Enda bwa kuleshe myanda i mwanka

Enda bwa kuleshe kashibo ka myanda i mwanka

 DILONGYESHA 62

Bufumu bwi bu mutshi ukata

Bufumu bwi bu mutshi ukata

Dingi efuku bufuku, Nabukodonosore baalootele kilootwa kibamukwatshiishe moo. Baadi mwitanyine bantu ba-sha binangu bwabadya kumupatulwila. Anka, takubaadi su ngumune a kwabadi a kumupatulwila nya. Ku nfudiilo a byoso, nfumu baadi mulungule Ndanyele.

Nabukodonosore nkulungula Ndanyele shi: ‘Mu kilootwa kyande, namono mutshi. Ubakudile ao nkukakuma mwiyilu. Ubaadi bya kumweneka mbalo yooso mu nsenga. Ubaadi na masaki na bikuba bibuwa. Nyema ibaadi ayishaala mu mutaala wao, na toonyi twa mwiyilu tubaadi atwibaka maswa mu ntabi yao. Akupu, mwikeyilu nkufika mwiyilu. Aye nkwakula shi: “Shindaayi mutshi, tshibaayi ntabi yao. Anka kishishi na mishi yaawo, ekilekyeyi mu nsenga, na lwanyo lwa kyaamo na lwa munyinga usangwe lwikiifunyishe. Eshimba dya wawa mutshi adikashintuluka kubanga ku dya muntu na ku dya nyema, bipungo musambobidi abikidi pa mbidi paawo. Bantu booso abakatundula shi Efile Mukulu nyi Nfumu a bulopwe bwa bantu, eebupeyaa aakyebe.”’

Yehowa nkuleesha Ndanyele bibaadi abipatuula kilootwa. Pabaadi Ndanyele mupushe kilootwa, bapushishe moo. Aye nkwakula shi: ‘Nfumwami, namonanga shi kino kilootwa nkya beshikwanyi noobe, kadi nkikutale. Mutshi ukata ubaadi ushindiibwe, nnobe. Okashimisha bufumu boobe, ookadi lubishi mu kisuku nka bu nyema a kisuku. Bu byakule mwikeyilu bwa kuleka kishishi na mishi yaakyo, ookalukiila dingi bu nfumu.’

Kunyima kwa kipwa, Nabukodonosore baadi atambuka ku kitenta kya nshibo yaaye, na kukaanyisha kibundji kya Babilone, na kwakula shi: ‘Tala luno lupata lwandji mwibakye byaludi buuwa. Ne mwilwibakye ku ntumbo ya bukata bwande!’ Pabaadi kyakula, eyi dibatuukile mwiyilu dyamulungula shi: ‘Nabukodonosore! Boshimisha bufumu boobe.’

Kubanga’nka yaaya nsaa, Nabukodonosore baadi mushimishe binangu byaye afika nka bu nyema a mu kisuku. Abamubingile mwibalasa dyaaye, aye nkwenda mu kushaala na nyema mu kisuku. Nyene ya Nabukodonosore ibakudile ayo nkufika’nka bu mapushi a  koonyi ka moombo na ngala yaaye bu ya koonyi.

Kunyima kwa bipwa musambo, binangu bya Nabukodonosore bibaadi bimwalukiile dingi, Yehowa nkumwalushuula bu nfumu a Babilone. Akupu Nabukodonosore bambile shi: ‘Natumbula Yehowa, Nfumu Sha-kwiyilu kula. Binobino nashinguula shi Yehowa nyi Mukunkushi. Ayishaa ba-sha kwitatula, na mmulombeene kupa bufumu muntu ooso aakumiina kwibupa.’

“Kwilungula akufisha muntu ku kabutu, kwitatula akuponeshaa muntu.”—Nkindji 16:18