya kwiyilu. Kubaadi kukitshikye kintu kya kukaanya musango umune. Ku mutwe kwa mulondji ooso kubayikile kintu bu ludimi lwa kaalo, abo nkubanga kwakukula mu ndjimi ilekenelekene. Kituumo ki bukopo bu kya kipapi kibaudile mu nshibo.

Beenyi ba mu angi maumbo abafikile mu Yeelusaleme abaapushishe kituumo, abo nkwenda lubilo ku nshibo mu kutala kibaadi akikitshika. Abaadi bakaanye bikata p’abo kupusha balondji abakula yaya ndjimi yooso. Abo nkwamba shi: ‘Bano bantu booso mba ku Ngalileeya. Nkipaso kinyi kyabakula mu ndjimi yeetu?’

Akupu Mpyeele, na bangi batumiibwa abayimeene kumpala kwa kibumbu. Mpyeele nkwibalungula bibaadi Yesu mwipayibwe  na bibadi Yehowa mumusangushe ku lufu. Mpyeele nkwakula shi: ‘Yesu e mwiyilu binobino mushale ku mboko ibalume y’Efile Mukulu, na bapongoola kikudi kiselele kibaadi mulee. Nyi bwakinyi nubamono na kupusha bino bipaso.’

Mayi a Mpyeele abaadi ebakume ku mashimba, abo nkwipusha shi: “Kilombeene twa kita nkinyi?” Mpyeele bebalulwile shi: ‘Elangyeyi ku milwisho yenu nubatshishibwe mwishina dya Yesu. Anukapete kya buntu kya kikudi kiselele.’ Mu dyadya efuku, bantu bafikye ku 3000 nkubatshishiibwa. Kubanga nka paapa, balondji ababangile kufwima bukidibukidi mu Yeelusaleme. Ku bukwashi bwa kikudi kiselele, batumiibwa abakitshine tungi tukongye bwa kulongyesha balondji bintu byoso bibaadi Yesu mwibalongyeshe.

‘Su mukanwa moobe osokola shi Yesu nyi mMwanana, na su mwishimba dyoobe okumiina shi Efile Mukulu mmumusangushe ku lufu, okapanda.’—Beena-Looma 10:9