Enda bwa kuleshe myanda i mwanka

Enda bwa kuleshe kashibo ka myanda i mwanka

 DILONGYESHA 83

Yesu adiisha binunu bya bantu

Yesu adiisha binunu bya bantu

Kumpala kwa Kidiibwa kya lukilo mu kipwa kya 32 B.B., batumiibwa abaadi balukiile mu bulungudi. Abaadi bakookye, Yesu nkwibatwala ku Betsaida mu bwato bwabadya nkekisha. Kadi pabafikile bwato peepi na kyese, Yesu bamweene binunu bya bantu abebalondo. Sungwa byekala shi Yesu baadi akimbi kwikala pa bupenka na batumiibwa baaye, baadi mukuukile baaba bantu booso na kalolo. Baadi mupaashe mikumbo yabo, aye nkubanga kwibalongyesha. Yesu baadi mwibalongyeshe efuku dishima pabitale Bufumu bw’Efile Mukulu. Nguba pabafikile ku kyolwa, batumiibwa baaye abafikile kwadi bamulungula shi: ‘Abimweneka shi bantu abapusha nsala. Ebalushe bakakimbe kwabadya kwiudila bya kudya.’

Yesu bebalungwile shi: ‘Tabibuwa benda nya. Ebapeeyi anwe banabeene bya kudya pano.’ Batumiibwa nkumwipusha shi: ‘Okumina shi atwe twende tukebaudile bya kudya?’ Fidipe, umune a ku batumiibwa bakwile shi: ‘Su byekala shi atwikalanga na nfwalanga ibungi, ta tubaadya kuudila kino kibumbu bya kudya bilombane.’

Yesu baadi mwipushe shi: ‘Nwi na bidiibwa kinyi paapa?’ Andree bambile shi: ‘Pano twi’nka na mikate itaano na tumishipa tubidi. Tambikumbane su nkapeela.’ Yesu nkwamba shi: ‘Ntwadileyi yaya mikate na mishipa.’ Aye nkulungula bantu bwabadya kushaala mu lubishi mu bisaka bya bantu 50 na 100. Yesu nkwata mikate na mishipa, nkubuusha meeso mwiyilu aye nkwela luteko. Akupu, aye nkutambika batumiibwa abo nkwabila bantu booso. Bantu 5 000 kukatusha bakashi na bana abadiile abo nkwikuta. Kunyima kwa byabya, batumiibwa  abakongyele bibasheele bwa kupela kwibilwisha. Abakongyele biseele 12 biule! Kibaadi kilengyeleshi kya kukaanya, nta nabyo su?

Bantu abaadi bakaanye bikata abo nkukimba kutuula Yesu bu nfumu aabo. Anka Yesu baadi auku shi yaaya tayibaadi nsaa ikumiine Yehowa bwa shi ayikale nfumu nya. Baadi mutume kibumbu kungi, aye nkulungula batumiibwa bwa kwenda ku dingi eshiya dya Kalunga ka Ngalileeya. Abatwelele mu bwato abo nkwenda, Yesu naamu nkukamina ku mwengye aye nabeene. Bwakinyi? Mwanda baadi akimbi nsaa ya kwela nteko kwi Nshaye. Sunga byekala shi Yesu baadi na myanda ibungi, tabaadi akutwa nsaa ya kwela nteko nya.

“Tanufubanga’nka penda pa mwanda wa kwikala na bidibwa abilwilâ, ooo. Bi buwa nufube pa mwanda wa kwikala na bidibwa bishabilwilâ, dingi, abipânâ muwa wa ikalaika. Nyi byabya bidiibwa by’abakenupa kwi Mwana a Muntu.”—Yowano 6:27, EEM